“Phakxamang”

MEHLENG ya bogologolo, baleta-kgoro ba be ba šoma dikgorong tša motse le tša tempele gomme ka dinako tše dingwe ba hlapetša mejako ya magae a batho. Ka ntle le go kgonthišetša gore dikgoro di tswaletšwe bošego, baleta-kgoro ba be ba šoma e le bahlapetši. Ye e be e le kabelo ye e nyakago boikarabelo bjo bogolo, ka gobane tšhireletšego ya motse e be e ithekgile ka go goeletša ga bona bakeng sa go lemoša ka kotsi e tlago.

Jesu Kriste o be a tlwaelane le tema yeo baleta-kgoro ba e kgathago, bao gape ba bitšwago gore ke baleti ba mejako. Ka nako e nngwe, o ile a swantšha barutiwa ba gagwe le baleti ba mejako gomme a ba kgothaletša go dula ba phakgame ge e le mabapi le bofelo bja tshepedišo ya dilo ya se-Juda. O itše: “Fahloxang, Le phakxamê Le rapêlê, xobane lebaka la tšôna xa Le le tsebe. Xo byalo ka motho e a êtaxo a tloxêla ngwakô wa xaxwe . . . à laetše moleta-mojakô a re a phakxamê. Phakxamang-xê, xobane lebaka la xo boa xa Mong wa ngwakô xa Le le tsebe.”—Mareka 13:33-35.

Ka mo go swanago, ga bjale mo e ka bago ka nywaga ya ka godimo ga e 125, makasine wa Morokami o be o dutše o fetišetša kgothatšo ya Jesu ya gore batho ‘ba dule ba phakgame.’ Bjang? Go etša ge go bontšhitšwe go letlakala 2 la makasine wo gore, “O ela hloko ditirigalo tša lefase ka ge di phethagatša boporofeta bja Beibele. O homotša batho ka moka ka ditaba tše dibotse tša gore Mmušo wa Modimo o tla tloga o senya batho bao ba hlakišago magagabo bona, le gore o tla fetola lefase gore e be paradeise.” Ka kabo ya wona ya dikopi tše di fetago 26 000 000 lefaseng ka bophara, ka maleme a 150, Morokami ke makasine wa bodumedi wo o abjago kudu lefaseng ka bophara. Ka wona, Dihlatse tša Jehofa go etša baleta-kgoro ba bogologolo di tutuetša batho gohle go ‘dula ba phakgame’ moyeng ka gobane Mong wa tšona Jesu Kriste, o kgaufsi le go boa le go tliša kahlolo tshepedišong ye ya dilo.—Mareka 13:26, 37.