Ke Eng Seo Jehofa a se Letetšego go Rena?

‘Ke eng seo Jehofa a se nyakago go wena ge e se go dira toka, go rata botho le go sepela le Modimo wa gago o ne boipoetšo?’​—Mika 6:⁠8.

1, 2. Ke ka baka la’ng bahlanka ba bangwe ba Jehofa ba ka nolega moko, eupša ke’ng seo se swanetšego go itlhatsela e le se se thušago?

VERA ke Mokriste yo a botegago wa nywaga e ka bago 75 yoo a fokolago mmeleng. O re: “Ka dinako tše dingwe ke hlodimela ka lefasetere gomme ka bona bana bešo le dikgaetšedi ba Bakriste ba bolela ka ntlo le ntlo. Se se dira gore ke sekiše megokgo ka gobane ke nyaka go ba le bona, eupša bolwetši bo lekanyetša tirelo ya-ka go Jehofa.”

² Na o kile wa ikwa ka tsela yeo? Go ba gona, bohle bao ba ratago Jehofa ba nyaka go sepela ka leina la gagwe gomme ba fihlelele dinyakwa tša gagwe. Lega go le bjalo, go thwe’ng ge e ba re e-⁠na le boemo bja maphelo bjo bo phuhlamago, re godile ka nywaga goba re e-⁠na le boikarabelo bja lapa? Re ka nolega moko ka tsela e itšego ka baka la gore maemo a bjalo a ka re thibela go dira sohle seo dipelo tša rena di nyakago go se dira tirelong ya Modimo. Ge e ba re le boemong bjo, go ahla-ahla Mika kgaolo 6 le 7 go tla itlhatsela e le mo go kgothatšago kudu. Dikgaolo tše di bontšha gore dinyakwa tša Jehofa ke tšeo di kwagalago e bile di ka fihlelelwa.

Kamoo Modimo a Ilego a Swara Batho ba Gagwe ka Gona

3. Jehofa o ile a swara bjang ba-Isiraele ba marabele?

³ Sa pele anke re lebeleleng Mika 6:​3-⁠5 gomme re bone kamoo Jehofa a ilego a swara batho ba gagwe ka gona. Gopola gore mehleng ya Mika ba-Isiraele e be e le marabele. Lega go le bjalo, ka kwelobohloko Jehofa o ile a ba bitša ka mantšu a rego “setšhaba sa-ka.” O ile a kgopela ka gore: “Wene setšhaba sa-ka, gopola hle.” (NW) Go e na le go ba latofatša ka bogale, o ile a leka go fihlelela dipelo tša bona ka go botšiša gore, “Ke Xo dirile’ng?” E bile o ile a ba kgothaletša gore ba mo ‘fetole.’

4. Mohlala wa Modimo wa kwelobohloko o swanetše go ba le mafelelo afe go rena?

⁴ A mohlala o mobotse gakaakang woo Modimo a re beetšego wona ka moka ga rena! Ka kwelobohloko o ile a ba a bitša gaešita le marabele a mehleng ya Mika a Isiraele le Juda gore ke “sethšaba sa-ka” e bile a ba bolediša ka dipolelwana tše bjalo ka “hle.” Ka gona, ka ntle le pelaelo re swanetše go bontšha kwelobohloko le botho ge re dirišana le bao e lego karolo ya phuthego. Ke therešo gore ba bangwe go ka no se be bonolo go dirišana le bona goba ba ka ba ba fokola moyeng. Lega go le bjalo, ge e ba ba rata Jehofa, re nyaka go ba thuša le go ba bontšha kwelobohloko.

