“Molaki” Yo A Botegago Yo bohlale

“Byale ké mang molaki e a bôtêxaxo yo bohlale, yo mong wa xaxwe a mmeilexo xo laka bahlanka ba xaxwe?”—MATEO 24:45.

1, 2. Ke ka baka la’ng lehono e le gabohlokwa gore re amogele kabo ya ka mehla ya dijo tša moya?

KA Labobedi thapama, Nisani 11, 33 C.E., barutiwa ba Jesu ba ile ba rotoša potšišo yeo e lego bohlokwa kudu go rena lehono. Ba ile ba mmotšiša gore: ‘Ke mahlola afe ao re tlogo bona ka ona ge go fihla maboo a gago le bofelo bja mabaka ano?’ Jesu ge a araba o ile a bolela boporofeta bjo bo kgahlišago. O ile a bolela ka nako ya khuduego ya dintwa, ditlala, ditšhišinyego tša lefase le malwetši. Le gona seo e be e tla ba feela “mathômô a ditlalêlô.” Boemo bo be bo tla mpefala. A tebelelo e boifišago gakaakang!—Mateo 24:3, 7, 8, 15-22; Luka 21:10, 11.

² Ga e sa le go tloga ka 1914, dibopego tše dintši tša boporofeta bjo bja Jesu di be di dutše di phethagatšwa. “Mathômô a ditlalêlô” a wetše batho ka botlalo. Lega go le bjalo, Bakriste ba therešo ga se ba swanela go boifa. Jesu o holofeditše gore o tla ba fepa ka dijo tša moya tšeo di nago le phepo. Ka ge gona bjale Jesu a le legodimong, o lokišeleditše bjang gore re amogele kabo ya rena ya dijo tša moya mo lefaseng?

3. Jesu o dirile ditokišetšo dife gore re hwetše “dijô ka lebaka la xôna?”

³ Jesu ka noši o ile a bolela karabo ya potšišo yeo. Nakong ya ge a be a bolela boporofeta bja gagwe bjo bogolo, o ile a botšiša gore: “Byale ké mang molaki e a bôtêxaxo yo bohlale, yo mong wa xaxwe a mmeilexo xo laka bahlanka ba xaxwe le xo ba fa dijô ka lebaka la xôna?” Ke moka a re: “Wa lehlôxônôlô e tlo ba molaki eo, mong wa xaxwe xe a e-tla, a mo hwetša a dira tšôna tšeo. Ruri, ke a Le botša, ó tlo mmea a laka dilô tša xaxwe ka moka.” (Mateo 24:45-47) Ee, go be go tla ba le “molaki” yo a abetšwego go nea dijo tša moya, “molaki” yo e tla bago yo a botegago le yo bohlale. Na molaki yoo e be e le motho o tee, batho bao ba latelanago goba selo se itšego? Ka ge molaki yo a botegago a re nea dijo tšeo re di nyakago ka phagahlo, re kgahlegela go tseba karabo.

Na ke Motho o Tee Goba ke Sehlopha?

4. Re tseba bjang gore “molaki e a bôtêxaxo yo bohlale” e ka se be motho o tee?

⁴ “Molaki e a bôtêxaxo yo bohlale” e ka se be motho o tee. Ka baka la’ng? Ka gobane molaki o ile a thoma go aba dijo tša moya morago kua lekgolong la pele la nywaga, gomme go ya ka Jesu, molaki o be a tla ba a sa dira bjalo ge Mong wa gagwe a be a fihla ka 1914. Seo se be se tla bolela nywaga e ka bago 1 900 ya tirelo ya potego ya motho o tee. Gaešita le Methusala ga se a phela nako e telele gakaalo!—Genesi 5:27.

5. Hlalosa lebaka leo ka lona polelwana e rego “molaki e a bôtêxaxo yo bohlale” e sa šupego go Mokriste yo mongwe le yo mongwe.

