Go Hlankela Sehlopha sa Polelo ya Moswana-noši Kua Korea

SEHLOPHA seo se fišegago kudu eupša e le seo se homotšego se ile sa bokana kopanong ya selete ya Dihlatse tša Jehofa selemong sa 1997. Ye e be e le kopano ya pele ya moswana-noši kua Korea ya difoa le batho bao ba sa kwego gabotse. Tlhora ya bao ba bilego gona moo e be e le 1 174. Lenaneo ka moka​—go akaretša dipolelo, dipoledišano le terama​—le be le newa ka Polelo ya Diatla ya se-Korea gomme le be le bontšhwa sekirining se segolo sa projector seo se bego se bonagala ka Holong ya Kopano ka moka. Se e be e le bofelo bja nywaga e mentši ya go šoma ka thata ka lehlakoreng la baithapi ba bantši.

Nako e tla tla lefaseng le lefsa la paradeise moo go ‘tlogo thibollwa ditsebe tša difoa.’ (Jesaya 35:⁠5) E le gore ba phele Paradeiseng yeo, batho ka moka, go akaretša le difoa, ba swanetše gore pele ba tsene paradeiseng ya moya, e lego boemo bjo bo atlegilego bja moya bja batho bao ba šegofaditšwego ba Modimo. Ba swanetše go fetoga Dihlatse tšeo di ineetšego le go kolobetšwa tša Jehofa, gomme ba rutwe ke yena.​—Mika 4:​1-⁠4.

Mathomo a Manyenyane

Gaešita le ge modiro wa boboledi o be o dirwa go difoa ka bo-1960, e ile ya ba go fihla ka bo-1970 moo tše sego kae tša tšona di ilego tša thoma go ya dibokeng tša Dihlatse tša Jehofa kua Seoul, e lego motse-mošate wa Korea. Ngwanabo rena wa Mokriste yo a bego a kgona go ngwala ka pela o ile a diriša letlapa la go ngwalela bakeng sa go ngwala dintlha tše dikgolo tša dipolelo, go akaretša le ditemana tša Beibele tšeo di dirišitšwego.

Ka 1971 kua motseng wa Taejon, Hlatse e nngwe yeo e bego e e-⁠na le morwa wa sefoa e ile ya thoma go mo ruta molaetša wa Mmušo gotee le bagwera ba gagwe ba difoa. Sehlopheng se go ile gwa tšwa batho ba mmalwa ba fišegago bao ga bjale ba šomago e le thušo e kgolo tšhemong yeo go dirišwago polelo ya diatla.​—Sakaria 4:⁠10.

Ba Bafsa ba Ithapa ka go Rata

Ge e ba bao e lego difoa ba be ba tla monya tsebo ya go tseba Jehofa le Jesu gomme ka go rialo ba tsena tseleng e išago bophelong, gona maiteko  a lemogegago a be a swanetše go dirwa ke baithapi ba bangwe. (Johane 17:⁠3) E le go fihlelela pakane yeo, Dihlatse tša Jehofa tše sego kae di ile tša ithuta polelo ya diatla gomme di šegofaditšwe ka diphihlelo tše humišago.

Park In-sun, wa nywaga e 15, o ile a dira go ithuta polelo diatla pakane ya gagwe. E le go dira bjalo, o ile a ba moithuti-modiro feketoring yeo sehlopha sa batho ba 20 ba difoa se bego se thwetšwe go yona. Ka dikgwedi tše seswai o ile a šoma kgaufsi-ufsi le bona e le gore a ithute polelo le tsela ya difoa ya go nagana. Ngwageng o latetšego, o ile a ba mmulamadibogo wa ka mehla goba mogoeledi wa nako e tletšego wa Mmušo, gomme a šoma le sehlopha sa difoa seo se bego se thabela therešo ya Beibele. Sehlopha se ile sa gola ka lebelo kudu, gomme go se go ye kae ba ka godimo ga 35 ba ile ba ba gona dibokeng tša Sontaga.​—Psalme 110:⁠3.

