Re tla Sepela ka Leina la Jehofa ka mo go sa Felego!

“Re tlo fela re sepela ka leina la Jehofa, Modimo wa rena ka mehla le ka mo go sa felego.”​—Mika 4:​5, PK.

1. Ke melaetša efe yeo e hlaloswago go Mika kgaolo 3 go ya go 5?

JEHOFA o na le selo se a nyakago go se botša batho ba gagwe gomme o diriša Mika e le moporofeta wa gagwe. Morero wa Modimo ke gore a gate mogato malebana le badiri ba bobe. O tla otla Isiraele ka baka la bohlanogi bja yona. Lega go le bjalo, ke mo go thabišago gore Jehofa o tla šegofatša bao ba sepelago ka leina la gagwe. Melaetša ye e hlaloswa gabotse go dikgaolo 3 go ya go 5 tša boporofeta bja Mika.

2, 3. (a) Baetapele ba Isiraele ba be ba swanetše go bontšha seka sefe, eupša ge e le gabotse ba be ba dira’ng? (b) O be o ka hlalosa bjang dika-polelo tšeo di dirišitšwego go Mika 3:​2, 3?

² Moporofeta wa Modimo o ile a tsebatša gore: “A nke Le theetšeng, lena baxolo ba Jakobo, lena babuši ba moloko wa Isiraele! A xa se lena bô-matsebe ba moahlolêlô?” Ee, woo e be e swanetše go ba modiro wa bona, eupša ge e le gabotse ba be ba dira’ng? Mika o re: “Fêla, Le ba-hlôya-boló, Le ba-rata-bobe; Le bua batho letlalô, Le ba elola nama marapong. Ké bô-lena ba Le jaxo nama ya sethšaba sa-ka, Le se khumola letlalô, Le rôba marapô a sôna, la a rathêla pitšeng, sa etša nama morufsing.”​—Mika 3:​1-⁠3.

³ Baetapele ba be ba gatelela gakaakang badiidi, batho bao ba sa kgonego go iphemela! Dika-polelo tše di dirišitšwego mo di ile tša kwešišwa gabonolo ke bao ba ilego ba kwa Mika. Ge nku yeo e hlabilwego e lokišeletšwa go apewa, sa pele e a buiwa ke moka ya segelelwa. Ka dinako tše dingwe marapo a a pšhatlwa bakeng sa go ntšha moko. Bobedi nama le marapo di apewa ka pitšeng e kgolo, go swana le yeo Mika a boletšego ka yona. (Hesekiele 24:​3-5, 10) A seswantšho seo se swanetšego gakaakang sa tshwaro e sehlogo yeo batho ba mehleng ya Mika ba ilego ba lebeletšana le yona ka diatleng tša baetapele ba bona ba babe!

Jehofa o Letetše Gore re Bontšhe Toka

4. Jehofa o fapana bjang le baetapele ba Isiraele?

⁴ Go na le phapano e kgolo magareng ga Modiši yo lerato Jehofa le baetapele ba Isiraele. Ka baka la ge ba sa bontšhe toka, ba palelwa ke go phethagatša thomo ya bona ya go šireletša mohlape. Go e na le moo, ka boithati ba swara dinku tša seswantšhetšo gampe, ba di tima toka gomme ba di diriša ‘ditiro tša tšhollo ya madi’ go etša ge go bontšhitšwe go Mika 3:​10. Re ka ithuta’ng boemong bjo?

5. Jehofa o letetše’ng go bao ba etelelago batho ba gagwe pele?

⁵ Modimo o letetše gore bao ba etelelago batho ba gagwe pele ba bontšhe toka. Se ke seo re se hwetšago e le sa therešo ka bahlanka ba Jehofa lehono. Go feta moo, se se dumelelana le Jesaya 32:⁠1 moo re balago gore: “Tsebang! Xo tlo bewa kxoši ya xo buša ka xo loka, ya bakxôma ba moahlolêlô wo o lokilexo.” Lega go le bjalo, ke’ng seo re se hwetšago mehleng ya Mika? “Ba-hlôya-boló, Le ba-rata-bobe” ba phegelela go kgopamiša toka.