⁵ Ka gona, na polelwana e rego “molaki e a bôtêxaxo yo bohlale” e ka šupa ka kakaretšo go  Mokriste yo mongwe le yo mongwe? Ke therešo gore Bakriste ka moka ba swanetše go botega le go ba ba bohlale; lega go le bjalo, Jesu o be a naganne ka selo se itšego seo se fetago seo ge a be a bolela ka “molaki e a bôtêxaxo yo bohlale.” Re tseba seo bjang? Ka gobane o boletše gore “mong wa xaxwe xe a e-tla” o tla bea molaki go “ laka dilô tša xaxwe ka moka.” (Mongwalo o sekamego ke wa rena.) Ke bjang Mokriste yo mongwe le yo mongwe a bego a ka bewa go laka dilo ka moka—go laka dilo “ka moka” tša Morena? Seo ga se kgonege!

6. Setšhaba sa Isiraele se be se reretšwe bjang go šoma e le “mohlanka” goba “molaki” wa Modimo?

⁶ Ka gona, phetho e nnoši yeo e kwagalago ke ya gore Jesu o be a šupa go sehlopha sa Bakriste e le “molaki e a bôtêxaxo yo bohlale.” Na go ka ba le selo se bjalo ka sehlopha sa molaki? Ee. Nywaga e makgolo a šupago pele ga ge Kriste a ka ba gona, Jehofa o ile a šupa go setšhaba ka moka sa Isiraele e le “dihlatse tša-ka” le “mohlanka wa-ka eo ke mo kgethilego.” (Jesaya 43:10, PK, mongwalo o sekamego ke wa rena.) Go tloga ka 1513 B.C.E., ge Molao wa Moše o be o newa, go fihla ka Pentekoste ya 33 C.E., setho se sengwe le se sengwe sa setšhaba sa Isiraele e be e le karolo ya sehlopha se sa mohlanka. Ba-Isiraele ba bantši ba be ba sa tšee karolo ka go lebanya go laoleng ditaba tša setšhaba goba go rulaganyeng lenaneo la sona la phepo ya moya. Jehofa o ile a diriša dikgoši, baahlodi, baporofeta, baperisita le ba-Lefi bakeng sa gore ba dire mediro yeo. Lega go le bjalo, Isiraele e le setšhaba e be e swanetše go emela bogoši bja Jehofa le go bolela ka letago la gagwe gare ga ditšhaba. Mo-Isiraele yo mongwe le yo mongwe e be e swanetše go ba hlatse ya Jehofa.—Doiteronomio 26:19; Jesaya 43:21; Maleaki 2:7; Ba-Roma 3:1, 2.

“Mohlanka” o a Lahlwa

7. Ke ka baka la’ng setšhaba sa bogologolo sa Isiraele se ile sa se sa swanelega go ba “mohlanka” wa Modimo?

⁷ Ka ge Isiraele e be e le “mohlanka” wa Modimo nywaga-kgolong e fetilego, na gape e be e le molaki yo Jesu a boletšego ka yena? Aowa, ka gobane Isiraele ya bogologolo e ile ya fetoga e sa botegego le yeo e sego bohlale. Paulo o nea kakaretšo ya boemo bjo ge a tsopola mantšu ao Jehofa a a boditšego setšhaba ka gore: “Ina la-ka le hlwa lè xoboxa ka bô-lena mo xo ba-ntlê.” (Ba-Roma 2:24) Ka kgonthe, Isiraele e ile ya fihla sehloeng sa histori e telele ya borabele ka go gana Jesu, e lego nakong yeo Jehofa a ilego a e lahla.—Mateo 21:42, 43.

8. “Mohlanka” o ile a kgethwa neng go tšeela Isiraele legato, gomme ka tlase ga maemo afe?

⁸ Go se botege mo ga “mohlanka” yo e lego Isiraele, go be go sa bolele gore le ka mohla barapedi ba botegago ba ka se amogele kabo ya dijo tša moya. Ka Pentekoste ya 33 C.E., matšatši a 50 ka morago ga tsogo ya Jesu, moya o mokgethwa o ile wa tšhollelwa go barutiwa ba gagwe ba ka bago 120 ka phapošing ya ka godimo kua Jerusalema. Ka nako yeo, setšhaba se sefsa se ile sa tswalwa. Ka mo go swanelegago, go tswalwa ga sona go ile gwa phatlalatšwa ge ka sebete ditho tša sona di thoma go botša badudi ba Jerusalema ka “matete a Modimo.” (Ditiro 2:11) Ka gona, setšhaba seo se sefsa e lego setšhaba sa moya, se ile sa ba “mohlanka” yo a bego a tla tsebatša letago la Jehofa ditšhabeng le go nea dijo ka lebaka la gona. (1 Petro 2:9) Ka mo go swanetšego, se ile sa bitšwa “ba-Isiraele ba Modimo.”—Ba-Galatia 6:16.

