“Ke Hweditše Bogwera, Lerato le Tlhokomelo”

“SEO bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:​35) Bjalo ka ge Jesu a ile a bolela, lerato e ile ya ba seka se se hlaolago borwarre bja Bokriste bja pele. Tertullian, ge a ngwala nywageng e fetago e lekgolo ka morago ga lehu la Kriste, o tsopotše batho bao ba bego ba etše hloko bophelo bja Bakriste ba re: ‘Bona kamoo ba ratanago ka gona le kamoo ba ikemišeditšego go hwelana.’

Na lerato la mohuta woo le sa dutše le hwetšagala lefaseng? Ee. Ka mohlala, nagana ka lengwalo leo le hweditšwego ke ofisi ya lekala ya Dihlatse tša Jehofa kua Brazil. Mongwadi wa lengwalo le, e lego mosadi yo a bitšwago Marília, o ngwadile gore:

“Ge re be re dula Villa Mercedes, Argentina, mma yo e lego yo mongwe wa Dihlatse tša Jehofa, o ile a ba le bolwetši bja osteoarthritis bjo bo ilego bja mo tlogela a golofetše go tloga dinokeng go ya tlase. Dihlatse tša kua Villa Mercedes ke tšona di bego di mo hlokometše ka lerato dikgweding tše seswai tša bolwetši bja gagwe. Di ile tša hlokomela dilo ka moka, tša hlwekiša legae la gagwe le go mo lokišeletša dijo. Le ge mma a be a le sepetlele, ka dinako tšohle o be a e-⁠ba le yo mongwe yo a bego a dula le yena, mosegare le bošego.

“Nna le mma re boetše Brazil, moo a sa dutšego a fola bolwetšing bja gagwe. Dihlatse tša moo re dulago gona gabjale di dira sohle seo di ka se kgonago go thuša mma gore a fole.”

Marília o phetha lengwalo la gagwe ka gore: “Ge e le nna ga ke Hlatse, eupša ke hweditše bogwera, lerato le tlhokomelo gare ga Dihlatse.”

Ka kgonthe, go sa na le batho bao ba bontšhanago lerato la kgonthe la Bokriste. Ka go dira bjalo, ba bontšha seo matla a dithuto tša Jesu a ka se dirago maphelong a rena.

Na o tla Amogela Ketelo?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org