Boetapele bjo Bobotse​—Re ka bo Hwetša Kae?

BEIBELE e re: “Malapá ka moka a na le baaxi ba ôna; xomme Mo-axa-tšohle ké Modimo.” (Ba-Hebere 3:⁠4; Kutollo 4:​11) Ka ge Modimo wa therešo, Jehofa, e le Mmopi wa rena, “ó tseba lebopô le re lexo ka lôna.” (Psalme 103:​14) O na le tsebo e tletšego ka mafokodi le dinyakwa tša rena. Gomme ka baka la gore ke Modimo yo a nago le lerato, o nyaka go kgotsofatša dinyakwa tšeo. (Psalme 145:​16; 1 Johane 4:8) Go nyaka ga rena boetapele bjo bobotse le gona go a akaretšwa.

Jehofa o ile a bolela ka moporofeta Jesaya gore: “Le tsebê, ke beile yêna, xore e bê hlatse ya dithšaba, e bê yêna kêta-pele le molai wa dithšaba.” (Jesaya 55:4) Tharollo bothateng bja lehono bja boetapele e akaretša go tseba gabotse Moetapele yoa kgethilwego ke Ra-matla-ohle ka boyenagomme a amogela boetapele bja gagwe. Ka gona, ke mang Moetapele le Molaodi yo go boletšwego ka yena e sa le pele? Ke mangwalo afe a bohlatse a go mo hlatsela e le moetapele? A ka re lebiša kae? Re swanetše go dira’ng gore re holwe ke boetapele bja gagwe?

Moetapele yo a Holofeditšwego o a Goroga

Nywaga e ka bago e 2 500 e fetilego, morongwa Gabariele o ile a tšwelela go moporofeta Daniele gomme a mmotša gore: “Tseba  O kwešešê; xo tloxa ka lebaka la xe Lentšu la xo re Jerusalêma xo bušê xo axiwê xo fihla xo Motlotšwa Mo-êta-pele, ké beke tše di šupaxo. Ka beke tše masome a selêlaxo a metšô e mebedi xo tlo axiwa merakô le mekxôba; fêla, è le mehla e methata.”Daniele 9:25.

Go molaleng gore morongwa o be a botša Daniele ka nako e lebanego ya go tla ga Moetapele yo a kgethilwego wa Jehofa. “Mo-êta-pele” o be a tla tšwelela mafelelong a dibeke tše 69, goba nywaga e 483, re bala go tloga ka 455 B.C.E., ge go be go ntšhwa lentšu la gore Jerusalema e agwe lefsa. * (Nehemia 2:​1-8) Ke eng seo se ilego sa direga mafelelong a lebaka leo? Mongwadi wa Ebangedi e lego Luka o re: “Ka ngwaxa wa lesome la metšô e fetšaxo seatla wa boxoši bya Kesara Tiberio, mehleng ya xe Pontio Pilato à buša naxa ya Juda, Herode Teterareka à buša Galilea [29 C.E.], . . . ké mo Lentšu la Modimo le tletšexo Johane morwa wa Tsakaria à le lešokeng. A tla dinaxeng ka moka tše di bataxanexo le noka ya Jorodane, a bolêla kolobetšô ya thsokoloxô ya xore batho ba lebalêlwê dibe.” Ka nako yeo, “sethšaba se be se dutše sè holofetše” Mesia Moetapele. (Luka 3:​1-3, 15) Gaešita le ge mašaba a ile a tla go Johane, e be e se Moetapele yoo.

Gomme mo e ka bago ka October ya 29 C.E., Jesu wa Natsaretha o ile a tla go Johane gore a tlo kolobetšwa. Gomme Johane o ile a hlatsela se ge a be a re: “Ke bone Môya ò theoxa lexodimong ò le byalo ka leeba, wa tla wa dula ò mo okametše. Le nna ke be ke sa mo tsebe. Fêla, e a nthomilexo xo kolobetša ka meetse, ó be a mpoditše a re: Yo O mmônaxo Môya ò mo theoxêla, wa dula ò mo okametše, ké Yêna wa xo kolobetša ka Môya o mokxêthwa. Xomme ke di bone ka bea bohlatse ka re: Yó ké Yêna Morwa-Modimo.” (Johane 1:​32-34) Kolobetšong ya gagwe, Jesu o ile a ba Moetapele yo a tloditšwegoMesia goba Kriste.

Ee, Jesu Kriste o ile a itlhatsela e le “kêta-pele le molai wa dithšaba” yo a holofeditšwego. Gomme ge re seka-seka dika tša gagwe e le moetapele, re kgona go bona ka pela gore boetapele bja gagwe bo feta kgole dinyakwa tše di nyakegago go moetapele wa mehleng yeno yo a swanetšego.

