Therešo e Bohlokwa Gakaaka’ng go Wena?
Therešo e Bohlokwa Gakaaka’ng go Wena?
“La tlo tseba therešô, ’me therešô ya tlo Le lokolla.”—JOHANE 8:32.
1. Ke bjang tirišo ya Pilato ya lentšu “therešô” e fapanego ka mo go lego molaleng le go dirišwa ga lona ke Jesu?
“THEREŠÔ ké eng?” Ge Pilato a be a botšiša potšišo ye, kgahlego ya gagwe, ka mokgwa wo e bego e le ka gona e bonagetše e be e bolela ka therešo ka kakaretšo. Ka lehlakoreng le lengwe, Jesu o be a sa tšwa gore: “Ké se ke se tswáletšwexo; ke tletše sôna lefaseng xore ke bê hlatse ya therešô.” (Johane 18:37, 38) Ka go fapana le Pilato, Jesu o be a bolela ka therešo ya Modimo yeo e lego bohlokwa. O be a bolela ka therešo e tšwago go Modimo.
Boemo bja Kgopolo bja Lefase ka Therešo
2. Ke polelo efe ya Jesu yeo e bontšhago bohlokwa bja therešo?
2 Paulo o itše: “Tumêlô xa se ya bohle.” (2 Ba-Thesalonika 3:2) Go ka bolelwa ka mo go swanago ka therešo. Gaešita le ge ba newa sebaka sa go tseba therešo e theilwego ka Beibeleng, batho ba bantši ba e hlokomologa ka boomo. Lega go le bjalo, ke ya bohlokwa gakaakang! Jesu o itše: “La tlo tseba therešô, ’me therešô ya tlo Le lokolla.”—Johane 8:32.
3. Ke temošo efe mabapi le dithuto tšeo di arošago yeo re swanetšego go e ela hloko?
3 Moapostola Paulo o boletše gore therešo e be e ka se hwetšwe difilosofing le metlwaeng ya batho. (Ba-Kolose 2:8) Ka kgonthe, dithuto tše bjalo di a timetša. Paulo o ile a lemoša Bakriste ba Efeso gore ge e ba ba bea tumelo ya bona go tšona, ba be ba tla ba bjalo ka masea moyeng ba “xapa-xapiwa . . . ke phefô e nngwê le e nngwê ya thutô ka xo foraforetšwa ke batho, rè xokwa ke maanô a xo re aroša.” (Ba-Efeso 4:14) Lehono, “xo foraforetšwa ke batho,” go tšwetšwa pele ke phatlalatšo ya maaka ya bao ba ganetšago therešo ya Modimo. The New Encyclopædia Britannica e hlalosa “phatlalatšo ya maaka” e le “maiteko ao a beakantšwego a go dira ka bohlale ditumelo, dikgopolo goba ditiro tša batho ba bangwe.” Phatlalatšo e bjalo ya maaka e fapoša ka boradia therešo gore e be maaka gomme e tšwetša pele maaka e le therešo. Gore re hwetše therešo ge re lebeletšane le dikgateletšo tše bjalo tša bohwirihwiri, re swanetše go lebelela ka Mangwalong ka phišego.
Bakriste le Lefase
4. Therešo e dirilwe gore e hwetšagale go bomang, gomme bao ba e hwetšago ba na le boikarabelo bofe?
4 A bolela ka bao ba bego ba fetogile barutiwa ba gagwe, Jesu Kriste o ile a rapela Jehofa gore: “Ba kxêthê therešong ya xaxo; Lentšu la xaxo ké yôna therešô.” (Johane 17:17) Ba bjalo ba be ba tla kgethwa, goba ba beelwa ka thoko, ka morero wa gore ba hlankele Jehofa le go dira gore leina le Mmušo wa gagwe di tsebege. (Mateo 6:9, 10; 24:14) Gaešita le ge e se ya batho ka moka, therešo ya Jehofa e hwetšagala ka ntle le tefo e le mpho ya batho bohle bao ba e nyakago, go sa šetšwe boemo bja bona bja setšhaba, morafe goba setlogo sa setšo. Moapostola Petro o itše: “Ke lemoxa xore Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.”—Ditiro 10:34, 35.
