Ke’ng Seo o Bego o ka Rata go se Botšiša Modimo?

LEFASENG ka bophara batho ba na le dipotšišo tše di tseneletšego ka bophelo. Na o na le tšona? Batho ba bantši ba ile ba lebiša dipotšišo tša bona go bahlahli ba madumedi eupša ga se ba hwetša dikarabo tše di kgotsofatšago. Ba bangwe ba ile ba naganišiša ka dipotšišo tše ka sephiring. Ba bangwe ba ile ba rapelela tlhahlo. Na ruri go a kgonega gore o hwetše dikarabo go tšwa go Modimo ditabeng tšeo di go hlobago boroko? Dipotšišo tše dingwe tšeo ba ba bantši ba ilego ba re ba ka rata go di botšiša Modimo ke tše.

Modimo, ge e le gabotse o mang?

Tsela yeo batho ba lebelelago Modimo ka yona e tutuetšwa ke setšo sa bona, bodumedi bja batswadi ba bona gomme mo gongwe ke kgetho ya bona ka noši. Batho ba bangwe ba diriša leina la Modingwana; ba bangwe ba fo mmitša Modimo. Na ruri go bohlokwa? Na go na le Modimo o tee wa therešo yoo a re utollelago boyena bja gagwe le leina la gagwe?

Ke ka baka la’ng go na le tlaišego e kaakaa?

Ge e ba motho a sa itlhokomele goba tsela ya gagwe ya bophelo ya boitshwaro bjo bo gobogilego e mo senyeditše maphelo goba e mo tlišeditše bodiidi, a ka ngongorega. Eupša a ka ba a tseba gabotse gore ke ka baka la’ng a tlaišega.

Lega go le bjalo, batho ba bangwe ba bantši ba tlaišega o šoro ba se na molato. Ba bangwe ba swerwe ke malwetši a šoro. Ba bangwe ba katana le mathata ao ba ka se kgonego go lebeletšana le ona ka katlego a gore ba be le bodulo le dijo tše di lekanego bakeng sa malapa a bona. Batho ba dimilione ke bahlaselwa ba bošoro, ntwa, bosenyi bjo bo sa hlaolego, dikotsi tša tlhago goba go hloka toka ga balaodi.

Ka mo go kwagalago, ba bantši ba botšiša gore: ‘Ke ka baka la’ng maemo a bjalo a phatlaletše ka tsela ye? Ke ka baka la’ng Modimo a dumelela ditlaišego tše ka moka?’

 Ke ka baka la’ng ke phela? Morero wa bophelo ke ofe?

Dipotšišo tše gantši di rotošwa ke go ferekana ga motho yoo mediro ya gagwe ya letšatši le letšatši e sa mo kgotsofatšego e le ka kgonthe​—gomme seo se diragalela batho ba bantši. Batho ba bangwe ba dimilione ba dumela gore tsela ya bophelo ya motho yo mongwe le yo mongwe e rulagantšwe ke Modimo e sa le pele ka tsela e itšego. Na go bjalo? Ge e ba ruri Modimo a e-⁠na le morero o kgethegilego ka wena, ga go pelaelo gore o tla nyaka go tseba gore morero woo ke ofe.

Gare ga dipuku ka moka tšeo di lego gona lefaseng, ke puku e tee feela yeo e bolelago gabotse gore e buduletšwe ke Modimo. Puku ye e hwetšagala ka maleme a mantši go feta puku le ge e le efe yeo e kilego ya ngwalwa, go etša ge o be o ka letela seo ka molaetša woo ruri o tšwago go Modimo o e-⁠ya go batho bohle. Ke Beibele e Kgethwa. Ka gare ga yona, Mmopi wa legodimo le lefase, Modimo ka noši, o ikutolla gore ke mang le seo se bolelwago ke leina la gagwe. Na o tseba leina leo? Na o tseba seo Beibele e se bolelago ka mohuta wa Motho yo Modimo e lego yena? Na o tseba seo e se bolelago ka seo Modimo a se nyakago go wena?

[Caption on page 3]

Mountain: Chad Ehlers/Index Stock Photography