9. (a) Ke bomang ba bopago “molaki e a bôtêxaxo yo bohlale”? (b) “Bahlanka” ke bomang?

⁹ Setho se sengwe le se sengwe sa “ba-Isiraele ba Modimo” ke Mokriste yo a ineetšego le  go kolobetšwa, yo a tloditšwego ka moya o mokgethwa gomme o na le kholofelo ya go phela legodimong. Ka gona, polelwana e rego “molaki e a bôtêxaxo yo bohlale” e šupa go ditho ka moka tša setšhaba seo se tloditšwego ka moya e le sehlopha mo lefaseng ka nako le ge e le efe go tloga ka 33 C.E. go fihlela gona bjale, go fo swana le ge mo-Isiraele yo mongwe le yo mongwe yo a bego a phela nakong ya go tloga ka 1513 B.C.E. go fihlela ka Pentekoste ya 33 C.E. e be e le karolo ya sehlopha sa mohlanka sa pele ga Bokriste. Lega go le bjalo, “bahlanka” bao ba amogelago dijo tše di agago tša moya go tšwa go molaki ke bomang? Lekgolong la pele la nywaga C.E., Mokriste yo mongwe le yo mongwe o be a e-na le kholofelo ya go phela legodimong. Ka baka leo, bahlanka le bona e be e le Bakriste ba tloditšwego, bao ba lebelelwago e le motho ka o tee ka o tee, e sego e le sehlopha. Batho ka moka, go akaretša bao ba bego ba e-na le maemo a boikarabelo ka phuthegong, ba be ba nyaka dijo tša moya go tšwa go molaki.—1 Ba-Korinthe 12:12, 19-27; Ba-Hebere 5:11-13; 2 Petro 3:15, 16.

‘Bohle o ba Laetše Mediro ya Bona’

10, 11. Re tseba bjang gore ga se ditho ka moka tša sehlopha sa molaki tšeo di nago le kabelo e swanago ya modiro?

¹⁰ Le ge “ba-Isiraele ba Modimo” e le sehlopha sa molaki yo a botegago le yo bohlale seo se nago le kabelo ya modiro, setho se sengwe le se sengwe se na le boikarabelo bja motho ka noši. Mantšu a Jesu ao a begilwego go Mareka 13:34 a bolela se ka go lebanya. O itše: “Xo byalo ka motho e a êtaxo a tloxêla ngwakô wa xaxwe a neile bahlanka ba xaxwe matla, bohle à ba laetše medirô ya bôná, à laetše moleta-mojakô a re a phakxamê.” (Mongwalo o sekamego ke wa rena.) Ka gona setho se sengwe le se sengwe sa sehlopha sa molaki se amogetše kabelo—go oketša dilo tša Kriste tša lefaseng. Se dira modiro wa sona ka go dumelelana le bokgoni le dibaka tša sona.—Mateo 25:14, 15.

¹¹ Go oketša moo, moapostola Petro o boditše Bakriste ba ba tloditšwego ba mehleng ya gagwe gore: “Le dirêlanê ka mo e mongwê le e mongwê a séditšwexo ka xôna ka xo xauxêlwa; le bê balaki ba botse ba dikabêlô tša mehuta-huta tša kxauxêlô ya Modimo.” (1 Petro 4:10, mongwalo o sekamego ke wa rena.) Ka baka leo, batlotšwa bao ba na le boikarabelo bja go direlana ba diriša dimpho tšeo Modimo a ba neilego tšona. Go oketša moo, mantšu a Petro a bontšha gore ga se Bakriste ka moka bao ba ka bago le bokgoni bjo bo swanago, boikarabelo goba ditokelo. Lega go le bjalo, setho se sengwe le se sengwe sa sehlopha sa molaki se ka tsenya letsogo ka tsela e itšego kgolong ya setšhaba sa moya. Bjang?