5. Ke ka baka la’ng Bakriste gantši ba tlaišwa?
5 Bakriste ba abelana therešo ya Beibele le ba bangwe eupša ga ba amogelwe mafelong ka moka. Jesu o lemošitše gore: “Ba tlo Le xafêla tlaišong; ba tlo Le bolaya; Le tlo ba ba xo hloiwa ke dithšaba tšohle ka ’baka la Leina la-ka.” (Mateo 24:9) Ge a be a bolela ka temana ye, moruti wa Ireland John R. Cotter o ngwadile ka 1817 gore: “Maiteko a bona [Bakriste] a go mpshafatša maphelo a batho ka go bolela, go e-na le go dira gore batho ba bontšhe tebogo, a tla dira gore ba hloye le go tlaiša barutiwa e le ka kgonthe bakeng sa go bontšha bokgopo bja bona.” Batlaiši ba bjalo “ba xanne xo rata therešô ya xo ba phološa.” Ke ka baka leo ge “Modimo a ba lesitše ba tšewa ke matla a phorô, a ba lesa ba y’o dumêla maaká, Xore xo lahlwê bohle ba sa kaxo ba dumêla therešô, ba e lexo ba xo kxahlwa ke sebe.”—2 Ba-Thesalonika 2:10-12.
6. Ke dikganyogo dife tšeo Bakriste ba sa swanelago go di hlagolela?
6 Moapostola Johane o lemoša Bakriste bao ba phelago lefaseng le la bonaba gore: “Le se kê la rata lefase le tše lefaseng . . . tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng.” (1 Johane 2:15, 16) Ge a re “tšohle,” Johane o be a sa hlaole selo. Ka baka leo ga se ra swanela go hlagolela kganyogo ya selo le ge e le sefe seo lefase le se neago seo se ka re arošago therešong. Go ela hloko temošo ya Johane go tla nea tutuetšo e matla maphelong a rena. Bjang?
7. Tsebo ya therešo e tutuetša bjang ba dipelo tša go loka?
7 Ngwageng wa 2001, Dihlatse tša Jehofa lefaseng ka bophara di ile tša swara dithuto tša magae tša Beibele tša ka godimo ga dimilione tše nne le seripa kgwedi le kgwedi, di ruta batho ka o tee ka o tee goba dihlopha ka dinyakwa tša Modimo bakeng sa bophelo. Ka baka la seo, batho ba 263 431 ba ile ba kolobetšwa. Seetša sa therešo se ile sa ba sa bohlokwa go barutiwa ba ba bafsa, gomme ba ile ba lahla ditswalano tše mpe le tše gobogilego, ditsela tšeo di sa hlomphego Modimo tšeo di tletšego lefaseng le. Ga e sa le ba kolobetšwa, ba tšwetše pele ba phela ka ditekanyetšo tšeo Jehofa a di beetšego Bakriste ka moka. (Ba-Efeso 5:5) Na therešo ke ya bohlokwa gakaalo go wena?
Jehofa o a re Hlokomela
8. Jehofa o arabela bjang boineelong bja rena, gomme ke ka baka la’ng e le ga bohlale go ‘tsoma mmušo pele’?
8 Go sa šetšwe go se phethagale ga rena, Jehofa o amogela boineelo bja rena ka kgaugelo, ka tsela ya seswantšhetšo eka o theoga boemong bja gagwe bjo bo phagamego, e le gore a re gogele go yena. Ka go rialo o re ruta gore re tšeele godimo dipakane le dikganyogo tša rena. (Psalme 113:6-8) Ka nako e swanago, Jehofa o re dumelela gore re be le tswalano ya motho ka noši le yena, gomme o holofetša go re hlokomela ge e ba re ‘tsoma mmušo pele le go loka ga gagwe.’ Ge e ba re dira se gomme re itšhireletša moyeng, o re holofetša gore: “Ké mo Le tl’o xo ekeletšwa ka tšeo ka moka.”—Mateo 6:33, bapiša le NW.
