Jehofa O Hlokomela Bao E Lego Batho Feela

NA RE swanetše go ba batho ba sa tlwaelegago goba ba phagamego ka tsela e itšego gore Modimo a re ele hloko? Mopresidente wa bo-16 wa kua United States e lego Abraham Lincoln, o tsopotšwe a re: “Morena o rata bao e lego batho feela. Ke ka baka leo a ba dirago ka bontši ka tsela ye.” Batho ba bantši ba nagana gore e fo ba batho feela ba se nago mohola. Go ba motho feela go ka tswalana le go ba “modiidi, motho wa tlasana.” Ka mo go swanago, lentšu “tlwaelegilego” le ka bolela “go hlaelela ke ditshwanelo” goba “maemo a kgethegilego,” “go wela legorong la ka tlase ga maemo a tlwaelegilego,” goba gaešita le “go ba legorong la bobedi.” O kgetha go ba gare ba batho ba mohuta mang? Baikgogomoši, ba sehlogo le batho ba ikgantšhago? Na o ka se kgethe go ba gare ga batho ba nago le bogwera, ba ikokobeditšego, ba ipoeditšego le ba bontšhago go kgahlegela ba bangwe ka borutho bjo bo tšwago pelong?

Ka ge go gobošwa maikwelong le go kwerwa e le dilo tše di tlwaelegilego lefaseng lehono, batho ba bangwe ba hwetša go le thata go dumela gore Modimo ka boyena o a ba kgahlegela. Mmadi wa makasine wo o ngwadile gore: “Ke tšwa lapeng leo le se nago lerato. Ke be ke nyenyefatšwa, ke kwerwa e bile ke segwa. Ka go rialo ke ile ka ikwa ke se na mohola go tloga bjaneng. Ke sa dutše ke e-⁠na le maikwelo a tseneletšego a nakong e fetilego ao a nkgatelelago ge ke lebana le mathata.” Lega go le bjalo, go na le mabaka a go dumela gore Modimo ka boyena o kgahlegela bao e lego batho feela.

Go Kgahlegela ga Modimo Batho ba Tlwaelegilego

Kgoši Dafida o ngwadile gore: “Morêna ké Yêna yo moxolo, Morêtwa wa paala, yo moxolo a se naxo mo-ka-Yêna.” (Psalme 145:⁠3) Lega go le bjalo, se ga se thibele Jehofa go re hlokomela ka tsela e lerato le ya kwelobohloko. (1 Petro 5:⁠7) Ka mohlala, mopsalme o opetše ka gore: “Morêna ó kxaufsi le ba ’pelo di rôbexilexo; ó phološa meôya e kxobetsi.”​—Psalme 34:⁠18.

Dilo tše di tanyago tlhokomelo mo lefaseng, tše bjalo ka botse bja mmele, botumo goba lehumo ga se dilo tše Modimo a di lebelelago e le tša bohlokwa. Molao wa Modimo go Isiraele o be o bontšha kgahlego ya gagwe e nago le kwelobohloko go badiidi, dišuana, bahlologadi le go badiiledi. Modimo o ile a botša ba-Isiraele bao bona ka noši ba ilego ba swarwa ka tsela e šoro kua Egipita gore: “Modiiledi O se kê wa mo pateletša, O se kê wa mo katêlêla; . . . O se kê wa hlakiša mohloloxadi le sešuana. Xe O ka bá wa ba hlakiša, ’me ba ntelêla, ke tlo kwa sellô sa bôná.” (Ekisodo 22:​20-23) Ka godimo ga moo, moporofeta Jesaya o ile a bolela ka go holofela ga gagwe tlhokomelo ya Modimo ya go hlokomela babotlana ge a re: “Xobane O ’thšabêlô sa babôtla, O ’thšabêlô sa badiidi xe ba hlaka, O bokhutô ditimong, O moriti xe xo fiša, xe sehloxo sa baxale sè ka pula ya lefoká è khutilwe ka morakô.”​—Jesaya 25:⁠4.

Bodireding bja gagwe ka moka, Jesu Kriste yoo e lego “seswantšho sa makgonthe” sa Modimo, e bile mohlala go barutiwa ba gagwe ka go kgahlegela bao e lego batho feela. (Ba-Hebere 1:⁠3, PK) Ge a bona mašaba a batho bao ba bego  ba “lahlexile wa dinku tše di se naxo modiši,” Jesu o ile “a ba šôkêlwa.”​—Mateo 9:⁠36.

