Kamoo Magole a Tlago go Fela ka Gona

NAGANA mahlo a difofu a bona, ditsebe tša difoa di e-kwa modumo o mongwe le o mongwe, leleme la dimuma le opela ka lethabo gomme maoto a digole a tiile gomme a kgona go sepela-sepela! Ga re bolele ka dilo tšeo di fihleletšwego ke thutamahlale ya tša kalafo, eupša ka go tsena ditaba gare ga Modimo bakeng sa batho. Beibele e bolela e sa le pele gore: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.” (Jesaya 35:​5, 6) Eupša re ka kgodišega bjang gore boporofeta bjo bo makatšago bo tla phethagala?

Sa pele, ge Jesu Kriste a be a le lefaseng, o ile a tloga a fodiša batho ba malwetši le magole a fapa-fapanego. Go feta moo, bontši bja mehlolo ya gagwe e ile ya bonwa ke dihlatse tše dintšigaešita le ke manaba a gagwe. Ge e le gabotse, bonyenyane tiragalong e tee, baganetši ba babelaedi ba ile ba nyakišiša ka mo go tseneletšego phodišo e le gore ba hlompholle Jesu. Eupša sa go ba nyamiša, seo ba go se dira e bile go tiišetša mehlolo ya gagwe. (Johane 9:​1, 5-34) Ka morago ga gore Jesu a dire mohlolo o mongwe o sa ganetšegego, ba ile ba bolela ka tlalelo gore: “Re tlo re’ng? Motho é ó dira mehlôlô e mentši.” (Johane 11:​47) Lega go le bjalo, batho feela, e be e le ba fapanego, ka gobane ba bantši ba ile ba thoma go bontšha tumelo go Jesu.—Johane 2:​23; 10:​41, 42; 12:​9-11.

Mehlolo ya Jesu

Pontšho ya Phodišo ya Lefase ka Moka

Mehlolo ya Jesu e bontšhitše seo se fetago go hlatsela gore Jesu e be e le Mesia le Morwa wa Modimo. E theile motheo wa go ba le tumelo dikholofetšong tša Beibele tša gore batho ba ba kwago ba tla fodišwa nakong e tlago. Dikholofetšo tše di akaretša boporofeta bjo bo lego go Jesaya kgaolo 35, ye go boletšwego ka yona serapeng sa mathomo. Jesaya 33:​24 e bolela mabapi le bokamoso bja bophelo bjo bobotse bja batho ba boifago Modimo gore: “Mo xo ba ba axilexo fá xo ka se bê le e a rexo: Ke a babya!” Ka mo go swanago, Kutollo 21:4 e holofetša gore: “Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele [diteko tša lehono le tlaišego] di fetile.”

Batho ba rapelela go phethagatšwa ga diporofeto tše ge ba boeletša thapelo ya Jesu ya mohlala,  yeo ka boripana e rego: “Mmušô wa xaxo a o tlê; thatô ya a xaxo a e dirwê mono lefaseng byalo ka xe e dirwa lexodimong.” (Mateo 6:​10) Ee, thato ya Modimo e akaretša lefase le batho. Gaešita le ge malwetši le magole a dumeletšwe ka lebaka, go se go ye kae a tla ba a ile; a ka se senye “boxatô bya dinaô” tša Modimo ka mo go sa felego.—Jesaya 66:1. *

Go Fodišwa Ntle le Bohloko Goba Tefo

Go sa šetšwe gore ke bolwetši bofe bjo bo bego bo tlaiša batho, Jesu o ba fodišitše ka ntle le go ba kweša bohloko, a sa dika-dike e bile a sa ba lefiše. Ka ntle le pelaelo, ditaba tša mabapi le se di ile tša phatlalala bjalo ka mollo wa hlaga, gomme go se go ye kae “mašaba a mantši a batho a tla xo Yêna; ba tla bà na le dihlotša, le difofu, le dimuma, le dixôlê, le ba bangwê ba bantši; ba ba bea fase maotong a xaxwe, Yêna a ba fodiša.” Batho ba ile ba arabela bjang? Pego ya Mateo yo a bonego ka mahlo e tšwela pele gore: “Mašaba a tlabêxa xe a bôna dimuma di bolêla, dixôlê di fodile, dihlotša dì sepela, difofu dì bôna; ’me ba rêta Modimo wa Isiraele.”—Mateo 15:​30, 31.

