Bota Jehofa Ka Pelo Ya Gago Ka Moka
Bota Jehofa Ka Pelo Ya Gago Ka Moka
“Ba ba tsebaxo leina la xaxo ba Xo holofetše.”—Psalme 9:10.
1, 2. Ke dilo dife tše dingwe tša lefeela tšeo batho ba di botago bakeng sa go ba šireletša?
LEHONO, ge dilo tše dintši gakaakaa di bea bophelo bja rena bjo bobotse kotsing, ke ga tlhago go nyaka motho goba selo se itšego seo se ka re šireletšago. Ba bangwe ba nagana gore go ba le tšhelete e ntši go ka šireletša bokamoso bja bona, eupša go bolela therešo, tšhelete ke sebo seo se sa kgonthišetšwago. Beibele e re: “Pôta-mahumô ó tlo wa.” (Diema 11:28) Ba bangwe ba bota baetapele ba batho, eupša gaešita le baetapele ba bakaone kudu ba dira diphošo. Le gona mafelelong, ka moka ga bona ba a-hwa. Beibele e bolela ka bohlale gore: “Se boteng maxoši e lexo bana ba batho, bao xo sexo phološô xo bôná.” (Psalme 146:3) Mantšu ao a buduletšwego le ona a re lemoša malebana le go bota maiteko a rena ka noši. Le rena re fo ba “bana ba batho.”
2 Moporofeta Jesaya o ile a bona baetapele ba setšhaba sa Isiraele phošo mehleng ya gagwe, ka gobane ba be ba botile “bokhutô byola bya maaká.” (Jesaya 28:15-17) Go tsomeng ga bona tšhireletšego, ba ile ba dira kgwerano ya dipolitiki le ditšhaba tša baagišani. Dikgwerano tše bjalo di be di sa botege—e be e le tša maaka. Ka tsela e swanago, lehono baetapele ba bantši ba bodumedi ba hlagolela ditswalano le baetapele ba tša dipolitiki. Le tšona dikgwerano tšeo di tla iponagatša go ba tša “maaká.” (Kutollo 17:16, 17) Di ka se tliše tšhireletšego ya ka mo go sa felego.
Mohlala o Mobotse wa Jošua le wa Kalebe
3, 4. Jošua le Kalebe le dihlodi tše dingwe tše lesome ba ile ba tliša dipego dife tše di sa swanego go tšwa Nageng ya Kholofetšo?
3 Ka gona, re swanetše go nyaka tšhireletšego kae? Gona moo Jošua le Kalebe ba ilego ba lebelela gona mehleng ya Moše. Kapejana ka morago ga gore Isiraele e lokollwe bokgobeng kua Egipita, setšhaba se be se itokišeditše go tsena Kanana, Nageng ya Kholofetšo. Banna ba lesome-pedi ba ile ba rongwa go ya go hlola naga, gomme ka morago ga matšatši a 40 ba ile ba tliša pego. Ke feela ba babedi e lego Jošua le Kalebe bao ba ilego ba bolela gabotse ka ditebelelo tša Isiraele kua Kanana. Ba bangwe ba ile ba dumelelana ka gore naga e be e le e botse eupša ba re: “Fêla, batho ba ba axilexo naxeng yeo ké ba bathata; metse ké dibo . . . Re ka se kê ra kxôna xo lwa le sethšaba seo, ka xobane se re feta ka matla.”—Numeri 13:27, 28, 31.
4 Ba-Isiraele ba ile ba theetša dihlodi tše lesome gomme ba boifa, moo ba ilego ba ba ba belaela ka Moše. Mafelelong, Jošua le Kalebe ba ile ba bolela ka maikwelo a tseneletšego gore: “Naxa yela ye re e raletšexo ra e hlôla, ké naxa e botse ka kudu. Xe Morêna a ka re atla, ó tlo re fihliša naxeng yeo, a e neêla rena. Ké naxa ye e êlaxo mafsi le nose. Fêla, Le se kê rumola Morêna; le xôna Le se kê la thšoxa batho ba naxa yeo; re tlo ba ja byalo ka boxôbê; xa ba n’e kôtsê; Morêna ó na le rena. Le se ba boifê.” (Numeri 14:6-9) Lega go le bjalo, ba-Isiraele ba ile ba gana go theetša, ka baka leo ba ile ba se dumelelwe go tsena Nageng ya Kholofetšo nakong yeo.
