Na o Hlagolela Maikwelo a go Makala?

NA O etše hloko gore bangwadi ba Beibele leboelela ba tsoša maikwelo a go makala ge ba bona mediro le dika tša Modimo? Mopsalme o boletše gore: “O mpopile wa matete-tete.” (Psalme 139:​14) Moporofeta Jesaya o ngwadile gore: “Morêna, O Modimo wa-ka! Ke a Xo xodiša. Ke rêta leina la xaxo xobane ó dira mehlôlò.” (Jesaya 25:⁠1) Goba nagana ka dimakatšo le tlhompho tše di boletšwego ke moapostola Paulo mantšung a gagwe a rego: “A! Bodiba bya lehumô la Modimo, le bya bohlale bya xaxwe, bya tsebô ya xaxwe!”​—Ba-Roma 11:⁠33.

The Oxford Encyclopedic English Dictionary e hlalosa lentšu “makalo” e le “maikwelo ao a hlohleletšwago ke selo seo se sa letelwago, se se sa tlwaelegago goba se se sa hlalosegego, kudu-kudu semaka seo se tswakanego le tebogo goba go rata go tseba dilo, bjalo bjalo.”

Na ga se mo go thabišago go bona bana ba makala kudu ge ba bona, ba kgoma goba ba e-⁠kwa dilo tše difsa? Ka manyami, go rata go tseba mo go bjalo goba go rata go tseba dilo tše difsa go a fokotšega ge motho a gola.

Lega go le bjalo, go bangwadi ba Beibele bao ba sa tšwago go tsopolwa, go ba le maikwelo a tlhompho e be e le mo go tseneletšego kudu go bona. Go be go tšea nako e telele kudu. Ka baka la’ng go be go le bjalo? Ba be ba hlagoletše maikwelo a go makala ka go naganišiša ka mo go tseneletšego ka tebogo ka mediro ya Modimo. Mopsalme o rapetše ka gore: “Ke eleletša tša mehla ya kxalê; ke êlêlwa tšohle O kilexo wa di dira, ke xopola medirô [“dimaka”, The New English Bible] ya ’atla tša xaxo.”​—Psalme 143:⁠5.

Ke mo go retegago gakaakang gore maikwelo a a go makala a ka hwetšwa gare ga barapedi ba Modimo ba lehono! Na o na le ona? Na o a a hlagolela?

Na o tla Amogela Ketelo?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org