Ke Dithapelo tša Bomang Tšeo di Arabjago?

6, 7. Ke ntlha efe ya bohlokwa yeo e gatelelwago go Mika 3:⁠4?

⁶ Na batho ba kgopo ba mehleng ya Mika ba be ba ka letela go amogelwa ke Jehofa? Le gatee! Mika 3:⁠4 e re: “Ba tl’o xo tsoša mantšu ba llêla Morêna, a ka se arabe; mohla woo ó tlo ba xerula, ka xe medirô ya bôná è le e mebe.” Se se gatelela ntlha ya bohlokwa kudu.

 ⁷ Jehofa a ka se arabe dithapelo tša rena ge e ba re dira sebe ka go se itshole. Se se bjalo e le ka kgonthe ge e ba re phela maphelo a mabedi, re fihla ditiro tša rena tše mpe mola ka lehlakoreng le lengwe re itira eka re hlankela Modimo ka potego. Go ya ka Psalme 26:⁠4, Dafida o opetše ka gore: “Xa k’a dula le batho ba maaká; xa nka ka ya le ba bomenetša.” Jehofa le yena a ka se arabe dithapelo tša bao ba sa theetšego Lentšu la gagwe ka boomo!

Go Matlafatšwa ke Moya wa Modimo

8. Baporofeta ba maaka ba mehleng ya Mika ba ile ba lemošwa ka eng?

⁸ A mekgwa e mebe gakaakang yeo e bego e tlwaelegile go baetapele ba moya ba Isiraele! Baporofeta ba maaka ba be ba dira gore batho ba Modimo ba hlahlathe moyeng. Baetapele ba megabaru ba be ba goeletša ka gore “Khutšô!” eupša ge e le gabotse ba be ba hlohla ntwa malebana le yo mongwe le yo mongwe yo a sa ba neego sa go iša ka ganong. Jehofa o re: “Ka wôna molato woo Le tlo tlelwa ke bošexo bo se naxo pônô; Le tlo wêlwa ke lefsifsi le se naxo porofetô; baboni bao ba tlo dikêlêlwa ke letšatši; ’me mosexare o tlo ba fifalêla. Baboni ba tlo lewa ke dihlong; didupe di tlo šexama; bohle ba tlo iša ’atla diledung.”​—Mika 3:​5-7a.

9, 10. Ke’ng seo se bolelwago ke go ‘iša diatla diledung,’ gomme ke ka baka la’ng Mika a be a se na lebaka la go dira bjalo?

⁹ Ke ka baka la’ng ba be ba ‘iša diatla diledung’? Se ke selo seo batho ba mehleng ya Mika ba kgopo ba bego ba se dira ka baka la go hlabja ke dihlong. Le gona banna ba ba babe ba swanelwa ke go hlabja ke dihlong. Go ya le ka mokgwa woo ba naganago, ‘phetolo ya Modimo ga e gona.’ (Mika 3:7b) Jehofa ga a theetše dithapelo tša batho le ge e le bafe ba kgopo bao ba ikgogomošago.

¹⁰ Mika o be a se na lebaka la gore a ‘itshware seledu.’ O be a sa hlabje ke dihlong. Jehofa o be a araba dithapelo tša gagwe. Ela hloko Mika 3:⁠8 moo moporofeta yo a botegago a itšego: “Ka kxonthe ke tletše matla a Môya wa Morêna; ke filwe kahlolô le boxale.” Mika o be a thabile kudu gakaakang gore bodireding bja gagwe ka moka bja nako e telele bja potego, o be a dutše a “tletše matla a Môya wa Morêna”! Se se ile sa mo nea matla a gore a “botšê Jakobo ’phapoxô tša xaxwe, Isiraele [a] mmotšê dibe tša xaxwe.”