5. Ke ka baka la’ng Jošua le Kalebe ba ile ba nea pego e botse?
5 Ke ka baka la’ng Jošua le Kalebe ba ile ba nea pego e botse, mola dihlodi tše dingwe tše lesome di neile e sa kgahlišego? Dihlodi ka moka tše 12 di ile tša bona metse e matla le ditšhaba tšeo di theilwego gabotse. Le gona tše lesome di be di bolela therešo ka gore Isiraele e be e se matla ka mo go lekanego go ka fenya naga. Jošua le Kalebe le bona ba be ba tseba seo. Lega go le bjalo, tše lesome di ile tša lebelela dilo ka pono ya batho. Ka lehlakoreng le lengwe, Jošua le Kalebe ba be ba bota Jehofa. Ba ile ba bona ditiro tša gagwe tše matla kua Egipita, Lewatleng le Khwibidu le patogeng ya Thaba ya Sinai. Ka baka leo, nywaga-some ka morago dipego feela tša ditiro tšeo e be e le tše lekanego go ka šušumeletša Rahaba wa Jeriko go bea bophelo bja gagwe kotsing bakeng sa batho ba Jehofa! (Jošua 2:1-24; 6:22-25) Jošua le Kalebe e lego dihlatse tše iponetšego ditiro tša Jehofa ka mahlo, ba be ba na le kgodišego e feletšego ya gore Modimo o tla tšwela pele go lwela batho ba gagwe. Nywaga e masome a mane ka morago, go bota ga bona Jehofa go ile gwa putswa ge moloko o mofsa wa ba-Isiraele ka tlase ga boetapele bja Jošua o be o tsena Kanana gomme o fenya naga.
Lebaka Leo ka Lona re Swanetšego go Bota Jehofa ka mo go Feletšego
6. Ke ka baka la’ng Bakriste lehono ba le ka tlase ga kgateletšo, gomme ba swanetše go bota mang?
6 Mo ‘dinakong tše tše hlobaetšago tšeo go lego thata go lebeletšana le tšona,’ ka go swana le ba-Isiraele re lebeletšane le manaba ao a lego matla go re feta. (2 Timotheo 3:1, bapiša le NW.) Re gateletšega boitshwarong, moyeng gomme dinakong tše dingwe gaešita le mmeleng. Ka ntle le thušo, ga re kgone go lebeletšana le dikgateletšo tšeo, ka ge di e-tšwa mothopong wa matla a fetago a batho, Sathane Diabolo. (Ba-Efeso 6:12; 1 Johane 5:19) Ka gona, re ka retologela kae? Monna yo a botegago wa bogologolo o ile a retologela go Jehofa ka thapelo ka gore: “Ba ba tsebaxo leina la xaxo ba Xo holofetše.” (Psalme 9:10) Ge e ba re tloga re tseba Jehofa le go kwešiša seo leina la gagwe le se emelago, re tla mmota ka mo go tletšego bjalo ka ge go ile gwa dira Jošua le Kalebe.—Johane 17:3.
7, 8. (a) Ke bjang tlholo e re neago mabaka a go bota Jehofa? (b) Ke mabaka afe ao Beibele e a neago a go bota Jehofa?
7 Ke ka baka la’ng re swanetše go bota Jehofa? Ka boripana, Jošua le Kalebe ba ile ba dira bjalo ka gobane ba ile ba bona dipontšho tša matla a gagwe. Le rena ka mo go swanago re di bone. Ka mohlala, nagana ka mediro ya Jehofa ya tlholo, go akaretša legohle le melalatladi ya lona ya dinaledi tše dikete tše dimilione. Matla a magolo kudu ao Jehofa a a laolago a bontšha e le ka kgonthe gore ke Ra-matla-ohle. Ge re dutše re naganišiša ka dilo tše makatšago tša tlholo, re swanetše go dumelelana le Jobo yoo a boletšego ka Jehofa gore: “Šoo, ó a amoxa; ’me ó kae e a kaxo Mo iletša? a kaxo Mo rêra a re: Naa O dira bya’ng?” (Jobo 9:12) Ka kgonthe, ge e ba Jehofa a le ka lehlakoreng la rena, ga se ra swanela go boifa motho legohleng.—Ba-Roma 8:31.
8 Le gona, nagana ka Lentšu la Jehofa e lego Beibele. Mothopo wo wa bohlale bjo bogolo kudu bja Modimo ke thušo e matla go re thuša go fenya mekgwa e mebe le go dumelelanya maphelo a rena le thato ya Jehofa. (Ba-Hebere 4:12) Ke ka Beibele moo re tsebago Jehofa ka leina le go bona seo se bolelwago ke leina la gagwe. (Ekisodo 3:14) Re lemoga gore Jehofa a ka ba selo le ge e le sefe seo a se kgethago—Tate yo lerato, Moahlodi wa toka, Mofenyi—e le gore a phethagatše merero ya gagwe. Le gona re bona kamoo lentšu la gagwe ka mehla e lego therešo. Ge re dutše re ithuta Lentšu la Modimo, re tutueletšega go bolela go swana le mopsalme yo a itšego: “Ke bótile Lentšu la xaxo.”—Psalme 119:42; Jesaya 40:8.
9. Topollo le tsogo ya Jesu di matlafatša bjang go bota ga rena Jehofa?
9 Tokišetšo ya topollo ke lebaka le lengwe la go bota Jehofa. (Mateo 20:28) Ke mo go kgahlišago gakaakang gore Modimo o rometše Morwa wa gagwe a nnoši go hwa e le topollo bakeng sa rena! Le gona topollo e tloga e le matla. E lefelela dibe tša batho ka moka bao ba sokologago gomme ba retologela go Jehofa ka pelo ka moka. (Johane 3:16; Ba-Hebere 6:10; 1 Johane 4:16, 19) Sebopego se sengwe sa go lefa topollo e bile tsogo ya Jesu. Mohlolo woo, wo o ilego wa hlatselwa ke dihlatse tše di bonego ka mahlo tše makgolo, ke lebaka le oketšegilego la go bota Jehofa. Ke kgonthišetšo ya gore dikholofelo tša rena di tla phethagatšwa.—Ditiro 17:31; Ba-Roma 5:5; 1 Ba-Korinthe 15:3-8.
10. Re na le mabaka afe a motho ka noši a go bota Jehofa?
10 A ke a mangwe a mabaka ao ka ona re ka botago Jehofa ka mo go feletšego e bile re swanetšego go dira bjalo. Go na le mabaka a mangwe a mantši, a mangwe a wona ke a motho ka noši. Ka mohlala, nako le nako ka moka ga rena re lebeletšana le maemo a thata maphelong a rena. Ge re dutše re tsoma tlhahlo ya Jehofa bakeng sa go a rarolla, re bona kamoo tlhahlo yeo e šomago ka gona. (Jakobo 1:5-8) Ge re dutše re ithekga kudu ka Jehofa maphelong a rena a letšatši le letšatši gomme re bona mafelelo a mabotse a se, go mmota ga rena go tla matlafala.
Dafida o Ile a Bota Jehofa
11. Dafida o ile a bota Jehofa go sa šetšwe maemo afe?
11 Dafida wa Isiraele ya bogologolo ke yo mongwe wa bao ba ilego ba bota Jehofa. Dafida o ile a lebeletšana le go tšhošetšwa ke Kgoši Saulo yo a bego a nyaka go mmolaya, le madira a matla a ba-Filisita ao a bego a leka go fenya Isiraele. Go sa dutše go le bjalo, o ile a phologa a ba a fenya. Ka baka la’ng? Dafida ka noši o hlalosa gore: “Morêna ké seetša sa-ka, le xo pholoxa xa-ka. Ke sa boifa mang? Morêna ké Yêna sebô sa bophelô bya-ka. Ke sa tlo thšoxa mang?” (Psalme 27:1) Le rena ka mo go swanago re tla atlega ge e ba re bota Jehofa.
