Dipotšišo tše Tšwago go Babadi

Go kolobeletšwa bahu ke’ng?

Ge a be a ngwala ka tsogo ya go tsošetšwa legodimong, moapostola Paulo o ile a ngwala temana yeo e makatšago kudu. Re bala gore: “Le xôna, ba ba kolobeletšwaxo bahu ba di dirêla’ng xe bahu ba ka be ba sa tsoxe? Ba re’ng xe ba kolobeletšwa bahu?” Le gona The New Jerusalem Bible e fetolela temana ye ka gore: “Batho ba direla’ng ge ba kolobetšwa legatong la bahu? Ge e ba bahu ba ka se tsoge le gatee, ke ka baka la’ng re kolobetšwa legatong la bona?”​—1 Ba-Korinthe 15:⁠29.

Na Paulo mo o be a šišinya gore batho bao ba phelago ba kolobetšwe legatong la bao ba hwilego ba se ba kolobetšwa? Se se ka bonagala bjalo go tšwa ditemaneng tše le diphetolelong tše dingwe tša Beibele. Lega go le bjalo, go lebeledišiša Mangwalo a gotee le Segerika sa mathomong seo se dirišitšwego ke Paulo go nea phetho e nngwe. Paulo o be a bolela gore Bakriste ba tloditšwego ba kolobeletšwa goba ba inelwa tseleng ya bophelo yeo e tla lebišago lehung la go hwa ba botega go swana le lela la Kriste. Ka morago ga moo ba tla tsošetšwa bophelong bja moya go swana le yena.

Mangwalo a thekga tlhaloso ye. Lengwalong la gagwe le le yago go ba-Roma Paulo o ngwadile gore: “A xa Le tsebe xobane bohle ba re kolobeleditšwexo Kriste, re kolobeleditšwe lehu la xaxwe?” (Ba-Roma 6:⁠3) Lengwalong la gagwe le le yago go ba-Filipi Paulo o ile a ipolela ka gore: “[Ke] kôpana [le Kriste] mahlokong a xaxwe, kè e-⁠ba wa xo tlo swana naê, lehung la xaxwe, È le xore le nna ke fihlêlê xo tlo tsoxa bahung.” (Ba-Filipi 3:​10, 11) Paulo o be a bolela gore bophelo bja molatedi yo a tloditšwego wa Kriste bo akaretša tsela ya go kgomarela potego ka tlase ga teko, go lebeletšana le lehu letšatši le letšatši gomme mafelelong go hwa a botega moo go latelwago ke go tsošetšwa legodimong.

Ke mo go lemogegago gore mangwalo a gotee le a mangwe ao ka go lebanya a bolelago ka lehu mabapi le bao ba kolobeditšwego a bolela ka batho bao ba phelago bao ba šetšego ba kolobeditšwe, e sego bao ba hwilego. Le gona Paulo o ile a botša Bakriste-gotee le yena bao ba tloditšwego gore: “Ké mo Le fihlilwexo le Yêna ka kolobetšô, la tsoxa le Yêna ka yôna ka xo dumêla matla a Modimo e a mo tsošitšexo bahung.”​—Ba-Kolose 2:⁠12.

Letlema la Segerika e lego hy·perʹ, leo le fetoletšwego e le “legatong la” diphetolelong tše di fapa-fapanego tša Beibele go 1 Ba-Korinthe 15:​29, gape le ka bolela gore “ka morero wa.” Ka go rialo, ka go dumelelana le ditemana tše dingwe tša Beibele, New World Translation of the Holy Scriptures e fetolela temana ye ka mo go nepagetšego ka gore: “Ba tla ba ba dirang bao ba kolobetšwago ka morero wa go ba bahu? Ge e ba bahu ba ka se tsošwe le gatee, gona ke ka baka la’ng ge le bona ba kolobeditšwe ka morero wa go ba ba ­bjalo?”