Seo Dinonyana di ka re Rutago Sona

“LEBÊLÊLANG dinonyana tša sebakeng xa di byale, xa di bune, xa di kxobêlele dišexong; [eupša] Tata-weno ó a di otla. Afa lena xa Le di fetiše xa-xolo?” (Mateo 6:​26) Jesu Kriste o ile a bolela mantšu a therong e tumilego kudu patogeng ya thaba kgaufsi le Lewatle la Galilea. O be a sa theetšwa ke balatedi ba gagwe feela. Go be go e-⁠na le lešaba le legolo la batho go tšwa dikarolong ka moka tša naga bao e bego e ka ba barutiwa nakong e tlago. Bontši bja bona e be e le batho ba diilago bao ba bego ba tlišitše balwetši gore Jesu a ba fodiše.​—Mateo 4:​23–5:⁠2; Luka 6:​17-⁠20.

Ka morago ga go fodiša balwetši ka moka, Jesu o ile a lebiša tlhokomelo go dinyakwa tša bohlokwa kudu tša moya. Gare ga dithuto tšeo a ilego a di ruta, e bile yeo go boletšwego ka yona ka mo godimo.

Ke kgale dinonyana di le gona. Tše dingwe tša tšona di ja dikhunkhwane gomme tše dingwe di ja dienywa le dipeu. Ge e ba Modimo a dirile gore go be le dijo tše dintši gakaakaa bakeng sa dinonyana, ga go pelaelo gore o kgona go thuša batho ba gagwe bao ba mo hlankelago go hwetša dijo tša bona tša ka mehla. Se a ka se dira ka go ba thuša go hwetša mošomo e le gore ba hwetše tšhelete ya go reka dijo. Goba a ka dira gore ba atlege ge ba ipšalela dijo. Mabakeng a tšhoganetšo, Modimo a ka tutuetša dipelo tša baagišani ba botho gotee le bagwera gore ba abelane le bahloki dijo le ge e le dife tšeo ba nago le tšona.

Go na le mo gontši mo re ka ithutago gona ka go lebeledišiša bophelo bja dinonyana. Modimo o bopile dinonyana di e-⁠na le bokgoni bjo bo makatšago bja go dira dihlaga tšeo di ka godišetšago mafotwana ka go tšona. Ela hloko mehuta e mebedi e sa swanego ya dihlaga. Sehlaga seo se bontšhitšwego ka lehlakoreng le letshadi ke sa peolwane ya Afrika. Se agilwe godimo ga lefsika goba lebotong la ntlo. Marulelo a dihlaga tše bjalo ke mafsika ao a okamego goba tlhaka ya moago go etša ge go bontšhitšwe seswantšhong se. Lebato la sehlaga le dirilwe ka dikgokolo tša letsopa tšeo di bopaganego wa sebopego sa komiki. Bobedi ya tshadi le ya tona di šoma ka thata go kgoboketša dikgokolo tša letsopa gomme di ka no tšea lebaka la go feta kgwedi di aga sehlaga. Ke moka tša se ala ka byang le ka mafofa. Bobedi di thušana go fepa mafotwana a tšona. Sehlaga seo o se bonago mo tlase ke sa thaga ya tona. Nonyana ye ya sekgwari ya Afrika e diriša byang goba meseto ya dibjalo tše dingwe go aga sehlaga. E kgona go aga sehlaga ka letšatši letee gomme e ka aga dihlaga tše di fetago tše 30 sehleng sa go aga!

Re ithuta’ng? Ge e ba Modimo a nea dinonyana bokgoni bjo bo bjalo le dilo tše dintši tša go aga dihlaga, ruri a ka thuša batho ba gagwe bao ba mo hlankelago go hwetša lefelo la bodulo le le nyakegago. Lega go le bjalo, Jesu o bontšhitše gore go na le selo se sengwe sa bohlokwa seo se nyakegago ge e ba re nyaka gore Jehofa Modimo a re thuše go hwetša dinyakwa tša rena tša dilo tše di bonagalago. Jesu o holofeditše gore: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.” (Mateo 6:​33) Mo gongwe o ka ipotšiša gore, ‘Go tsoma Mmušo wa Modimo go akaretša’ng?’ Dihlatse tša Jehofa tšeo di abago makasine wo, di tla thabela go araba potšišo yeo.