12, 13. Dafida o ile a bontšha bjang gore re swanetše go bota Jehofa gaešita le ge baganetši ba diriša maleme a bona e le dibetša tša go lwa le rena?
12 Lebakeng le lengwe Dafida o ile a rapela ka gore: “Modimo, kwaa lentšu la-ka xe ke lla; diša ’phelô bya-ka xe le lenaba le šiiša. Mphêmêlê xe bakxopô ba ntakana, xe ba-dira-bobe ba tsoša lerole. Ké ba [“louditšego” PK] maleme a boxale bya marumô, ba nêpa motho ka mesêbê ya ’polêlô tša xo hlokofatša. Ba rata xo betša yo boló bà mo laletše.” (Psalme 64:1-4) Ga ra kgonthišega gore Dafida o ile a tutuetšwa ke eng go ngwala mantšu a. Eupša re a tseba gore lehono, baganetši ka mo go swanago ba ‘louditše maleme a bona,’ ba diriša dipolelo tša bona e le sebetša sa ntwa. Ba “betša” Bakriste bao ba se nago molato, ba diriša mantšu a bolelwago goba a ngwadilwego e le “mesêbê” ya go ba bolela gampe. Ge e ba re bota Jehofa ka mo go feletšego, mafelelo e tla ba afe?
13 Dafida o tšwela pele gore: “Modimo ké Yêna a tl’o xo betša bôná ka mosêbê; ba tlo thšoxa bà hlabilwe. Ba tlo wa bà rarilwe ke maleme a bôná; . . . Moloki ó tlo ithabêla Moreneng a khuta ka Yêna.” (Psalme 64:7-10) Ee, gaešita le ge manaba a re loutšetša maleme, mafelelong ‘maleme a bona a a ba rara.’ Mafelelong Jehofa o fetoša ditaba go ba le mafelelo a atlegilego, e le gore bao ba mmotilego ba ka mo thabela.
Go Bota ga Hiskia Jehofa go Ile gwa Itlhatsela e le ga Bohlokwa
14. (a) Hiskia o ile a bota Jehofa ka tlase ga boemo bofe bjo kotsi? (b) Hiskia o ile a bontšha bjang gore o be a sa dumele go maaka a ba-Asiria?
14 Kgoši Hiskia ke yo mongwe yoo go bota ga gagwe Jehofa go ilego gwa itlhatsela e le ga bohlokwa. Nakong ya go buša ga Hiskia, madira a matla a Asiria a ile a tšhošetša Jerusalema. Madira ao a ile a fenya ditšhaba tše dingwe tše dintši. E bile a be a ile a fenya metse ya Juda go fihlela go šetše Jerusalema feela, gomme Sanheribe o ile a ikgantšha ka gore o tla fenya le wona motse woo. A diriša Rabasake, o ile a bolela gore—ka mo go nepagetšego—go bota Egipita bakeng sa thušo e be e le ga lefeela. Lega go le bjalo, ka morago ga fao o itše: “Se forwê ke Modimo wa xaxo yo O mmotilexo wa re: Jerusalêma xo ka se xafêlwe diatleng tša kxoši ya Asuri.” (Jesaya 37:10) Lega go le bjalo, Hiskia o be a tseba gore Jehofa o be a ka se mo fore. Ka gona o ile a rapela ka gore: “Morêna Modimo wa rena, re phološê seatleng sa xaxwe, mebušô yohle ya lefase e tlê e tsebê xobane Modimo ké Wene Morêna Ò nnoši.” (Jesaya 37:20) Jehofa o ile a theetša thapelo ya Hiskia. Ka bošego bjo botee, morongwa o ile a bolaya mašole a ba-Asiria a 185 000. Jerusalema e ile ya phološwa, gomme Sanheribe o ile a tloga nageng ya Juda. Ka moka bao ba ilego ba kwa ka tiragalo ye ba ile ba ithuta ka bogolo bja Jehofa.
15. Ke selo sefe feela seo se tla re thušago go itokišeletša boemo le ge e le bofe bjo thata bjoo re ka ikhwetšago re le go bjona lefaseng le le sa tsepamago?
