Ba Be Ba Tlaišwa Eupša E Le Ba Thabilego
Ba Be Ba Tlaišwa Eupša E Le Ba Thabilego
“Ba lehlôxônôlô [“ba thabilego,” NW] ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka.”—MATEO 5:11.
1. Ke kgonthišetšo efe yeo Jesu a ilego a e nea balatedi ba gagwe mabapi le lethabo gotee le tlaišo?
GE Jesu a be a roma baapostola ba gagwe ka lekga la pele gore ba yo bolela ka Mmušo, o ile a ba lemoša gore ba be ba tla lebeletšana le kganetšo. O ba boditše gore: “Le tlo ba ba ba hloilwexo ke bohle ka ’baka la leina laka.” (Mateo 10:5-18, 22) Lega go le bjalo, pejana Thutong ya gagwe ya Thabeng, o ile a nea baapostola ba gagwe le ba bangwe kgonthišetšo ya gore kganetšo e bjalo ga e nape e dira gore lethabo la bona le legolo le fele. Ge e le gabotse, Jesu o ile a ba a tswalanya go thaba le go tlaišwa re le Bakriste! Ke bjang tlaišo e bego e ka tliša lethabo?
Go Tlaišetšwa Toko
2. Go ya ka Jesu le moapostola Petro, ke tlaišego ya mohuta mang yeo e tlišago lethabo?
2 Tlhaloso ya seswai yeo Jesu a boletšego ka yona Thutong ya Thabeng ke e rego: ‘Ba thabilego ke bao ba tlaišetšwago toko, gobane mmušo wa magodimo ke wa bona bao.’ (Mateo 5:10) Go tlaišwa ka bogona ga go thabiše. Moapostola Petro o ngwadile gore: “A e sa le tumô e botse xe Le ka kxôtlêlêla bothata Lè ôtlwa xe Le sentše? Fêla, xe Le kxôtlêlêla dithlokofatšô Lè le ba xo dira botse, xôna e ba mahlatse pele xa Modimo.” O okeditše ka gore: “Mo xo lena xo se kê xwa ba le e a hlokofatšwaxo è le mmolai xoba lehodu, xoba sesenyi xoba sehwirihwiri. Xe motho a ka hlokofatšwa ka xore e le Mokriste, a se kê a kwa dihlong; a a retišê Modimo ka lôna ’ina leo.” (1 Petro 2:20; 4:15, 16) Go ya ka mantšu a Jesu, tlaišego e tliša lethabo ge e kgotlelelwa ka baka la toko.
3. (a) Go tlaišetšwa toko go bolela’ng? (b) Tlaišo e bile le mafelelo afe go Bakriste ba pele?
3 Toko ya kgonthe e bonwa ge motho a dira thato ya Modimo e bile a latela ditaelo tša gagwe. Ka gona, go tlaišetšwa toko go bolela gore motho o tlaišetšwa go lwantšha kgateletšo ya gore a robe ditekanyetšo tša Modimo goba dilo tšeo Modimo a di nyakago. Baapostola ba be ba tlaišwa ke baetapele ba ba-Juda ka baka la go gana go tlogela go ruta ka leina la Jesu. (Ditiro 4:18-20; 5:27-29, 40) Na se se ile sa fokotša lethabo la bona goba sa dira gore ba emiše modiro wa bona wa boboledi? Le gatee! “[Ba ile] ba tloxa moo lekxotleng bà thabile ka xo re, xe ba xobošitšwe ka ’baka la Leina la Jesu, ké xôna xe ba xodišitšwe. ’Me ba se kxaotše xo hlwa bà ruta Ntlong-kxêthwa le mo malapeng, bà fêla ba kwatša Ebangedi ya xore Jesu ké Yêna Kriste.” (Ditiro 5:41, 42) Tlaišo ye e ile ya ba thabiša gomme ya tsošološa mafolofolo a bona modirong wa boboledi. Ka morago, Bakriste ba pele ba ile ba tlaišwa ke ba-Roma ka gobane ba be ba gana go rapela mmušiši.
