Bana ba Rena—Bohwa bjo Bohlokwa

“Ka kxonthe, bana ba motho ké neô ya Morêna; kenyô ya mmele ké mphô.”—PSALME 127:3.

1. Go tlile bjang gore go belegwe ngwana wa pele yo e lego motho?

NAGANA ka ditiro tša mohlolo tšeo Jehofa Modimo a ilego a dira gore di kgonege ka tsela yeo a ilego a bopa monna wa pele gotee le mosadi ka yona. Bobedi tate e lego Adama le mma e lego Efa ba ile ba fana ka karolo e tšwago mebeleng ya bona yeo e ilego ya gola ka popelong ya Efa gomme ya fetoga motho yo mofsa yo a feletšego—ngwana wa pele yo e lego motho. (Genesi 4:1) Go ba go fihla lehono, go ingwa le go belegwa ga ngwana go sa dutše go re makatša gomme ba bantši ba go hlalosa e le mohlolo wa kgonthe.

2. Ke ka baka la’ng o ka bolela gore seo se diregago ka popelong ya mosadi wa moimana ke mohlolo?

² Ka matšatši a ka bago a 270, sele ya mathomo yeo e ilego ya bopša ka gare ga mma ka baka la go kopana ga gagwe le tate e a gola gomme e fetoga ngwana yo a bopilwego ka disele tše dibilione. Ka gare ga sele yeo ya mathomo go na le tsebišo e nyakegago bakeng sa go tšweletša mehuta ya disele ya ka godimo ga e 200. Ge di latela tsebišo yeo e kgahlišago ye motho a sa kgonego go e kwešiša, disele tše tše di raraganego ka tsela e makatšago di gola ka lenaneo le ka mokgwa o swanetšego bakeng sa go tšweletša motho yo mofsa yo a phelago!

3. Ke ka baka la’ng batho ba bantši ba ba naganišišago ba dumela gore Modimo o swanetše go ba a dirile gore ngwana a kgone go belegwa?

³ O be o tla re mmopi wa kgonthe wa ngwana yo ke mang? Ke therešo gore ke Yo a hlodilego bophelo mathomong! Mopsalme wa Beibele o ile a opela ka gore: “Tsebang xobane Modimo ké Yêna Morêna; ké Yêna a re dirilexo; xa r’a itira.” (Psalme 100:3) Batswadi, le tseba gabotse gore ga se ka bohlale bja lena ge le kgonne go ba le ngwana yo a rategago gakaakaa. Ke feela Modimo yo a nago le bohlale bjo bo sa lekanywego yo a ka ikarabelago ka go bopega ga ngwana ka tsela ye ya mohlolo. Ka nywaga e dikete, batho ba ba naganišišago ba ile ba bolela gore Mmopi yo Mogolo ke yena a dirago gore ngwana a bopege ka popelong ya mmagwe. Na le wena o nagana bjalo?—Psalme 139:13-16.

4. Ke phošo efe ya batho yeo Jehofa le ka mohla a ka se kego a e dira?

⁴ Lega go le bjalo, na Jehofa ke Mmopi yo a se nago kwelobohloko yo a ilego a fo hlama tshepedišo ya tša thutaphedi yeo ka yona banna le basadi ba ka bago le bana? Batho ba bangwe ga ba na kwelobohloko, eupša Jehofa le ka mohla ga a bjalo. (Psalme 78:38-40) Beibele go Psalme 127:3 e re: “Ka kxonthe, bana ba motho ké neô [“bohwa,” NW] ya Morêna; kenyô ya mmele ké mphô.” Bjale anke re eleng hloko gore bohwa ke eng le gore bo hlatsela eng.

Bohwa le Mpho

5. Ke ka baka la’ng bana e le bohwa?

⁵ Bohwa bo swana le mpho. Gantši batswadi ba šoma nako e telele ka thata bakeng sa go tlogelela bana ba bona bohwa. E ka ba tšhelete, thoto goba mohlomongwe selo se itšego sa bohlokwa kudu. Go sa šetšwe gore ke bja eng, bohwa ke bohlatse bja lerato la batswadi. Beibele e bolela gore Modimo o neile batswadi bana ba bona e le bohwa. Ke mpho e lerato e tšwago go yena. Ge e ba o le motswadi, na o ka bolela gore ditiro tša gago di bontšha gore o lebelela bana ba gago e le mpho yeo Mmopi wa legohle a go neilego yona?