15 Lehono, ka go swana le Hiskia re ntweng. Tabeng ya rena, ntwa ke ya moya. Lega go le bjalo, ka ge re le bahlabani ba moya, re swanetše go hlagolela bokgoni bja go phologa. Re swanetše go bona ditlhaselo e sa le pele gomme re itokišeletše e le gore re kgone go di lwantšha. (Ba-Efeso 6:11, 12, 17) Lefaseng le le sa tsepamago, maemo a ka fetoga kapejana. Khuduego ya selegae e ka tsoga ka mo go sa letelwago. Dinaga tšeo di tsebjago ka go kgotlelela batho ba madumedi a fapa-fapanego di ka fetoga. Ka go swana le Hiskia, ke feela ge re itokišetša ka go hlagolela go bota Jehofa ka mo go sa šikinyegego moo re tlago go dula re loketše selo le ge e le sefe seo se ka diregago.
Go Bota Jehofa go Bolela’ng?
16, 17. Re bontšha bjang gore re bota Jehofa?
16 Go bota Jehofa ga se feela go fo bolela bjalo. Go akaretša dipelo tša rena gomme go bontšhwa ka mediro ya rena. Ge e ba re bota Jehofa, re tla bota Lentšu la gagwe e lego Beibele ka mo go tletšego. Re tla le bala letšatši le letšatši, ra naganišiša ka lona le go le dumelela gore le hlahle maphelo a rena. (Psalme 119:105) Le gona go bota Jehofa go akaretša go bota matla a moya o mokgethwa. Ka thušo ya moya o mokgethwa, re ka hlagolela dienywa tšeo di thabišago Jehofa gomme re ka tumola mekgwa e mebe. (1 Ba-Korinthe 6:11; Ba-Galatia 5:22-24) Ka gona, ka thušo ya moya o mokgethwa, ba bantši ba ile ba kgona go tlogela go kgoga goba go diriša dihlare-tagi. Ba bangwe ba tlogetše mekgwa ya bophelo e gobogilego. Ee, ge e ba re bota Jehofa, re dira dilo ka matla a gagwe e sego a rena.—Ba-Efeso 3:14-18.
17 Go oketša moo, go bota Jehofa go bolela go bota bao a ba botago. Ka mohlala, Jehofa o rulagantše gore “molaki e a bôtêxaxo yo bohlale,” a hlokomele dikgahlego tša lefaseng tša Mmušo. (Mateo 24:45-47) Ga re leke go dira dilo ka boithatelo, le gona ga re hlokomologe go kgethwa ga molaki yo a botegago, ka gobane re bota tokišetšo ya Jehofa. Go oketša moo, bagolo ba hlankela ka diphuthegong tša gabo rena tša Bokriste, gomme go ya ka moapostola Paulo ba kgethilwe ke moya o mokgethwa. (Ditiro 20:28) Ka go dirišana le tokišetšo ya bagolo ka phuthegong, le gona re bontšha gore re bota Jehofa.—Ba-Hebere 13:17.
Latelang Mohlala wa Paulo
18. Bakriste lehono ba latela bjang mohlala wa Paulo, eupša ga ba bote eng?
18 Moapostola Paulo o ile a lebeletšana le dikgateletšo tše dintši bodireding bja gagwe, go fo swana le rena. Mehleng ya gagwe Bokriste bo be bo bolelwa gampe go babuši, le gona ka dinako tše dingwe o ile a katanela go phošolla dipolelo tšeo di fošagetšego goba go thea modiro wa boboledi ka molao. (Ditiro 28:19-22; Ba-Filipi 1:7) Lehono, Bakriste ba latela mohlala wa gagwe. Kae le kae moo go kgonegago, re thuša ba bangwe gore ba edišetšwe mabapi le modiro wa rena, re diriša dibaka le ge e le dife tšeo di bulegago. Le gona re šomela go lwela ditaba tše dibotse le go di thea ka molao. Lega go le bjalo, ga re bote ka mo go feletšego maiteko a bjalo, ka gobane ga re lebelele katlego goba go palelwa e le mo go ithekgilego ka go fenya ga rena melato dikgorong tša tsheko goba go amogelwa gabotse ke batho bohle. Go e na le moo, re bota Jehofa. Re gopola kgothatšo ya gagwe go Isiraele ya bogologolo e rego: “Matla a lena ké xo ikhomolêla le xo holofêla.”—Jesaya 30:15.
