Go Tsoma Lethabo

NYWAGENG e sego kae e fetilego, batho ba kua Fora, Jeremane, Great Britain le United States ba ile ba botšišwa gore, “Ke’ng seo se dirago gore o thabe?” Go bao go ilego gwa boledišanwa le bona, ba 89 lekgolong ba boletše gore go nyakega boemo bjo bo bobotse bja tša maphelo; ba 79 lekgolong ba boletše ka lenyalo leo le kgotsofatšago goba bogwera; ba 62 lekgolong ba šupile go beng le bana; gomme ba 51 lekgolong ba ile ba nagana gore go nyakega mošomo o tsenyago tšhelete e ntši gore ba thabe. Gaešita le ge batho ba bantši ka tlwaelo ba rutwa gore tšhelete ga e kgonthišetše lethabo, ba 47 lekgolong ba bao go ilego gwa boledišanwa le bona ba be ba kgodišegile gore e a le tliša. Ditherešo di bontšha’ng?

Sa pele, lebelela seo go thwego ke tswalano magareng ga tšhelete le lethabo. Nyakišišo yeo e dirilwego go batho ba lekgolo bao ba humilego kudu kua United States e ile ya bontšha gore ba be ba sa thaba go feta batho ka kakaretšo. Go oketša moo, go ya ka ditsebi tša bophelo bjo bobotse bja monagano, le ge ba bantši kua United States ba ile ba oketša dilo tša bona tše di bonagalago mo e nyakilego go ba ka makga a mabedi nywaga-someng e meraro e fetilego, ga se ba thaba go feta kamoo ba bego ba thabile ka gona pele. Ge e le gabotse, pego e nngwe e hlalosa gore: “Nakong yona yeo, ditekanyo tša kgateletšego ya monagano di ile tša oketšega. Go ipolaya ga bafsa bao ba lego mahlalagading go ile gwa oketšega ka makga a mararo. Ditekanyo tša tlhalo di ile tša oketšega ka makga a mabedi.” Dinageng tše ka bago 50 tše di fapanego, banyakišiši bao ba ithutilego ka tswalano magareng ga tšhelete le lethabo ba fihleletše phetho ya gore tšhelete e ka se reke lethabo.

Se se latelago ke gore na dilo tše bjalo ka boemo bjo bobotse bja tša maphelo, lenyalo leo le kgotsofatšago le mošomo o tsenyago tšhelete e ntši ke tša bohlokwa gakaaka’ng gore o thabe? Ge e le gabotse, ge e ba dilo tše di be di tloga di nyakega gore o thabe, go thwe’ng ka batho ba dimilione bao ba sa thabelego boemo bjo bobotse bja tša maphelo le batho ka moka bao ba sego lenyalong le le kgotsofatšago? Go thwe’ng ka banyalani bao ba se nago bana le banna ka moka gotee le basadi bao ba se nago mošomo o tsenyago tšhelete e ntši? Na batho ba bjalo ka moka ba ahloletšwe go phela bophelo bjo bo sa thabišego? Le gona, na leo go thwego ke lethabo la bao mo nakong ye ba thabelago boemo bjo bobotse bja tša maphelo le lenyalo leo le thabišago, le tla fela ge e ba boemo bja bona bo ka fetoga?

Na re le Tsoma Mafelong a Swanetšego?

Motho yo mongwe le yo mongwe o nyaka go thaba. Se ga se makatše ka gobane Mmopi wa batho o hlaloswa e le “Modimo yo a thabilego,” gomme motho o dirilwe ka seswantšho sa Modimo. (1 Timotheo 1:11, NW; Genesi 1:26, 27) Ka gona, e fo ba  ga tlhago gore batho ba tsome lethabo. Lega go le bjalo, ba bantši ba lemoga gore go khuparetša lethabo go swana le go khuparetša santa—bobedi di šwahla gabonolo.

Lega go le bjalo, na e ka ba e le gore ba bangwe ba leka ka thata kudu go hwetša lethabo? Radifilosofi wa tša leago e lego Eric Hoffer o ile a nagana bjalo. O itše: “Go tsoma lethabo ke o mongwe wa methopo e megolo ya go se thabe.” Seo e tloga e le sa kgonthe ge e ba re tsoma lethabo mafelong a fošagetšego. Boemong bjoo, re kgodišegile gore re tla lebeletšana le go nyama gotee le kgakanego. Go leka go huma; go katanela botumo goba go tsebega; go phegelela dipakane tša tša dipolitiki, tša tša leago goba tša tša boiphedišo; goba go fo iphelela le go ikgotsofatša ka go akgofa ka moka ga tšona ga di kgone go re tlišetša lethabo. Ga go makatše gore ba bangwe ba šetše ba e-na le pono e ikganetšago yeo e bontšhitšwego ke mongwadi yo mongwe yo a itšego: “Ge e ba re ka tlogela go leka go hwetša lethabo re be re ka thaba”!

Sa bohlokwa ke gore nyakišišo yeo go boletšwego ka yona mathomong a sehlogo se e ile ya ba ya bontšha gore batho ba 4 go ba 10 ba be ba nagana gore lethabo le tlišwa ke go dira botse le go thuša ba bangwe. Le gona motho o tee go ba bangwe le ba bangwe ba 4 o gateletše gore tumelo le go kgonthišega ka bodumedi di kgatha tema e kgolo gore o be yo a thabilego. Go molaleng gore re nyaka go lebeledišiša gore ke eng seo se tlogago se nyakega gore re thabe e le ka kgonthe. Sehlogo se se latelago se tla re thuša go dira bjalo.

[Caption on page 3]

Ba bantši ba nagana gore tšhelete, bophelo bja lapa bjo bo thabišago goba mošomo o tsenyago tšhelete e ntši ke dilo tšeo di lebišago lethabong. Na o dumelelana le seo?