Khomotšo Bakeng sa Bao ba Tlaišegago

KA NYWAGA-KGOLO e mentši, taba ya gore ke ka baka la’ng Modimo a dumelela tlaišego e hlohlile bo-radifilosofi le bo-rathutatumelo ba bantši. Ba bangwe ba boletše gore ka ge Modimo a na le matla a magolo, o swanetše go ikarabela ka mo go feletšego ka tlaišego. Mongwadi wa The Clementine Homilies, e lego puku ya lekgolong la bobedi la nywaga yeo go se nago kgonthe ya yona, o boletše gore Modimo o buša lefase ka matsogo a mabedi. Ka ‘letsogong la gagwe le letshadi,’ ke Diabolo, yo a bakago tlaišego le mathata, gomme ka ‘letsogong la gagwe le letona,’ ke Jesu, yo a phološago le go šegofatša.

Ba bangwe ka ge ba palelwa ke go dumela gore Modimo a ka dumelela tlaišego gaešita le ge e sa bakwe ke yena, ba kgethile go gana gore tlaišego e gona. Mary Baker Eddy o ngwadile gore: “Bobe ke selo sa boikgopolelo, gomme ga bo na motheo wa kgonthe. Ge nkabe sebe, bolwetši le lehu di be di kwešišwa e le boemo bja go se be selo, di be di ka nyamelela.”​—Science and Health With Key to the Scriptures.

Ka baka la ditiragalo tša masetla-pelo tša histori, kudu-kudu ga e sa le go tloga ntweng ya pele ya lefase go fihla le lehono, ba bantši ba fihleletše phetho ya gore Modimo o fo ba a palelwa ke go thibela tlaišego. Seithuti sa Mojuda e lego David Wolf Silverman se ngwadile gore: “Ke nagana gore Polao e Sehlogo e fedišitše go dirišwa ga bonolo le ge e le gofe ga matla a magolo e le selo seo go bolelwago gore se swanetše Modimo.” O okeditše ka gore: “Ge e ba Modimo a swanetše go kwešišwa ka tsela e itšego, gona go loka ga Gagwe go swanetše go dumelelana le go ba gona ga bobe, gomme se ke sa kgonthe ge feela A se na matla a magolo.”

Lega go le bjalo, dipolelo tša gore Modimo o ikarabela ka tsela e itšego ka tlaišego, gore o palelwa ke go e thibela goba gore tlaišego e fo ba selo seo re itlhamelago sona ka menaganong ya rena, ga di nee khomotšo e lekanego go bao ba tlaišegago. Le gona sa bohlokwa kudu ke gore ditumelo tša mohuta woo di ganetšana le dika tša Modimo yo a nago le toka, yo mogolo le yo a hlokomelago yoo a utollwago ka matlakaleng a Beibele. (Jobo 34:​10, 12; Jeremia 32:​17; 1 Johane 4:⁠8) Ka gona, Beibele e re’ng ka lebaka leo ka lona go dumeletšwego tlaišego?

Tlaišego e Thomile Bjang?

Modimo ga se a bopela batho gore ba tlaišege. Ka mo go fapanego, o ile a nea banyalani ba pele e lego Adama le Efa, menagano le mebele e phethagetšego, a ba lokišeletša serapa se se kgahlišago gore e be legae la bona, gomme a ba abela modiro o nago le morero le o kgotsofatšago. (Genesi 1:​27, 28, 31; 2:⁠8) Lega go le bjalo, lethabo la bona le le tšwelago pele le be le ithekgile ka go lemoga ga bona bogoši bja Modimo le tshwanelo ya gagwe ya go dira phetho ka se se lokilego le se sebe. Taelo yeo ya Modimo e ile ya emelwa ke sehlare seo se bitšwago “sehlare sa xo tseba botse le bobe.” (Genesi 2:​17) Adama le Efa ba be ba tla bontšha go ikokobeletša ga bona Modimo ge nkabe ba ile ba kwa taelo ya gagwe ya gore ba se je seenywa sa sehlareng seo. *

Ka manyami, Adama le Efa ba ile ba palelwa ke go kwa Modimo. Sebopiwa sa moya seo se bego se rabela, seo ka morago se ilego sa tsebja e le Sathane Diabolo, se ile sa kgodiša Efa gore go kwa Modimo go be go sa mo hole ka selo. Ge e le gabotse, go be go bonala Modimo a  be a mo tima selo se itšego seo se kganyogegago kudu: boipušo, tshwanelo ya go ikgethela se se lokilego le se sebe. Sathane o ile a bolela gore ge e ba a be a ka ja seenywa sa sehlareng, ‘mahlo a gagwe a be a ka buduloga a ba bjalo ka Modimo, a tseba botse le bobe.’ (Genesi 3:​1-⁠6; Kutollo 12:⁠9) A gokeditšwe ke tebelelo ya go ipuša, Efa o ile a ja sehlare seo se bego se ileditšwe, gomme go se go ye kae Adama le yena o ile a latela.