5. Ke ntlha efe ya motheo yeo e bolelwago go Mika 6:​6, 7?

⁵ Se se latelago, anke re phetleng Mika 6:​6, 7. Mika o botšiša lelokelelo la dipotšišo tšeo di  sa nyakego dikarabo ka gore: “Ke tlo ipexa ka’ng pele xa Morêna, ke lobê Modimo wa xodimo? A nka lebana naê’ ka didimo, ka mamane a ngwaxola? A fa Morêna a ka kxahlwa ke dikete tša dikxapa? Le makhura a êlaxo boka ’noka tše dikete-kete a a ka Mo kxahla? A nka lefa dikaroxô ka morw’ake yo moxolo? Ka lefa mabobe a môya wa-ka ka ngwana wa mmele wa-ka?” Aowa, ga go kgonego go kgahliša Jehofa ka “dikete tša dikxapa le makhura a êlaxo boka ’noka.” Eupša go na le selo se sengwe seo se tlago go mo kgahliša. Ke sefe seo?

Re Swanetše go Bontšha Toka

6. Ke dinyakwa dife tše tharo tša Modimo tšeo di boletšwego go Mika 6:⁠8?

⁶ Go Mika 6:⁠8 re ithuta seo Jehofa a se letetšego go rena. Mika o botšiša gore: ‘Ke eng seo Jehofa a se nyakago go wena, ge e se go dira toka, go rata botho le go sepela le Modimo wa gago o ne boipoetšo?’ Dinyakwa tše tše tharo di akaretša kamoo re ikwago ka gona, kamoo re naganago le kamoo re dirago dilo ka gona. Re swanetše go ikwa re sekametše go bontšheng dika tše, re nagane kamoo re ka di bontšhago ka gona gomme re gate mogato wa go di bontšha. Anke re ahla-ahleng dinyakwa tše ka setee ka setee.

7, 8. (a) ‘Go dira toka’ go bolela’ng? (b) Ke go hloka toka gofe moo go bego go atile mehleng ya Mika?

⁷ ‘Go dira toka’ go bolela go dira se se lokilego. Tsela ya Modimo ya go dira dilo ke tekanyetšo ya toka. Lega go le bjalo, batho ba mehleng ya Mika ba be ba sa bontšhe toka eupša ba be ba bontšha go hloka toka. Ka ditsela dife? Ela hloko Mika 6:​10. Mafelelong a temana yeo, babapatši ba hlaloswa e le bao ba dirišago “moêlô wo o hlaswêxaxo wa xo kotobetša,” ke gore o monyenyane kudu. Temana 11 e tlaleletša ka gore ba be ba diriša “mokotlana wa kêlô tša xo ja moreki.” Le gona go ya ka temana 12, “leleme maxanong a bôná ke la xo fora.” Ka gona meelo ya maaka, dikelo tša boima tša bofora le dipolelo tša maaka di be di atile go tša kgwebo mehleng ya Mika.

⁸ Ditiro tša go hloka toka di be di sa felele feela mafelong a tša kgwebo. Di be di atile le dikgorong tša tsheko. Mika 7:⁠3 e bontšha gore “mmuši ó re: Nthša! Moahlodi ó a rêkwa!” Baahlodi ba be ba newa tsogo-le-kobong e le gore ba tle ba ahlole batho bao ba se nago molato ka go hloka toka. “Baxolo” goba badudi bao ba nago le tutuetšo ba be ba akaretšwa bosenying. Ge e le gabotse, Mika o re mmuši, moahlodi le monna yo mogolo ba be ba “loxišana maanô” goba ba dirišana ditirong tša bona tše kgopo.

9. Juda le Isiraele di ile tša kgongwa bjang ke go hloka toka moo go bego go dirwa ke batho ba kgopo?

⁹ Go hloka toka mo go bego go dirwa ke baetapele ba kgopo go ile gwa kgoma Juda ka moka le Isiraele. Mika 7:⁠5 e bontšha gore go hloka toka go lebišitše go go se botane ga batho bao ba tsebanago, go bagwera ba go ntšhana sa inong gaešita le go balekane ba lenyalo. Temana 6 e bolela gore se se lebišitše boemong bjoo go bjona batho bao ba tswalanago kgaufsi bjalo ka barwa le botate, barwedi le bomma ba be ba nyatšana.