4. Ke mabaka afe a mangwe ao a dirago gore Bakriste ba tlaišwe?
4 Mehleng yeno, Dihlatse tša Jehofa di tlaišwa ka gobane di gana go tlogela go bolela ka “ditaba tše tše dibotse tša Mmušo.” (Mateo 24:14, NW) Ge diboka tša tšona tša Bokriste di thibetšwe, di ikemišetša go tlaišwa go e na le go tlogela go bokana gotee go etša ge Beibele e laela. (Ba-Hebere 10:24, 25) Di tlaišwa ka baka la boema-gare bja tšona bja Bokriste goba go gana ga tšona go diriša madi gampe. (Johane 17:14; Ditiro 15:28, 29) Lega go le bjalo, go emela toko mo ka go tia go tlišetša batho ba Modimo lehono khutšo e kgolo ya ka gare le lethabo.—1 Petro 3:14.
Go Rogakwa ka Baka la Kriste
5. Ke lebaka lefe la motheo leo le dirago gore batho ba Jehofa ba tlaišwe lehono?
5 Tlhaloso ya senyane yeo Jesu a e ahla-ahlilego Thutong ya gagwe ya Thabeng le yona e bolela ka taba ya go tlaišwa. O itše: ‘Ba thabilego ke bolena, ge ba le roga, ba le tlaiša, ba le phara ka bobe ka moka ka maaka ka baka la-ka.’ (Mateo 5:11) Lebaka la motheo leo le dirago gore batho ba Jehofa ba tlaišwe ke ka gobane ba se karolo ya tshepedišo ya gona bjale e kgopo ya dilo. Jesu o boditše barutiwa ba gagwe gore: “Xe le ka be Le le ba lefase, lefase le ka ba le rata ba e lexo ba xalô; xomme le Le hloile ka xe Le se ba xalô, ka xe ke Le hlaotše lefaseng.” (Johane 15:19) Ka mo go swanago, moapostola Petro o itše: “Ké sôna se se ba tlabaxo, xe Le sa etše bôná la kitimêla moo ba itahlêlaxo bohlôla; ’me ba Le xoboša.”—1 Petro 4:4.
6. (a) Ke ka baka la’ng mašaledi le badirišani-gotee le ona ba rogakwa le go tlaišwa? (b) Na go rogakwa mo go bjalo go fokotša lethabo la rena?
6 Re šetše re bone gore Bakriste ba pele ba be ba tlaišwa ka gobane ba be ba gana go tlogela go bolela ka leina la Jesu. Kriste o laetše balatedi ba gagwe gore: “[Le] tlo ba dihlatse tša-ka . . . xo fihla maxomong a lefase.” (Ditiro 1:8) Mašaledi a botegago a bana babo Kriste ba tloditšwego a phethile taelo yeo ka mafolofolo, a thušwa ke badirišani-gotee le ona ba botegago ka go se kwanantšhe ba “lešaba le lexolo.” (Kutollo 7:9) Ka go rialo, Sathane o lwa “le bao ba bexo ba šaletše, è le ba peu ya xaxwe [peu ya “mosadi,” e lego karolo ya legodimong ya mokgatlo wa Modimo] ba ba xomaretšexo melaô ya Modimo, ba ba naxo le bohlatse bya Jesu Kriste.” (Kutollo 12:9, 17) Re le Dihlatse tša Jehofa, re nea bohlatse ka Jesu, e lego Kgoši yeo ga bjale e bušago ya pušo ya Mmušo, woo o tlago go fediša mebušo ya batho yeo e emego tseleng ya lefase le lefsa la Modimo la go loka. (Daniele 2:44; 2 Petro 3:13) Re a rogakwa le go tlaišwa ka baka la se, eupša re itebelela re le ba thabilego ge re tlaišwa ka baka la leina la Kriste.—1 Petro 4:14.