19. Ge bana babo rena ba be ba tlaišwa, ke bjang go bota ga bona Jehofa go ilego gwa itlhatsela e se ga lefeela?
19 Ka dinako tše dingwe historing ya rena ya mehleng yeno, modiro wa rena o ile wa thibelwa ka Bohlabela le Bodikela bja Yuropa, dikarolong tša Asia le Afrika le dinageng tša Amerika Borwa le Leboa. Na se se bolela gore go bota ga rena Jehofa ke ga lefeela? Aowa. Gaešita le ge ka dinako tše dingwe a dumeletše tlaišo e šoro bakeng sa merero ya gagwe e mebotse, ka lerato Jehofa o ile a matlafatša bao e bilego bahlaselwa ba tlaišo yeo. Ka tlase ga yona, Bakriste ba bantši ba ile ba hlama pego e kgahlišago ya tumelo le go bota Modimo.
20. Gaešita le ge re ka holwa ke go lokologa ka molao, ke ka dibopego dife tšeo ka tšona le ka mohla re ka se kwanantšhego?
20 Ka lehlakoreng le lengwe, dinageng tše dintši re tsebja ka molao, gomme ka dinako tše dingwe re bolelwa gabotse ke ba mekero ya ditaba. Re leboga go lemogwa moo gomme re lemoga gore se le sona se thuša go phethagatša morero wa Jehofa. Ka tšhegofatšo ya gagwe, re diriša tokologo e kgolwanyana go hlankela Jehofa ka bolokologi le ka mo go tletšego, e sego go kaonefatša mekgwa ya rena ka noši ya bophelo. Lega go le bjalo, le ka mohla re ka se ke ra kwanantšha boema-gare bja rena, ra fokotša modiro wa rena wa boboledi goba ra fokodiša tirelo ya rena go Jehofa ka tsela le ge e le efe ka lebaka la go nyaka go hlompšha ke babuši. Re balata ba Mmušo wa Mesia gomme re ka lehlakoreng la bobuši bja Jehofa ka mo go feletšego. Kholofelo ya rena ga e mo tshepedišong ye ya dilo, eupša e lefaseng le lefsa moo Mmušo wa Mesia wa legodimong e tlago ba mmušo o nnoši wo o bušago mo lefaseng. Dipomo, dibetša goba gaešita le ditlhaselo tša nuclear di ka se ke tša šikinya Mmušo woo goba tša o thenkgolla legodimong. Ga o fenyege gomme o tla dira seo Jehofa a se rerilego.—Daniele 2:44; Ba-Hebere 12:28; Kutollo 6:2.
21. Ke tsela efe yeo re ikemišeditšego go e latela?
21 Paulo o re: “Xomme rena xa re ba xo xomêla moraxo le xo y’o lahlwa; re ba tumêlô ya xo y’o rua bophelô.” (Ba-Hebere 10:39) Ka gona, eka ka moka ga rena re ka hlankela Jehofa ka potego go fihlela mafelelong. Re na le mabaka ka moka a go bota Jehofa ka mo go feletšego gona bjale le ka mo go sa felego.—Psalme 37:3; 125:1.
[Dipotšišo tša Thuto]
[Caption on page 15]
Ke ka baka la’ng Jošua le Kalebe ba ile ba nea pego e botse?
[Caption on page 16]
All three images: Courtesy of Anglo-Australian Observatory, photograph by David Malin
[Caption on page 16]
Tlholo e re nea lebaka le matla la go bota Jehofa
[Caption on page 18]
Go bota Jehofa go bolela go bota bao a ba botago
O Ithutile’ng?
• Ke ka baka la’ng Jošua le Kalebe ba ile ba tliša pego e botse?
• Ke afe a mangwe a mabaka ao ka ona re swanetšego go bota Jehofa ka mo go feletšego?
• Go bota Jehofa go bolela’ng?
• Ka go bota Jehofa, re ikemišeditše go dira’ng?