10. Bakriste ba itshwara bjang boemong bja mehleng yeno bja go hloka toka?

¹⁰ Go thwe’ng ka mehleng yeno? Na re bona maemo a swanago? Ka go swana le Mika, re dikologilwe ke go hloka toka, boemo bja go se botane le go senyega ga bophelo bja tša leago le bja lapa. Lega go le bjalo, ka ge re le bahlanka ba Modimo lefaseng le la go hloka toka, ga re dumelele moya wa lefase le wa ditirišano tša go hloka toka gore o tsene ka phuthegong ya Bokriste. Go e na le moo, re katanela go kgomarela melao ya motheo ya mabapi le go botega, re bontšha se ditirišanong tša rena tša letšatši le letšatši. Ka kgonthe, re “[itshwara, NW] ka tsela e botse dilong tšohle.” (Ba-Hebere 13:​18) Na ga o dumele gore ka go bontšha toka re thabela ditšhegofatšo tše kgolo tšeo di tlišwago ke borwarre bjo bo bontšhago go botana ga kgonthe?

Batho ba Ile ba kwa Bjang “Lentšu la Morêna”?

11. Mika 7:​12 e phethagatšwa bjang?

¹¹ Mika o porofetile gore go sa šetšwe maemo a go hloka toka, toka e tla fihlelela batho ba mehuta ka moka. Moporofeta o ile a bolela e sa le pele gore batho ba tla kgoboketšwa go tloga “ka lewatlê le lewatlê, le ka dithaba le dithaba,” gore e be barapedi ba Jehofa. (Mika 7:​12) Lehono,  phethagalong ya mafelelo ya boporofeta bjo, ga se setšhaba setee se itšego seo se holwago e le ka kgonthe ke toka ya Modimo e sa bebego sefahlego, eupša ke batho ba ditšhaba ka moka. (Jesaya 42:⁠1) Se se itlhatsela bjang e le sa therešo?

12. “Lentšu la Morêna” le kwewa bjang lehono?

¹² E le gore o hwetše karabo, ela hloko mantšu ao Mika a a boletšego pejana. Mika 6:⁠9 e re: “Lentšu la Morêna le bitša motse wó. Bohlale ké xo šia ’ina la Morêna.” Batho ba ditšhaba ka moka ba kwa bjang “lentšu la Morêna,” gomme se se tswalana bjang le go bontšha ga rena toka? Go ba gona, lehono batho ga ba kwe lentšu la Modimo ka tsela ya kgonthe. Lega go le bjalo, ka modiro wa rena wa boboledi wa lefaseng ka bophara, lentšu la Jehofa le kwewa ke batho ba merafo ka moka le ba maemo ka moka a bophelo. Ka baka leo, bao ba theetšago ba “šia ’ina la Morêna,” ba ba le tlhompho ya go le boifa. Ka ntle le pelaelo, ka go hlankela re le bagoeledi ba fišegago ba Mmušo re dira dilo ka tsela ya toka le ya lerato. Ka go tsebagatša leina la Modimo go motho yo mongwe le yo mongwe ka go se bebe sefahlego, re ‘dira toka.’

Re Swanetše go Rata Botho

13. Phapano ke efe magareng ga botho bjo lerato le lerato?

¹³ Se se latelago, a re ahla-ahleng senyakwa sa bobedi seo go boletšwego ka sona go Mika 6:⁠8. Jehofa o letetše gore re ‘rate botho.’ Lentšu la Sehebere leo le fetoletšwego e le “botho” le  ­fetolelwa gape e le “botho bjo lerato” goba “lerato le le botegago ka go se kwanantšhe.” Botho bjo lerato ke go tshwenyega ka ba bangwe, go tshwenyega ka bona ka tsela ya kwelobohloko. Botho bjo lerato bo fapana le seka sa lerato. Go bjalo bjang? Lerato ke lentšu le le nabilego, leo le ka bontšhwago gaešita le dilong le dikgopolong. Ka mohlala, Mangwalo a bolela ka motho yo ‘a ratago sebela le makhura’ gotee le ka motho yo a ‘ratago bohlale.’ (Diema 21:​17; 29:⁠3) Ka lehlakoreng le lengwe, ka mehla botho bjo lerato bo akaretša batho, kudu-kudu bao ba hlankelago Modimo. Ka gona Mika 7:​20 (NW) e bolela ka “botho bjo lerato bjo bo bontšhitšwego Aborahama”​—monna yo a ilego a hlankela Jehofa Modimo.

