Seo Thapelo ya Morena e se Bolelago go Wena

THAPELO ya Morena, bjalo ka ge e boletšwe ke Jesu Kriste Thutong ya Thabeng, e hwetšwa ka Beibeleng go Mateo kgaolo 6, ditemana 9 go ya go 13. Pejana ga ge a ka bolela thapelo ye, Jesu o itše: “Xe Le rapêla, Le se kê la touta byalo ka ba dithšaba; xobane bôná ba re ba tlo kowa xe ba bola-bola tše ntši.”—Mateo 6:7.

Ka gona, ke mo go kwagalago gore Jesu o be a sa rerela gore Thapelo ya Morena e boeletšwe lentšu ka lentšu. Ke therešo gore ka morago o ile a boeletša thapelo ye bakeng sa go hola batheetši ba bangwe. (Luka 11:2-4) Eupša mantšu a thapelo ye a fapana ganyenyane ka dipegong tša Ebangedi ya Mateo le ya Luka. Go feta moo, dithapelo tša ka morago tšeo di ilego tša rapelwa ke Jesu le barutiwa ba gagwe ga se tša ka tša kgomarela ka go tia mantšung a thapelo ya gagwe ya mohlala.

Ke ka baka la’ng Thapelo ya Morena e begilwe ka Beibeleng? Ka thapelo ye ya mohlala, Jesu o re ruta kamoo dithapelo tša rena di ka amogelegago ka gona go Modimo. Mo thapelong ye, re hwetša gape le dikarabo tša tše dingwe tša dipotšišo tša motheo bophelong. Ka gona anke re ahla-ahleng karolo e nngwe le e nngwe ya Thapelo ya Morena.

Leina la Modimo ke Mang?

“Tata-wešo wa maxodimong! Leina la xaxo a le kxêthwê.” (Mateo 6:9) Mantšu a a pele thapelong ya mohlala a re thuša go batamela kgaufsi le Modimo ka go mmitša “Tata-wešo.” Ka go swana le ngwana yoo ka tlhago a batamelago kgaufsi le motswadi yo lerato le yo a kwešišago, re ka batamela Tatago rena wa legodimong re kgodišegile gore o nyaka go re kwa. Kgoši Dafida o opetše ka gore: “Batho ka moka ba tla xo Wene Mokwi wa dithapêlô.”—Psalme 65:2.

Jesu o re laela gore re rapelele gore leina la Modimo le kgethagatšwe, goba le hlaolwe e le le le kgethwa. Eupša leina la Modimo ke mang? Beibele  e araba ka mantšu a: “Leina la xaxwe ké Jehofa. Pele xa xaxwe Le xobê mexobô.” (Psalme 68:4) Na o kile wa bala leina Jehofa ka Beibeleng?

Ge e le gabotse, leina la Modimo, e lego Jehofa, le tšwelela ka makga a nyakilego go ba a 7 000 ka mengwalong ya bogologolo ya Beibele ya go ngwalwa ka seatla. Lega go le bjalo, bafetoledi ba bangwe ba ile ba ba ba ya bokgoleng bja go tloša leina le ka diphetolelong tša bona tša Beibele. Ka go rialo, re rapela ka mo go swanetšego gore Mmopi wa rena a kgethagatše leina la gagwe, goba a le dire gore e be le le kgethwa. (Hesekiele 36:23) Tsela e nngwe ya go gata mogato ka go dumelelana le thapelo e bjalo ke go diriša leina Jehofa ge re rapela Modimo.

Mosadi yo a bitšwago Patricia o godišitšwe e le Mokatholika gomme o be a tlwaelane kudu le Thapelo ya Morena. O ile a arabela bjang ge yo mongwe wa Dihlatse tša Jehofa a be a mmontšha leina la Modimo ka Beibeleng? O ile a bolela gore: “Ke be ke sa kgolwe! Ka gona ke ile ka tšea phetolelo ya-ka ya Beibele, gomme le be le le gona ka moo. Ke moka Hlatse e ile ya mpontšha Mateo 6:9, 10 gomme ya hlalosa gore go bolelwa ka leina la Modimo Thapelong ya Morena. Ke be ke tloga ke thabile kudu gomme ka e kgopela gore e ithute Beibele le nna.”

Thato ya Modimo e Dirwe mo Lefaseng

“Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10) Karolo ye ya thapelo ya Jesu ya mohlala e tla phethagatšwa bjang? Batho ba bantši ba nagana ka legodimo e le lefelo la khutšo le la boiketlo. Mangwalo a bolela ka legodimo e le ‘boago bja Jehofa bjo bokgethwa le bja borena.’ (Jesaya 63:15) Ke ka baka leo re rapelelago gore thato ya Modimo e dirwe mo lefaseng “byalo ka xe e dirwa lexodimong”! Eupša na se se tla ka sa direga?