7, 8. Baganetši ba ile ba bolela maaka afe kgahlanong le Bakriste ba pele?
7 Jesu o boletše gore balatedi ba gagwe ba swanetše go itebelela e le ba thabilego gaešita le ge batho ‘ba ba phara ka bobe ka moka ka maaka’ ka baka la gagwe. (Mateo 5:11) Se e be e tloga e le sa therešo ka Bakriste ba pele. Ge moapostola Paulo a be a golegilwe kua Roma, mo e ka bago ka 59-61 C.E., baetapele ba ba-Juda ba moo ba ile ba bolela ka Bakriste gore: “Thutô yeo re tseba xore e xanetšwa mo xo fêla.” (Ditiro 28:22) Paulo le Silase ba be ba latofatšwa ka gore ba “ferekanya mafase ka moka,” gomme ba “nyatša molaô wa Kesara.”—Ditiro 17:6, 7.
8 Ge a ngwala ka Bakriste ba nakong ya Mmušo wa Roma, radihistori K. S. Latourette o itše: “Ditatofatšo di be di fapa-fapana. Bakriste ba ile ba bitšwa baila-Modimo ka ge ba be ba gana go tšea karolo ditirelong tša boheitene. Ka go ikarola ga bona mekgweng ya bophelo ya setšhaba—menyanya ya boheitene, boithabišo bja setšhaba . . .—ba ile ba bitšwa ka lenyatšo gore ke batho bao ba hloilego moloko wa batho. . . . Go ile gwa bolelwa gore banna le basadi ba be ba kopana bošego . . . gomme ka morago ba e-ba le dikopano tša botona le botshadi tše di gobogilego. . . . Taba ya gore [Segopotšo sa lehu la Kriste] se be se binwa feela ge go e na le badumedi e ile ya thoma mabarebare a gore Bakriste gantši ba be ba dira dihlabelo ka bana le gore ba be ba e-ja madi a bana le dinama tša bona.” Go oketša moo, ka ge Bakriste ba pele ba be ba gana go rapela mmušiši, ba ile ba latofatšwa ka gore ke manaba a Mmušo.
9. Bakriste ba lekgolong la pele la nywaga ba ile ba arabela bjang ditatofatšong tša maaka tšeo di bego di bolelwa kgahlanong le bona, gomme boemo ke bofe lehono?
9 Ditatofatšo tšeo tša maaka ga se tša thibela Bakriste ba pele go phetha taelo ya bona ya go bolela ditaba tše dibotse tša Mmušo. Ka 60-61 C.E., Paulo o ile a kgona go bolela ka ‘ditaba tše dibotse’ tše di bego ‘di bea dienywa e bile di tšwela pele lefaseng ka moka,’ tšeo gape di bego di “anêxêlwa babopya bohle ba tlase xa lexodimo.” (Ba-Kolose 1:5, 6, 23) Selo se se swanago se a direga le lehono. Dihlatse tša Jehofa di latofatšwa ka maaka, go etša ge go be go le bjalo ka Bakriste ba lekgolong la pele la nywaga. Lega go le bjalo, lehono modiro wa go bolela ka molaetša wa Mmušo o tšwela pele gabotse gomme o tliša lethabo le legolo go bao ba tšeago karolo go wona.
Ba Thabela go Tlaišwa go Etša Baporofeta
10, 11. (a) Jesu o ile a phetha bjang go ahla-ahla ga gagwe tlhaloso ya senyane yeo a boletšego ka yona Thutong ya Thabeng? (b) Ke ka baka la’ng baporofeta ba be ba tlaišwa? Nea mehlala.