11. Batho ba newa bjang matla a go tsebatša melaetša ya Modimo?

¹¹ Mika o be a nyaka matla a fetago a motho gore a tsebatše molaetša wa Modimo wa kahlolo e sehlogo. Moya wa Jehofa o bohlokwa. Go thwe’ng ka rena? Thomo ya rena ya go dira boboledi e ka phethwa feela ge e ba Jehofa a re matlafatša ka moya wa gagwe o mokgethwa. Maiteko a go dira boboledi a tla folotša ka mo go feletšego ge e ba re dira sebe ka boomo. Maemong ao Modimo a ka se ke a araba dithapelo tša rena tša go kgopela matla a go dira modiro wo. Ge e le gabotse re ka se kgone go bolela molaetša wa kahlolo ya Tatago rena wa legodimong ka ntle le ge “Môya wa Morêna” o le go rena. Ka dithapelo tšeo di kwewago le ka thušo ya moya o mokgethwa, re kgona go bolela lentšu la Modimo ka sebete go swana le Mika.

12. Ke ka baka la’ng barutiwa ba Jesu ba pele ba ile ba kgona go ‘tšwela pele ba bolela lentšu la Modimo ka sebete’?

¹² Mohlomongwe o gopola pego yeo e lego go Ditiro 4:​23-31. Inagane o le yo mongwe wa barutiwa ba Jesu ba lekgolong la pele la nywaga.  Batlaiši ba bašoro ba be ba dutše ba nyaka go tswalela melomo ya balatedi ba Kriste. Eupša babotegi ba ba ile ba rapela Morena wa bona yo a Phagamego, ba kgopela gore: “Morêna, bôna kxalemô tša bôná; ’me bahlanka ba xaxo O ba fê mafolofolo ruri, ba bolêlê ’ntšu la xaxo [ka sebete, NW].” Mafelelo e bile afe? Ge ba be ba dira dikgopelo, lefelo leo ba bego ba bokane go lona le ile la tekema, gomme ba tlatšwa ka moya o mokgethwa ka nako e tee ke moka ba bolela lentšu la Modimo ka sebete. Ka gona anke ka thapelo re lebeleleng go Jehofa gomme re ithekge ka thušo ya gagwe ya moya o mokgethwa ge re dutše re phetha bodiredi bja rena.

13. Go ile gwa direga’ng ka Jerusalema le Samaria, gomme ka baka la’ng?

¹³ Nagana gape ka mehla ya Mika. Go ya ka Mika 3:​9-12, babuši bao ba nago le molato wa madi ba be ba ahlola ba lebeletše pipa-molomo, baperisita ba ruta ba lebeletše moputso gomme baporofeta ba maaka ba dira bonoge gore ba hwetše tšhelete. Ga go makatše ge Modimo a ile a bolela semmušo gore motse-mošate wa Juda e lego Jerusalema “e tlo ba mokxobô wa mafsika”! Ka ge borapedi bja maaka le go goboga boitshwarong di be di phatlaletše le Isiraele, Mika o ile a budulelwa go lemoša gore Modimo o tla dira Samaria “mokxobô wa mafsika.” (Mika 1:⁠6) Ge e le gabotse, moporofeta o ile a phela go fihlela a bona phedišo yeo e boletšwego e sa le pele ya Samaria ke madira a Asiria ka 740 B.C.E. (2 Dikxoši 17:​5, 6; 25:​1-21) Go molaleng gore melaetša ye e matla ya malebana le Jerusalema le Samaria e be e ka fetišetšwa feela ka matla a Jehofa.