Nke o ele hloko gore ke batho ba mohuta mang bao Jesu a ba kgethilego go ba baapostola ba gagwe​—banna bao ba bego ba lebelelwa e ‘se ba mangwalo, ba sa rutega.’ (Ditiro 4:​13) Ka morago ga lehu la Jesu, barutiwa ba gagwe ba ile ba thoma go laletša batho ba mehuta yohle go theetša Lentšu la Modimo. Moapostola Paulo o ngwadile gore “e a sa dumelexo le e a sa di lemoxexo” o be a ka kgona go tsena ka phuthegong ya Bokriste gomme a ba modumedi. (1 Ba-Korinthe 14:​24, 25) Go e na le go kgetha bao ba hlompšhago go ya ka ditekanyetšo tša lefase, Modimo o ile a kgetha bontši bja bao e lego batho feela bakeng sa tirelo ya gagwe. Moapostola Paulo o itše: “Bana bešo! Bônang ka mo Le biditšwexo ka xôna. Mo xo lena xa xo ba bantši ba bohlale ka nama; xa xo ba bantši ba baxolo; xa xo ba bantši ba meloko ya boxoši. Tše Modimo a ikxethetšexo tšôna ké tše lefase le rexo ké tša bošilo, xore a nyatšišê bohlale bya lôna; ó ikxethetše tše lefase le rexo ké tša phôkôlô, xore a nyatšišê tše matla. Modimo ó ikxethetše dinyatšexi, tše bôtlana, tše e sexo selô, xore a fedišê tšeo ba rexo di xôna, xore xo se bê sa nama se se kaxo ikxanthša pele xa xaxwe.”​—1 Ba-Korinthe 1:​26-⁠29.

Le lehono, Modimo o re kgahlegela e le ruri. Thato ya Modimo ke gore “batho bohle ba phološwê ba fihlêlê tsebô Ya therešô.” (1 Timotheo 2:⁠4) Ge e ba Modimo a ratile batho gakaakaa mo e lego gore o ile a ba a romela Morwa wa gagwe lefaseng go tlo re hwela, ga re na lebaka la go ikwa re sa ratwe goba re se na mohola. (Johane 3:​16) Jesu Kriste o ile a bontšha balatedi ba gagwe bohlokwa bja go swara gaešita le yo monyenyane wa bana babo ba moya bjalo ka ge eka ba dirišana le Jesu ka noši. O itše: “Mo Le di diretšexo e mongwè wa bana bešo ba banyenyane bá, Le di diretše Nna.” (Mateo 25:​40) Go sa šetšwe gore lefase le ka re lebelela bjang, ge e ba re rata therešo, re ba kgethegilego mahlong a Modimo.

Ke kamoo Francisco, * sešuana sa mo-Brazil a ilego a ikwa ka gona ka morago ga go hlagolela tswalano ya motho ka noši le Modimo. O hlalosa gore: “Go tseba Jehofa le mokgatlo wa gagwe go nthušitše go lebeletšana ka katlego le maikwelo a-⁠ka a go ikwa ke sa šireletšega le go ba le dihlong. Ke ithutile gore Jehofa ka noši o kgahlegela yo mongwe le yo mongwe wa rena.” Jehofa e bile Tate wa kgonthe go Francisco.

Go Tshwenyega ka Bafsa

Jehofa o kgahlegela bafsa e le ka kgonthe e sego feela e le sehlopha eupša e le motho ka o tee ka o tee. Ke therešo gore go sa šetšwe gore re bafsa goba batho ba bagolo, le ka mohla ga re nyake go itšeela godimo go feta kamoo re lego ka gona. Lega go le bjalo, re ka ba re e-⁠na le bokgoni goba dika tšeo Modimo a ka di dirišago nakong e tlago. Jehofa o tseba gore re hloka kaonefatšo efe le tlwaetšo e le gore re ka diriša matla a rena ka botlalo. Ka mohlala, ela hloko pego e lego go 1 Samuele kgaolo 16. Ka ge bao e bego e ka ba dikgoši tša Isiraele ba ile ba bonagala ba swanelega kudu go  ya ka moporofeta Samuele, Jehofa o ile a hlalosa mabaka a Gagwe a go kgetha Dafida, morwa yo monyenyane wa Isai, go ba kgoši ya Isiraele ya nakong e tlago ge a re: “O se bonè sebopêxô sa xaxwe le botelele bya xaxwe; Nna ke mo nyaditše [mogolwago Dafida]. Ka xobane yo batho ba mmôxêlaxo, xa se yêna. Motho ó bôna se se lebanaxo le mahlô a xaxwe; Morêna Yêna ó bôna pelo.”​—1 Samuele 16:⁠7.