14, 15. Botho bjo lerato bo bontšhwa bjang, gomme ke bohlatse bofe bja bjona bjo bo bontšhitšwego?

¹⁴ Go ya ka Mika 7:​18 (NW), moporofeta o re Modimo “o kgahlwa ke botho bjo lerato.” Go Mika 6:⁠8, ga re botšwe feela gore re bontšhe botho bjo lerato, eupša re botšwa gore re rate seka seo. Re ithuta’ng mangwalong a? Botho bjo lerato bo bontšhwa ka go rata le ka bolokologi ka gobane re nyaka go bo bontšha. Ka go swana le Jehofa, re thabišwa goba re kgahlišwa ke go bontšha botho bjo lerato go bao ba bo nyakago.

¹⁵ Lehono, botho bjo bjalo bjo lerato ke leswao la batho ba Modimo. Ela hloko mohlala o tee feela. Ka June 2001, ledimo la molatšatšing le ile la baka mafula a magolo kua Texas, U.S.A., la senya magae a dikete go akaretša le magae a makgolo a Dihlatse tša Jehofa. E le gore di thuše bana babo tšona ba Bakriste bao ba nyakago thušo, Dihlatse tše ka bago 10 000 di ile tša gafa nako le matla a tšona ka go rata le ka bolokologi. Lebakeng la ka godimo ga seripa-gare sa ngwaga, baithapi ba ile ba šoma ka go se lape, ba diriša matšatši a bona, mašego a bona le mafelo-beke go aga lefsa Diholo tša Mmušo tše 8 le magae a ka godimo ga a 700 a bana babo bona ba Bakriste. Bao ba bego ba sa kgone go dira mošomo o bjalo ba ile ba nea dijo, ditlabakelo le tšhelete. Ke ka baka la’ng Dihlatse tše ka moka tše dikete di ile tša thuša bana babo tšona? Ka gobane di “rata botho.” Le gona ke mo go ruthetšago pelo gakaakang go tseba gore ditiro tše bjalo tša botho bjo lerato di bontšhwa ke bana babo rena lefaseng ka bophara! Ee, go fihlelela senyakwa sa go “rata botho” ga se morwalo, eupša ke mo go thabišago!

Sepelang le Modimo ka Boipoetšo

16. Ke seswantšho sefe seo se gatelelago go nyakega ga gore re sepele le Modimo ka boipoetšo?

¹⁶ Senyakwa sa boraro seo se hwetšwago go Mika 6:⁠8 ke “xo sepela le Modimo w’axo Ò n’e boipoetšô.” Se se bolela go lemoga mafokodi a rena le go ithekga ka Modimo. Ka mohlala: Ka motsotswana nagana ka ngwanenyana yo monyenyane a ngaparetše seatla sa tatagwe ge ba dutše ba sepela go phatša ledimo. Ngwanenyana yo o tseba gabotse gore matla a gagwe a lekanyeditšwe, eupša o na le kholofelo go tatagwe. Le rena re swanetše go tseba mafokodi a rena eupša re be le kholofelo go Tatago rena wa legodimong. Re ka boloka bjang kholofelo ye? Tsela e nngwe ke ka go dula re gopola lebaka leo ka lona e lego ga bohlale go dula re le kgaufsi le Modimo. Mika o re gopotša mabaka a mararo: Jehofa ke Molopolodi wa rena, ke Mohlahli wa rena e bile ke Mošireletši wa rena.