10 Jesu o ile a phetha go ahla-ahla ga gagwe tlhaloso ya senyane yeo a e boletšego Thutong ya Thabeng ka gore: “Thabang . . . Hleng le baporofeta ba Le etilexo pele, ba ba tlaišitše ka mokxwa woo.” (Mateo 5:12) Baporofeta bao Jehofa a bego a ba roma gore ba yo lemoša ba-Isiraele ba sa botegego ba be ba sa amogelwe gabotse gomme gantši ba be ba tlaišwa. (Jeremia 7:25, 26) Moapostola Paulo o ile a hlatsela therešo ye ka go ngwala gore: “Ke sa tlo iša pele ka dife? Nka hlaêlêlwa ke lebaka xe nka laodiša ka . . . tša baporofeta. . . . Ka tumêlô . . . ba kxôtlêlêla kxobošô le dikôtlô, le ditlêmô, le kxôlêxô.”—Ba-Hebere 11:32-38.
11 Nakong ya Pušo ya Kgoši e mpe Ahaba le mosadi wa gagwe, e lego Isebele, baporofeta ba bantši ba Jehofa ba ile ba bolawa ka tšhoša. (1 Dikxoši 18:4, 13; 19:10) Moporofeta Jeremia o ile a tsenywa ka setokising gomme ka morago a lahlelwa ka sedibeng sa maraga. (Jeremia 20:1, 2; 38:6) Moporofeta Daniele o ile a lahlelwa ka moleteng wa ditau. (Daniele 6:16, 17) Baporofeta ba ba pele ga Bokriste ka moka ba be ba tlaišwa ka gobane ba be ba emelela borapedi bjo bo sekilego bja Jehofa. Baporofeta ba bantši ba be ba tlaišwa ke baetapele ba bodumedi ba ba-Juda. Jesu o ile a bitša bamangwalo le Bafarisei gore ke “bana ba babolai ba baporofeta.”—Mateo 23:31.
12. Ke ka baka la’ng rena bjalo ka Dihlatse tša Jehofa re go tšea e le tokelo go tlaišwa go etša baporofeta ba bogologolo?
12 Lehono, rena bjalo ka Dihlatse tša Jehofa gantši re tlaišwa ka gobane re bolela ka mafolofolo mabapi le ditaba tše dibotse tša Mmušo. Manaba a rena a re latofatša ka gore “re sokolla ka go hlasela,” eupša re a tseba gore barapedi ba botegago ba Jehofa bao ba bilego gona pele ga rena le bona ba ile ba lebeletšana le go ntšhwa diphošo mo go swanago. (Jeremia 11:21; 20:8, 11) Re go tšea e le tokelo go tlaišetšwa lebaka le le swanago le leo baporofeta ba botegago ba bogologolo ba tlaišitšwego ka baka la lona. Moapostola Jakobo o ngwadile gore: “Tšeang ka mohlala wa Baporofeta ba ba boletšexo ka Leina la Morêna, mohlala wa xo kxôtlêlêla le wa xo se fêle pelo. Hleng re re: Ba lehlôxônôlô ké bakxôtlêledi.”—Jakobo 5:10, 11.
Mabaka a Kwagalago a Gore re Thabe
13. (a) Ke ka baka la’ng re sa nyamišwe ke tlaišo? (b) Ke’ng seo se dirago gore re kgone go ema re tiile, gomme seo se bontšha’ng?
13 Go e na le gore re nyamišwe ke tlaišo, re homotšwa ke kgopolo ya gore re latela mehlala ya baporofeta, ya Bakriste ba pele le ya Kriste Jesu ka boyena. (1 Petro 2:21) Re hwetša kgotsofalo e kgolo go tšwa Mangwalong, bjalo ka mantšu a latelago a moapostola Petro a rego: “Baratexi, Le se kê la tlabya ke phišô ye e Le wetšexô xore Le lekwê ka yôna; e se kê ya Le tlaba bo-ka selô se Le sa se tsebexo. Xe Le xobošwa ka ’baka la Leina la Kriste, xôna Le ba lehlôxônôlô, xobane ké xôna Lè okametšwe ke Môya wa letaxô le matla, Môya wa Modimo.” (1 Petro 4:12, 14) Re tseba go tšwa phihlelong gore re kgona go ema re tiile tlase ga tlaišo, feela ka gobane moya wa Jehofa o le go rena gomme o re matlafatša. Thekgo ya moya o mokgethwa ke pontšho ya gore re amogelwa ke Jehofa, gomme se se re thabiša kudu.—Psalme 5:12; Ba-Filipi 1:27-29.