Ela hloko gore bao ba ilego ba fodišwa ke Jesu ba be ba sa kgethwe ka šedi lešabenge lego leano leo le dirišwago ke baradia. Go e na le moo, ba leloko ba bantši le bagwera ba bao ba babjago ba be “ba ba bea fase maotong a xaxwe [Jesu], Yêna a ba fodiša.” Ga bjale a re ahla-ahleng mehlala e itšego ya bokgoni bja Jesu bja go fodiša.

Bofofu: Ge a be a le Jerusalema, Jesu o ile a bona monna e “a tswetšwexo è le sefofu.” Monna yo o be a tsebja motseng e le mokgopedi wa sefofu. Ka gona o ka nagana ka lethabo le lešata ge batho ba be ba mmona a sepela a kgona go bona! Lega go le bjalo, ga se bohle ba bego ba thabile. Ba befedišitšwe ke go pepentšha ga Jesu bofokodi bja bona phatlalatša pejana, ditho tše dingwe tša sehlotswana se se tsebegago le se se tutuetšago sa ba-Juda se bitšwago Bafarisei ba be ba le tlalelong ya go hwetša bohlatse bja bomenetša ka lehlakoreng la Jesu. (Johane 8:​13, 42-44; 9:​1, 6-31) Ka gona, ba ile ba botšološiša monna yo a fodišitšwego, batswadi ba gagwe gomme ka morago ba botšološiša monna gape. Eupša nyakišišo ya Bafarisei e ile ya fo tiišetša mohlolo wa Jesu, e lego seo se ilego sa ba befediša. A makaditšwe ke bokgopo bja baikaketši ba ba bodumedi, monna yo a fodišitšwego o ile a re: “Xo tloxa mehleng le mehla xa xo ešo xwa kwala xore motho ó budulotše mahlô a wa xo tswalwa è le sefofu. Xe motho eo e ka be e se wa Modimo, a ka be a s’a kxôna xo dira selô.” (Johane 9:​32, 33) Ka baka la polelo e botegago le e bohlale ya tumelo, Bafarisei ba ile “ba mo lêlêkêla ntlê,” seo se bonagalago se bolela gore ba ile ba raka monna yo e kilego ya ba sefofu ka sinagogeng.—Johane 9:​22, 34.

Bofoa: Ge Jesu a be a le Dekapoli, tikologo e lego ka bohlabela bja Noka ya Jorodane, “ba tla xo Yêna bà na le motho wa sefoa sa semuma.” (Mareka 7:​31, 32) Jesu ga se a ka a fodiša feela motho yo eupša gape o ile a utolla temogo e tseneletšego ka maikwelong a sefoa, seo se bego se ka lewa ke dihlong ka gare ga mašaba. Beibele e re botša gore Jesu o ile a “tšwa naê [monna wa sefoa] lešabeng,” gomme a mo fodiša. Le gona, dihlatse tše di bonego ka mahlo di ile tša ‘tlabega gagolo-golo,’ tša re: “Tšohle ó di dirile xa-botse; ó kwiša difoa; ó bolediša dimuma.”—Mareka 7:​33-37.

Go repha ditho: Ge Jesu a be a le Kaperenaume, batho ba ile ba tla go yena ba e-na le monna yo a rephilego ditho a robetše malaong. (Mateo 9:2) Ditemana 6 go ya go 8 di hlalosa seo se ilego sa direga. “Ya ba xôna [Jesu] a bolêlaxo le yo a rephilexo dithô a re: Tsoxa! Rwala malaô a xaxo, O yê ngwakong wa xaxo. Monna eo a tsoxa, a ya ngwakong wa xaxwe. Mašaba a batho xe a bôna tšeo, ba tlabêxa, ba tumiša Modimo e a filexo motho matla a makaakaa.” Mohlolo wo le wona o dirilwe barutiwa ba Jesu gotee le manaba a gagwe ba le gona. Ela hloko gore barutiwa ba Jesu, ba sa foufatšwe ke lehloyo goba kgethollo, ba ile “ba tumiša Modimo” ka seo ba se bonego.