14. Boporofeta bjo bo begilwego go Mika 3:​12 bo ile bja phethagala bjang, gomme seo se swanetše go re kgoma bjang?

¹⁴ Ka ntle le pelaelo Juda e ka se phologe kahlolo  e šoro ya Jehofa. Ka go phethagatšwa ga boporofeta bjo bo begilwego go Mika 3:​12, Tsione e be e tla “lengwa ya ba thšemo.” Go ya ka pono ya rena ya lekgolong la bo-21 la nywaga, re a tseba gore dilo tše di diragetše ge ba-Babele ba be ba fediša Juda le Jerusalema ka 607 B.C.E. Se se diragetše nywaga e mentši ka morago ga gore Mika a porofete, eupša o be a kgodišegile gore se be se tla direga. Ka ntle le pelaelo re swanetše go kgodišega ka mo go swanago gore tshepedišo ye ya gona bjale ya dilo e tla fela ‘letšatšing la Jehofa’ leo le boletšwego e sa le pele.​—2 Petro 3:​11, 12.

Jehofa o Lokiša Ditaba

15. O be o ka hlalosa bjang boporofeta bjo bo begilwego go Mika 4:​1-⁠4 ka mantšu a gago?

¹⁵ Ge re lebelela morago, re bona gore se se latelago Mika o fetišetša molaetša o kgahlišago kudu wa kholofelo. A mantšu a kgothatšago gakaakang ao re a hwetšago go Mika 4:​1-4! Ka boripana Mika o re: “Bofelong bya mabaka thaba ya Ntlo ya Modimo e tlo ba e thekxilwe xodimo xa dithaba, è beilwe xodimo xa meboto; ’me dithšaba di tlo thšoloxêla mo xo yôna. Merafô-rafô e tlo ya xôna . . . Ó tlo buša dithšaba tše ntši, ó tlo ahlolêla ba merafo-rafo e matla le ya kxolê. Ke mo ba tl’o xo tšea dithšoša ba rula mexoma ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana. Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo; ka xobane xo boletše molomo wa Morêna wa mašaba.”

16, 17. Mika 4:​1-⁠4 e phethagatšwa bjang lehono?

¹⁶ “Dithšaba tše ntši” le “merafo-rafo e matla” yeo go bolelwago ka yona mo ke bomang? Ga se ditšhaba le mebušo ya lefase le. Go e na le moo, boporofeta bo šupa go batho bao ba tšwago ditšhabeng ka moka bao ga bjale ba kopanego tirelong e kgethwa thabeng ya Jehofa ya borapedi bja therešo.

¹⁷ Ka go dumelelana le boporofeta bja Mika, borapedi bjo bo hlwekilego bja Jehofa kgaufsinyane bo tla dirišwa ka mo go tletšego lefaseng ka bophara. Lehono, batho bao ‘ba sekametšego ka mo go swanetšego bophelong bjo bo sa felego’ ba rutwa ditsela tša Jehofa. (Ditiro 13:​48, bapiša le NW.) Jehofa o ntšha kahlolo gomme o lokiša ditaba ka tsela ya moya bakeng sa badumedi bao ba emelago Mmušo. Ba tla phologa “tlaišexong e kxolo” e le karolo ya “lešaba le lexolo.” (Kutollo 7:​9, 14) Ka ge ba dirile ditšhoša tša bona megoma, le mo nakong ye ba phela ka khutšo le Dihlatse-gotee le bona tša Jehofa le batho ba bangwe. Ke mo go thabišago gakaakang go ba gare ga bona!

Go Ikemišetša go Sepela ka Leina la Jehofa

18. Ke’ng seo se swantšhetšwago ke ‘go dula ga motho ka tlase ga sehlare sa gagwe sa morara le sa mogo’?

¹⁸ Mehleng ya rena, ge poifo e aparela lefase go swana le leru le leso, re thabišwa ke gore ba bantši ba ithuta ditsela tša Jehofa. Re hlologetše nako yeo gona bjale e lego kgaufsi ya ge barati ba bjalo ka moka ba Modimo ba tla bego ba sa kgaotša feela go ithuta ntwa eupša ba bile ba tlago go dula meriting ya merara le mego ya bona. Mego gantši e bjalwa ka dirapeng tša merara. (Luka 13:⁠6) Go dula ga motho ka tlase ga sehlare sa gagwe sa morara le sa mogo go swantšhetša maemo a khutšo, a katlego le a tšhireletšego. Gaešita le gona bjale, tswalano ya rena le Jehofa e re nea khutšo ya monagano le tšhireletšego ya moya. Ge maemo a bjalo a tla be a le gona ka tlase ga pušo ya Mmušo, re ka se boife e bile re tla šireletšega ka mo go feletšego.