Ka lona letšatši leo, Adama le Efa ba ile ba thoma go lebeletšana le mafelelo a borabele bja bona. Ka go gana bogoši bja Modimo, ba ile ba lahlegelwa ke tšhireletšo le ditšhegofatšo tšeo go ikokobeletša Modimo go bego go ba tlišetša tšona. Modimo o ile a ba raka Paradeiseng gomme a botša Adama gore: “Lefase le roxilwe ka ’baka la xaxo; tša lôna O tlo di ja ka tapišêxô mehla yohle ya xo phela xa xaxo. Boxôbê O tlo bo ja ka dikudumêla tša sefahloxô sa xaxo; wa bá wa boêla mmung.” (Genesi 3:​17, 19) Adama le Efa ba ile ba lebeletšana le bolwetši, bohloko, botšofadi le lehu. Tlaišego e ile ya thoma go ba karolo ya bophelo bja motho.​—Genesi 5:⁠29.

Go Lokiša Bothata

Motho yo mongwe a ka botšiša gore, ‘Na Modimo o be a ka se fo hlokomologa sebe sa Adama le Efa?’ Aowa, ka gobane seo se ka be se ile sa nyatša go hlompšhwa ga bolaodi bja gagwe ka mo go tšwelago pele, mohlomongwe gwa tutueletša gore go be le marabele a ka moso gomme gwa feleletša ka tlaišego e kgolo kudu. (Mmoledi 8:​11) Go oketša moo, go amogela go se kwe mo go bjalo go ka ba go ile gwa dira Modimo gore e be motšea-karolo tirong ya bobe. Mongwadi wa Beibele e lego Moše o re gopotša gore: “Ké Yêna Lentšwê, yo tirô-phethexi, ka xe ’tsela tša’xwe tšohle di lokile, Yêna Modimo wa therešô, Mo-ila-bokxôpô, Moloki, Yêna Mosiami.” (Doiteronomio 32:⁠4) E le gore a ipotegele, Modimo o ile a swanela ke go dumelela Adama le Efa go tlaišwa ke ditla-morago tša go se kwe ga bona.

Ke ka baka la’ng Modimo a ile a se fediše banyalani ba pele go akaretša le Sathane, yo e lego mohlami yo a sa bonagalego wa borabele bja bona? O be a na le matla a go dira bjalo. Adama le Efa ba be ba ka se be le bana bao ba bego ba ka se be le leabela la go tlaišega le la go hwa. Lega go le bjalo, pontšho e bjalo ya matla a Modimo e be e ka se hlatsele go swanelegela ga bolaodi bja Modimo go laola dibopiwa tša gagwe tše bohlale. Go oketša moo, ge nkabe Adama le Efa ba ile ba hwa ba se na bana, seo se ka ba se bontšhitše go palelwa ga morero wa Modimo wa go tlatša ga bona lefase ka ditlogolo tša bona tše di phethagetšego. (Genesi 1:​28) Le gona “Modimo ga a swane le batho . . . Selo le ge e le sefe seo a se holofetšago, o a se dira; o a bolela gomme sa dirwa.”​—Numeri 23:​19, Today’s English Version.

Ka bohlale bja gagwe bjo bo phethagetšego, Jehofa Modimo o ile a phetha ka go dumelela borabele go tšwela pele ka nako e lekaneditšwego. Marabele a be a ka ba le sebaka se se lekanego sa go bona ditla-morago tša go ipuša ntle le Modimo. Histori e bontšhitše ntle le pelaelo go hloka ga batho tlhahlo ya Modimo le go phagamela ga pušo ya Modimo pušo ya batho goba ya Sathane. Ka nako e swanago, Modimo o ile a gata megato ya go kgonthišetša gore morero wa gagwe wa mathomo ka lefase o tla phethagatšwa. O ile a holofetša gore go be go tla tla “peu,” yeo e bego e tla ‘pšhatla Sathane hlogo,’ ya fediša borabele bja gagwe le ditla-morago tša yona tše di senyago gatee ya ba moka.​—Genesi 3:⁠15.

Jesu Kriste e be e le Peu yeo e holofeditšwego. Re bala go 1 Johane 3:⁠8 gore “se Morwa-Modimo a [se] tletšexo . . . ké xo fediša medirô ya Diabolo.” Se o se dirile ka go neela bophelo bja gagwe bjo bo phethagetšego e le motho le ka go lefa tefo ya topollo go lokolla bana ba Adama sebeng le lehung tša leabela. (Johane 1:​29; 1 Timotheo 2:​5, 6) Bao ba tlogago ba bontšha tumelo sehlabelong sa Jesu ba holofetšwa go lokollwa tlaišegong ka mo go sa felego. (Johane 3:​16; Kutollo 7:​17) Se se tla direga neng?