Na bafsa lehono ba ka kgonthišega gore Jehofa o ba kgahlegela e le ka kgonthe? Nke o nagane ka Ana, mosadi yo mofsa wa mo-Brazil. Ka go swana le bafsa ba bantši, o ile a hlobja boroko ke go bona kgobogo le go hloka toka. Ke moka tatagwe o ile a thoma go ya le yena gotee le bana babo dibokeng tša Bokriste. Ge nako e dutše e tšwela pele, o ile a thoma go thabela seo a bego a ithuta sona ka Lentšu la Modimo. Ana o ile a thoma go bala Beibele le dikgatišo tša Bokriste gotee le go rapela Jehofa Modimo. Ganyenyane-ganyenyane, o ile a ba le tswalano ya kgaufsi le Modimo. O hlalosa gore: “Ke be ke thabela go ragela paesekele ya-ka go ya mmotong wa kgaufsi le gae moo ke bego ke kgona go bogela go sobela mo gobotse ga letšatši. Ke be ke leboga Jehofa ka thapelo ka baka la botho bja gagwe le seatla sa gagwe se se bulegilego, ke leka go mmotša kamoo ke mo ratago ka gona. Go tseba Jehofa Modimo le merero ya gagwe go ile gwa nnea khutšo le go ikwa ke šireletšegile.” Na le wena o leka go hwetša nako ya go naganišiša ka tlhokomelo e lerato ya Jehofa?

Ke therešo gore setlogo sa rena se ka re thibela go ba le tswalano ya kgaufsi le Jehofa. Ka mohlala, nagana ka Lidia. Ge a be a tšhollela tatagwe sa mafahleng a gagwe ka taba yeo e tlogago e mo kgoma ka noši, o ile a fo mo fotlela ka gore: “Ga go na selo sa mohuta woo.” Gaešita le ge a be a kwešiša gore tatagwe o be a nyaka gore a lebale ka bothata bjoo, Lidia o re: “Go ithuta Beibele go nneile tšohle tšeo ke bego ke di kganyoga le go feta moo. Semelo se se gogelago sa Jehofa se ile sa dira gore e be mogwera wa-ka wa paala. Ga bjale ke na le Tate yo lerato le yo a kwešišago yoo nka mo tšhollelago maikwelo a-⁠ka le dilo tše di ntšhošago kudu. Ke kgona go fetša diiri tše dintši ke bolela le Motho yo bohlokwa kudu legohleng, ke kgonthišegile gore o tla ntheetša.” Ditemana tša Beibele tše bjalo ka Ba-Filipi 4:​6, 7 di mo thušitše go thabela tlhokomelo e lerato ya Jehofa. Ditemana tšeo di re: “Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.”

O go Thuša go Hlokomela Dinyakwa tša Gago

Jehofa o bontšha gore o šetša bahlanka ba gagwe e le motho ka o tee ka o tee gotee le phuthego ya gagwe ya lefaseng ka bophara. Re ka bontšha lerato la go rata Tatago rena wa legodimong ka go fetša nako re bolela le yena. Le ka mohla ga se ra swanela go tšeela tswalano ya rena le yena fase. Ka mehla Dafida o be a tšeela tswalano ya gagwe le Jehofa godimo. O itše: “Morêna, ntsebišê ditsela tša xaxo, O nthutê mebila ya xaxo. O nketetšê ka therešô ya xaxo, ’me O nthutê, xobane Modimo wa xo mphološa ke Wene; ke dula kè Xo hloloxetšwe mehla yohle.”​—Psalme 25:​4, 5.

Kgopolo ya go ba le tswalano ya kgaufsi le Modimo e ka ba e mpsha go wena. Go sa šetšwe mathata le ge e le afe ao o ka bago le ona, ka mehla o ka kgonthišega gore Yo-godimo-dimo o tla kgona go go thuša ka go dumelelana le thato ya gagwe. (1 Johane 5:​14, 15) Ka gona, ithute go  dira gore dithapelo tša gago e be tše di lebanyago, o nagana ka maemo le dinyakwa tša gago.