19. Go sepela ka leina la Jehofa go bolela’ng?

¹⁹ Gore re thabele go amogelwa ke Modimo, re swanetše go sepela ka leina la Jehofa. Se se boletšwe ka tsela e matla go Mika 4:⁠5, (PK) moo moporofeta a bolelago gore: “Gobane setšhaba se sengwe le se sengwe se tlo sepela ka leina la Modimo wa sona, gomme rena re tlo fela re sepela ka leina la Jehofa, Modimo wa rena ka mehla le ka mo go sa felego.” Go sepela ka leina la Jehofa ga go bolele feela go bolela gore ke Modimo wa rena. Go nyaka se se fetago go fo tšea karolo dibokeng tša Bokriste le modirong wa go bolela ka Mmušo, gaešita le ge mediro e bjalo le yona e le bohlokwa. Ge e ba re sepela ka leina la Jehofa, gona re ineetše go yena gomme re katanela go mo hlankela ka potego ka lerato leo le tšwago pelong. (Mateo 22:​37) Le gona, bjalo ka  barapedi ba gagwe, ka ntle le pelaelo re ikemišeditše go sepela ka leina la Jehofa Modimo wa rena ka mo go sa felego.

20. Ke’ng seo se ilego sa bolelwa e sa le pele go Mika 4:​6-⁠13?

²⁰ Ga bjale anke re eleng hloko mantšu a boporofeta a Mika 4:​6-13. “Ngwanana wa Tsione” o swanelwa ke go ya bothopša go “fihla kwa Babele.” Se ke sona seo se diragaletšego badudi ba Jerusalema lekgolong la bošupa la nywaga B.C.E. Lega go le bjalo, boporofeta bja Mika bo bontšha gore mašaledi a be a tla boela Juda gomme Jehofa o be a tla kgonthišetša gore manaba a bona a a fedišwa ge Tsione e tsošološwa.

21, 22. Mika 5:⁠2 e ile ya phethagatšwa bjang?

²¹ Ditiragalo tše dingwe tše dikgolo di boletšwe e sa le pele go Mika kgaolo 5. Ka mohlala, ela hloko seo se boletšwego go Mika 5:​1-⁠4. Mika o ile a porofeta gore Mmuši yo a hlomilwego ke Modimo​—yo “thlaxô ya xaxwe e lexo ya boxolo-xolo”​—o tla tšwa Betlelehema. O tla buša e le modiši “à na le matla a Morêna.” Go feta moo, Mmuši yo e tla ba yo mogolo e sego feela Isiraeleng eupša “xo fihla kua lefase le xómaxo xôna.” Go tsebja ga gagwe go ka gakantšha lefase ka kakaretšo, eupša ga se sephiri go rena.

²² Ke mang motho yo bohlokwa kudu yo a kilego a belegwa Betlelehema? Le gona ke mang e tlago go ba yo “moxolo xo fihla kua lefase le xómaxo xôna”? Ga go le o tee ge e se Mesia, Jesu Kriste! Ge Herode yo Mogolo a be a botšiša baperisita ba bagolo le bamangwalo mabapi le moo Mesia a bego a tla belegelwa gona, ba ile ba araba ka gore: “Ké Betlehêma naxeng ya Juda.” Ba ile ba ba ba tsopola mantšu a Mika 5:⁠2. (Mateo 2:​3-⁠6) Ba bangwe ba batho feela ba be ba tseba se ka gobane Johane 7:​42 e ba tsopola ba bolela gore: “A mangwalô xa a re Kriste ó tlo tšwa lelokong la Dafida, ó tlo tšwa Betlêhêma motseng wo Dafida a tšwilexo xo wôna?”

