Na Modimo o na le Taba le Rena?

NA O ikwa o goga ka kgara ka baka la go tshwenyega maikwelong e le ka baka la mathata a lapa la gago, a maphelo, a mošomo goba maikarabelo a mangwe a magolo? Batho ba bantši ba ikwa bjalo. Le gona ke mang lehono yo a sa kgongwego ke go hloka toka, bosenyi le bošoro? Ka kgonthe, se ke seo Beibele e se bolelago ge e re: “Dibopya ka moka le tšôna di sa fêxêlwa, le tšôna di sa šôkwa.” (Ba-Roma 8:22) Ga go makatše ge batho ba bantši ba botšiša gore: ‘Na Modimo o na le taba le rena? Na o tla re thuša?’

Ka thapelo Kgoši Salomo yo bohlale o itše go Modimo: “Mo-tseba-dipelo tša-bana-ba-batho-ka-moka ké Wene Ò nnoši.” Salomo o be a dumela gore Modimo ga a re tsebe feela eupša e bile o re hlokomela re le motho ka noši. O be a kgona go kgopela Modimo go ‘kwa a le legodimong’ le go araba dithapelo tša yo mongwe le yo mongwe yo a boifago Modimo yo a utollelago Modimo ‘kotlo ya pelo ya gagwe.’—2 Koronika 6:29, 30.

Lehono, Jehofa Modimo o sa na le taba le rena gomme o re laletša go mo tsoma ka thapelo. (Psalme 50:15) O holofetša go araba dithapelo tšeo di dirwago go tšwa pelong tšeo di dumelelanago le thato ya gagwe. (Psalme 55:16, 22; Luka 11:5-13; 2 Ba-Korinthe 4:7) Ee, Jehofa o theetša “dithapêlô tšohle le ditôpô tšohle, xe di ka dirêlwa motho mang le mang, le xe e le sethšaba [sa gagwe] ka moka.” Ka gona, ge re bota Modimo, re rapelela thušo ya gagwe le go batamela kgaufsi le yena, re tla thabela tlhokomelo ya gagwe e lerato le tlhahlo ya gagwe. (Diema 3:5, 6) Mongwadi wa Beibele Jakobo o re kgonthišetša gore: “Batamelang kgaufsi le Modimo, gomme o tla batamela kgaufsi le lena.”—Jakobo 4:8, NW.