14. Ke mabaka afe ao re nago le ona a gore re thabišwe ke go tlaišetšwa toko?
14 Lebaka le lengwe leo ka lona go ganetšwa le go tlaišetšwa toko go re thabišago ke ka gobane go bontšha gore re phela bjalo ka Bakriste ba therešo bao ba ineetšego go Modimo. Moapostola Paulo o ngwadile gore: “Bohle ba ba rataxo xo phela ka borapedi ka Kriste Jesu; le bôná ba tlo hlomarêlwa.” (2 Timotheo 3:12) Re thabišwa kudu ke kgopolo ya gore go tšwela pele ga rena re botega tlase ga diteko go araba tlhohlo ya Sathane ka mo go oketšegilego, ya gore dibopiwa tša Jehofa di Mo hlankela ka baka la kganyogo ya boithati. (Jobo 1:9-11; 2:3, 4) Re thabišwa ke gore re tšea karolo go godišeng pušo ya Jehofa ya go loka, gaešita le ge karolo yeo re e tšeago e le e nyenyane kudu.—Diema 27:11.
Hlalalelang Moputso
15, 16. (a) Jesu o re neile lebaka lefe la gore re ‘thabe re be re hlalale’? (b) Ke moputso ofe wo o boloketšwego Bakriste ba tloditšwego legodimong, gomme badirišani-gotee le bona ba “dinku tše dingwê” bona ba tla putswa bjang?
15 Jesu o neile lebaka le lengwe la gore re thabišwe ke go hloiwa le go tlaišwa go etša baporofeta ba bogologolo. Go ya mafelelong a tlhaloso ya senyane yeo a e boletšego Thutong ya Thabeng, o itše: “Thabang Le hlalalê, xobane moputsô wa lena ké o moxolo maxodimong.” (Mateo 5:12) Moapostola Paulo o ngwadile gore: “Moputsô wa sebe ké lehu; ’me neô ya kxauxêlô ya Modimo ké bophelô byo bo sa felexo ka Jesu Kriste Mong ’a rena.” (Ba-Roma 6:23) Ee, ‘moputso o mogolo’ ke bophelo, gomme ga se moputso o re swanetšego. Ke mpho e sa lefelelwego. Jesu o boletše gore moputso wo o “maxodimong” ka gobane o tšwa go Jehofa.
16 Batlotšwa ba amogela “mphapahlôxô wa bophelô,” wo boemong bja bona e lego bophelo bja go se hwe ba e na le Kriste legodimong. (Jakobo 1:12, 17) Bao ba nago le kholofelo ya go phela lefaseng, e lego “dinku tše dingwê,” ba lebeletše pele gore ba amogele bohwa bja bophelo bjo bo sa felego lefaseng la paradeise. (Johane 10:16; Kutollo 21:3-5) Boemong bja bona ka bobedi, “moputso” wo ga se o ba swanetšego. Batlotšwa le “dinku tše dingwê” ka bobedi ga bona ba amogela moputso wa bona ka ‘kgaugelo e kgolo e sa ba swanelago’ ya Jehofa, yeo e ilego ya tutuetša moapostola Paulo go bolela gore: “A Modimo a leboxwê xe a nea ka mokxwa wó wa xo pala polêlô.”—2 Ba-Korinthe 9:14, 15.
17. Ke ka baka la’ng re thaba ge re tlaišwa gomme re ‘hlalala’ ka tsela ya seswantšhetšo?
17 Moapostola Paulo o ngwaletše Bakriste, bao ba bangwe ba bona go se go ye kae ba bego ba tla tlaišwa o sehlogo ke Mmušiši Nero, gore: “Re kxanthša le ditlaišêxô rè tseba xore di tšweletša kxôtlêlêlô, Kxôtlêlêlô ya tlo tšweletša pôtêxô; pôtêxô ya tlo tšweletša kholofêlô. Xomme kholofêlô xa e lahletše.” Le gona o itše: “Thabang kholofelong; kxôtlêlêlang tlaišexong.” (Ba-Roma 5:3-5; 12:12) Go sa šetšwe gore kholofelo ya rena ke ya legodimong goba ya lefaseng, moputso wa go botega ga rena ka tlase ga diteko ke o mogolo kudu go feta selo le ge e le sefe seo se re swanetšego. Go thabela ga rena kholofelo ya go phela ka mo go sa felego bakeng sa go hlankela le go tumiša Tatago rena yo lerato, Jehofa, ka tlase ga Kgoši ya rena Jesu Kriste ke mo go sa lekanywego le selo. Ka tsela ya seswantšhetšo ‘re a hlalala.’
18. Go ka letelwa gore ditšhaba di dire’ng ge bofelo bo dutše bo batamela, gomme Jehofa o tla dira’ng?
18 Dinageng tše dingwe, Dihlatse tša Jehofa di be di tlaišwa gomme di sa dutše di tlaišwa. Boporofeteng bja gagwe bja mabapi le bofelo bja tshepedišo ye ya dilo, Jesu o lemošitše Bakriste ba therešo gore: “Le tlo ba ba xo hloiwa ke dithšaba tšohle ka ’baka la Leina la-ka.” (Mateo 24:9, mongwalo o sekamego ke wa rena.) Ge re dutše re batamela bofelo, Sathane o tla dira gore ditšhaba di bontšhe lehloyo la tšona kgahlanong le batho ba Jehofa. (Hesekiele 38:10-12, 14-16) Se se tla re bontšha gore e tla ba e le nako ya Jehofa ya go gata mogato. “Ke tlo ipônatša boxolo le bokxêthwa ka xo dira tšeo, ka tsebya ke dithšaba tše ntši, tša tseba xe Morêna è le Nna.” (Hesekiele 38:23) Ka go rialo, Jehofa o tla tagafatša leina la gagwe le legolo gomme a phološa batho ba gagwe tlaišong. Ka gona, “wa lehlôxônôlô ké monna wa xo kxôtlêlêla.”—Jakobo 1:12.
19. Re swanetše go dira’ng ge re dutše re letile ‘letšatši le legolo la Jehofa’?
19 Ge ‘letšatši leo le legolo la Jehofa’ le dutše le batamela go feta le ge e le neng pele, anke re thabeng ka gobane re “xobošitšwe” ka baka la leina la Jesu. (2 Petro 3:10-13; Ditiro 5:41) Go etša Bakriste ba pele, eka re ka tšwela pele re sa ‘kgaotše go ruta le go kwatša ka ditaba tše dibotse tša mabapi le Kriste’ le tša mabapi le pušo ya Mmušo ge re dutše re letile moputso wa rena lefaseng le lefsa la Jehofa la go loka.—Ditiro 5:42; Jakobo 5:11.
[Dipotšišo tša Thuto]
[Caption on page 16]
‘Ba thabilego ke bolena ge ba le roga, ba le tlaiša’
[Caption on page 17]
Group in prison: Chicago Herald-American
E le go Boeletša
• Go tlaišetšwa toko go bolela’ng?
• Tlaišo e bile le mafelelo afe go Bakriste ba pele?
• Ke ka baka la’ng go ka bolelwa gore Dihlatse tša Jehofa di tlaišwa go etša baporofeta ba bogologolo?
• Ke ka baka la’ng re ka ‘thaba ra ba ra hlalala’ ge re tlaišwa?