Bolwetši: “Xwa tla motho wa lephêra, a mo kxopêla, a mo khunamêla ka matôlô, a re: Morêna, xe O ka rata, O ka kxôna xo mphodiša! Jesu a mo kwêla bohloko, a iša seatla a mo swara a re: Ke rata fao; fôla! A sa r’yalo, kê xe lephêra  lè mo tloxa.” (Mareka 1:​40-42) Hlokomela gore Jesu ga se a fodiša motho yo ka go ngongorega eupša o mo fodišitše ka kwelobohloko ya kgonthe. Nagana ge nkabe o le molephera. O be o tla ikwa bjang ge o be o fodišitšwe le semeetseng ka ntle le go kwešwa bohloko bolwetšing bjo bošoro bjoo bo tšwetšego pele bo hlagatša mmele wa gago gomme bo go dirile gore o ilwe ke setšhaba? Ka ntle le pelaelo o tla kwešiša lebaka leo ka lona molephera yo mongwe yo a ilego a fodišwa ka mohlolo a ilego “a wêla fase ka sefahloxô maotong a Jesu, a mo leboxa.”—Luka 17:​12-16.

Kgobalo: Mohlolo wa mafelelo wa Jesu pele ga ge a ka swarwa le go bolawa e be e le tiro ya go fodiša. Tirong ya bošoro malebana le bao ba bego ba le kgaufsi le go tšea Jesu, moapostola Petro, “yêna a bexo a na le thšoša, a e hlômôla, a rêma mohlanka wa moperisita e moxolo, a mo ripa tsêbê ya xo le letona.” (Johane 18:​3-5, 10) Pego e swanago go Luka e re botša gore Jesu o ile a “swara tsêbê ya mohlanka eo, a mo fodiša.” (Luka 22:​50, 51) Gape, tiro ye ya kwelobohloko e ile ya dirwa pele ga mahlo a bagwera ba Jesu gotee le manaba a gagwelebakeng le, baswari ba gagwe.

Ee, ge re hlahlobišiša mehlolo ya Jesu, ke moo re tšwelago pele re kwešiša bohlatse bja go ba ga yona ya kgonthe. (2 Timotheo 3:​16) Gomme bjalo ka ge go boletšwe pejana, thuto e bjalo e swanetše go matlafatša tumelo ya rena kholofetšong ya Modimo ya go fodiša batho ba kwago. Beibele e hlalosa tumelo ya Bakriste e le “tebelelo ye e kgonthišeditšwego ya dilo tše di holofetšwego, ke pontšho ye e bonagalago ya dilo tša kgonthe le ge di se tša bonwa.” (Ba-Hebere 11:1, NW) Ka mo go kwagalago, Modimo ga a kgothaletše go dumela dilo tšohle ka go foufala goba go iphora ka lefeela, eupša o kgothaletša tumelo e tiilego e theilwego bohlatseng. (1 Johane 4:1) Ge re dutše re hwetša tumelo e bjalo, re ikhwetša re e ba ba matla, ba phetšego gabotse le ba thabilego moyeng.Mateo 5:3; Ba-Roma 10:17.

Phodišo ya Moya

e Swanetše go tla Pele!

Batho ba bantši bao ba phetšego gabotse mmeleng ga se ba thaba. Ba bangwe e bile ba leka le go ipolaya ka gobane ga ba na kholofelo ka bokamoso goba ba ikwa ba gateletšwe ke mathata. Ge e le gabotse, ba babja moyengboemo bjo bo lego bohlokwa kudu mahlong a Modimo go feta bogole bja mmeleng. (Johane 9:​41) Ka lehlakoreng le lengwe, ba bantši bao ba golofetšego mmeleng, go swana le Christian le Junior bao go boletšwego ka bona sehlogong se se fetilego, ba phela maphelo a lethabo le a kgotsofatšago. Ka baka la’ng? Ka gobane ba phetše gabotse moyeng gomme ba fiwa mafolofolo ke kholofelo e kgonthišeditšwego e theilwego Beibeleng.