12. Setho se sengwe le se sengwe sa sehlopha sa molaki se ile sa tsenya letsogo bjang kgolong ya molaki, go sa šetšwe gore ke monna goba ke mosadi?

¹² Sa pele, yo mongwe le yo mongwe o be a swanetše go ba hlatse ya Jehofa, a bolele ditaba tše dibotse tša Mmušo. (Jesaya 43:10-12; Mateo 24:14) Pejana ga ge a ka rotogela legodimong, Jesu o ile a laela barutiwa ba gagwe ka moka bao ba botegago gore e be barutiši, bobedi banna le  basadi. O itše: “Ké xôna yang Le dirê dithšaba ka moka barutiwa, ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna. Xomme tsebang, ke na le lena ka mehla xo fihla bofelong bya lefase.” (Mongwalo o sekamego ke wa rena.)—Mateo 28:19, 20.

13. Ke tokelo efe yeo batlotšwa ka moka ba ilego ba e thabela?

¹³ Ge barutiwa ba bafsa ba be ba hweditšwe, ba be ba swanetše go rutwa ka kelohloko gore ba boloke dilo ka moka tšeo Kriste a di laetšego barutiwa ba gagwe. Ge nako e dutše e tšwela pele, bao ba arabelago ba ile ba swanelegela go ruta ba bangwe. Go ile gwa dirwa gore dijo tša moya tšeo di agago di hwetšagale go bao mafelelong e bego e tla ba ditho tša sehlopha sa molaki ditšhabeng tše dintši. Bakriste ka moka ba tloditšwego, banna le basadi, ba ile ba tšea karolo go phethagatšeng thomo ya go dira barutiwa. (Ditiro 2:17, 18) Modiro wo o be o tla tšwela pele go tloga nakong ya ge molaki a be a thoma modiro wa wona la mathomo go fihlela bofelong bja tshepedišo ye ya dilo.

14. Ditokelo tša go ruta ka phuthegong di be di lekanyeditšwe go bomang, gomme basadi ba tloditšwego bao ba fišegago ba ile ba ikwa bjang ka seo?

¹⁴ Bao ba sa tšwago go kolobetšwa le go tlotšwa ba ile ba ba karolo ya molaki, gomme go sa šetšwe gore mathomong ba rutilwe ke mang, ba ile ba tšwela pele ba amogela tlhahlo go tšwa go ditho tša phuthego tšeo di bego di e-na le ditshwanelego tša Mangwalo tša go hlankela e le bagolo. (1 Timotheo 3:1-7; Tito 1:6-9) Ka go rialo banna ba bao ba kgethilwego ba be ba e-na le tokelo ya go tšea karolo kgolong ya setšhaba ka tsela e kgethegilego. Basadi ba Bakriste bao ba botegago bao ba tloditšwego ga se ba ka ba kgopišwa ke taba ya gore ke banna ba Bakriste feela bao ba bego ba abetšwe go ruta ka phuthegong. (1 Ba-Korinthe 14:34, 35) Go e na le moo, ba ile ba thabela go holwa ke modiro o thata wa ditho tše e lego banna tša phuthego gomme ba be ba thabela ditokelo tšeo di bego di bulegetše basadi, go akaretša ya go iša ditaba tše dibotse go ba bangwe. Dikgaetšedi tše di tloditšwego tšeo di fišegago lehono di bontšha boemo bja kgopolo bjo bo swanago bja boikokobetšo, go sa šetšwe gore bagolo bao ba kgethilwego ke batlotšwa goba go se bjalo.

15. O mongwe wa methopo e megolo ya dijo tša moya lekgolong la pele la nywaga e be e le ofe, gomme ke bomang bao ba ilego ba etelela pele go di aba?

