“BATAMELANG KGAUFSI LE MODIMO, GOMME O TLA BATAMELA KGAUFSI LE LENA”

Pele le ka Morago Kamoo Beibele e Fetotšego Monna yo

MMINO e be e le selo sa bohlokwa kudu bophelong bja Rolf-Michael. O be a e-⁠na le kganyogo e feteletšego ya dihlare-tagi. E le mofsa kua Jeremane, o be a e-⁠nwa dino-tagi kudu le go diriša ka bolokologi dihlare-tagi tša LSD, cocaine, hashish le tše dingwe tšeo di gobatšago monagano.

Ge a be a leka go šwahlišetša dihlare-tagi nageng e nngwe ya Afrika, Rolf-Michael o ile a golegwa gomme a fetša dikgwedi tše 13 kgolegong. Nako yeo a e feditšego kgolegong e ile ya mo nea sebaka sa go naganišiša ka morero wa kgonthe wa bophelo.

Rolf-Michael le mosadi wa gagwe, e lego Ursula, ba ile ba nyaka morero wa bophelo gotee le go tsoma therešo ba kgwahlišitše. Go sa šetšwe diphihlelo tše di nyamišago tšeo ba bilego le tšona dikerekeng tšeo go thwego ke tša Bokriste, ba be ba e-⁠na le kganyogo e tiilego ya go nyaka go tseba Modimo. Eupša ba be ba e-⁠na le dipotšišo gomme ba se ke ba hwetša dikarabo tše di kgotsofatšago go dihlopha tše di fapa-fapanego tša bodumedi. Go oketša mo, madumedi a a be a sa ba nee tutuetšo e matla yeo e bego e ka ba dira gore ba fetole maphelo a bona.

Mafelelong Rolf-Michael le Ursula ba ile ba kopana le Dihlatse tša Jehofa. Ka morago ga go thoma go ithuta Beibele, Rolf-Michael o ile a kgongwa kudu ke keletšo e rego: “Batamelang kgaufsi le Modimo, gomme o tla batamela kgaufsi le lena.” (Jakobo 4:⁠8, NW) O be a ikemišeditše go ‘apola semelo sa kgale le tsela ya sona ya boitshwaro gomme a apare semelo se sefsa, seo se bopetšwego go etša Modimo go lokeng le kgethegong ya makgonthe.’​—Ba-Efeso 4:​22-⁠24.

Rolf-Michael o be a ka apara bjang semelo se sefsa? O ile a bontšhwa go tšwa Beibeleng gore “ka tsebo e nepagetšego” semelo sa motho se ka ‘mpshafatšwa go ya ka seswantšho sa Yo a se bopilego,’ e lego Jehofa Modimo.​—Ba-Kolose 3:​9-11, bapiša le NW.

Ge a dutše a monya tsebo e nepagetšego, Rolf-Michael o ile a ikemišetša go dumelelanya bophelo bja gagwe le melao ya motheo ya Lentšu la Modimo. (Johane 17:⁠3) Go tlogela dihlare-tagi go be go le thata, eupša Rolf-Michael o ile a lemoga bohlokwa bja go batamela Jehofa ka thapelo gotee le go thabela thušo ya gagwe. (1 Johane 5:​14, 15) Thušo e oketšegilego e ile ya tšwelela ka go gwerana kgaufsi le bao e bego e šetše e le Dihlatse tša Jehofa, gomme ba šoma ka thata go dira thato ya Modimo.

Tsebo ya gore lefase le a feta le gore bao ba dirago thato ya Modimo ba tla phela ka mo go sa felego le yona e ile ya thuša Rolf-Michael. E ile ya mo thuša go kgetha tšhegofatšo ya ka mo go sa felego ya go ba le tswalano ya kgaufsi le Modimo yo lerato, Jehofa, e sego lerato la nakwana la lefase. (1 Johane 2:​15-17) Rolf-Michael o ile a kgongwa kudu ke mantšu a Diema 27:​11 a rego: “Ngwan’a-ka! Hlalefa, O nthabiše pelo, ke tsebê se nkaxo fetola  sôna xe ba nnyatša.” O bolela ka tebogo gore: “Temana ye e bontšha bogolo bja lerato la Jehofa, ka ge a nea batho sebaka sa go mo thabiša pelo.”

Go swana le Rolf-Michael, mosadi wa gagwe le bana ba bona ba bararo, ba dikete tše makgolo ba hotšwe ke go latela melao ya motheo ya Beibele. Batho ba bjalo ba ka hwetšwa ka diphuthegong tša Dihlatse tša Jehofa lefaseng ka bophara. Ka manyami, dinageng tše dingwe Dihlatse di latofatšwa ka maaka a gore ke sehlotswana se kotsi sa maarogi seo se thubago malapa. Phihlelo ya Rolf-Michael e hlatsela se se fapanego.​—Ba-Hebere 4:⁠12.

Rolf-Michael o bolela gore Mateo 6:​33, yeo e re kgothaletšago go etiša dikganyogo tša moya pele bophelong, ke “khamphase” ya lapa la gagwe, yeo e le šupetšago tsela e swanetšego. Yena le lapa la gagwe ba leboga Jehofa kudu bakeng sa bophelo bjo bo thabišago bja lapa bjoo ba bo thabelago e le Bakriste. Ba na le maikwelo a swanago le a mopsalme yo a opetšego ka gore: “Byale ke re, Morêna ke tlo mo leboxa ka’ng tše di botse tšohle tše a ntiretšexo tšôna?”​—Psalme 116:⁠12.

[Lepokisi go letlakala 9]

Melao ya Motheo ya Beibele e a Šoma

Gare ga melao ya motheo ya Beibele yeo e tutueditšego ba bantši go tlogela ditemalelo tše bolayago go na le ye e latelago:

“Hee lena ba-rata-Modimo, hlôyang bobe.” (Psalme 97:​10) Ka morago ga go kgodišega ka bobe bja mekgwa e bolayago le go godiša lehloyo la kgonthe bakeng sa yona, motho a ka hwetša go le bonolo go dira seo se kgahlišago Modimo.

“Šika le bahlale O hlalefê; mokxônana-le-mašilo ó tlo thsereana.” (Diema 13:​20) Gore a tlogele dihlare-tagi le dilo tše dingwe tše di lemalelwago, motho o swanetše go kgetha bagwera ba gagwe ka kelohloko. Go hlagolela segwera le Bakriste bao ba tlago go mo thuša go tlogela dilo tše ke ga bohlokwa e le ka kgonthe.

A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” (Ba-Filipi 4:​6, 7) Khutšo e bjalo ya pelo le monagano e ka se bapišwe le selo le ge e le sefe. Le gona go ithekga ka Modimo mo go dirwago ka thapelo go tla thuša motho go lebeletšana le mathata a bophelo ka ntle le go retologela dihlare-taging tšeo di lemalelwago.

Modimo o nea batho sebaka sa go mo thabiša pelo