Bohlokwa bja go lemoga dinyakwa tša rena bo bontšhwa thapelong yeo Kgoši Salomo a ilego a e rapela ge go be go neelwa tempele e rego: “Mohla xò wile tlala naxeng, xoba ya wêlwa ke dinkhu, xoba phori, xoba mexwelema le xe e ka ba tšiê, xoba moxokong, le xe manaba a ba hlohla mo naxeng le mo kxorong, le xe e ka ba kôtlô mang le bolwetši mang, dithapêlô tšohle le ditôpô tšohle, xe di ka dirêlwa motho mang le mang, le xe e le sethšaba ka moka sa xaxo sa Isiraele, bohle bà lemoxa kôtlô ya dipelo tsa bôná, . . . O kwe Ò le xodimong, . . . Ò ba lebalêlê; bohle O ba neé tše di lebanexo tsela ye ba bexo ba e swere.” (2 Koronika 6:​28-30) Ruri ke wena o nnoši o ‘lemogago kotlo ya pelo ya gago.’ Ka gona go bohlokwa kudu go lemoga dinyakwa le dikganyogo tša gago tša kgonthe. Ge e ba o dira bjalo, “[Jehofa] ó tlo Xo nea tše pelo y’axo e di kxopêlaxo.”​—Psalme 37:⁠4.

Matlafatša Tswalano ya Gago le Jehofa

Jehofa o kgahlišwa ke go dumelela bao e lego batho feela go thabela tswalano ya kgaufsi le yena. Lentšu la Gagwe le re kgonthišetša gore: “Ke tlo ba Tata weno; ’me lena Le tlo ba barwa ba-ka le barwedi ba-ka O r’yalo Morêna Ra-matla-ohle.” (2 Ba-Korinthe 6:​18) Ruri Jehofa le Morwa wa gagwe ba nyaka gore re atlege gomme re hwetše bophelo bjo bo sa felego. Go kgothatša gakaakang go tseba gore Jehofa o tla re thuša go phethagatša boikarabelo bja rena ka lapeng, mošomong le ka phuthegong ya Bokriste!

Go sa dutše go le bjalo, ka moka ga rena re lebeletšana le dinako tše hlobaetšago. Maphelo a fokolago, mathata a lapa, mogolo wa tlasana goba re ka kwešwa bohloko ke selo tsoko. Re ka ba re sa tsebe gore re ka lebeletšana bjang ka katlego le teko. Dikgateletšo tše oketšegilego di tla ka go lebanya goba ka go se lebanye di bakwa ke mothomeletši yo kgopo e lego Sathane Diabolo, yo a lwago ntwa ya moya le batho ba Modimo. Lega go le bjalo, go na le motho yo a re kwešišago gomme o re thuša go boloka tswalano e botse le Jehofa. Ga se yo mongwe ge e se Jesu Kriste yo a lego boemong bja gagwe bjo bo phagamego kua legodimong. Re bala gore: “Xobane Moperisita e moxolo e lexo wa rena, xa se a kaxo šitwa xo re kwêla bohloko xe re fôkôla; ké e a lekilwexo mo xo tšohle byalo ka rena; fêla, xa a na sebe. Ké xôna, a re batameleng rè holofetše, re tlê madulong ao a kxauxêlô, re tlê re amoxêlê thšôkêlô, re hwetše kxauxêlô ya xo hlakodišwa lebakeng la xôna.”​—Ba-Hebere 4:​15, 16.

Ke mo go thabišago gakaakang go tseba gore ga se ra swanela go ba ba tumilego goba ba humilego e le gore re amogelwe ke Modimo! Gaešita le ge o le tlalelong, e ba bjalo ka mopsalme yo a ilego a rapela ka gore: “Le xe ke le mmôtlana le modiitšana​—Mong’a-ka xa’ ntebale. Mophološi wa-ka! Monamoledi wa-ka, a k’O se ntiêxêlê.” (Psalme 31:​9-14; 40:​17) Kgonthišega gore Jehofa o rata batho ba ikokobeditšego, bao e lego batho feela. Ka kgonthe ‘re ka lahlela dipelaelo tša rena ka moka godimo ga gagwe gobane yena o a re hlokomela.’​—1 Petro 5:⁠7.

[Mengwalo ya ka tlase]

[Caption on page 29]

Bontši bja balatedi ba Jesu bo be bo sa rutega e bile e le batho feela

[Caption on page 30]

Bakriste ba katanela go ba le tumelo e matla

[Caption on page 31]

Ga se ra swanela go ba maemong a godimo gore re amogelwe ke Modimo