Kgetha Bophelo bjo bo sa Felego

LE KA mohla batho ga se ba ka ba lebeletšana le dikgetho tše dintši ka tsela ye. Ka mohlala, gantši re ikgethela diaparo tše re di aparago, dijo tše re di jago le moo re šomago gona gotee le moo re dulago gona. Dikarolong tše dintši tša lefase, go ikgethela molekane le gona go tlwaelegile. Lega go le bjalo, Beibele e nea kgetho yeo e fetago dikgetho tše dingwe ka moka​—yeo e bulegetšego batho ka moka.

Beibele e re: “Xo loka sa ruri xo iša bophelong; mo-latêla-bobe ó ya lehung.” (Diema 11:​19) Le gona Jesu Kriste o tsebaditše gore: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.”​—Johane 17:⁠3.

Ee, Mmopi wa rena o re neile sebaka sa go kgetha tsela yeo e ka lebišago bophelong bjo bo sa felego! Re swanetše go dira’ng e le gore re hwetše bophelo bjo bo sa felego?

Go ya ka Beibele, “bophelô bo mmileng wa tokô.” (Diema 12:​28) Re ka ba gare ga baloki bao ba lego tseleng ya bophelo bjo bo sa felego. Bjang? Ka go kgonthišetša gore maphelo a rena a dumelelana le thato ya Modimo le ditaelo tša gagwe. (Mateo 7:​13, 14) Ka gona anke re direng kgetho e nepagetšego gomme re amogele mpho ya Modimo ya bophelo bjo bo sa felego.​—Ba-Roma 6:⁠23.