Dipotšišo tše Tšwago go Babadi

Na ke mo go nepagetšego go bolela gore kgaugelo ya Jehofa e tswakilwe ka toka ya gagwe?

Gaešita le ge polelwana ye e be e dutše e dirišwa, go kaone go e phema ka ge e bonagala e bolela gore kgaugelo ya Jehofa e letefatša goba e thibela toka ya gagwe, bjalo ka ge eka kgaugelo ya gagwe e phagametše seka se se se šoro sa toka. Se ga se sa nepagala.

Lentšu la Sehebere bakeng sa “toka” gape le ka bolela “kahlolo.” Toka e tswalana kgaufsi le toko. Lega go le bjalo, toka gantši e tswalana le ditaba tša molao. Gantši toko ga e na yona. Ke therešo gore toka ya Jehofa e ka akaretša go lekanyetšwa ga kotlo e swanetšego, eupša gape e ka akaretša go nea phološo go bao e ba swanetšego. (Genesi 18:​20-32; Jesaya 56:1; Maleaki 4:2) Lega go le bjalo, toka ya Jehofa ga se ya swanela go lebelelwa e le e šoro goba e le e swanetšego go letefatšwa.

Lentšu la Sehebere bakeng sa “kgaugelo” le ka šupa go go diriša thibelo ge go newa kahlolo. Gape le ka šupa go polelo e matla ya kwelobohloko, e tlišago kimologo go bahlaki.—Doiteronomio 10:​18; Luka 10:​29-37.

Jehofa ke Modimo wa bobedi toka le kgaugelo. (Ekisodo 34:​6, 7; Doiteronomio 32:4; Psalme 145:9) Toka le kgaugelo tša gagwe bobedi bja tšona di phethagetše, gomme di šoma gotee ka go dumelelana. (Psalme 116:5; Hosea 2:​19) Dika tše ka bobedi di leka-lekana ka mo go phethagetšego goba go tlatšana. Lega go le bjalo, ge e ba re be re ka re kgaugelo ya Jehofa e tswakile toka ya gagwe, re tla swanelwa gape ke gore re re toka ya gagwe e tswakile kgaugelo ya gagwe.

Jesaya o porofetile gore: “Ké ka ’baka leo xe Morêna a sa fêle pelo, xore a bê a Le setše; ké ka ’baka leo xe a êma, xore a Le xauxêlê. Xobane Morêna ké Modimo wa [kgaugelo, The New English Bible].” (Jesaya 30:​18) Jesaya mo o bontšha gore toka ya Jehofa e tutuetša ditiro tša kgaugelo go e na le gore kgaugelo ya gagwe e letefatša goba go thibela toka ya gagwe. Jehofa o bontšha kgaugelo ka gobane a e na le toka le ka gobane a e-na le lerato.

Ke therešo gore mongwadi wa Beibele Jakobo o ngwadile gore: “Kxauxêlô ké yôna e fenyaxo thsekong.” (Jakobo 2:​13b) Lega go le bjalo, tabeng e dikologilego Jakobo ga a bolele ka Jehofa eupša o bolela ka Bakriste bao ba bontšhago kgaugeloka mohlala, go batlaišegi le badiidi. (Jakobo 1:​27; 2:​1-9) Ge batho ba bjalo ba nago le kgaugelo ba ahlolelwa, Jehofa o naganela boitshwaro bja bona gomme o ba lebalela ka kgaugelo motheong wa sehlabelo sa Morwa wa gagwe. Ka gona, boitshwaro bja bona bja kgaugelo bo fenya kahlolo le ge e le efe e sa lokago yeo e ka bago e ba swanetše.—Diema 14:​21; Mateo 5:7; 6:​12; 7:2.

Ka gona, ga se mo go nepagetšego go bolela gore kahlolo ya Jehofa e tswakilwe ka kgaugelo ya gagwe ka kgopolo ya gore toka ya gagwe e swanetše go letefatšwa ke kgaugelo. Go Jehofa dika tše ka bobedi di leka-lekane ka mo go phethagetšego. Di a iteka-tekanya go fo swana le ge di leka-lekanyagomme di leka-lekanywa kedika tše dingwe tša Jehofa tše bjalo ka lerato le bohlale.