Dipotšišo tše Tšwago go Babadi

Na go na le selo seo se ka dirwago ge e ba Mokriste wa motlotšwa yo a babjago a hwetša go sa kgonege gore a be gona phuthegong bakeng sa segopotšo sa Sejo sa Morena sa Mantšiboa?

Ee. Selo se itšego se ka dirwa e bile se swanetše go dirwa ka baka la go naganela Mokriste wa motlotšwa yo a babjago mohlomongwe a sa kgone go tloga malaong gomme ka go rialo a sa kgone go ba gona ge phuthego e bina Segopotšo sa lehu la Kriste. Tabeng e bjalo, sehlopha sa bagolo se ka rulaganya gore mogolo goba setho se sengwe se setona sa Mokriste se išetše modumedi-gotee senkgwa le beine tša seswantšho bjona bošegong bjoo pele letšatši le hlaba.

Go ithekgilwe ka maemo, mogolo goba ngwanabo rena le ge e le ofe yo a mo etetšego a ka bolela mantšu a sego kae gomme a bala mangwalo a swanetšego. A ka latela mohlala wo o beilwego ke Jesu ge a be A hloma Sejo sa Morena sa Mantšiboa. Ka mohlala, mohlomongwe go ka balwa lengwalo la Mateo 26:​26 gomme senkgwa se sa omelwago sa newa ka morago ga thapelo. Se se latelago, ngwanabo rena yo a mo etetšego mohlomongwe a ka bala Mateo kgaolo 26, ditemana 27 le 28, gomme beine ya newa ka morago ga go rapela gape. Mohlomongwe a ka bolela ditlhaloso tše kopana tša mabapi le seo se swantšhetšwago ke seswantšhetšo se sengwe le se sengwe, gomme thapelo ya go phetha e tla ba e swanetšego.

Go ba gona, go swanetše go dirwe boiteko le ge e le bofe bja go ba le phuthego ge e bina Sejo sa Morena sa Mantšiboa. Eupša go ka dirwa’ng maemong a šoro kudu ao a akaretšago Mokriste wa motlotšwa yo a babjetšago go hwa, yo a lego bookelong goba ka baka la mabaka a mangwe a sa kgone go bina Segopotšo ka morago ga ge letšatši le sobetše ka Nisani 14? Motlotšwa yo bjalo a ka latela mohlala o beilwego ka Molaong wa Moše gomme a se gopola ka sephiring matšatši a 30 ka morago.​—Numeri 9:​9-14.