‘Lerato la Rena le Godišitšwe’

KA Labohlano, March 31, 2000, Thaba ya Usu kua Hokkaido, Japane, e ile ya thuthupa ka morago ga go dula e sa thuthupe ka nywaga e 23. Badudi ba dikete ba ile ba gapeletšega go tšhaba lefelong le kotsi. Ba bantši ba ile ba lahlegelwa ke magae a bona le mešomo, eupša ka mahlatse ga go le o tee wa bona yo a ilego a hlokofala. Gare ga batho bao ba ilego ba swanela ke go tšhaba go be go e-⁠na le Dihlatse tša Jehofa tše 46, eupša ga se ba ka ba tlogelwa ka ntle le thušo.

Letšatšing lona leo la mothuthupo, ka thušo ya modiredi wa Mokriste wa mosepedi yo a hlankelago tikologong yeo, go ile gwa dirwa dithulaganyo bakeng sa mediro ya tlhakodišo. Kapejana, ditlabakelo tša tlhakodišo di ile tša fihla go tšwa diphuthegong tša kgaufsi. Ka tlase ga tlhokomelo ya lekala la Japane, komiti ya tša tlhakodišo e ile ya hlongwa gatee-tee, gomme meneelo e mentši bakeng sa tlhakodišo e ile ya tšwa go Dihlatse tša Jehofa go dikologa Japane. Bahlanka ba nako e tletšego ba Dihlatse tša Jehofa ba ile ba romelwa diphuthegong tšeo di bego di kgomilwe kudu bakeng sa go thekga mediro ya moya, gomme molebeledi wa tikologo o ile a etela lefelo leboelela bakeng sa go fana ka thekgo maikwelong le moyeng.

Dihlatse mafelong ao a bego a kgomilwe ke se di ile tša tšwela pele di swara diboka tša tšona tša Bokriste nakong yeo e thata di diriša magae a batho lefelong le le bolokegilego. Ge go be go ntšhwa taelo ya gore go boelwe lefelong leo Holo ya Mmušo e bego e le go lona, bana babo rena ba ile ba boela gomme ba hwetša moago o sekamego, o palegilego le o senyegilego. Kgaufsi le Holo ya Mmušo, molomo wa thabamollo yeo e bego e sa tšwa go thuthupa o be o sa dutše o thuntšha muši o mokoto. Dihlatse di ile tša ipotšiša, ‘Na ke ga bohlale go tšwela pele re swarela diboka lefelong le? Na Holo ya Mmušo e ka lokišwa?’

Go ile gwa dirwa phetho ya gore go agwe Holo ya Mmušo e mpsha lefelong la kgaufsi leo le bolokegilego. Komiti ya tša Meago ya Tikologo e ile ya nea thušo e bego e nyakega. Tšhelete yeo e ilego ya neelwa ke Dihlatse go dikologa naga ka moka e ile ya dirišwa bakeng sa go aga mo. Kapejana go ile gwa hwetšwa naga, gomme re leboga thušo ya baithapi ba makgolo, Holo ya Mmušo e mpsha e ile ya fetšwa ka nako e kopana. Ka Sontaga, July 23, 2000, seboka sa pele se se bego se swaretšwe ka Holong ye ya Mmušo e sa tšwago go agwa se ile sa ba le batho ba 75. Ba bantši ba bao ba bego ba le gona ba ile ba tšholla megokgo ya lethabo. Ge Holo ya Mmušo e be e neelwa ka October ya wona ngwaga woo, yo mongwe wa bagolo ba phuthego ya moo o ile a tutueletšega go bolela gore: “Mothuthupo o bakile mathata le tlaišego. Lega go le bjalo, go aga mo go fetošitše letšhogo la rena go ba lethabo. Lerato la rena la go rata Jehofa le bana babo rena ba rategago ba Bakriste le godišitšwe!”

[Mothopo wa Seswantšho go letlakala 19]

Eruption of Mount Usu: AP Photo/Koji Sasahara