Go Bota ba Bangwe go Bohlokwa Gore Bophelo e be bjo bo Thabišago

BOLWETŠI bjo bo bakwago ke mpholo wa ka dijong ke selo se se sa rategego. Motho yo bo mo swarago kgafetša o swanetše go šetša kudu mekgwa ya gagwe ya go ja. Eupša go tlogela dijo ka mo go feletšego e le go efoga kotsi ya go swarwa ke bolwetši bjo bo bakwago ke mpholo ka dijong ga se kgetho e swanetšego. Go dira bjalo go tla baka mathata a mantši go feta ao go tla a rarollago. Ga go na motho yo a ka phelago nako e telele a sa je.

Ka mo go swanago, go bohloko go nyamišwa ke motho yo o mmotilego. Go nyamišwa gantši go ka re dira gore re nagane ka kelohloko ge re kgetha bagwera. Lega go le bjalo, go katologa batho ka mo go feletšego e le go efoga kotsi ya go nyamišwa ga se yona tharollo. Ka baka la’ng? Ka gobane go se bote ba bangwe go ka re amoga lethabo la rena ka noši. Gore re phele bophelo bjo bo kgotsofatšago, re nyaka ditswalano tšeo di theilwego go botaneng.

Puku ya Jugend 2002 e hlalosa gore: “Go botana go hlama o mongwe wa metheo ya go dirišana mo go sa raraganago ga letšatši le letšatši le ba bangwe.” Kuranta ya Neue Zürcher Zeitung e bega gore: “Motho yo mongwe le yo mongwe o nyaka go botwa. Go bota ba bangwe go kaonefatša tsela ya bophelo” go fihla tekanyong ya gore “go bohlokwa e le gore re tšwele pele re phela.” Kuranta e tšwela pele ka gore, ka kgonthe ka ntle le go bota ba bangwe, “motho a ka se kgone go lebeletšana le bophelo.”

Ka ge re e-⁠na le senyakwa sa motheo sa go bota motho yo mongwe, ke mang yo re ka mmotago ka ntle le go ba kotsing ya go nyamišwa?

Bota Jehofa ka Pelo ka Moka

Beibele e re botša gore: “Bôʹta Modimo ka pelo ka moka.” (Diema 3:⁠5) Ka kgonthe, Lentšu la Modimo ka mo go tšwelago pele le re kgothaletša gore re bote Mmopi wa rena, Jehofa Modimo.

Ke ka baka la’ng re ka bota Modimo? Sa pele ke ka gobane Jehofa Modimo ke yo mokgethwa. Moporofeta Jesaya o ngwadile gore: “Mokxêthwa, Mokxêthwa, Mokxêthwa, ké Morêna wa mašaba.” (Jesaya 6:⁠3) Na kgopolo ya bokgethwa ga se yeo e ipiletšago go wena? Ge e le gabotse, e swanetše go ba yeo e ipiletšago go wena ka gobane bokgethwa bja Jehofa bo bolela gore ke yo a sekilego, yo a sa dirego phošo le ge e ka ba efe le yo a ka botwago ka mo go feletšego. Le ka mohla a ka se be yo a sa botegego goba yo šoro, le gona ga go kgonege gore a re nyamiše.

 Go feta moo, re ka bota Modimo ka baka la bokgoni bja gagwe le kganyogo ya gagwe ya go rata go thekga bao ba mo hlankelago. Ka mohlala, matla a gagwe a magolo a mo dira gore a kgone go gata mogato. Toka ya gagwe ye e phethagetšego gotee le bohlale bja gagwe di hlahla tsela ya gagwe ya go dira dilo. Le gona lerato la gagwe leo le sa lekanywego le selo le mo tutueletša go gata mogato. Moapostola Johane o ngwadile gore: “Modimo ké Yêna leratô.” (1 Johane 4:⁠8) Lerato la Modimo le tutuetša dilo tšohle tšeo a di dirago. Bokgethwa bja Jehofa le dika tša gagwe tše dingwe tšeo di bonagalago di mo dira Tate yo kaone, motho yo re ka mmotago ka mo go feletšego. Ga go na selo le ge e le sefe le motho le ge e le ofe yo le ka mohla a ka botwago go feta Jehofa.

Bota Jehofa Gomme o be yo a Thabilego

Lebaka le lengwe leo le kwagalago la go bota Jehofa ke gore o re kwešiša gakaone go feta motho le ge e le ofe. O tseba gore motho yo mongwe le yo mongwe o na le senyakwa sa motheo sa tswalano e šireletšegilego, ya nako e telele le ya go bota Mmopi. Bao ba nago le tswalano e bjalo ba ikwa ba šireletšegile kudu. Kgoši Dafida o phethile ka gore: “Wa lehlôxônôlô ké monna eo a itšexo: Kholofêlô ya-ka ké Morêna!” (Psalme 40:⁠4) Ba dimilione lehono ba dumelelana ka pelo ka moka le dikgopolo tša Dafida.