9. “Molaki e a bôtêxaxo yo bohlale” ke mang, gomme Jehofa o re hlokomela bjang a diriša “molaki” yo?
9 Jesu Kriste o ile a kgetha baapostola ba 12 gomme a thea motheo bakeng sa phuthego ya Bakriste ba tloditšwego yeo e ilego ya bitšwa “Ba-Isiraele ba Modimo.” (Ba-Galatia 6:16; Kutollo 21:9, 14) Ba ka morago ba ile ba hlaloswa e le ‘phuthego ya Modimo e a phelago, e lego yona kokwane le motheo wa therešo.’ (1 Timotheo 3:15) Jesu o ile a bolela ka mo go kgethegilego ditho tša phuthego yeo gore ke “molaki e a bôtêxaxo yo bohlale.” Jesu o itše, mohlanka eo yo bohlale o be a tla ikarabela ka go nea Bakriste “dijô ka lebaka la xôna.” (Mateo 24:3, 45-47; Luka 12:42) Ka ntle le dijo re ka bolawa ke tlala. Ka mo go swanago, ge re sa je dijo tša moya, re a fokola gomme ra hwa moyeng. Ka gona, go ba gona ga “molaki e a bôtêxaxo yo bohlale” ke bohlatse bjo bongwe bja gore Jehofa o a re hlokomela. Anke ka mehla re tšeeleng godimo ditokišetšo tše di rategago tša moya tšeo re di diretšwego ka “molaki.”—Mateo 5:3.
10. Ke ka baka la’ng go le bohlokwa go rena gore re be gona dibokeng ka mehla?
10 Go ja dijo tša moya go akaretša thuto ya motho ka noši. Go akaretša gape le go kopana le Bakriste ba bangwe le go kopanela dibokeng tša phuthego. Na o sa gopola gabotse seo o se jelego dikgweding tše tshela tšeo di fetilego, goba gaešita le dibeke tše tshela? Ga go bonale go le bjalo. Go sa šetšwe seo, selo le ge e le sefe seo o ka bego o se jele se ile sa go nea phepo yeo o bego o e nyaka gore o phele. Gomme o ka be o jele dijo tše swanago ga e sa le go tloga ka nako yeo. Selo se swanago ke sa therešo ka dijo tša moya tšeo di newago dibokeng tša rena tša Bokriste. Mohlomongwe ga re sa gopola dintlha ka moka tšeo re ilego ra di kwa dibokeng. Gomme tsebišo e swanago e ka ba e ile ya newa ka makga a mmalwa. Go sa dutše go le bjalo, ke dijo tša moya, ke tša bohlokwa bakeng sa bophelo bja rena bjo bobotse. Ka mehla diboka tša rena di nea thekgo e botse ya moya, e abjago ka nako e swanetšego.
11. Ke maikarabelo afe ao re nago le ona ge re le dibokeng tša Bokriste?
11 Le gona go ba gona dibokeng tša Bokriste go re nea boikarabelo. Bakriste ba kgothaletšwa gore ba “kgothatšane,” (NW) ba iše ditho-gotee le bona tša phuthego “leratong le medirong e botse.” Go lokišeletša ga rena, go ba gona ga rena le go tšea karolo dibokeng ka moka tša Bokriste go tiiša tumelo ya rena gaešita le go kgothatša ba bangwe. (Ba-Hebere 10:23-25) Go swana le bana ba banyenyane bao ba ka kgetha-kgethago dijo, ba bangwe ba ka nyaka kgothatšo e tšwelago pele ya gore ba je dijo tša moya. (Ba-Efeso 4:13) Ke go bontšha lerato go nea kgothatšo yeo ge e nyakega e le gore ba bjalo ba ka gola gore e be Bakriste ba godilego, e lego bao moapostola Paulo a ngwadilego ka bona gore: “Xe e le dijô tše di tiilexo ké tša ba ba xodilexo, ba ba ithutilexo ba tlwaêla xo kxetholoxanya botse le bobe.”—Ba-Hebere 5:14.