Ge Jesu a be a bolela ka senyakwa sa rena sa moswana-noši re le batho o itše: “Motho xa a phele ka boxôbê fêla; ó phela ka mantšu ohle a a tšwaxo molomong wa Modimo.” (Mateo 4:4) Ee, ka go fapana le diphoofolo, batho ba nyaka se se fetago go phela ka dilo tše di bonagalago. Ka ge re bopilwe ka ‘seswantšho’ sa Modimo, re nyaka dijo tša moyatsebo ya go tseba Modimo le kamoo re tsenago ka gona morerong wa gagwe gotee le go direng thato ya gagwe. (Genesi 1:​27; Johane 4:​34) Tsebo ya go tseba Modimo e tlatša maphelo a rena ka morero le tutuetšo ya go hlankela Modimo. Le gona e thea motheo bakeng sa bophelo bjo bo sa felego lefaseng la paradeise. Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.”—Johane 17:3.

Ke mo go lemogegago gore batho ba mehleng ya Jesu ba be ba sa mmitše “Mofodiši” eupša ba be ba mmitša “Morutiši.” (Luka 3:​12, NW; 7:​40, NW) Ka baka la’ng? Ka gobane Jesu o rutile batho ka tharollo ya sa ruri mathateng a bathoMmušo wa Modimo. (Luka 4:​43; Johane 6:​26, 27) Mmušo wo wa legodimong ka diatleng tša Jesu Kriste o tla buša lefase ka moka gomme wa phethagatša dikholofetšo ka moka tša Beibele tša mabapi le tsošološo e feletšego le e swarelelago ya batho ba go loka le legae la bona la lefaseng. (Kutollo 11:​15) Ke ka baka leo Jesu thapelong ya gagwe ya mohlala, a ilego a kopanya go tla ga Mmušo le go dirwa ga thato ya Modimo lefaseng.—Mateo 6:10.

Go ba bantši ba ba golofetšego, go ithuta ka  kholofelo ye e tutuetšago go bakile gore megokgo ya bona ya manyami e fetoge megokgo ya lethabo. (Luka 6:​21) Ge e le gabotse, Modimo o tla dira se segolo go feta go tloša bolwetši le bogole; o tla tloša sebaki sa tlaišego ya bathosebe ka bosona. Ka kgonthe, Jesaya 33:​24 le Mateo 9:​2-7, tšeo di tsopotšwego pejana, di kgokaganya bolwetši le boemo bja rena bja sebe. (Ba-Roma 5:​12) Ka gona, ge sebe se fentšwe, mafelelong batho ba tla thabela “tokoloxô ya xe bana ba Modimo bà e-ya letaxong,” tokologo yeo e akaretšago go phethagala ga monagano le ga mmele.—Ba-Roma 8:21.

Bao ba thabelago bophelo bjo bobotse mmeleng ba ka tšeela fase boemo bjo bja bona gabonolo. Eupša ga go bjalo ka batho bao ba tlaišwago ke bohloko bja magole. Ba tseba gabotse kamoo bophelo bjo bobotse bja mmele le bophelo di lego bohlokwa ka gona le kamoo di ka fetogago ka lebelo le ka mo go sa letelwago. (Mmoledi 9:​11) Ka gona, re holofela gore bao ba golofetšego gare ga babadi ba rena ba tla ela hloko kamoo go kgethegilego dikholofetšo tše kgahlišago tša Modimo tšeo di begilwego ka Beibeleng. Jesu o neile bophelo bja gagwe e le gore a kgonthišetše go phethagala ga tšona. Ke kgonthišetšo efe e kaone go feta ye yeo re ka bago le yona?—Mateo 8:​16, 17; Johane 3:​16.

[Mengwalo ya ka tlase]