O Laletšwa ka Borutho

SELALELO sa Mafelelo seo Morena Jesu Kriste a se theilego nywageng e ka bago 2 000 e fetilego, ga e fo ba tiragalo feela e kgahlišago ya histori. E kgomile batho ka tsela e matla ga e sa le go tloga nakong yeo e theilwego ka yona. Ka go kgongwa ke seo ba se badilego ka dipegong tša Ebangedi ya mabapi le seo se diragetšego bošegong bjoo, ba bantši ba ile ba fagahlela go bina Selalelo sa Morena ka ditsela tše di fapa-fapanego.

Se ka moka se a kwagala ka ge Jesu Kriste ka noši a laetše balatedi ba gagwe go keteka tiragalo ye le gore ba dire bjalo ka mehla. O ile a ba botša ka go lebanya gore: “Dirang byalo xore e bê xo nkxopola.”​—Luka 22:​19; 1 Ba-Korinthe 11:​23-⁠25.

Therešo ke gore, e le gore tiragalo e be e holago e le ruri, motho o swanetše go ba le kwešišo e nepagetšego ya seo e se bolelago, go etša ge go bontšhitšwe ke Lentšu la Modimo, Beibele. Go oketša moo, ke ga bohlokwa go tseba seo Beibele e se bolelago ka taba ya gore monyanya o swanetšwe go binwa neng le gona ka tsela efe.

E le go kwa taelo ya Jesu, Dihlatse tša Jehofa lefaseng ka bophara di tla be di bokane gotee mantšiboeng a Laboraro la April 16, 2003, bakeng sa go gopola lehu la Jesu. E tla ba tiragalo ya gore di hlahlobe Mangwalo le go tsošološa tumelo le lerato la tšona la go rata Morena Jesu Kriste yo a ilego a re: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:​16) O laletšwa ka borutho go tla go bokana le tšona mantšiboeng ao e le gore le wena o ka matlafatša tumelo ya gago le lerato la go rata Jesu Kriste le Tate wa legodimong, Jehofa Modimo.