Bathekgi ba Borapedi bja Therešo​—Nakong e Fetilego le Gona Bjale

NA O gopola leina la monna yo a ilego a llela motse wa bogologolo wa Jerusalema? O ka araba ka gore ‘ke Jesu’​—gomme ka kgonthe Jesu o ile a o llela. (Luka 19:​28, 41) Lega go le bjalo, nywaga-kgolo pele Jesu a ka sepela lefaseng, mohlanka yo mongwe yo a botegago wa Modimo le yena ka mo go swanago o ile a llela Jerusalema. Leina la gagwe e be e le Nehemia.​—Nehemia 1:​3, 4.

Ke eng seo se ilego sa dira gore Nehemia a nyame gakaakaa moo a ilego a ba a llela Jerusalema? O ile a dira’ng bakeng sa go hola motse le badudi ba ona? Gomme re ka ithuta’ng mohlaleng wa gagwe? E le gore re arabe dipotšišo tše, anke re hlahlobeng ditiragalo tše dingwe tša mehleng ya gagwe.

Monna wa Maikwelo le wa go Gata Mogato

Nehemia e be e le mmušiši yo a kgethilwego wa Jerusalema, eupša pele ga moo, e be e le letona la maemo a godimo kgorong ya Peresia motseng wa Susani. Lega go le bjalo, bophelo bja gagwe bja manobonobo ga se bja ka bja fediša go tshwenyega ga gagwe ka katlego ya bana babo ba ba-Juda ba bego ba le Jerusalema yeo e bego e le kgole le yena. Ge e le gabotse, selo sa mathomo seo a se dirilego ge baeng ba ba-Juda ba go tšwa Jerusalema ba be ba etetše Susani e bile go “ba botšiša ditaba tša Ba-Juda ba ba pholoxilexo, le tša mašalêla a boilexo bothopya, le tša  Jerusalêma.” (Nehemia 1:2) Ge baeng ba be ba araba ka gore batho ba Jerusalema ba be “ba phela ka bohloko byo boxolo” le gore merako ya motse e be e “phušoxile,” Nehemia ‘o ile a dula fase a lla a fetša matšatši a hlomogile pelo.’ Ka morago ga moo o ile a bolela maikwelo a gagwe a manyami ka go rapela Jehofa ka go tšwa pelong. (Nehemia 1:​3-11) Ke ka baka la’ng Nehemia a be a nyamile gakaakaa? Ka gobane Jerusalema e be e le lefelo la borapedi bja Jehofa lefaseng, gomme e be e hlokomologilwe. (1 Dikxoši 11:​36) Go feta moo, go wa ga motse e be e le pontšho ya boemo bjo bo fokolago bja moya bja badudi ba wona.​—Nehemia 1:​6, 7.

Go tshwenyega ga Nehemia ka Jerusalema le go kwela ga gagwe ba-Juda bao ba bego ba dula moo bohloko go ile gwa mo tutuetša gore a ineele. Kapejana ge kgoši ya Peresia e mo dumeletše gore a ikhutše mešomong ya gagwe, Nehemia o ile a thoma go rulaganya leeto le letelele la go ya Jerusalema. (Nehemia 2:​5, 6) O be a nyaka go neela matla a gagwe, nako le bokgoni go thekgeng modiro o bego o nyakega wa go lokiša. Ka morago ga matšatši a sego kae a fihlile, o be a šetše a rulagantše go lokiša maboto ka moka a Jerusalema.​—Nehemia 2:​11-18.

Nehemia o ile a aroganya modiro o mogolo wa go lokiša maboto gare ga malapa a mantši, ao ka moka ga ona a ilego a dirišana. * Dihlopha tše fetago tše 40 tše fapa-fapanego di be di abetšwe gore se sengwe le se sengwe se lokiše “seripa.” Mafelelo e bile afe? Ka ge go be go e-na le bašomi ba bantši gakaakaa​—go akaretša batswadi bao ba bego ba sepela le bana ba bona​—ba neela nako ya bona le matla, modiro wo o bego o bonagala e le o mogolo kudu o ile wa phethwa. (Nehemia 3:​11, 12, 19, 20) Pele ga ge dikgwedi tše pedi tša mošomo di ka fela, leboto ka moka le be le lokišitšwe! Nehemia o ile a ngwala gore gaešita le bao ba bego ba ganetša modiro wa go lokiša ba ile ba gapeletšega go dumela gore “modirô woo re o phethile Modimo wa rena à na le rena.”​—Nehemia 6:​15, 16.