 Go Fela ga Tlaišego

Go ganwa ga bolaodi bja Modimo go bakile tlaišego yeo e sa hlalosegego. Ka gona, ke mo go swanetšego gore Modimo o swanetše go bontšha matla a gagwe ka tsela e kgethegilego bakeng sa go fediša tlaišego ya batho gomme a fihlelele morero wa gagwe wa mathomo ka lefase. Jesu o ile a bolela ka tokišetšo ye ya Modimo ge a be a ruta balatedi ba gagwe go rapela: “Tata-wešo wa maxodimong! . . . mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mongwalo o sekamego ke wa rena.)​—Mateo 6:​9, 10.

Nako yeo Modimo a dumeletšego gore batho ba latswe boipušo e kgaufsi le go fela. Ka go phethagatšwa ga boporofeta bja Beibele, Mmušo wa gagwe o ile wa hlongwa magodimong ka 1914, Jesu Kriste e le Kgoši ya wona. * Go se go ye kae, o tla pšhatla gomme o fediše mebušo ka moka ya batho.​—Daniele 2:⁠44.

Nakong ya bodiredi bja gagwe bjo bokopana bja mo lefaseng, Jesu o ile a nea tatso e sa lego ka pele ya ditšhegofatšo tšeo go hlongwa lefsa ga pušo ya Modimo go tlago go di tlišetša batho. Diebangedi di nea bohlatse bja gore Jesu o ile a bontšha kwelobohloko go batho bao ba bego ba diila e bile ba kgethollwa. O ile a fodiša balwetši, a fepa ba swerego ke tlala gomme a tsoša bahu. Gaešita le matla a tlhago a ile a kwa lentšu la gagwe. (Mateo 11:⁠5; Mareka 4:​37-39; Luka 9:​11-16) Nagana ka seo Jesu a tlago go se phethagatša ge a diriša mafelelo a hlwekišago a sehlabelo sa gagwe sa topollo go hola batho ka moka bao ba kwago! Beibele e holofetša gore ka pušo ya Kriste, Modimo o tla “phomola mexôkxô ka moka mahlong a [batho]; le lehu le ka se hlwê le e-⁠ba xôna; le xe e le manyami le dillô le bohloko, di ka se hlwê di e-⁠ba xôna.”​—Kutollo 21:⁠4.

Khomotšo Bakeng sa Bao ba Tlaišegago

Ke mo go kgothatšago gakaakang go tseba gore Modimo wa rena yo a nago le lerato le yo a nago le matla a magolo, Jehofa, o a re hlokomela gomme kgaufsinyane o tla tlišetša batho kimologo! Ka tlwaelo, motho yo a babjago o šoro o amogela ka go rata kalafo yeo e tlago go mo fodiša gaešita le ge e le bohloko kudu. Ka tsela e swanago, ge e ba re tseba gore tsela ya Modimo ya go swaragana le ditaba e tla tliša ditšhegofatšo tša ka mo go sa felego, tsebo yeo e ka re matlafatša go sa šetšwe mathata a nakwana ao re lebeletšanago le ona.

Ricardo yo go boletšwego ka yena sehlogong se se fetilego, ke yo mongwe wa bao ba ithutilego go hwetša khomotšo go tšwa dikholofetšong tša Beibele. O gopola gore: “Ka morago ga lehu la mosadi wa-ka, ke ile ka ba le kganyogo e matla ya go ipea lekatana, eupša go se go ye kae ke ile ka lemoga gore seo se be se ka se buše mosadi wa-ka gomme seo se tla mpefatša boemo bja maikwelo a-⁠ka.” Go e na le moo, Ricardo o ile a kgomarela mokgwa wa gagwe wa go ba dibokeng tša Bokriste le go abelana le ba bangwe molaetša wa Beibele. Ricardo o re: “Ge ke dutše ke e kwa thekgo e lerato ya Jehofa gomme ke lemoga kamoo a arabago dithapelo tša-ka le dilong tšeo di bego di bonala e le tše dinyenyane, ke ile ka mmatamela kgaufsi. E bile go lemoga ga-ka lerato le la Modimo moo go dirilego gore ke kgone go kgotlelela seo ka ntle le pelaelo e bego e le teko e kgolo kudu yeo nkilego ka lebeletšana le yona.”  O dumela gore: “Ke sa dutše ke hlologelwa mosadi wa-ka kudu, eupša ga bjale ke dumela ka matla gore ga go selo seo Jehofa a se dumelelago gore se direge seo se ka re dirago gore re gobale ka mo go sa felego.”