Ka morago ga moo, ka lekga la pele kua Seoul, diboka tša Bokriste di ile tša rulaganywa ka mo go kgethegilego ka polelo ya diatla. Ngwanabo rena Park In-sun o ile a hlankela e le mmulamadibogo yo a kgethegilego sehlopheng se seo se golago. Mo nakong ye o be a šetše a kgona polelo ya diatla. Dikgweding tše dingwe, o ile a swara dithuto tše 28 tša legae tša Beibele le batho ba difoa. Ba bantši ba bona ba ile ba tšwela pele gomme ya ba Dihlatse tša Jehofa.

Ka baka la modiro wo o mafolofolo wa boithapi, phuthego ya pele ya polelo ya diatla kua Seoul e ile ya thongwa ka October 1976, e e-⁠na le bagoeledi ba 40 le babulamadibogo ba babedi ba ka mehla. Se se ile sa kgothaletša modiro metseng e mengwe ya Korea. Batho ba bantši ba difoa ba be ba swerwe ke tlala ya ditaba tše dibotse gomme ba be ba emetše go etelwa.

Go Šoma le Difoa

O ka ipotšiša kamoo difoa di ilego tša hwetšwa ka gona. Go ile gwa ikopanywa le ba bantši ba bona ka go tsebišana. Se sengwe gape, beng ba mabenkele a tikologong a reise ba ile ba batamelwa, gomme ba ile ba nea maina le diaterese tša batho ba difoa. Diofisi tše dingwe tša mmušo di ile tša thuša ka go nea tsebišo e bjalo. Go bolela ka mafolofolo tikologong yeo difoa di bego di dula go yona go ile gwa atlega kudu moo e lego gore, ge nako e dutše e e-⁠ya diphuthego tše nne tša polelo ya diatla di ile tša thongwa. Bafsa ba bantši ba Bakriste ba ile ba kgothaletšwa go ithuta polelo ya diatla.

Badiredi ba babulamadibogo ba kgethegilego bao ba ithutilego polelo ya diatla ba ile ba abelwa go šoma le diphuthego ke ofisi ya lekala ya Dihlatse tša Jehofa. Morago-rago bjale, dialoga tša Sekolong sa Tlwaetšo ya Bodiredi di abetšwe go ya diphuthegong tše, gomme di ile tša di matlafatša moyeng.

Go na le mathata ao a swanetšego go fenywa. Go hlankela tikologong ye go nyaka gore go dirwe maiteko a go kwešiša setšo sa difoa. Ke batho bao ba naganago ka go lebanya le go dira dilo ka go se pepetletše. Se ka dinako tše dingwe se makatša batho gomme se ka baka go se kwešišane. Go oketša moo, Dihlatse di swara dithuto tša legae tša Beibele le batho ba difoa, go nyakega gore o ba thuše gore ba be le bokgoni polelong ya bona ka noši le go ba kgothaletša go oketša lenaneo la bona ka noši la go bala le go ithuta.

Medirong ya tšona ya letšatši le letšatši, difoa di lebeletšana le mathata ao bontši bja ona bo sa tsebjego ke ba bangwe. Go swara poledišano diofising tša mmušo le mafelong a tlhokomelo ya tša kalafo gotee le dipapaletšano tše bonolo tša kgwebo gantši e ba mathata a magolo go bona. Ka gobane Dihlatse tše di tšwago diphuthegong tša  kgaufsi di ile tša nea thušo e lerato, batho ba difoa ba ile ba bona borwarre bja kgonthe ka phuthegong ya Bokriste.​—Johane 13:​34, 35.