MesiaMoetapele yo a Swanetšego

Moetapele yo botse o nea tlhahlo e kwagalago gomme o thuša batho bao ba lego ka tlase ga tlhokomelo ya gagwe gore ba be le matla le bokgoni e le gore ba ka kgona go rarolla mathata ka katlego. Puku ya 21st Century Leadership: Dialogues With 100 Top Leaders e re: ‘Se ke senyakwa bakeng sa moetapele yo a atlegago wa lekgolo la bo-21 la nywaga.’ Jesu o kgonne gabotse gakaakang go lokišeletša batheetši ba gagwe gore ba swaragane le maemo a letšatši le letšatši! E fo ela hloko polelo ya gagwe e tumilego kuduThuto ya Thabeng. Mantšu ao a humilego ka keletšo e šomago a begilwe go Mateo dikgaolo 5 go ya go 7.

Ka mohlala, ela hloko temošo ya Jesu ya mabapi le go lokiša diphapano tša motho ka noši. O itše: “Ké xôna, xe O tliša neô ya xaxo aletareng, ’me Ò le xôna-fao wa êlêlwa xore ngwan’eno ó na le taba le wêna, xôna tloxêla neô ya xaxo moo aletareng, O thômê xo y’o boêlana le ngwan’eno, O tseb’o tliša neô ya xaxo.” (Mateo 5:​23, 24) Go gata mogato wa pele ka go dira khutšo le ba bangwe go tla pelegaešita le go ba bohlokwa le go feta go dira modiro wa borapedi, go swana le go neelana ka dimpho aletareng ya tempele kua Jerusalema ka ge go be go nyakwa ke Molao wa Moše. Ge e ba go se bjalo, ditiro tša borapedi ke tše sa amogelegego go Modimo. Keletšo ya Jesu ke e šomago lehono bjalo ka ge e be e šoma nywaga-kgolong e fetilego.

Jesu gape o ile a thuša batheetši ba gagwe gore ba pheme molaba wa boitshwaro bjo bo gobogilego. O ile a ba lemoša ka gore: “Le kwele ba boxolo-xolo bà boditšwe xwa thwe: O se kê wa otswa! Xe e le nna ke Le botša ke re: Mang le mang e a lebêlêlaxo mosadi à mo kxanyoxa, ó šetše a otswitše pelong ya xaxwe.” (Mateo 5:​27, 28) A temošo e swanelago gakaakang! Ke ka baka la’ng re swanetše go thoma mosepelo wa go lebiša go direng bootswa ka go nagana ka dikgopolo tše lego mabapi le bjona? Jesu  o boletše gore mo pelong ke gona go tšwago bootswa le bohlotlolo. (Mateo 15:​18, 19) Re ba bohlale ka go šireletša dipelo tša rena.—Diema 4:23.

Le gona Thuto ya Thabeng e na le keletšo e botse ka go rata manaba a rena, go bontšha moya wa go rata go fana, go ba le pono e botse ka dilo tše di bonagalago le dilo tša moya le tše di swanago le tšeo. (Mateo 5:​43-​47; 6:​1-4, 19-​21, 24-​34) Le gona Jesu o bontšhitše batheetši ba gagwe kamoo ba ka nyakago thušo ya Modimo ka go ba ruta kamoo ba ka rapelago ka gona. (Mateo 6:​9-​13) Mesia Moetapele o matlafatša le go lokišeletša balatedi ba gagwe gore ba swaragane le mathata a tlwaelegilego a batho.

Thutong ya Thabeng, Jesu ka makga a tshelelago o ile a thoma dipolelo tša gagwe ka polelwana e rego ‘le kwele go thwe’ goba “Le xôna xo kile xwa thwe,” eupša o ile a bolela kgopolo e nngwe ge a be a re “xe e le Nna ke Le botša ke re.” (Mateo 5:​21, 22, 27, 28, 31-34, 38, 39, 43, 44) Seo se bontšha gore batheetši ba gagwe ba be ba tlwaetše go dira dilo ka tsela e itšego, go ya ka ditšo tša Bofarisei tša go fo bolelwa. Eupša Jesu ga bjale o be a ba bontšha tsela e fapanegoyeo e bego e bontšha moya wa therešo wa Molao wa Moše. Ka go rialo Jesu o be a tšweletša phetogo, gomme o dirile se ka tsela yeo e dirilego gore dilo di be bonolo go balatedi ba gagwe gore ba di amogele. Ee, Jesu o tutueditše batho gore ba dire diphetogo tše makatšago maphelong a bona, moyeng le boitshwarong. Se ke sešupo sa moetapele wa kgonthe.