Na le wena ka go swana le Ricardo le ba bangwe ba dimilione, o hlologela nako yeo ka yona tlaišego ya batho ‘e ka se hlwego e tsebja, le mo pelong ya motho e ka se hlwego e rotoga’? (Jesaya 65:​17) Kgodišega gore ditšhegofatšo tša Mmušo wa Modimo ke selo seo o ka se fihlelelago ge e ba o latela keletšo ya Beibele e rego: “Nyakang Morêna è sa le lebaka la xo ka mmôna, Le mmitšeng à sa le kxaufsi.”​—Jesaya 55:⁠6.

Go go thuša go dira se, dira go bala le go ithuta Lentšu la Modimo ka kelohloko go ba selo se se tlago pele bophelong bja gago. Tseba Modimo gotee le moromiwa wa gagwe e lego Jesu Kriste. Katanela go phela ka go dumelelana le ditekanyetšo tša Modimo gomme ka go rialo o bontšhe gore o rata go ikokobeletša bogoši bja gagwe. Tsela e bjalo e tla go tlišetša lethabo le legolo gona bjale go sa šetšwe diteko tšeo o ka swanelago ke go lebeletšana le tšona. Ka gona nakong e lego ka pele, go tla feleletša ka gore o thabele bophelo lefaseng leo le se nago tlaišego.​—Johane 17:⁠3.

[Mengwalo ya ka tlase]

[Lepokisi go letlakala 6, 7]

RE KA LEBELETŠANA BJANG KA KATLEGO LE TLAIŠEGO?

“Dipelaêlô tša lena ka moka di lahleleng xodimo xa [Modimo].” (1 Petro 5:⁠7) Ke ga tlhago gore ge re tlaišega goba re bona motho yo mongwe yo re mo ratago a tlaišega, re be le maikwelo a kgakanego, pefelo le go kwa re lahlilwe. Lega go le bjalo, a re kgodišegeng gore Jehofa o kwešiša maikwelo a rena. (Ekisodo 3:⁠7; Jesaya 63:⁠9) Ka go swana le banna ba botegago ba bogologolo, re ka mmulela dipelo tša rena gomme ra hlalosa dipelaelo tša rena. (Ekisodo 5:​21; Jobo 10:​1-⁠3; Jeremia 14:​19; Habakuku 1:​13) A ka fo se tloše diteko tša rena ka mohlolo, eupša ka go arabela dithapelo tša rena tše tšwago pelong, a ka re nea bohlale le matla gore re lebeletšane le tšona.​—Jakobo 1:​5, 6.

“Le se kê la tlabya ke phišô ye e Le wetšexô xore Le lekwê ka yôna; e se kê ya Le tlaba bo-ka selô se Le sa se tsebexo.” (1 Petro 4:​12) Petro mo o bolela ka tlaišo, eupša mantšu a gagwe a šoma ka mo go swanago le go tlaišego le ge e le efe yeo modumedi a ka lebeletšanago le yona. Batho ba tlaišwa ke bodiidi, bolwetši le go lahlegelwa ke baratiwa ba bona. Beibele e re “nako le ditiragalo tše di sa letelwago” di wela batho bohle. (Mmoledi 9:​11) Dilo tše bjalo ke karolo ya boemo bja batho mo nakong ye. Go kwešiša se go tla re thuša go lebeletšana ka katlego le go tšwelela ga tlaišego le go hloka mahlatse. (1 Petro 5:⁠9) Sa bohlokwa kudu, go gopola kgonthišetšo ya gore “mahlô a Morêna a bôna baloki; [gomme] ’tsêbê tša xaxwe di kwa xe ba lla,” e tla ba mothopo o kgethegilego wa khomotšo.​—Psalme 34:​15; Diema 15:⁠3; 1 Petro 3:⁠12.

“Thabang kholofelong.” (Ba-Roma 12:​12) Go e na le go tšwela pele re nagana ka lethabo la nakong e fetilego leo re bego re e-⁠na le lona, re ka naganišiša ka kholofetšo ya Modimo ya go fediša tlaišego ka moka. (Mmoledi 7:​10) Kholofelo ye e matla e tla re šireletša go fo swana le ge kefa e šireletša hlogo. Kholofelo e thoba mahloko bophelong gomme e re thuša go kgonthišetša gore ga a gobatše bophelo bja rena bjo bobotse bja monagano, maikwelo le bja moya.​—1 Ba-Thesalonika 5:⁠8.

[Seswantšho go letlakala 5]

Adama le Efa ba ile ba gana pušo ya Modimo

[Seswantšho go letlakala 7]

Modimo o holofetša lefase leo le se nago tlaišego