Moporofeta wa Jehofa e lego Daniele o boletše e sa le pele gore: “Ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka [ya lefaseng] wa e fediša; xe e le wôna, o tlo êma xo ya xo ile.” (Daniele 2:44) Mmušo wo wa legodimong, kgaufsinyane o tla gata mogato wa go tliša khutšo ya lefaseng ka bophara ka tlase ga pušo ya go loka.—2 Petro 3:13.

Go rapelela gore Mmušo wa Modimo o tle le gore thato ya gagwe e dirwe mo lefaseng ke pontšho ya tumelo yeo e ka se lebišego manyaming. Moapostola Johane wa Mokriste o ngwadile gore: “Ka kwa lentšu le lexolo lè e-tšwa lexodimong lè re: Šoo ngwakô wa Modimo mo xare xa  batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” Ke moka Johane o okeditše ka gore: “E a dutšexo sedulong sa boxoši a re: . . . Ngwala, xobane ’taba tšé ké tša xo rereša le xo bôtêxa.”—Kutollo 21:3-5.

Thapelo le Dinyakwa tša Rena tša Nama

Jesu o bontšhitše ka seo a se boletšego thapelong ya mohlala gore selo seo re swanetšego go tshwenyega kudu ka sona ge re rapela se swanetše go tswalana le leina la Modimo le thato ya gagwe. Lega go le bjalo, thapelo ya mohlala e tšwela pele ka dikgopelo tša motho ka noši tšeo di kgopelwago Jehofa ka mo go swanetšego.

Ya mathomo ya tšona ke e rego: “Re fê lehono boxôbê bya rena bya ka mehla.” (Mateo 6:11) Ye ga se kgopelo ya go kgopela mahumo a dilo tše di bonagalago. Jesu o re kgothaleditše gore re rapelele “boxôbê bya rena bya ka mehla.” (Luka 11:3) Ka go dumelelana le Thapelo ya Morena, re ka rapela ka tumelo gore Modimo o tla re nea dinyakwa tša rena tša letšatši le letšatši ge e ba re mo rata e bile re mo kwa.

Go tshwenyega ka mo go sa swanelago mabapi le mathata a tša boiphedišo go ka dira gore re hlokomologe dinyakwa tša rena tša moya gomme ka go rialo ra palelwa ke go dira seo Modimo a se letetšego go rena. Eupša ge e ba re etiša borapedi bja Modimo pele bophelong, re ka kgonthišega gore dikgopelo tša rena bakeng sa dinyakwa tša dilo tša nama, tše bjalo ka dijo le diaparo, di tla kwewa ka mo go nepagetšego. Jesu o itše: “Sa pele Le tsomê mmušô wa Modimo le [go loka ga gagwe, NW]; ké mo Le tl’o xo ekeletšwa ka tšeo ka moka.” (Mateo 6:26-33) Go tsoma go loka ga Modimo ga go bonolo, ka ge ka moka ga rena re dira dibe gomme re nyaka go lebalelwa. (Ba-Roma 5:12) Thapelo ya Morena e bolela le ka yona taba yeo.

Dithapelo tša Rena le go Lebalelwa

“Re lebalêlê melato ya rena byalo ka xe re lebalêla ba ba naxo le melato xo rena.” (Mateo 6:12) Ka pegong ya Luka ya Thapelo ya Morena, “melato” ye go bolelwa ka yona e le “dibe.” (Luka 11:4, NW) Na ruri Jehofa Modimo o tla re lebalela dibe tša rena?

Gaešita le ge Kgoši Dafida wa Isiraeleng ya bogologolo a be a dirile dibe tše kgolo, o ile a itshola gomme a rapela ka kgodišego gore: “Wene Morêna O yo botho, O molebaledi; bohle ba Xo rapêlaxo ba Xo hwetša Ò le Ra-mabobo.” (Psalme 86:5) A kgopolo e kgothatšago gakaakang! Tatago rena wa legodimong o ‘ikemišeditše go lebalela’ dibe tša bao ba mmitšago ka go itshola. Go etša ge molato o ka phumolwa ka mo go feletšego e le ka kgonthe, ka gona Jehofa Modimo a ka re lebalela dibe tša rena ka mo go feletšego.

Lega go le bjalo, Jesu o boletše selo seo se swanetšego go dirwa e le gore Modimo a re lebalele ka gore: E le gore Modimo a re lebalele, re swanetše go lebalela ba bangwe. (Mateo 6:14, 15) Gaešita le ge monna wa moloki e lego Jobo a ile a swarwa gampe ke bagwera ba gagwe ba bararo, o ile a ba lebalela gaešita le go ba rapelela. (Jobo 42:10) Ge e ba re lebalela bao ba re fošetšago, re tla thabiša Modimo gomme ra holwa ke kgaugelo ya gagwe.