17. Jehofa o ile a lopolla, a hlahla le go šireletša bjang batho ba gagwe ba mehleng ya bogologolo?

¹⁷ Go ya ka Mika 6:​4, 5, Modimo o re: “Ke Xo nthšitše naxeng ya Egipita.” Ee Jehofa e be e le Molopolodi wa Isiraele. Ka mo go tšwelago pele Jehofa o re: “Ke romile Mošê le Arone le Miryama ba Xo êta-pele.” Moše le Arone ba ile ba dirišwa go hlahla setšhaba, gomme Miryama o ile a eta basadi pele mminong wa phenyo. (Ekisodo 7:​1, 2; 15:​1, 19-21; Doiteronomio 34:​10) Jehofa o ile a nea tlhahlo ka bahlanka ba gagwe. Go temana 5, Jehofa o ile a gopotša setšhaba sa Isiraele gore o ile a se šireletša malebana le Balaka le Bileama le gore o ile a šireletša ba-Isiraele nakong ya mogato wa mafelelo wa leeto la bona la go tloga Sithima kua Moaba go ya Giligala e lego Nageng ya Kholofetšo.

18. Ke bjang lehono Modimo e lego Molopolodi, Mohlahli le Mošireletši wa rena?

¹⁸ Ge re dutše re sepela le Modimo, o re phološa lefaseng la Sathane, o re hlahla ka Lentšu la  gagwe le ka mokgatlo wa gagwe gomme o re šireletša re le sehlopha ge re hlaselwa ke baganetši. Ka gona re na le lebaka le le kwagalago la go ngaparela seatla sa Tatago rena wa legodimong ge re dutše re sepela le yena mogatong wa mafelelo wa go phatša ledimo leetong la rena la go ya lefelong leo le fetago kgole Naga ya Kholofetšo​—lefase le lefsa la Modimo la go loka.

19. Boipoetšo bo tswalana ka tsela efe le mafokodi a rena?

¹⁹ Go ipoetša ge re sepela le Modimo go re thuša go ba le pono ya kgonthe ka maemo a rena. Se se bjalo ka gobane go bontšha boipoetšo go akaretša go lemoga mafokodi a rena. Botšofadi goba bogwahla bo ka bea mellwane e itšego go seo re ka se dirago tirelong ya Jehofa. Lega go le bjalo, go e na le gore re dumelele se go re nola moko, re swanetše go gopola gore Modimo o amogela maiteko le boikgafo bja rena ‘go ya ka seo re nago le sona e sego seo re se nago sona.’ (2 Ba-Korinthe 8:​12) Ka kgonthe, Jehofa o letetše gore re mo hlankele ka moya ka moka, re dire sohle seo maemo a rena a re dumelelago go se dira. (Ba-Kolose 3:​23) Modimo o re šegofatša ka mo go humilego ge re dira sohle seo re ka se kgonago tirelong ya gagwe ka potego le ka mafolofolo.​—Diema 10:⁠22.

 Boemo bja Kgopolo bja go Leta bo Tliša Ditšhegofatšo

20. Ke go lemoga eng moo go swanetšego go re thuša go bontšha boemo bja kgopolo bja go leta ka go swana le Mika?

²⁰ Go hwetša tšhegofatšo ya Jehofa go re tutueletša go ekiša moya wa Mika. O re: “Ke tla bontšha boemo bja kgopolo bja go letela Modimo wa phološo ya-ka.” (Mika 7:⁠7, NW) Mantšu a a tswalana bjang le go sepela ga rena le Modimo ka boipoetšo? Go ba le boemo bja kgopolo bja go leta goba go se fele pelo, go re thuša go phema go nyamišwa ke gore letšatši la Jehofa ga se la tšwa le fihla. (Diema 13:​12) Ke therešo gore ka moka ga rena re fagahletše go fela ga lefase le le kgopo. Lega go le bjalo, beke e nngwe le e nngwe batho ba dikete ke gona ba thomago go sepela le Modimo. Go tseba seo go re nea lebaka la go bontšha boemo bja kgopolo bja go leta. Hlatse e nngwe ya nako e telele e boletše mabapi le se gore: “Ge ke lebelela morago nywageng e fetago e 55 modirong wa boboledi, ke kgodišegile gore ga se ka lahlegelwa ke selo ka go letela Jehofa. Ka mo go fapanego, ke šireleditšwe manyaming a mantši.” Na o bile le phihlelo e swanago?

21, 22. Mika 7:​14 e phethagatšwa bjang mehleng ya rena?