Bohlatse bjo bo sa Rulaganyetšwago bo Tliša Meputso

Kua Pusan, e lego motse wa Korea o mogolo wo o lego lebopong la ka borwa, go ile gwa direga gore Hlatse e nngwe e gahlane le batho ba babedi ba difoa bao ba ilego ba ngwala pampišaneng gore: “Re rata Paradeise. Re nyaka go tseba mangwalo ao a bolelago ka bophelo bjo bo sa felego.” Ngwanabo rena o ile a ngwala aterese ya bona fase gomme a dira dithulaganyo tša go ba etela. Ge a dirile bjalo, o ile a hwetša phapoši e tletše ka batho ba difoa bao ba emetšego go kwa molaetša wa Mmušo. Phihlelo ye e ile ya mo tutueletša gore a thome go ithuta polelo ya diatla. Go se go ye kae phuthego ya polelo ya diatla e ile ya thongwa kua Pusan.

Ngwanabo rena yo a tšwago phuthegong yeo o ile a bona batho ba babedi ba difoa ba boledišana ka polelo ya diatla gomme a ba batamela. Ge a hwetša gore ba be ba sa tšwa go kopanela sebokeng sa bodumedi, o ile a ba laletša gore ba ye Holong ya Mmušo ka iri ya bobedi thapameng ya lona letšatši leo. Ba ile ba ya, gomme thuto ya Beibele e ile ya thongwa. Gatee-tee ka morago ga moo, bobedi bja bona ba ile ba ba gona kopanong ya selete gotee le bagwera ba bona ba 20 ba difoa. Sehlopheng seo, ba mmalwa ba ile ba neela maphelo a bona go Jehofa. Ba babedi ba ile ba ba bagolo ba phuthego gomme yo mongwe a ba mohlanka wa bodiredi diphuthegong tša polelo ya diatla.

 Boikemišetšo bo a Putswa

Ka ge batho ba bangwe ba difoa ba dula kgojana le phuthego le ge e le efe ya polelo ya diatla, maiteko a magolo le boikemišetšo gantši di a nyakega bakeng sa go ba nea dijo tša ka mehla tšeo di nago le phepo tša moya go tšwa Beibeleng. Ka mohlala, monna yo a nago le nywaga e 31 o be a iphediša ka go rea dihlapi lebopong la sehlakahlaka. O ile a kwa ka molaetša wa Beibele go ngwanabo yo monyenyane, yoo Dihlatse tša Jehofa di bego di dutše di ikopanya le yena. Ka go leka go kgotsofatša tlala ya gagwe ya moya, morei wa dihlapi wa sefoa o ile a sepela leeto la dikhilomithara tše 16 ka seketswana go ya Motseng wa Tongyoung, wo o lego lebopong la ka borwa la Korea. O ile a dira seo e le gore a kopane le mmulamadibogo yo a kgethegilego yo a tšwago phuthegong ya polelo ya diatla yeo e lego Motseng wa Masan. Ka Mošupologo o mongwe le o mongwe, mmulamadibogo yo yo a kgethegilego o be a sepela dikhilomithara tše 65 e le feela gore a sware thuto ya Beibele le morei wa dihlapi wa sefoa.

E le gore a be gona dibokeng tša Sontaga Motseng wa Masan, morutwana yo wa Beibele wa sefoa o be a swanetše go sepela leeto la dikhilomithara tše 16 ka seketswana gomme a sepele leeto le lengwe gape la dikhilomithara tše 65 ka pese. Boikemišetšo bja gagwe bo ile bja putswa. Dikgweding tše sego kae, o be a kaonefaditše polelo ya gagwe ya diatla, a ithutile dialfabete tše oketšegilego tša se-Korea gomme​—sa bohlokwa le go feta​—o be a ithutile tsela e nnoši ya go aga tswalano le Jehofa. Ka go lemoga bohlokwa bja diboka le go nea bohlatse ka mehla, o ile a hudugela tikologong yeo phuthego ya polelo ya diatla e lego go yona. Na seo se be se le bonolo? Aowa. O ile a swanela ke go tlogela modiro wa gagwe wa go rea dihlapi wo o bego o mo tlišetša tšhelete e lekanago diranta tše 32 400 ka kgwedi, eupša boikemišetšo bja gagwe bo ile bja putswa. Ka morago ga go tšwela pele therešong, o ile a kolobetšwa gomme ga bjale yena gotee le lapa la gagwe ba hlankela Jehofa ka lethabo.