¹⁵ Dijo tša moya tše bohlokwa tšeo di bego di newa lekgolong la pele la nywaga di be di e-tšwa ka go lebanya mangwalong a baapostola le a barutiwa ba bangwe bao ba bego ba etelela pele. Mangwalo ao ba a ngwadilego—kudu-kudu ao a hwetšwago dipukung tše 27 tšeo di buduletšwego tšeo di hlamago Mangwalo a Bakriste a Segerika—a be a abja gare ga diphuthego gomme ka ntle le pelaelo a ile a thea motheo bakeng sa thuto yeo e bego e newa ke bagolo ba lefelong leo. Ka tsela ye, baemedi ba molaki ba ile ba aba ka potego dijo tša moya tše di humilego go Bakriste bao ba botegago. Sehlopha sa molaki sa lekgolong la pele la nywaga se ile sa itlhatsela se botegela thomo ya sona.

“Molaki” ka Morago ga Nywaga-kgolo e 19

16, 17. Sehlopha sa molaki se itlhatsetše bjang se botega go phethagatšeng kabelo ya sona nywageng ya go fihla ka 1914?

¹⁶ Go thwe’ng ka lehono? Ge go ba gona ga Jesu go be go thoma ka 1914, na o ile a hwetša go e na le sehlopha sa Bakriste ba tloditšwego seo ka potego se bego se aba dijo ka lebaka la gona? Ka ntle le pelaelo o ile a hwetša se le gona. Sehlopha se se be se ka hlaolwa gabotse ka baka la dienywa tše dibotse tšeo se bego se di tšweletša. (Mateo 7:20) Ga e sa le go tloga ka nako yeo histori e ile ya hlatsela gore phetho ye e be e le e nepagetšego.

¹⁷ Nakong ya go tla ga Jesu, bahlanka ba ka bago 5 000 ba be ba swaregile ka go phatlalatša therešo ya Beibele. Bašomi ba be ba se nene, eupša molaki o ile a diriša mekgwa e mmalwa e bohlale go phatlalatša ditaba tše dibotse. (Mateo 9:38) Ka mohlala, go ile gwa dirwa ditokišetšo bakeng sa gore dithero tša dihlogo tša Beibele di gatišwe ka dikuranteng tše ka bago 2 000. Ka tsela ye, therešo ya Lentšu la Modimo e ile ya fihlelela babadi ba dikete tše masome ka nako e tee. Go oketša moo, go ile gwa lokišeletšwa lenaneo la diiri tše seswai leo le kopantšego di-slide tša mmala le diswantšho tšeo di sepelago. Ka baka la mokgwa wo o mofsa, molaetša wa Beibele wa go  tloga mathomong a Tlholo go fihla mafelelong a Pušo ya Nywaga e Sekete ya Kriste, o ile wa fetišetšwa go batheetši ba ka godimo ga dimilione tše senyane dikontinenteng tše tharo. Dipuku tšeo di gatišitšwego e be e le mokgwa o mongwe woo o bego o dirišwa. Ka mohlala, ka 1914, dikopi tše ka bago 50 000 tša makasine wo di ile tša gatišwa.

18. Ke neng moo Jesu a ilego a bea molaki gore a lake dilo tša gagwe ka moka, gomme ka baka la’ng?

¹⁸ Ka kgonthe, ge Mong a fihlile, o ile a hwetša molaki wa gagwe yo a botegago a fepa bahlanka ka potego gotee le go bolela ditaba tše dibotse. Molaki yoo ga bjale o be a emetšwe ke boikarabelo bjo bogolo. Jesu o itše: “Ruri, ke a Le botša, ó tlo mmea a laka dilô tša xaxwe ka moka.” (Mateo 24:47) Jesu o dirile se ka 1919, ka morago ga ge molaki a fetile lebaka la tlhahlobo. Lega go le bjalo, ke ka baka la’ng “molaki e a bôtêxaxo yo bohlale” a ile a amogela boikarabelo bjo bogolo? Ka gobane Mong wa gagwe o be a hweditše dilo tša gagwe di oketšegile. Jesu o be a neilwe bogoši ka 1914.