Tapološo ya Kgonthe Bakeng sa Batho

23. Ke’ng seo ga bjale se diregago bakeng sa go phethagatša Mika 5:⁠6?

²³ Mika 5:​5-15 e bolela ka tlhaselo ya ba-Asiria yeo e tlago go atlega ka nakonyana feela gomme e bolela gore Modimo o tla tliša tefetšo ditšhabeng tšeo di sa kwego. Mika 5:⁠6 e holofetša tsošološo ya mašaledi a ba-Juda ya go boela nageng ya gabo bona, eupša mantšu a a šoma le mehleng ya rena. Mika o re: “’Me mašalêla a ba Jakobo, à le xare xa dithšaba tše di ntši, a tlo etša phoka ye e tšwaxo xo Morêna, a tlo etša pula mabyanyeng.” Tshwantšhišo ye e lerato e dirišwa bakeng sa go bolela e sa le pele gore mašaledi a Jakobo wa moya goba Isiraele, e tla ba tšhegofatšo e tšwago go Modimo bathong. “Dinku tše dingwê” tša Jesu, tšeo di nago le kholofelo ya go phela lefaseng, di thabišwa ke go hlankela di bapelane ka magetla le mašaledi a mehleng yeno a “ba-Isiraele ba Modimo,” ba thušago go lapološa ba bangwe moyeng. (Johane 10:​16; Ba-Galatia 6:​16; Tsefanya 3:⁠9) Tabeng ye, go na le ntlha ya bohlokwa yeo re swanetšego go e ela hloko. Ka ge re le bagoeledi ba Mmušo, ka moka ga rena re swanetše go tšeela godimo tokelo ya rena ya go tlišetša ba bangwe tapološo ya kgonthe.

24. O kgahlilwe ke dintlha dife go Mika kgaolo 3 go ya go 5?

²⁴ O ithutile’ng go dikgaolo 3 go ya go 5 tša boporofeta bja Mika? Mohlomongwe o ithutile dintlha tše bjalo ka tše: (1) Modimo o letetše gore bao ba etelelago batho ba gagwe pele ba bontšhe toka. (2) Jehofa a ka se ke a araba dithapelo tša rena ge e ba re dira sebe ka go se itshole. (3) Thomo ya rena ya go dira boboledi e ka phethwa ge feela Modimo a re matlafatša ka moya wa gagwe o mokgethwa. (4) Gore re thabele go amogelwa ke Modimo, re swanetše go ikemišetša  go sepela ka leina la Jehofa. (5) Ka ge re le bagoeledi ba Mmušo, re swanetše go tšeela godimo tokelo ya rena ya go tlišetša batho tapologo ya kgonthe. O ka ba o kgahlilwe ke dintlha tše dingwe. Ke’ng se sengwe gape seo re ka ithutago sona pukung ye ya boporofeta ya Beibele? Sehlogo se se latelago se tla re thuša go hwetša dithuto tše di šomago go tšwa dikgaolong tše pedi tša mafelelo tša boporofeta bja Mika bjoo bo matlafatšago tumelo.

Na o ka hlalosa seswantšho sa Mika seo se bolelago ka pitša ya go apea?

Ka go swana le Mika, re dira bodiredi bja rena ka sebete

O be o tla Araba Bjang?

• Modimo o letetše’ng go bao ba etelelago batho ba gagwe pele?

• Ke ka baka la’ng thapelo le moya o mokgethwa di le bohlokwa mabapi le tirelo ya rena go Jehofa?

• Ke bjang batho ba ‘sepelago ka leina la Jehofa’?