Puku ya go ithutela bolaodi e bontšha kamoo go lego thata ka gona go fihlelela phetogo e bjalo. E re: “Motho yo a tlišago phetogo [moetapele] go nyakega gore e be yo a kgomegago bjalo ka modirela-leago, a be le temogo ya go swana le setsebi sa tša monagano, a be le kgotlelelo ya mokitimi wa lebelo la monabo o motelele, e be yo a phegelelago bjalo ka mpša, yo a ikemetšego bjalo ka modula-noši gomme a se fele pelo bjalo ka mokgethwa. Gomme gaešita le ka dika tšeo ka moka, katlego ga se e kgonthišetšwe.”

Sehlogo se se rego, “Boetapele: Na Dika di Bohlokwa”? se boletše gore: “Baetapele ba swanetše go itshwara ka tsela yeo ba ratago gore balatedi ba bona ba itshware ka yona.” Ka kgonthe, moetapele yo botse o dira seo a se bolelago. Seo e be e le therešo gakaakang ka Jesu Kriste! Ee, o rutile bao ba bego ba e-na le yena gore ba ikokobetše, gomme o ile a ba bontšha thuto e šomago ka go ba hlatswa maoto. (Johane 13:​5-​15) Ga se a fo roma barutiwa ba gagwe go ya go bolela ditaba tše dibotse tša Mmušo wa Modimo, eupša o ile a ikgafa ka mafolofolo modirong woo. (Mateo 4:​18-​25; Luka 8:​1-3; 9:​1-6; 10:​1-​24; Johane 10:​40-​42) Gomme le tabeng ya go arabela go boetapele, Jesu o beile mohlala. O ile a bolela ka yena gore: “Morwa a ka se ke a dira se sengwe ka la gagwe, a sa bone Tatagwe a se dira.”—Johane 5:​19, PK.

Go ela hloko se se boletšwego mabapi le seo Jesu a se boletšego le go se dira go bontšha gabotse gore ke Moetapele yo a swanetšego. Ge e le gabotse, o feta ditekanyo ka moka tša batho tša boetapele bjo bobotse. Jesu o phethagetše. Ka ge a ile a amogela go se hwe ka morago ga lehu la gagwe le tsogo, o phela ka mo go sa felego. (1 Petro 3:​18; Kutollo 1:​13-18) Ke moetapele ofe wa motho yo a ka kgonago go fihlelela ditshwanelego tše?

Re Swanetše go Dira’ng?

E le Kgoši e bušago ya Mmušo wa Modimo, “Mo-êta-pele” o tla tšhollela ditšhegofatšo tša gagwe godimo ga batho ba kwago. Tabeng ye Mangwalo a holofetša gore: “Xo tseba Morêna xo tlo tlala ’fase lohle bo-ka meetse xe a nabile lewatleng.” (Jesaya 11:9) “Ba bolêta e tlo ba bôná beng ba naxa; ba tlo thaba ka botlalô bya moláô.” (Psalme 37:​11) “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo.” (Mika 4:4) “ ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:​3, 4.

 Lehono lefase le na le mathata a boetapele. Lega go le bjalo, Jesu Kriste o etelela pele ba boleta go ya lefaseng le lefsa la khutšo, moo batho ba ba kwago ba tlago go ba ba kopanego borapeding bja Jehofa Modimo gomme ba tla tšwela pele go ya phethegong. Ke ga bohlokwa gakaakang gore re monye tsebo ya go tseba Modimo wa therešo le Moetapele wa gagwe yo a mo kgethilego gomme re dire ka go dumelelana le tsebo yeo!—Johane 17:3.

Tlhompho e nngwe e botse kudu yeo re ka e neago motho ke go mo ekiša. Ka gona na ga se ra swanela go leka go ekiša Moetapele yo mogolo historing ya mothoJesu Kriste? Re ka dira seo bjang? Go amogela boetapele bja gagwe go tla kgoma bjang maphelo a rena? Dipotšišo tše le tše dingwe di tla ahla-ahlwa dihlogong tše pedi tše di latelago.

[Mengwalo ya ka tlase]

[Seswantšho go letlakala 4]

Daniele o ile a bolela e sa le pele ka go tla ga Moetapele yo a kgethilwego ke Modimo

[Diswantšho go letlakala 7]

Dithuto tša Jesu di ile tša lokišeletša batho gore ba lebeletšane le mathata a bophelo

[Seswantšho go letlakala 7]

Jesu o tla etelela pele batho ba kwago go ya lefaseng le lefsa la khutšo