Bofetoledi Bakeng sa Difoa

Ditaba tše dibotse tša Mmušo gantši di fetišetšwa ka lentšu leo le tšwago molomong. Lega go le bjalo, go fetišetša molaetša wa Lentšu la Modimo ka mo go nepagetšego kudu, ke ga bohlokwa gore dithuto tša Beibele di abje ka mokgwa wo o sa fetogego. Ka gona, lekgolong la pele la nywaga, dipuku le mangwalo di be di ngwalwa ke banna ba bagolo bao ba nago le phihlelo. (Ditiro 15:​22-31; Ba-Efeso 3:⁠4; Ba-Kolose 1:⁠2; 4:​16) Mehleng ya rena, dijo tše dintši tša moya di be di dutše di newa ka dipuku le dikgatišo tše dingwe tša Bokriste. Tše di be di fetolelwa ka maleme a mantši go akaretša le dipolelo tše di fapa-fapanego tša diatla. E le go dira se ka Polelo ya Diatla ya se-Korea, ofisi ya lekala e na le lefapha la bofetoledi la polelo ya diatla. Lefapha la bidio le tšweletša dibidio tša polelo ya diatla. Se se tšweletša dijo tša moya bakeng sa bagoeledi ba ditaba tše dibotse ba difoa le bao ba thabelago diphuthego ka moka tša Korea.

Gaešita le ge ba bantši ba šetše ba e-⁠na le bokgoni polelong ya diatla gomme ba thušitše go tšweletšeng dibidio, gantši bafetoledi bao ba nago le bokgoni kudu ke bana bao batswadi ba bona e lego difoa. Ba ithutile polelo ya diatla go tloga bjaneng. Ba ga ba bolele polelo ya diatla ka mo go nepagetšego feela eupša gape ba fetiša molaetša ka go tšwa pelong le go gatelela molaetša ka boitšhišinyo bja bona bja mmele gotee le diponagalo tša sefahlego, ka go rialo ba fihlelela menagano le dipelo.

Bjalo ka ge go boletšwe, dikopano tše dikgolo le tše dinyenyane tša polelo ya diatla ga bjale di swarwa ka mehla kua Korea. Modiro o mogolo, ditshenyagalelo tše dintši le maiteko di a nyakega e le gore se se ka fihlelelwa. Lega go le bjalo, bao ba bago gona ba thabela thulaganyo ye kudu. Ka morago ga go phethwa ga dipokano tše, ba bantši ba dula go se nene, ba nyaka go tšwela pele ka segwera se se agago le go boledišana ka dijo tšeo ba di hweditšego tša moya. Go molaleng gore go hlankela sehlopha se sa moswana-noši go na le ditlhohlo tša gona, eupša ditšhegofatšo tša moya di dira gore e be ga mohola.

[Caption on page 10]

Dibidio tša polelo ya diatla tšeo di tšweleditšwego Korea: “What Does God Require of Us?,” “Appreciating Our Spiritual Heritage,” “Warning Examples for Our Day,” le “Respect Jehovah’s Authority”

[Caption on page 10]

Go tloga fase ka go le letshadi: Go tšweletšwa ga bidio ya polelo ya diatla Lekaleng la Korea; go lokišeletša maswao bakeng sa mantšu a tswalanago le Pušo ya Modimo; sehlopha sa bafetoledi ba polelo ya diatla; go tutuetša mofetoledi wa polelo ya diatla nakong ya go tšweletša bidio