Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

Bokgoni bja go nagana” bo ka itlhatsela bjang go ba tšhireletšo? (Diema 1:​4, NW)

Bo ka re thuša go lemoga dikotsi tša moya, gomme bo ka re tutueletša go rulaganya tsela e bohlale ya go lebeletšana le boemo ka katlego, bjo bjalo ka go phema meleko ya dikopano tša botona le botshadi mošomong. Bo re thuša go lemoga gore Bakriste-gotee le rena ga se ba phethagala, e lego seo se ka re thušago go phema go arabela kapejana ge re tshwentšwe. Le gona bo ka re thuša go phema dikgateletšo tša go rata dilo tše di bonagalago tšeo di ka re arošago tseleng ya moya.​—⁠8/15, matlakala 21-⁠4.

• Ke bjang motho a ka bago moagišani yo bohlokwa?

Ditsela tše pedi tša go ba moagišani yo mobotse ke go ba monei yo botse le moamogedi yo a nago le tebogo. Go bohlokwa go ba moagišani yo botse ge go tšwelela masetla-pelo. Dihlatse tša Jehofa di katanela go ba baagišani ba botse ka go lemoša ba bangwe ka tiragalo yeo e lego kgaufsi le go diragala, kgato ya Modimo ya go fediša bokgopo.​—⁠9/1, matlakala 4-⁠7.

• Go ya ka Beibele, ke bomang bao e lego bakgethwa ba kgonthe, gomme ba tla thuša batho bjang?

Bakriste ba pele ka moka e be e le bakgethwa ba kgonthe, ba dirilwe bakgethwa ke Modimo, e sego ke batho goba mekgatlo. (Ba-Roma 1:⁠7) Ge ba tsošeditšwe bophelong bja legodimong, bakgethwa ba tla tšea karolo le Kriste go šegofatšeng batho bao ba botegago mo lefaseng. (Ba-Efeso 1:​18-21)​—⁠9/15, matlakala 5-⁠7.

• Go tseba se sengwe ka ditiragalo tša mabelo tša Gerika ya bogologolo go ka ba le mohola ofe go Bakriste?

Mangwalo a moapostola Petro le moapostola Paulo a na le diswantšho goba ditsopolo tšeo di theilwego dipapading tša bogologolo. (1 Ba-Korinthe 9:​26; 1 Timotheo 4:⁠7; 2 Timotheo 2:⁠5; 1 Petro 5:​10) Go ramabelo wa bogologolo, go be go le bohlokwa go ba le motlwaetši yo mobotse, go ba le boitshwaro gotee le go diriša maiteko a gagwe gabotse. Se se swanago ke sa therešo mabapi le maiteko a moya a Bakriste lehono.​—⁠10/1, matlakala 28-⁠31.

• Go godišetša bana nageng e šele go na le mathata le meputso efe?

Bana ba bantši ba ithuta leleme le lefsa kapejana kudu go feta batswadi ba bona, bao ba ka hwetšago go le thata go kwešiša tsela yeo bana ba bona ba naganago ka yona le go arabela ka yona. Le gona bana ba ka fo se kwešiše gabonolo dithuto tša Beibele ka leleme la batswadi ba bona. Lega go le bjalo, ditlamo tša lapa di ka matlafatšwa ge batswadi ba ruta bana ba bona segagabo bona, bao mafelelong ba ka tsebago maleme a mabedi le go ikwa ba le karolo ya ditšo tše pedi.​—⁠10/15, matlakala 22-⁠6.

• Ke ka baka la’ng go ithuta go kgopela tshwarelo go le bohlokwa?

Go kgopela tshwarelo ka go tšwa pelong gantši ke tsela ya go lokiša tswalano yeo e senyegilego. Beibele e nea mehlala ya matla ao go kgopela tshwarelo go ka bago le ona. (1 Samuele 25:​2-35; Ditiro 23:​1-⁠5) Gantši, ge batho ba babedi ba fapane, ba na le phošo ka bobedi. Ka gona, tumelelano le go kgopelana tshwarelo di a nyakega.​—⁠11/1, matlakala 4-⁠7.

• Ke ka baka la’ng go petšha gaešita le ka tšhelete e nyenyane go le kotsi?

Go petšha go ka tutueletša boithati, moya wa phadišano le megabaru, e lego dilo tšeo Beibele e di ganetšago. (1 Ba-Korinthe 6:​9, 10) Ba bantši bao ba lemaletšego go petšha ba thomile e sa le ba banyenyane ka go petšha ka tšhelete e nyenyane.​—⁠11/1, letlakala 31.

• Ka ge dipuku tše dintši tša Beibele di be di ngwadilwe ka Segerika, ke ka baka la’ng go ile gwa nyakega gore go fetolelwe Beibele ka Segerika, gomme ka mafelelo afe?

Segerika sa mehleng yeno se fapane kudu le Segerika sa phetolelo ya Septuagint ya Mangwalo a Sehebere le ya Mangwalo a Bakriste a Segerika. Nywaga-kgolong ya morago bjale go bile le maiteko a mmalwa a go fetolela Beibele ka moka goba karolo ya yona ka Segerika se se bolelwago. Lehono go na le diphetolelo tše ka bago tše 30 tša Beibele, di feletše goba ka dikarolo tša tšona, tšeo di balegago go ba-Gerika ba tlwaelegilego, ya bohlokwa e le ka kgonthe ke New World Translation of the Holy Scriptures, yeo e gatišitšwego ka 1997.​—⁠11/15, matlakala 26-⁠9.

• Ke ka baka la’ng go ntšha karolo ya lesome go sa nyakege go Bakriste?

Ka tlase ga Molao wo o bego o neilwe Isiraele ya bogologolo, go ntšha karolo ya lesome e be e le tsela ya go thekga leloko la Lefi le go hlokomela bahloki. (Lefitiko 27:​30; Doiteronomio 14:​28, 29) Lehu la sehlabelo la Jesu le ile la fediša Molao le go nyaka ga wona gore go ntšhwe karolo ya lesome. (Ba-Efeso 2:​13-15) Phuthegong ya pele, e be e le mokgwa wa Mokriste yo mongwe le yo mongwe gore a nee go ya kamoo a kgonago ka gona le kamoo a dumelelanego le pelo ya gagwe ka gona. (2 Ba-Korinthe 9:​5, 7)​—⁠12/1, matlakala 4-⁠6.

• Na Kutollo 20:⁠8 e bolela gore Sathane o tla aroša batho ba bantši tekong ya mafelelo?

Temana ye e re bao ba tla arošwago ba tla ba ‘bjalo ka lešabašaba la lewatle.’ Ka Beibeleng, polelwana yeo gantši e bolela palo yeo e sa tsebjego, ka ntle le go šišinya gore ke e ntši kudu. Peu ya Aborahama, yeo e bego e tla ba “byalo ka lešabašaba la lebotong la lewatlê,” e ile ya ba batho ba 144 000 go sa balwe le Jesu Kriste. (Genesi 22:​17; Kutollo 14:​1-⁠4)​—⁠12/1, letlakala 29.