“Ba ba Itokišeditšego xo Dira tše Botse Tšhohle”

“BA ELETŠÊ xore e bê ba xo bušwa ke marêna le mmušô, e bê batho ba ba kwaxo, le ba ba itokišeditšexo xo dira tše botse tšohle.” (Tito 3:⁠1) Ke modiro ofe o mobotse woo moapostola Paulo a bego a naganne ka wona ge a be a ngwalela badumedi-gotee le yena mantšu ao? Seithuti sa Beibele E. F. Scott se ile sa šupa go mohuta o mongwe wa modiro o mobotse ka gore: “Bakriste ba be ba sa swanela go theetša babuši feela, eupša ba be ba swanetše go itokišetša go dira modiro le ge e le ofe o mobotse. . . . Ge e ba go nyakega, Bakriste ba swanetše go ba gare ga bao ba etelelago pele go bontšheng go tshwenyega ka setšhaba. Ka dinako tšohle go tla ba le go phulega ga mollo, leuba la bolwetši, masetla-pelo a mehuta e fapa-fapanego, moo baagi ka moka ba ba lokilego ba tla-​go go kganyoga go thuša baagišani ba bona.”

Bakriste ba tšea karolo medirong e itšego yeo e kgomago batho ge feela mediro yeo e sa ganetšane le melao ya Modimo. (Ditiro 5:​29) Ka mohlala, ka go latela ditaelo tša lefapha la tša go tima mollo la tikologong, ofisi ya lekala ya Dihlatse tša Jehofa kua Japane, yeo e lego Ebina, ngwaga le ngwaga e itlwaeletša seo se ka dirwago nakong ya mollo. Maemong a bjalo, ditho ka moka tša lapa la Bethele di a kgobokana e le go theetša ditaelo tšeo di newago ke moemedi wa lefapha la tša go tima mollo la tikologong yeo.

Go oketša moo, mo e ka bago ka godimo ga ngwaga-some, ofisi ya lekala e be e dutše e dirišana le babuši ba tikologong yeo pontšhong yeo e thekgwago bakeng sa go kgothaletša go ela hloko ditsela tša go thibela mollo. Pontšhong ye, dikhamphani le difeme tša motseng di bontšha go itokišetša ga tšona go lwa le mollo le go o laola. Gantši lekala le be le newa difoka bakeng sa bokgoni le tirišano ya bašomi ba lona. Ka 2001, le ile la newa sefoka sa pele pontšhong yeo. Bašomi ba lona ba itokišeditše go dira modiro o mobotse woo o ka phološago maphelo nakong ya mollo.

Tirelo e Bohlokwa Kudu

Lega go le bjalo, Dihlatse tša Jehofa di swaregile ka mohuta o bohlokwa kudu wa modiro o mobotse, woo le wona e lego wa go phološa maphelo. Ka mehla di etela baagišani ba tšona bakeng sa go boledišana le bona ka ditaba tše dibotse tša Mmušo wa Modimo. (Mateo 24:​14) Dihlatse di kgothaletša batho go ithuta le go diriša melao ya motheo ya Beibele maphelong a bona e le gore ba kaonefatše boemo bja bona bja bophelo mo nakong ye gotee le gore ba be le kholofelo ya bophelo bjo bo sa felego lefaseng leo go lona go tla aparetšago khutšo ya kgonthe le tšhireletšego.

Ba bangwe ba ka no ba ba sa kwešiše bohlokwa bja tirelo yeo Dihlatse tša Jehofa di e neago, ba di lebelela e le tše di tenago. Lega go le bjalo, Moahlodi Jean Crepeau wa Kgorong-kgolo ya tsheko ya Quebec kua Canada o ile a ba le pono e fapanego. Dihlatse tša Jehofa tša moo di ile tša ganetša molao wa motse wa Blainville, Quebec, wo o bego o nyaka gore di hwetše lengwalo la tumelelo bakeng sa diketelo tša tšona tša ntlo le ntlo. Phethong ya kgoro ya tsheko, Moahlodi Crepeau o itše: “Diketelo tša Dihlatse tša Jehofa ke tirelo ya Bokriste ya setšhaba gomme . . . dikgatišo tšeo  di sepedišwago ke Dihlatse go baagi bao ba nago le kgahlego ke dipuku tša bohlokwa, di ahla-ahla ditaba tše bjalo ka bodumedi, Beibele, dihlare-tagi, go lemalela dino-tagi, thuto ya bafsa, mathata a lenyalo le tlhalo.” Kahlolo e ile ya tšwela pele ka gore: “Kgoro ya tsheko e ka fo phetha ka gore go bapetša Dihlatse tša Jehofa le bakgopedi ke go di rogaka, go di nyatša, go di kweša bohloko le go di senya leina.”

Dihlatse tša Jehofa di tlaleletša katlegong ya setšhaba seo di phelago go sona ka go thuša batho go fenya mathata a bona a letšatši le letšatši le go ba tlišetša kholofelo bakeng sa bokamoso. Beibele e ba hlamela go phethagatša modiro woo. “Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong, Xore motho wa Modimo e bê yo boló-ka-tlalô, a kxonišwê xo dira medirô e botse ka moka.”​—2 Timotheo 3:​16, 17.

Na o tla rata go tseba kamoo Dihlatse tša Jehofa e bago ‘tše di itokišeditšego go dira tše botse tšohle’? Re go laletša gore o amogele thušo ya tšona ya go ithuta mo go oketšegilego ka Beibele gomme ka go rialo wa itira yo a hwetšagalago bakeng sa tirelo ye ya bohlokwa ya setšhaba yeo di e dirago tikologong ya geno le lefaseng ka bophara.

Dihlatse tša Jehofa di nyaka go dirišana le babuši ba lefase

Dihlatse di tsebja ka go thuša baagišani ba tšona