Go ya Motsaneng wa Bottom Kua Saba

SEHLAKAHLAKA sa Dutch sa kua Saba e kile ya ba sebo sa mahodu a lewatleng ao a bego a sesa ka meetseng a Lewatle la Caribbean a tsoma dithebola. Lehono, sehlakahlaka se se senyenyane se se lego bokgoleng bja dikhilomithara tše 240 ka bohlabela bja Puerto Rico, ke legae la badudi ba ka bago 1 600, bao ba bahlano ba bona e lego Dihlatse tša Jehofa. Lega go le bjalo, badiredi ba ba sebete ba tsoma selo se itšego se bohlokwa kudu go feta dithebola. Ba tsoma ka mafolofolo batho bao ba “hlaoletšwexo bophelô byo bo sa felexo.”—Ditiro 13:48.

Ditaba tše dibotse tša Mmušo wa Modimo di ile tša fihla la mathomo sehlakahlakeng se ka June 22, 1952, ge sekepe sa Sibia sa dimithara tše 18 seo se sesišwago ke Dihlatse tša Jehofa se be se ema lebopong la Saba. (Mateo 24:14) Baromiwa e lego Gust Maki le Stanley Carter ba ile ba sepela tsejaneng ye e bitšwago Ladder, tsela ya manyokenyoke ya mafsika a fetago 500 ye e rotogelago motsaneng wa Bottom e lego motse-mošate wa Saba. * Ka nywaga-kgolo e mentši, tsela ye e tshese e be e le tsela e nnoši ya go fihlelela badudi ba sehlakahlakeng.

Pego ya mathomo ya semolao e gatišitšwego ya mabapi le modiro wa Bokriste wa go nea bohlatse kua Saba e tšweletše ka go 1966 Yearbook of Jehovah’s Witnesses. Go ya ka pego yeo, go be go e na le Hlatse e tee feela e mafolofolo sehlakahlakeng seo. Ka morago, lapa le le tšwago Canada le ile la fetša nywaga e mmalwa le bolela ditaba tše dibotse moo. Morago bjale, Russel le Kathy, e lego banyalani bao ba tšofetšego ba tšwago United States, ba  ile ba ya Saba gomme ba tšea karolo modirong wa boboledi gona moo. Ela hloko kanegelo ya bona.

Go Etela Saba

Nna le mosadi wa-ka re fihlile ka sefofane re le baeng ba Ronald, yo e bego e le Hlatse e nnoši sehlakahlakeng se ka bo-1990. Motho yo re mo etelago o re emetše boema-fofaneng. O thabetše lepokisi le lenyenyane la merogo leo re mo tletšego le lona e le mpho, ka ge mo sehlakahlakeng go sa rekišwe ditšweletšwa tša temo. Ge re namela lori e nyenyane, re sepela tseleng ya manyokenyoke ka go nanya go ya Thabeng ya Scenery tlhoreng ya thaba-mollo ye e se sa hlwago e thuthupa.

Re ema motsaneng wa Hell’s Gate ge Ronald a iša mahlo letlapeng la tsebišo la batho bohle go bona ge e ba taletšo ya polelo ya phatlalatša ya Sontaga e sa dutše e pharilwe moo. Re thabile go bona gore e sa dutše e pharilwe. O itahlela gape ka loring, gomme re tšwela pele ka go namelela go ya motsaneng o mogolo kudu sehlakahlakeng e lego Windwardside. Go etša ge leina la ona le bontšha, motsana wo o bogegago o agilwe ka thoko lehlakoreng la sehlakahlaka leo moya o fokelago go lona, wo o lego dimithareng tše ka bago 400 ka godimo ga tekanyo ya lewatle. Ge re dutše re otlela re lebile ntlong ya Ron, re bona leswao la mebalabala mathuding a ka pele le le hlalosago ntlo e le Holo ya Mmušo ya Dihlatse tša Jehofa.

Nakong ya dijo tša matena, ke botšiša potšišo ye e re tutueleditšego gore re etele mo ya gore, “Go tlile bjang gore o be mogoeledi wa Mmušo mo Saba?”