Mohlala Woo o Swanetšego go Gopolwa

Nehemia ga se a neela feela nako ya gagwe le bokgoni bja gagwe bja go rulaganya. Le gona o ile a diriša dilo tša gagwe tše di bonagalago go thekga borapedi bja therešo. O ile a diriša tšhelete ya gagwe go reka bana babo ba ba-Juda bao ba bego ba le bokgobeng. O ile a adimiša tšhelete ka ntle le lešokotšo. Le ka mohla ga se a ka a ‘imetša’ ba-Juda ka go nyaka ditšhelete ka ge e le mmušiši, e lego selo seo a bego a le sona. Go e na le moo, o ile a dula a butše ngwako wa gagwe go fepa “ba lekxolo le masome a mahlano, le ba bangwê ba ba bexo ba e-tla xo rena bà e-tšwa dileteng thokô tšohle.” Letšatši le lengwe le le lengwe o be a hlabela baeng ba gagwe “pholo e tee, le dinku tše di selêlaxo, le dikxoxo.” Go oketša moo, gatee ka morago ga matšatši a lesome o be a ba nea “beine e ntši ya mehuta-huta”​—ka moka ka ditshenyagalelo tša gagwe.​—Nehemia 5:​8, 10, 14-18.

A mohlala o mobotse gakaakang wa go nea woo Nehemia a o beetšego bahlanka ba Modimo ka moka ba nakong yeo le ba gona bjale! Mohlanka yo a nago le sebete wa Modimo o ile a diriša dilo tša gagwe tše di bonagalago ka bolokologi le ka go rata bakeng sa go thekga bašomi e le gore ba tšwetše pele borapedi bja therešo. O be a ka kgopela Jehofa ka mo go swanetšego gore: “Hlê Modimo wa-ka! Tšohle tše ke di dirilexo sethšaba sé, O se di lebalê.” (Nehemia 5:​19) Ka kgonthe Jehofa o tla dira seo.​—Ba-Hebere 6:10.

Mohlala wa Nehemia o a Latelwa Lehono

Ke mo go ruthetšago pelo lehono go bona gore batho ba Jehofa ka mo go swanago ba bontšha maikwelo a borutho, go rata go gata mogato le boemo bja kgopolo bja go ineela bakeng sa borapedi bja therešo. Ge re e-kwa gore badumedi-gotee le rena ba a tlaišega, re tshwenyega kudu ka bophelo bja bona bjo bobotse. (Ba-Roma 12:​15) Go etša Nehemia, re retologela go Jehofa ka thapelo bakeng sa go thekga bana babo rena tumelong bao ba lego mathateng, re mo kgopela gore: “Hlê tsêbê ya xaxo e theetše thapêlô ya nna mohlanka wa xaxo, le ’thapêlô tša bahlanka ba xaxo ba ba rataxo xo boifa Leina la xaxo.”​—Nehemia 1:​11; Ba-Kolose 4:2.

Lega go le bjalo, go tshwenyega ga rena ka katlego ya moya le ya nama ya bana babo rena ba Bakriste le go tšwela pele ga borapedi bja therešo  ga go kgome feela maikwelo a rena. Le gona go re tutueletša go gata mogato. Bao maemo a bona a ba dumelelago ba tutuetšwa ke lerato go tlogela manobonobo a magae a bona, gomme ka go swana le Nehemia ba hudugele mafelong a mangwe go thuša bao ba nyakago thušo. Ba sa thibelwe ke maemo a tlase a bophelo ao baithapi ba bjalo ba ka lebeletšanago le wona dikarolong tše dingwe tša lefase, ba thekga go tšwela pele ga borapedi bja therešo fao, ba šoma ka tirišano le bana babo bona ba Bakriste. Moya wa boikgafo woo ba o bontšhago o tloga o retwa e le ka kgonthe.