Go ikemišetša ga Modimo go kwa dikgopelo tša rena go swanetše go re tutueletša gore re nyake gore a re amogele. Le gona re ka dira bjalo gaešita le ge re sa phethagala. (Mateo 26:41) Le gona mo, Jehofa a ka re thuša, go etša ge Jesu a bontšhitše ka go phetha thapelo ye ya mohlala ka kgopelo ya bohlokwa.

Thušo ya go Phegelela Tsela e Lokilego

“O se re išê molekong; xomme O re phološê [go yo mobe, NW].” (Mateo 6:13) Jehofa ga a re tlogele re se na thušo ya go lebeletšana le teko goba go re dira gore re wele sebeng. Lentšu la gagwe le re: “Modimo xa a lekwe ke bobe; ’me le Yêna xa a leke motho.” (Jakobo 1:13) Modimo o dumelela gore re lekwe, eupša a ka re phološa go Moleki yo Mogolo—“yo mobe” yoo a tsebjago e le Sathane Diabolo.

Moapostola Petro o kgothaleditše Bakriste-gotee le yena gore: “Le phafoxê le phakxamê, xobane Diabolo lenaba la lena ó Le dikoloxa bo-ka tau e bôpaxo; ó nyaka yo a kaxo mo metša.” (1 Petro 5:8) Ge e le gabotse, Sathane o ile a ba a leka motho yo a phethagetšego e lego Jesu Kriste! Pakane  ya Diabolo e be e le efe? E be e le go fapoša Jesu borapeding bjo bo sekilego bja Jehofa Modimo. (Mateo 4:1-11) Ge e ba o nyaka go hlankela Modimo, pakane ya Sathane ke gore le wena a go metše!

A diriša lefase le leo a le laolago, Diabolo a ka re leka gore re tšee karolo mekgweng yeo Modimo a sa e amogelego. (1 Johane 5:19) Ka gona ke gabohlokwa gore ka mehla re retologele go Modimo bakeng sa thušo, kudu-kudu ge e ba re lebeletšane le teko yeo e phegelelago. Le gona ge e ba re rapela Jehofa ka go dumelelana le Lentšu la gagwe le le buduletšwego, e lego Beibele, o tla re phološa ka go re thuša go ganetša Diabolo. Beibele e re botša gore: “Modimo ke Mmotexi; a ka se kê a lesa la lekwa ka tše di kaxo Le palêla.”—1 Ba-Korinthe 10:13.

Go ba le Tumelo go Modimo ke Gabohlokwa

Ke mo go ruthetšago pelo gakaakang go tseba gore Tatago rena wa legodimong o na le kgahlego ka yo mongwe le yo mongwe wa rena! O ile a ba a dira gore Morwa wa gagwe, e lego Jesu Kriste, a re rute kamoo re swanetšego go rapela ka gona. Ka ntle le pelaelo se se dira gore re nyake go thabiša Jehofa Modimo. Ke bjang re ka dirago bjalo?

Beibele e re: “Xo kxahla Modimo xa xo kxônexe xe xo se tumêlô. E a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.” (Ba-Hebere 11:6) Tumelo e bjalo e ka hwetšwa bjang? Beibele e re: “Tumêlô e tšwa xo kweng.” (Ba-Roma 10:17) Dihlatse tša Jehofa di thabela go bolela ka ditaba tša ka Mangwalong le bohle bao ba kganyogago go hlankela Modimo ka tumelo ya kgonthe.

Go holofelwa gore poledišano ye ya mabapi le Thapelo ya Morena e okeditše kwešišo ya gago mabapi le seo e se bolelago. Ka go monya tsebo e oketšegilego ka Jehofa le ka meputso ya gagwe bakeng sa ‘bao ba mo nyakago e le ka kgonthe,’ o ka matlafatša tumelo ya gago go Modimo. Eka o ka ithuta ka mo go oketšegilego ka yena le ka merero ya gagwe e le gore o thabele ka mo go sa felego tswalano ya kgaufsi le Tatago wa legodimong.—Johane 17:3.

[Ntlhakgolo go letlakala 5]

“Tata-wešo wa maxodimong! Leina la xaxo a le kxêthwê; Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong; Re fê lehono boxôbê bya rena bya ka mehla; Re lebalêlê melato ya rena byalo ka xe re lebalêla ba ba naxo le melato xo rena; O se re išê molekong; xomme O re phološê [go yo mobe, NW].”—Mateo 6:9-13.

[Caption on page 7]

Jehofa o kgotsofatša dinyakwa tša bao ba mo ratago

[Caption on page 7]

Le gona Modimo o re thuša gore re ganetše Diabolo

[Caption on page 7]

Re ka holwa ke kgaugelo ya Modimo ge e ba ka go swana le Jobo re lebalela bao ba re fošetšago