Go Dira Botse Dinakong tša Mathata

MOAPOSTOLA Paulo o kgothaleditše gore: “A re direng botse; re bo direlê batho bohle, xa-xolo re bo dirêlê batho ba-bô-rena ba tumêlô.” (Ba-Galatia 6:10) Dihlatse tša Jehofa lefaseng ka bophara ka mafolofolo di leka go diriša molao woo wa motheo maphelong a tšona, ka go direla batho ka moka botse, kudu-kudu badumedi-gotee le tšona. Se gantši se bonwa dinakong tša mathata. Anke re ele hloko mehlala ya morago bjale e tšwago dinageng tše tharo.

Ka December 2002, ledimo le matla le ile la hlasela kua Guam, ka diphefo tša lebelo leo le fetago dikhilomithara tše 300 ka iri. Magae a mantši a ile a senyega, gomme a mangwe a ile a senyega ka mo go feletšego. Diphuthego tša tikologong yeo kapejana di ile tša rulaganya dihlopha tša go hlwekiša gore di thuše malapa a Dihlatse ao a bego a kgomilwe o šoro ke seo. Lekala la Guam le ile la thuša ka ditlabakelo le ka bašomi ba go tlo lokiša magae ao a senyegilego, gomme lekala la Hawaii le ile la nea thekgo ya lona. Ka dibeke tše sego kae, sehlopha sa babetli se ile sa goroga go tšwa Hawaii go tlo thuša ka modiro wa go aga lefsa, gomme e le go se thuša, bana babo rena ba bangwe ba tikologong yeo ba ile ba tšea matšatši a go ikhutša mešomong ya bona. Moya wa go dirišana ka lethabo o ile wa nea bohlatse bathong ba moo ka moka.

Lefelong leo le lego ka ntle ga toropo la motse wa Mandalay, Myanmar, go ile gwa tsoga mollo kgaufsi le Holo ya Mmušo. Kgaufsi le wona go be go e na le ntlo yeo e bego e le ya kgaetšedi yo a tapilego le lapa la gagwe. Moya o be o fokela thoko tša ntlo ya gagwe, ka gona o ile a kitimela holong go yo kgopela thušo. Ka nako yeo, holo e be e mpshafatšwa, ka gona go be go e na le bana babo rena ba bantši moo. Ba ile ba makatšwa ke go gahlana le kgaetšedi yo ka gobane ba be ba sa tsebe gore o dula tikologong yeo. Kapejana, bana babo rena ba ile ba thuša ka go thotha dithoto tša lapa go di iša lefelong le le šireletšegilego. Ge monna wa gagwe, yo e bego e se Hlatse, a be a e-kwa ka mollo, o ile a kitimela gae moo a ilego a hwetša bana babo rena ba thuša lapa la gagwe. A kgahlilwe ke se e bile a tletše tebogo, o ile a ba a ikwa a imologile ka gobane mahodu gantši a ikhola ka maemo a bjalo. Go bontšha ga bana babo rena botho ka tsela ye go ile gwa kgothaletša kgaetšedi le morwa wa gagwe gore ba kopanele gape le phuthego ya Bokriste, gomme mo nakong ye ba ba gona dibokeng ka moka.

Ngwageng o fetilego wa tirelo, batho ba bantši kua Mozambique ba ile ba lebeletšana le tlala ka baka la komelelo le go se mele ga dibjalo. Ofisi ya lekala ya Dihlatse tša Jehofa ya tikologong yeo kapejana e ile ya arabela ka go nea dijo go bao ba lego mathateng. Dijo di be di abja Diholong tša Mmušo, ka dinako tše dingwe ka morago  ga diboka tša phuthego. Kgaetšedi yo mongwe yo e lego motswadi yo a se nago molekane o itše: “Ke tlile dibokeng ke gateletšegile, ke sa tsebe gore ke be ke tla nea bana ba-ka eng gore ba je ge re boela gae.” Thušo e lerato yeo e bego e newa ke bana babo rena kapejana e ile ya mo kgothatša. O itše: “E ile ya ba bjalo ka tsogo go nna!”

Dihlatse gape di ‘dira botse’ ka tsela ya moya ka go boledišana le batho ka molaetša wa Beibele o kgothatšago le o neago kholofelo. Di nagana go swana le monna yo bohlale wa mehleng ya bogologolo yo a itšego: “Xe e le eo a kwaxo [bohlale bja Modimo], ó tlo dula a iketla, ó ikaxêla à sa šie kotsi.”—Diema 1:33.

[Diswantšho go letlakala 31]

1, 2. Go abja ga dijo go bao ba lego mathateng kua Mozambique

3, 4. Ledimo la kua Guam le ile la senya magae a mantši

[Methopo]

Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe