Bohwa bjo Bohlokwa Kudu bjo bo Lego Gona

GO YA mafelelong a bophelo bja gagwe, moapostola Johane yo a tšofetšego o ngwadile gore: “Nna xa ke na lethabô le le fetaxo leo la xe ke e-kwa xore bana ba-ka ba swere tsela ya therešô.”—3 Johane 4.

Moapostola yo a botegago o be a bolela ka bana ba gagwe ka kgopolo ya moya. Lega go le bjalo, batswadi ba bantši ba be ba tla dumelelana le mantšu a moapostola. Ba šomile ka thata go godiša bana ba bona “xo ba etetša ka xo ba ruta le xo ba eletša tša Morêna,” gomme gabjale ba thabela go bona bana ba bona ba ba godilego ba “swere tsela ya therešô.” (Ba-Efeso 6:4) Ge e le gabotse, go ruta bana ba gago tsela e išago bophelong bjo bo sa felego ke go ba nea bohwa bjo bohlokwa kudu bjo bo lego gona. Seo ke ka gobane boineelo go Modimo, bjoo bo akaretšago go phela bophelo ka tsela yeo Jehofa a nyakago gore Bakriste ba phele ka yona, bo “na le kholofedišô ya bophelô byono le ya byo bo tl’o xo tla.”—1 Timotheo 4:8.

Jehofa, e lego Tate yo a phethagetšego, o tšeela godimo batswadi ba ba boifago Modimo bao ba lekago ka thata go ruta bana ba bona moyeng. Ge bana ba arabela gabotse, ba hwetša lethabo le legolo ka go phegelela borapedi bja therešo ba le gotee le batswadi ba bona. Ge bana ba bjalo ba dutše ba gola, ba kgoboketša dikgopolo tše di kgahlišago tša diphihlelo tše bjalo. Ba bangwe ka lethabo ba gopola lekga la pele leo ka lona ba ilego ba tšea karolo Sekolong sa Bodiredi sa Pušo ya Modimo. * Goba mohlomongwe ba gopola nako yeo ka yona ba ilego ba kgona go bala temana ya Beibele ka lekga la pele bodireding bja ntlo le ntlo ba sepela le yo mongwe wa batswadi ba bona. Ba ka lebala bjang go kwa batswadi ba bona ba ba balela go tšwa go Puku Ya-ka ya Ditaba tša Beibele goba go Go Theeletša Morutiši yo Mogolo? * Gabriel o gopola selo se itšego seo a bego a se rata kudu ge a re: “Ge ke be ke e-na le nywaga e mene feela, mma o be a nkopelela letšatši le lengwe le le lengwe ge a be a apea. Ke sa dutše ke gopola ka maikwelo a tseneletšego kopelo e nngwe ya Mmušo. Ka morago e ile ya nthuša go bona bohlokwa bja tirelo ya Jehofa.” Mohlomongwe le wena o gopola kopelo ye e botse yeo Gabriel a bolelago ka yona. Ke kopelo 157 ka pukung ya dikopelo ya Opelelang Jehofa Ditumišo, gomme sehlogo sa yona se re “Direla Jehofa Bofseng.”

Kopelo e thoma ka gore: “Bana ba ile ba tumiša Jah;/Ba reta Jesu ka go hlaboša.” Ka kgonthe, go be go e na le bana bao ba ilego ba ba le tokelo ya go gwerana le Jesu, gomme go bonagala  ba ile ba mo thabiša ka mokgwa wa bona o lapološago, wa go botega. Jesu o ile a ba a diriša go rutega gabonolo ga bana ba banyenyane e le mohlala wo balatedi ba gagwe ba swanetšego go o ekiša. (Mateo 18:3, 4) Ka gona bana ba na le sebaka se se swanetšego borapeding bja Jehofa. Ge e le gabotse, mantšu a kopelo a tšwela pele ka gore: “Ee, le bana ba mo godišitše.”