Go Itlhokomela Moyeng
12. Ke mang a nago le boikarabelo bjo bogolo bakeng sa go dula ga rena re le therešong? Hlalosa.
12 Molekane wa rena wa lenyalo goba batswadi ba rena ba ka re tutueletša tseleng ya therešo. Ka mo go swanago, bagolo ba phuthego ba ka re diša re le karolo ya mohlape wo o lego ka tlase ga tlhokomelo ya bona. (Ditiro 20:28) Eupša ke mang yo a nago le boikarabelo bjo bogolo ge e ba re tla tšwela pele tseleng ya rena ya go phela yeo e theilwego therešong? Ruri, boikarabelo bo letše go yo mongwe le yo mongwe wa rena. Gomme seo ke sa therešo bobedi maemong a tlwaelegilego le dinakong tše thata. Ela hloko tiragalo e latelago.
13, 14. Bjale ka ge go bontšhitšwe phihlelong e lego mabapi le kwana, re ka hwetša bjang thušo e nyakegago ya moya?
13 Kua Scotland dikwana tše dingwe di be di fula mafulong ge e nngwe ya tšona e be e timelela karolong ya thabana gomme e wela ka leribeng kgaufsinyana. E be e se ya gobala, eupša e be e tšhogile gomme e palelwa ke go namelela gape. Ka gona e ile ya thoma go lla kudu. Mmago yona o ile a e-kwa, gomme le yena o ile a thoma go lla go fihlela modiši a e-tla gomme a phološa kwana.
14 Ela hloko go latelana ga ditiragalo. Kwana e ile ya nyaka thušo, mmago yona a tlaleletša ka lentšu la gagwe go sello sa yona, gomme modiši yo a ilego a hlokomedišwa o ile a gata mogato ka pela gore a e hlakodiše. Ge e ba phoofolo e nyenyane le mmago yona di ka lemoga kotsi gomme tša kgopela thušo le semeetseng, na ga se ra swanela go dira se se swanago ge e ba re e-wa moyeng goba re lebeletšana le dikotsi tšeo di sa letelwago go tšwa lefaseng la Sathane? (Jakobo 5:14, 15; 1 Petro 5:8) Re swanetše, kudu-kudu ge e ba re se na phihlelo mohlomongwe ka gobane re sa le ba banyenyane goba e le ka gobane re sa le ba bafsa ditherešong.
Go Latela Tlhahlo ya Modimo go Tliša Lethabo
15. Mosadi yo mongwe o ile a ikwa bjang ge a be a thoma go kopanela le phuthego ya Bokriste?
15 Ela hloko bohlokwa bja go kwešiša Beibele le khutšo ya monagano yeo e e tlišetšago bao ba hlankelago Modimo wa therešo. Mosadi wa nywaga e 70 yo a bego a tsena Kereke ya Engelane bophelo bja gagwe ka moka o ile a dumela go ba le thuto ya Beibele ya motho ka noši le yo mongwe wa Dihlatse tša Jehofa. Go se go ye kae o ile a lemoga gore leina la Modimo ke Jehofa gomme a kopanela ka gore “Amene” go dithapelo tša phatlalatša tše tšwago pelong tše bego di rapelwa Holong ya Mmušo ya gabo. O ile a bolela ka maikwelo a matla gore: “Go e na le go bolela ka Modimo e le yo a sa kgonego go batamelwa ke rena batho feela, le mo tliša gona mo gare ga rena go swana le mogwera yo a rategago. Ke selo seo ke sa kago ka se bona pele.” Go bonala motho yo a botegago yo a thabelago a ka se tsoge a lebetše tiragalo ya mathomo yeo therešo e ilego ya e dira go yena. Le rena ka mo go swanago, anke le ka mohla re se ke ra lebala kamoo therešo e bego e le e bohlokwa ka gona go rena ge re be re e amogela ka lekga la mathomo.
16. (a) Ke eng seo se ka diregago ge e ba re dira go kgoboketša tšhelete pakane ya rena e kgolo? (b) Re ka hwetša bjang lethabo la kgonthe?
16 Ba bantši ba dumela gore ge nkabe ba be ba na le tšhelete e ntši, ba be ba tla thaba. Lega go le bjalo, ge e ba re dira go kgoboketša tšhelete pakane ya rena e kgolo bophelong, re ka tlaišwa ke “mahloko a magolo a monagano.” (1 Timotheo 6:10, Phillips) Ela hloko gore ke batho ba bakae bao ba rekago dithekethe tša go petšha, ba dirišago tšhelete dikhasinong goba ba lekelago hlogong mebarakeng ya tša go ananywa ga tša ditšhelete ba lora ka go hwetša tšhelete e ntši kudu. Ke ba sego kae feela bao ba bonago tšhelete yeo ba e hutšago. Le gona gantši le bao ba ka le bonago ba hwetša gore lehumo la bona la panya-gatee ga le ba tlišetše lethabo. Ka mo go fapanego, lethabo leo le swarelelago le tšwa go direng thato ya Jehofa, go šoma le phuthego ya Bokriste ka tlhahlo ya moya o mokgethwa wa Jehofa le thušo ya barongwa ba gagwe. (Psalme 1:1-3; 84:4, 5; 89:15) Ge re dira se, ditšhegofatšo tšeo di sa letelwago di ka re latela. Na therešo ke ya bohlokwa ka mo go lekanego go wena go go tlišetša ditšhegofatšo bophelong bja gago?
17. Go dula ga Petro le Simone e lego mošogi wa matlalo, go utolla’ng ka boemo bja kgopolo bja moapostola?
17 Ela hloko mohlala wa moapostola Petro. Ngwageng wa 36 C.E., o ile a dira leeto la boromiwa la go ya Molaleng wa Sarona. O ile a ema Lida, moo a ilego a fodiša Enea yo a bego a golofetše gomme a fetela boema-kepeng bja Jope. Moo o ile a tsoša Doroka. Ditiro 9:43 e re botša gore: “A fetša matšatši à le motseng wa Jope, à le lapeng la motho e a bitšwaxo Simone mošoxi wa mathêbô.” Tsebišo ye e kopana e utolla boemo bja kgopolo bja go se bebe sefahlego ga Petro ge a be a hlankela batho ba motseng woo. Bjang? Seithuti sa Beibele Frederic W. Farrar o a ngwala: “Go be go se molatedi yo thata le yo a sa kwanantšhego wa Molao wa [Moše] yo a bego a ka tutueletšega go dula ngwakong wa mošogi wa matlalo. Go bonana letšatši le letšatši le matlalo le ditopo tša diphoofolo tša mehuta-huta mo go bego go nyakwa ke modiro wo, le didirišwa tšeo o bego o di nyaka, go o dirile gore e be o sa hlwekago le o šišimišago mahlong a bakgomaredi ba molao.” Gaešita le ge ‘ngwako wa Simone wa hleng ga lewatle’ o be o se hleng ga lefelo la gagwe la go šogela matlalo, Farrar o re Simone o be a swaregile ka ‘modiro wo o bego o lebelelwa ka go šišingwa ka go rialo o fokotša boitlhompho bja bohle bao ba bego ba o dira.’—Ditiro 10:6.
18, 19. (a) Ke ka baka la’ng Petro a ile a makatšwa ke pono yeo a bego a e amogetše? (b) Ke tšhegofatšo efe yeo e sa letelwago yeo Petro a ilego a e amogela?
18 Petro yo a sa bebego sefahlego o ile a amogela kamogelo ya Simone, gomme Petro o ile a amogela tlhahlo e sa letelwago e tšwago go Modimo. O ile a bona pono yeo go yona a ilego a laelwa gore a je dibopiwa tšeo di bego di sa hlweka go ya le ka molao wa se-Juda. Petro o ile a gana ka gore ga se a ka a “ja seilá le sa dithšila.” Eupša o ile a botšwa ka makga a mararo gore: “Tše Modimo a di hlatswitšexo O se kê wa re di na le dithšila.” Ka mo go kwešišegago, ‘Petro o ile a gakanega gore pono yeo a e bonego e ka ba e le eng.’—Ditiro 10:5-17, bapiša le PK; 11:7-10.