19. Hlalosa kamoo dinyakwa tša dijo tša moya tša “lešaba le lexolo” di bego di dutše di hlokomelwa ka gona.

¹⁹ Dilo tšeo Mong yo a sa tšwago go bewa sedulong sa bogoši a ilego a di nea molaki wa gagwe yo a botegago ke’ng? Ke dilo ka moka tša moya tšeo e lego tša Gagwe mo lefaseng. Ka mohlala, nywaga-some e mebedi ka morago ga go bewa ga Kriste sedulong sa bogoši ka 1914, “lešaba le lexolo” la “dinku tše dingwê” le ile la hlaolwa. (Kutollo 7:9; Johane 10:16) Ba e be e se ditho tše di tloditšwego tša “ba-Isiraele ba Modimo,” eupša e be e le banna le basadi bao ba botegago bao ba nago le kholofelo ya go phela mo lefaseng, bao ba bego ba rata Jehofa le bao ba bego ba nyaka go mo hlankela go swana le kamoo batlotšwa ba dirilego ka gona. Ge e le gabotse, ba ile ba botša “molaki e a bôtêxaxo yo bohlale” gore: “A nkê re yê le lena, ka xobane re kwile xore Modimo ó na le lena.” (Sakaria 8:23) Bakriste ba ba sa tšwago go kolobetšwa ba ile ba ja dijo tšeo di humilego tša moya tšeo di swanago le tšeo di bego di jewa ke bahlanka ba tloditšwego, gomme dihlopha tše tše pedi di be di dutše di jela tafoleng e swanago ya dijo tše tša moya ga e sa le go tloga ka nako yeo. Se e bile tšhegofatšo gakaakang go ditho tša “lešaba le lexolo”!

20. “Lešaba le lexolo” le kgathile tema efe go oketšeng dilo tša Morena?

²⁰ Ka lethabo ditho tša “lešaba le lexolo” di ile tša tlatša sehlopha sa molaki yo a tloditšwego e le barutiši ba ditaba tše dibotse. Ge ba dutše ba ruta, dilo tša Mong wa bona tša lefaseng di ile tša oketšega, tša oketša boikarabelo bja “molaki e a bôtêxaxo yo bohlale.” Ge palo ya batho bao ba tsomago therešo e dutše e oketšega, go ile gwa nyakega mafelo a katološitšwego a go gatiša dipuku tša Beibele tšeo di nyakwago ka bontši. Diofisi tša makala tša Dihlatse tša Jehofa di ile tša hlongwa dinageng tše dintši. Baromiwa ba ile ba romelwa “maxomong a lefase.” (Ditiro 1:8) Go tloga go batlotšwa ba ka bago ba dikete tše hlano ka 1914, palo ya bareti ba Modimo e oketšegile go fihla go ya ka godimo ga dimilione tše tshela lehono, bao bontši bja bona e lego ba “lešaba le lexolo.” Ee, ka kgonthe dilo tša Kgoši di oketšegile ka makga a mantši ga e sa le go tloga ka 1914!

21. Ke diswantšho dife tše pedi tšeo re tlago go di ahla-ahla thutong ya rena e latelago?

²¹ Tše ka moka di bontšha gore molaki o be a dutše a ‘botega e bile a le bohlale.’ Gatee-tee ka morago ga ge a boletše ka “molaki e a bôtêxaxo yo bohlale,” Jesu o ile a bolela diswantšho tše pedi tšeo di gatelelago dika tšeo: seswantšho sa dikgarebe tše bohlale le tša ditlaela le seswantšho sa ditalente. (Mateo 25:1-30) Re na le kgahlego! Diswantšho tšeo di bolela’ng go rena lehono? Re tla ahla-ahla potšišo ye sehlogong se se latelago.

[Dipotšišo tša Thuto]

[Caption on page 10]

Sehlopha sa molaki sa lekgolong la pele la nywaga se ile sa itlhatsela se botegela thomo ya sona

O Nagana’ng?

• Ke bomang bao ba bopago “molaki e a bôtêxaxo yo bohlale”?

• “Bahlanka” ke bomang?

• Molaki yo a botegago o ile a bewa neng gore a lake dilo ka moka tša Morena, gomme ke ka baka la’ng e bile ka nako yeo?

• Ke bomang bao ba thušitšego go oketša dilo tša Morena nywaga-someng ya morago bjale, gomme bjang?