²¹ Ka ntle le pelaelo go sepela le Jehofa go a re hola. Ge re bala Mika 7:​14, Mika o bapiša batho ba Modimo le dinku tšeo di dutšego ka go šireletšega le modiši wa tšona. Lehono phethagatšong e kgolwanyane ya boporofeta bjo, mašaledi a Isiraele ya moya gotee le “dinku tše dingwê” ba hwetša tšhireletšego go Modiši wa bona yo a ka botwago, Jehofa. Ba dutše ‘ba le noši lesoding​—mo gare ga thaba ya Karamele,’ ba arogile ka tsela ya moya lefaseng le leo le nago le mathata ka mo go oketšegilego le le kotsi.​—Johane 10:​16; Doiteronomio 33:​28; Jeremia 49:​31; Ba-Galatia 6:⁠16.

²² Batho ba Jehofa ba thabela katlego, go etša ge Mika 7:​14 le yona e ile ya bolela e sa le pele. Ge a bolela ka dinku tša Modimo goba batho, Mika o re “O [di] fudišê kua Basani le Gileada.” Go etša ge dinku tša kua Basani le Gileada di be di fudišwa mafulong a humilego le ao a atlegilego, batho ba Modimo lehono ba thabela katlego ya moya​—e lego tšhegofatšo e nngwe bakeng sa bao ba sepelago le Modimo ka boipoetšo.​—Numeri 32:⁠1; Doiteronomio 32:⁠14.

23. Re ka ithuta thuto efe ka go ahla-ahla Mika 7:​18, 19?

²³ Go Mika 7:​18, 19, moporofeta o gatelela kganyogo ya Jehofa ya go lebalela bao ba itsholago. Temana 18 e bontšha gore Jehofa ke “Molebalêla-batho-sebe” e bile ke “Mo-feta-dikaroxô.” Go ya ka temana 19, “dibe tša rena tšohle ó tlo di lahlêla bodibeng bya lewatlê.” Ke thuto efe yeo re ka ithutago yona go se? Re ka ipotšiša ge e ba re ekiša Jehofa tabeng ye. Na re lebalela ba bangwe dibe tšeo ba ka re direlago tšona? Ge batho ba bjalo ba itshola gomme ba nyaka go swarelwa, ka ntle le pelaelo re tla nyaka go ekiša boikemišetšo bja Jehofa bja go lebalela ka mo go feletšego le sa ruri.

24. Boporofeta bja Mika bo go hotše bjang?

²⁴ Re hotšwe bjang ke go ahla-ahla boporofeta bjo bja Mika? Bo re gopoditše gore Jehofa o nea kholofelo ya kgonthe bakeng sa bao ba mmatamelago. (Mika 2:​1-13) Re kgothaleditšwe go dira se sengwe le se sengwe seo re ka se kgonago go tšwetša pele borapedi bja therešo e le gore re ka sepela ka leina la Modimo ka mo go sa felego. (Mika 4:​1-⁠4) Le gona re kgonthišeditšwe gore go sa šetšwe gore maemo a rena ke afe, re ka fihlelela dinyakwa tša Jehofa. Ee, ka kgonthe boporofeta bja Mika bo re matlafaletša go sepela ka leina la Jehofa.

Go sa šetšwe maemo a kgopo a mehleng ya gagwe, Mika o ile a phela ka go dumelelana le dilo tšeo Jehofa a di nyakago. Le wena o ka dira ka mo go swanago

Bontšha toka ka go nea bohlatse bathong ba maemo ka moka bophelong

Bontšha gore o rata botho ka go kgotsofatša dinyakwa tša ba bangwe

Dira seo o ka se kgonago ge ka boipoetšo o lemoga mafokodi a gago

O be o tla Araba Bjang?

• Go ya ka Mika 6:⁠8, ke eng seo Jehofa a se nyakago go rena?

• Ke’ng seo se nyakegago ge e ba re tla ‘dira toka’?

• Re ka bontšha bjang gore re “rata botho”?

• Ke’ng seo se akaretšwago go ‘sepeleng le Modimo ka boipoetšo’?