19 Petro o be a sa lemoge gore letšatšing le le latelago kua Kesarea, e lego bokgole bja dikhilomithara tše 50, Koronelio wa ba-Ntle le yena o be a bile le pono. Morongwa wa Jehofa o be a laetše Koronelio gore a romele bahlanka gore ba ye ba hwetše Petro ngwakong wa Simone mošogi wa matlalo. Koronelio o ile a romela bahlanka ba gagwe ngwakong wa Simone, gomme Petro o ile a sepela le bona go ya morago Kesarea. Gona moo o ile a bolela le Koronelio le meloko ya gagwe le bagwera. Ka baka la seo, ba ile ba fetoga badumedi ba pele ba sa bollago ba ba-Ntle go amogela moya o mokgethwa e le maja-bohwa a Mmušo. Gaešita le ge banna bao ba be ba sa bolla, bohle bao ba bego ba e-kwa lentšu la Petro ba ile ba kolobetšwa. Se se ile sa bula tsela bakeng sa baditšhaba, bao ba bego ba lebelelwa ba se ba hlweka go ya ka pono ya se-Juda, gore e be ditho tša phuthego ya Bokriste. (Ditiro 10:1-48; 11:18) A tokelo ya moswana-noši gakaakang bakeng sa Petrotše ka moka e le ka gobane therešo e be e le ya bohlokwa go yena gomme e mo dirile gore a latele tlhahlo e tšwago go Jehofa gomme a dire go ya le ka tumelo!
20. Re fiwa thušo efe ya Modimo ge e ba re bea therešo pele maphelong a rena?
20 Paulo o a kgothatša: “Re bê ba therešô leratong, ’me re fêlê re tiêlêla dilong tšohle, rè le dithô tša Kriste, e lexo Yêna hlôxô.” (Ba-Efeso 4:15, mongwalo o sekamego ke wa rena.) Ee, therešo e tla re tlišetša lethabo leo le sa lekanywego le selo ga bjale ge e ba re e bea pele maphelong a rena gomme re dumelela Jehofa ka moya wa gagwe o mokgethwa go hlahla dikgato tša rena. Le gona dula o gopola thekgo ya barongwa ba bakgethwa modirong wa rena wa boebangedi. (Kutollo 14:6, 7; 22:6) Re na le tokelo gakaakang ka go ba le thekgo e bjalo modirong woo Jehofa a re laetšego gore re o dire! Go boloka potego go tla re lebiša gore re rete Jehofa Modimo wa therešo ka mo go sa felego. Na go na le selo seo se ka bago bohlokwa go feta seo?—Johane 17:3.
Re Ithutile’ng?
• Ke ka baka la’ng ba bantši ba sa amogele therešo?
• Bakriste ba swanetše go lebelela bjang dilo tša lefase la Sathane?
• Boemo bja rena bja kgopolo ka diboka e swanetše go ba bofe, gomme ka baka la’ng?
• Ke boikarabelo bofe bjo re nago le bjona bja go itlhokomela moyeng?
[Dipotšišo tša Thuto]
[Mmapa/Seswantšho go letlakala 18]
(Bakeng sa mongwalo o beakantšwego ka mokgwa wa kgatišo, bona kgatišo ka boyona)
LEWATLE LE LEGOLO
MOLALA WA SARONA
Kesarea
Jope
Lida
Jerusalema
[Seswantšho]
Petro o ile a latela tlhahlo ya Modimo gomme a buna ditšhegofatšo tšeo di sa letelwago
[Mothopo]
Map: Mountain High Maps® Copyright © 1997 Digital Wisdom, Inc.
[Seswantšho go letlakala 13]
Jesu o ile a hlatsela therešo
[Seswantšho go letlakala 15]
Go swana le dijo tša nama, dijo tša moya di bohlokwa bakeng sa bophelo bja rena bjo bobotse