Ela hloko mehlala e mengwe. Doris o ile a dula Dominican Republic, Jeremane, Gerika le United States. O re: “Ke thabela kudu go bota Jehofa. O tseba tsela ya go ntlhokomela mmeleng, moyeng le maikwelong. Ke mogwera yo kaone yoo motho a ka bago le yena.” Wolfgang, e lego moeletši wa tša molao, o hlalosa gore: “Ke mo go kgahlišago go kgona go ithekga ka motho yo mongwe yo a go kganyogelago tše botse, motho yo a ka​—ge e le gabotse yo a tla⁠—​go direlago tše kaone!” Ham, yo a belegetšwego Asia eupša ga bjale a dulago Yuropa, o re: “Ke kgodišegile gore ditaba tšohle di ka diatleng tša Jehofa, le gore ga a dire diphošo, ka gona ke thabela go ithekga ka yena.”

Ke therešo gore ka moka ga rena ga se ra swanela go bota Mmopi wa rena feela eupša re swanetše go bota le batho. Ka gona, ka ge Jehofa e le mogwera yo bohlale le yo a nago le phihlelo, o re nea keletšo ka mohuta wa batho bao re swanetšego go ba bota. Ka go bala Beibele ka kelohloko, re ka ela hloko keletšo ya gagwe tabeng ye.

Batho Bao re ka ba Botago

Mopsalme o ngwadile gore: “Se boteng maxoši e lexo bana ba batho, bao xo sexo phološô xo bôná.” (Psalme 146:⁠3) Polelo ye e buduletšwego e re thuša go amogela gore batho ba bantši ga ba swanelwe ke gore re ba bote. Gaešita le bao ba tšeelwago godimo e le “maxoši” a lefase le, ba bjalo ka ditsebi tša mafapheng a kgethegilego a tsebo goba a modiro, ga ba swanelwe ke gore re fo ba bota. Tlhahlo ya bona gantši ke yeo e lahletšago, gomme go bota “maxoši” a bjalo go se go ye kae go ka feleletša ka manyami.

Ke therešo gore se ga se sa swanela go re dira gore re se ke ra bota batho ka moka. Lega go le bjalo, go bonagala re swanetše go ba šedi ge re kgetha batho bao re ka ba botago. Re swanetše go diriša mokgwa ofe? Mohlala o tšwago setšhabeng sa bogologolo sa Isiraele o ka re thuša. Ge go be  go nyakega gore go kgethwe batho bao ba bego ba tla rwala boikarabelo bjo bogolo Isiraeleng, Moše o ile a eletšwa gore a “ikxêthêlê banna ba dinatla, ba ba boifaxo Modimo, banna ba therešô, ba ba hloilexo mexabaru.” (Ekisodo 18:​21) Re ka ithuta’ng go se?

Ba e be e le banna bao ba ilego ba bontšha dika tše itšego tša Modimo pele ba ka kgethwa gore ba be maemong a go ka botwa. Ba be ba šetše ba ipontšhitše gore ba boifa Modimo; ba na le tlhompho e botse ya go hlompha Mmopi le gore ba be ba boifa go mo nyamiša. Go be go le molaleng go batho bohle gore banna ba ba be ba dira sohle seo ba ka se kgonago go swarelela ditekanyetšong tša Modimo. Ba be ba hloile megabaru, e lego seo se bego se bontšha matla a go itshwara ao a bego a tla ba thibela gore e se ke ya ba ba gobogilego ka ge ba le maemong a bolaodi. Ba be ba ka se diriše go botwa ga bona gampe e le go tšwetša pele dikganyogo tša bona ka noši goba tša ba leloko goba bagwera.

Na e be e ka se be gabohlale go rena go diriša mokgwa o swanago lehono ge re kgetha batho bao re ka ba botago? Na re tseba batho bao mekgwa ya bona e bontšhago gore ba boifa Modimo? Na ba ikemišeditše go swarelela ditekanyetšong tša gagwe tša boitshwaro? Na ba na le sebete sa go tlogela go dira dilo tšeo di fošagetšego? Na ba na le sebete sa go se fetole boemo e le gore ba ikhole ka noši goba e le gore ba hwetše seo ba se nyakago? Ka kgonthe banna le basadi bao ba bontšhago dika tše bjalo ba swanelwa ke gore re ba bote.