Ron o re: “Ge go agwa ga lekala la Dihlatse tša Jehofa la kua Puerto Rico go be go fela ka 1993, nna le mosadi wa-ka re ile ra kgahlegela go dula re le kabelong ya nageng e šele. Mathomong, re ile ra etela Saba le banyalani ba bangwe ba babulamadibogo gomme ra lemoga gore go be go e na le badudi ba 1 400 eupša go se na Dihlatse. Ka baka leo re ile ra bolela le Komiti ya Lekala ya Puerto Rico mabapi le go hudugela mo.

“Dilo di ile tša sepela gabotse, gomme mafelelong ra hwetša tumelelo ya go huduga. Ka manyami, nywageng e mebedi ka morago, mosadi wa-ka o ile a babja kudu, gomme re ile ra boela California. Ka morago ga lehu la gagwe, ke ile ka boa gape mo Saba. O a bona, ga ke rate go thoma selo gomme ka se se fetše.”

Go Nea Bohlatse ka Ntlo le Ntlo Kua Saba

Phapoši ya bodulo ya ntlo ya Ronald ye e nago le nywaga e 100 e šoma gape e le Holo ya Mmušo. * Ge re dutše re thabela difihlolo gomme re itokišeletša go ya bodireding, pula ye e nešwago ke maru ao a iphetelago e kolobiša khitšhi ya ka ntle. Ka morago ga difihlolo, marung a makabakabana, re a tšwa gomme re ya go nea bohlatse ka ntlo le ntlo kua Bottom. Ntlong e nngwe le e nngwe, Ron o dumediša mong wa ntlo ka leina. Poledišano ya rena e lebiša tlhokomelo ditabeng tša ditiragalo tše di sa tšwago go direga lefelong leo. Batho ba bantši ba tlwaelane le Ron le bodiredi bja gagwe, gomme ba bantši ba amogela dipuku tša Beibele ka go rata.

Go boloka pego ya bao ba kgahlegelago molaetša wa Mmušo e ka ba tlhohlo ge e ba o se wa tlwaelana le badudi ba motsaneng wo. Ka baka la’ng? Ron o re, ka baka la gore “molao o nyaka gore dintlo ka moka di pentwe ka mmala o swanago.” Ruri go be go le bjalo, ke ile ka lebelela gohle gomme ka bona gore dintlo ka moka tša Saba ke tše ditšhweu gomme di na le marulelo a mahwibidu.

Ka morago ga go phetha poledišano ya rena ya Beibele, re laletša mong wa ntlo go ba gona polelong ya phatlalatša ya Beibele ye e swarwago ka Sontaga Holong ya Mmušo. Ge Ron a le gona sehlakahlakeng, o bea polelo ya phatlalatša beke le beke. Mo nakong ye, go na le dithuto tša Beibele tše 17 tše di swarwago kua Saba. Batho ba 20 ba bile gona Segopotšong sa lehu la Kriste ka 2004. Le gona gaešita le ge palo yeo e ka bonagala e le e nyenyane kudu, ke tee lekgolong ya badudi ka moka ba Saba!

Ka kgonthe, Dihlatse tša Jehofa di ikgafile go fihlelela batho ba bantši ka mo go ka kgonegago ka molaetša wa Modimo wa phološo. Go sa šetšwe gore ke sehlakahlaka se senyenyane go swana le Saba goba ke kontinente ka moka, Dihlatse tša Jehofa ka potego di phethagatša thomo ya go “[dira] dithšaba ka moka barutiwa.”—Mateo 28:19.

Ka maswabi, ketelo ya rena e fedile. Ge re dutše re namela sefofane, re emiša matsogo gomme re a mo laela. Re tla dula re gopola go etela ga rena kua Saba le nako ye re e feditšego re e-ya motsaneng wa Bottom!

[Mengwalo ya ka tlase]

[Mebapa go letlakala 10]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

PUERTO RICO

[Mothopo wa Seswantšho go letlakala 10]

Background: www.sabatourism.com