Ka boitshwaro bja bona bjo bo beago mohlala—ka gae, sekolong le mafelong a mangwe—bana ba bantši ba tlišitše kgodišo go Modimo le go malapa a gabo bona. E bile tšhegofatšo e kgolo gakaakang go bona go ba le “batswadi ba ratago go loka.” (Doiteronomio 6:7) Batswadi ba ba boifago Modimo ba emela Modimo legato, yoo go etša Tate yo lerato, a rutago dibopiwa tša gagwe go sepela tseleng yeo di swanetšego go e swara. Le gona ba hwetša tšhegofatšo e kgolo gakaakang! Ge le bona ka mo go swanago ba ruta bana ba banyenyane ka malapeng a bona, ba thabela gakaakang go ba le bana bao ‘ba ba thabišago ka go ba kwa’! (Jesaya 48:17, 18) Angélica, yo gabjale a hlankelago ofising ya lekala ya Dihlatse tša Jehofa ya Mexico, o re: “Batswadi ba-ka ka dinako tšohle ba be ba dira maiteko a go diriša melao ya motheo ya Beibele. Seo se ile sa dira gore nako ya-ka ya bjana e be e thabišago kudu. Ke be ke thabile.”

Bakriste ba bjalo ba dumela gore go hlokomela bohwa bja gago bja moya gabotse ke mo go swanetšwego ke maiteko. Mohlomongwe o mofsa yo a godišeditšwego lapeng leo le nago le ditekanyetšo tša kgonthe tša Bokriste. Ge e ba go le bjalo, kopelo yona yeo e go kgothaletša gore: “Bafsa ba Bakriste ’nke le hlweke.” Nako e tla tla ya gore le dire diphetho tša lena ka noši, ka gona gabjale “mo go Jehofa le holofele./Se lweleng go ba ba tsebegago.”

Ge e ba ka phošo o etiša pele taba ya gore o tsebege bophelong, tlwaetšo ka moka yeo o e hweditšego e ka ba ya lefela e bile o ka senya ditebelelo tša gago tša bokamoso. Kganyogo ya go rata go tsebega e ka dira gore o se sa dula o phakgame. Ba bangwe ba feleleditše ba gwerane le bao ba sa kgahlegelego ditekanyetšo tša Bokriste, gaešita le ge ba bonagala ba se kotsi e bile ba bogega. Seo se ile sa bontšhwa ka Tara, sebapadi sa thwadi seo se bontšhitšwego bidiong ya Young People Ask—How Can I Make Real Friends? Go etša Tara, Mokriste le ge e le ofe wa mofsa yo a gweranago le bao ba sa tšeelego borapedi bja therešo godimo o tla lemoga go se go ye kae gore ‘bagwera ba sa holego ba senya mekgwa e mebotse,’ go etša ge kopelo e rialo. Go hlagolela mekgwa e mebotse go tšea nywaga e mentši ya maiteko, eupša e ka senywa ka go akgofa.

Therešo ke gore go phela bophelo bja go bontšha go boifa Modimo ga go bonolo. Lega go le bjalo, go etša ge kopelo e tšwela pele ka gore, “Ge o gopola Modimo bofseng,/O mo direla o dutše  tokeng,” o tla aga motheo o tiilego bakeng sa katlego ya kgonthe. Le gona “ge o godile o tlil’o thaba.” O tla thoma go lemoga ka mo go oketšegilego gore ge o le ka tlase ga tlhokomelo ya Jehofa e lerato, ga go na se se ka go thibelago go dira seo se lokilego mahlong a gagwe. Yeo ke yona tsela ya go ba motho yo a godilego, yo a boifago Modimo. Go feta moo, go diriša tlwaetšo ya Bokriste ka bohlale go go nea sebaka sa gore “o thabiše pelo ya Jehofa.” Na go na le tokelo e kgolo kudu yeo motho a ka bago le yona go feta ye?—Diema 27:11.

Ka gona, bafsa, dulang le gopola kamoo tlwaetšo e tšwago go Jehofa le go batswadi ba lena ba Bakriste e lego bohlokwa ka gona. Eka lerato la bona le legolo go lena le ka le tutueletša gore le dire se se thabišago mahlong a Jehofa. Go etša Jesu Kriste le Timotheo yo monyenyane yo a botegago, le tla thabiša Tatago lena wa legodimong le batswadi ba lena ba lefaseng. Le gona ge e ba ka mohla o mongwe le ka ba batswadi, le tla dumelelana le Angélica, yo go boletšwego ka yena pejana, yo a rego: “Ge e ba ka mohla o mongwe nka ba le ngwana, ke tla leka ka matla go tsenya lerato la go rata Jehofa ka pelong ya gagwe go tloga bjaneng, gomme ka le dira gore e be lebone leo le mo hlahlago.” Ka kgonthe, tsela e lokilego yeo e išago bophelong bjo bo sa felego ke bohwa bja bohlokwa kudu bjo bo lego gona!

[Mengwalo ya ka tlase]