Go Phetha Karolo ya Rena Setšhabeng sa Gabo Rena

Ka mo go kwešišegago, bontši bja rena ga re kgone go hudugela lefelong le lengwe. Re thekga borapedi bja therešo re le setšhabeng sa gabo rena. Seo le sona se bontšhitšwe ka pukung ya Nehemia. Ela hloko ditaba tšeo Nehemia a di tlaleletšago mabapi le ba bangwe ba malapa a botegago bao ba ilego ba tšea karolo modirong wa go lokiša. O ngwadile gore: “Jeyada morwa wa Harumafa, a axa mo xo lebanexo le ngwakô wa xaxwe . . . Benyamini le Hasuba ba ba bexo ba tsoša morakô mo o bexo o lebane le ngwakô wa bôná; ba be ba bataxane le Asaria morwa wa Maaseya morwa wa Ananya, e a bexo a tsoša morakô mo o lebanexo le ngwakô wa xaxwe.” (Nehemia 3:​10, 23, 28-30, mongwalo o sekamego ke wa rena.) Banna bao le malapa a bona ba ile ba tsenya letsogo kudu go tšwetšeng pele borapedi bja therešo ka go dira karolo ya bona modirong wa tsošološo setšhabeng sa gabo bona.

 Lehono, bontši bja rena re thekga borapedi bja therešo ditšhabeng tša gabo rena ka ditsela tše di fapa-fapanego. Re tšea karolo medirong ya go agwa ga Diholo tša Mmušo, medirong ya tlhakodišo nakong ya dikotsi, gomme sa bohlokwa kudu re tšea karolo modirong wa go bolela ka Mmušo. Go oketša moo, go sa šetšwe gore re kgona go tšea karolo ka noši modirong wa go aga goba wa tlhakodišo, ka moka ga rena re na le kganyogo e tšwago pelong ya go thekga borapedi bja therešo ka dilo tša rena tše di bonagalago, go etša ge Nehemia a ile a nea kudu mehleng ya gagwe.​—Bona lepokisi le le rego “Maswao a go Nea ka go Ithapa.”

Ka dinako tše dingwe go hwetša ditšhelete tše di nyakegago bakeng sa go thekga mediro e golago ya go gatiša, mediro ya tlhakodišo le ditirelo tše dingwe tše mmalwa tšeo di dirwago lefaseng ka bophara go ka bonagala e le mo go nolago moko. Lega go le bjalo, gopola gore modiro wa go tsošološa maboto a magolo a Jerusalema le wona o ile wa bonagala e le o nolago moko. (Nehemia 4:​10) Lega go le bjalo, ka ge modiro o be o arogantšwe gare ga malapa a mantši ao a ikemišeditšego, modiro o ile wa phethwa. Ka mo go swanago lehono, go hwetša didirišwa tše dingwe tše di nyakegago go tšwetša pele modiro wa rena wa lefaseng ka bophara go tla kgonega ge e ba yo mongwe le yo mongwe wa rena a tšwela pele go hlokomela karolo ya modiro.

Lepokisi le le rego “Ditsela Tšeo ka Tšona ba Bangwe ba Kgethago go Nea” le bontšha ditsela tše mmalwa tšeo ka tšona modiro wa Mmušo o ka thekgwago ka gona ka tša ditšhelete.  Ngwagola ba bantši gare ga batho ba Modimo ba neile thekgo e bjalo, gomme Sehlopha se Bušago sa Dihlatse tša Jehofa se rata go diriša sebaka se go leboga bohle bao dipelo tša bona di ba tutueleditšego go tšea karolo go neeng mo ka go ithapa. Go feta tšohle, re leboga Jehofa ka tšhegofatšo ya gagwe e humilego maitekong a mabotse a batho ba gagwe go godišeng borapedi bja therešo lefaseng ka bophara. Ee, ge re nagana ka tsela yeo seatla sa Jehofa se re hlahlilego ka gona go theoša le nywaga, re tutueletšega go bolela mantšu a Nehemia, yoo a ilego a leboga ka gore: ‘Seatla sa Modimo wa-ka se be se le botho godimo ga-ka.’​—Nehemia 2:​18, PK.

[Mongwalo wa ka tlase]

[Lepokisi/Diswantšho go letlakala 28, 29]

Ditsela Tšeo ka Tšona ba Bangwe ba Kgethago go Nea

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo ya tšhelete yeo ba e tsenyago ka mapokising ao a ngwadilwego “Meneelo Bakeng sa Modiro wa Lefase ka Bophara​—Mateo 24:​24.”

Kgweding e nngwe le e nngwe, diphuthego di romela ditšhelete tše ntlong-kgolo ya Dihlatse tša Jehofa goba ofising ya lekala ya lefelong leo. Meneelo ya go ithatela ya ditšhelete e ka romelwa ka go lebanya go Accounting Office, Watch Tower Bible and Tract Society of Pennsylvania, Private Bag X2067, Krugersdorp, 1740, South Africa, goba ofising ya lekala yeo e hlankelago naga ya geno. Mabenyabje goba dilo tše dingwe tša bohlokwa le tšona di ka neelwa. Lengwalo le le kopana leo le bolelago gore selo se bjalo ke mpho e neelwago ka go lebanya le swanetše go sepela le meneelo ye.

THULAGANYO YA MENEELO YEO E ITHEKGILEGO KA MAEMO

Tšhelete e ka neelwa ka tlase ga thulaganyo e kgethegilego yeo go yona ge e ba monei a e-na le senyakwa sa motho ka noši, moneelo o tla bušetšwa go yena. Bakeng sa tsebišo e oketšegilego, hle ikopanye le Accounting Office ya ofisi ya lekala ya lefelong la geno atereseng e bontšhitšwego ka mo godimo.

GO NEA MO GO RULAGANTŠWEGO

Go tlaleletša go dimpho tša ditšhelete tše di newago ka go lebanya le meneelo ya tša ditšhelete yeo e ithekgilego ka maemo, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Phemelo: Mokgatlo wa Watch Tower o ka ngwadišwa e le moja-bohwa wa thulaganyo ya tša phemelo ya bophelo goba thulaganyo ya go rola modiro/phenšene.

Di-Stock le di-Bond: Di-stock le di-bond di ka neelwa go Mokgatlo wa Watch Tower.

Dintlo le Mafelo ao e Lego Dithoto: Dintlo le mafelo ao e lego dithoto tšeo di ka rekišwago di ka neelwa Mokgatlo wa Watch Tower e le mpho e neelwago ka go lebanya goba ka go boloka thoto e le go monei, yo a ka tšwelago pele a dula go yona ge a sa dutše a phela. Ikopanye le ofisi ya lekala ya nageng ya geno pele o fetiša ntlo le ge e le efe goba lefelo leo e lego thoto.

Dikeno: Dithoto goba ditšhelete di ka tlogelelwa Mokgatlo wa Watch Tower e le bohwa ka go dirišwa ga keno e dirilwego ke molao.

Ge e ba o na le kgahlego go le ge e le efe ya dithulaganyo tše tša go nea, o swanetše go ikopanya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba ofising ya Mokgatlo yeo e hlankelago naga ya geno.

Accounting Office

Watch Tower Bible and Tract Society of Pennsylvania

Private Bag X2067, Krugersdorp, 1740, South Africa

Mogala: (011) 761 1000

[Lepokisi go letlakala 30]

Maswao a go Nea ka go Ithapa

Lengwalong la gagwe le le yago go ba-Korinthe, moapostola Paulo o boletše maswao a mararo a bohlokwa a go nea ka go ithapa. (1) Ge a be a ngwala ka moneelo wa ditšhelete, Paulo o laetše gore: “Ka la xo hlatlama Sabatha e mongwê le e mongwê a nthšê sa xaxwe.” (1 Ba-Korinthe 16:2a) Ka gona, go nea go nyaka gore go rulaganywe e sa le pele, gomme go swanetše gore go dirwe ka lenaneo. (2) Le gona Paulo o ngwadile gore motho yo mongwe le yo mongwe o swanetše go nea “ka mo a ruilexo ka xôna.” (1 Ba-Korinthe 16:2b) Ka mantšu a mangwe, motho yo a nyakago go tšea karolo go neeng a ka dira bjalo go ya ka matla a gagwe. Gaešita le ge Mokriste a hwetša tšhelete e nyenyane feela, bonyenyane bjoo a ka bo neelago ke bja bohlokwa go Jehofa. (Luka 21:​1-4) (3) Paulo o ngwadile ka mo go tšwelago pele gore: “E mongwê le e mongwê a nthšê ka mo a kwanexo le pelo ya xaxwe; a se nthšê ka xo belaêla le ka xo xapeletšwa, xobane Mo-nea-à-thabile, Modimo ó a mo rata.” (2 Ba-Korinthe 9:7) Bakriste ba kgonthe ba nea ka go tšwa pelong​—ba thabile.

[Diswantšho go letlakala 26]

Nehemia e be e le monna wa maikwelo le wa go gata mogato

[Diswantšho go letlakala 30]

Meneelo ya boithatelo e thekga mediro ya go gatiša, mediro ya tlhakodišo, go agwa ga Diholo tša Mmušo le ditirelo tše dingwe tša bohlokwa lefaseng ka bophara