O se ke wa Fetšwa Matla ke ge o Nyamišwa Nako le Nako

Ge re dira phetho ya gore ke mang yo re ka mmotago, re swanetše gore re se fele pelo, ka ge go bota motho go tšea nako e telele. Tsela e bohlale ke go bota motho ganyenyane-ganyenyane, kgato ka kgato. Bjang? Ge e le gabotse, re ka hlokomela boitshwaro bja motho ka nako e telele, re lebelela tsela ya gagwe ya go dira dilo maemong a itšego. Na motho yo a ka botwa dilong tše dinyenyane? Ka mohlala, na o buša dilo tšeo a di adimilego go etša ge a holofeditše le gona na o phetha mabaka ka nako e swanetšego? Ge e ba go le bjalo, gona re ka ikwa gore re ka mmota ka mo go šireletšegilego dilong tše dikgolo. Se se dumelelana le molao wa motheo o rego: “Mmotexi-dinyaneng, le ka tše kxolo ó a bôtêxa.” (Luka 16:​10) Go ba bao ba kgethago le bao ba sa felego pelo go ka re thuša go phema go nyamišwa mo gogolo.

Lega go le bjalo, go thwe’ng ge e ba motho a re nyamiša? Barutwana ba Beibele ba tla gopola gore bošegong bjo a golegilwego ka bjona, Jesu Kriste o ile a nyamišwa kudu ke baapostola ba gagwe. Judase Isikariothe o ile a mo eka, gomme ba bangwe ba ile ba tšhaba ka baka la poifo. Petro o ile a ba a latola Jesu ka makga a mararo. Eupša Jesu o ile a lemoga gore ke Judase a nnoši yo a ilego a gata mogato ka go rata. Go nyamišwa nakong yeo e bohlokwa ga se gwa ka gwa thibela Jesu gore a tiišetše lefsa go bota baapostola ba gagwe bao ba bego ba šetše ba 11 dibekeng tše sego kae feela ka morago. (Mateo 26:​45-47, 56, 69-75; 28:​16-20) Ka mo go swanago, ge e ba re ikwa re nyamišitšwe ke motho yo re mmotago, re swanetše go naganišiša ge e ba seo se bonagalago e le go nyamišwa e ka ba e le go bontšhwa ga moya wa go se swanelwe ke go botwa goba e le bofokodi bja nakwana bja nama.

Na ke Swanelwa ke go Botwa?

Motho yo a dirago phetho ya go kgetha batho bao a ka ba botago o swanetše go ba yo a leka-lekanego gomme a ipotšiše gore: ‘Na ke swanelwa ke go botwa? Ke ditekanyetšo dife tšeo di leka-lekanego tša go ka botwa tšeo ke swanetšego go di lebelela go nna le go ba bangwe?’

Ka kgonthe motho yo a botwago o bolela therešo ka mehla. (Ba-Efeso 4:​25) Ga a fetole mantšu a gagwe gore a swanele batheetši ba gagwe e le gore a ikhole. Le gona ge e ba a dira boitlamo, motho yo a botwago o dira sohle seo se lego matleng a gagwe go phethagatša seo a se boletšego. (Mateo 5:​37) Ge e ba motho yo mongwe a mo ntšhetša sa mafahleng a gagwe motho yo a botwago o boloka sephiri gomme ga a sebe. Motho yo a botwago o botegela molekane wa gagwe wa lenyalo. Ga a bogele diswantšho tšeo di kgothaletšago bootswa gomme ga a lebiše tlhokomelo ya gagwe dikganyogong tša nama tša boikgopolelo, le gona ga a bapale ka lerato. (Mateo 5:​27, 28) Motho yo a swanelago ke gore re mmote o šoma ka thata gore a phediše yena le ba lapa la gagwe gomme  ga a tsome tšhelete ye e hwetšwago gabonolo a sa naganele batho ba bangwe. (1 Timotheo 5:⁠8) Go gopola ditekanyetšo tše bjalo tše di leka-lekanego le tša Mangwalo go tla re thuša go lemoga batho bao re ka ba botago. Go feta moo, go kgomarela ditekanyetšo tše di swanago tša boitshwaro go tla thuša yo mongwe le yo mongwe wa rena gore a swanelwe ke go botwa ke ba bangwe.

E tla ba mo go thabišago go phela lefaseng leo go lona batho ka moka ba bego ba ka botwa le moo go nyamišwa go bego go ka se sa ba gona! Na seo ke toro feela? E sego go batho bao ba tšeelago godimo dikholofetšo tša Beibele, ka gobane Lentšu la Modimo le bolela e sa le pele ka go tla ga “lefase le lefsa” leo le se nago bofora, maaka le go hloka toka le ge e le gofe gotee le leo le se nago manyami, bolwetši gaešita le lehu! (2 Petro 3:​13; Psalme 37:​11, 29; Kutollo 21:​3-⁠5) Na e ka se be mo go holago go tseba mo go oketšegilego ka kholofetšo ye? Dihlatse tša Jehofa di tla thabela go go nea tsebišo e oketšegilego tabeng ye le ditabeng tše dingwe tša bohlokwa.

Go se bote ba bangwe go ka re amoga lethabo

Jehofa o swanelega kudu gore re mmote

Ka moka ga rena re nyaka ditswalano tšeo di theilwego go botaneng