6. Morero wa Modimo e be e le ofe ge a be a dira gore batho ba kgone go ba le bana?

⁶ Morero wa Jehofa wa go nea batho mpho ye e be e le gore lefase le tlale ka ditlogolwana tša  Adama le Efa. (Genesi 1:27, 28; Jesaya 45:18) Jehofa ga se a bopa motho yo mongwe le yo mongwe ka boyena, go etša ge a dirile bjalo ka barongwa ba dimilione. (Psalme 104:4; Kutollo 4:11) Go e na le moo, Modimo o kgethile gore a bope batho ba e-na le bokgoni bja go ba le bana bao ba bego ba tla swana le batswadi ba bona ka ditsela tše itšego. A tokelo e kgahlišago gakaakang go bo-mma le bo-tate gore ba be le bana ba bjalo gomme ba ba hlokomele! Bjalo ka batswadi, na le leboga Jehofa ge a dirile gore le kgone go thabela bohwa bjo bja bohlokwa?

Ithuteng Mohlaleng wa Jesu

7. Ka go fapana le seo batswadi ba bangwe ba se dirago, Jesu o bontšhitše bjang kgahlego le kwelobohloko go “bana ba batho”?

⁷ Ke mo go nyamišago go bolela gore ga se batswadi ka moka bao ba lebelelago bana ba bona e le dimpho. Ba bantši ga ba bontšhe kwelobohloko go bana ba bona. Batswadi ba bjalo ga ba bonagatše boemo bja kgopolo bja Jehofa goba bja Morwa wa gagwe. (Psalme 27:10; Jesaya 49:15) Ka mo go fapanego, ela hloko kgahlego yeo Jesu a bego a e-na le yona baneng. Gaešita le pele ga ge Jesu a ka tla lefaseng e le motho—ge e be e le motho yo matla kudu wa moya legodimong—Beibele e bolela gore o be a “kxahlwa ke bana ba batho.” (Diema 8:31) Lerato leo a bego a rata batho ka lona e be e le le legolo kudu moo ka pelo e tšhweu a ilego a gafa bophelo bja gagwe e le topollo bakeng sa gore re hwetše bophelo bjo bo sa felego.—Mateo 20:28; Johane 10:18.

8. Ke ka tsela efe Jesu a ilego a beela batswadi mohlala o mobotse?

⁸ Ge a be a le lefaseng, Jesu o ile a beela batswadi mohlala o mobotse ka mo go kgethegilego. Ela hloko seo a se dirilego. O ile a fetša nako a e-na le bana, gaešita le ge a be a swaregile kudu ka modiro a bile a gateletšegile. O ile a ba bogela ge ba bapala mmarakeng gomme tše dingwe tša dilo tšeo ba bego ba di dira o ile a di diriša thutong ya gagwe. (Mateo 11:16, 17) Nakong ya leeto la gagwe la mafelelo la go ya Jerusalema, Jesu o be a tseba gore o tla tlaišwa gomme a bolawa. Ka gona, ge batho ba be ba tliša bana go yena, mohlomongwe barutiwa ba Jesu ba ile ba dira maiteko a go šireletša Jesu kgateletšegong e oketšegilego ka go leka go gomišetša bana morago. Eupša Jesu o ile a kgalemela barutiwa ba gagwe. E le go bontšha gore o “kxahlwa” ke bana, o ile a re: “Lesang bana ba tlê xo Nna; Le se kê la ba thibêla.”—Mareka 10:13, 14.

9. Ke ka baka la’ng seo re se dirago e ka ba sa bohlokwa kudu go feta seo re se bolelago?

⁹ Re ka ithuta mohlaleng wa Jesu. Ge bana ba e-tla go rena, re arabela bjang—gaešita le ge re swaregile ka modiro? Na re arabela kamoo Jesu a ilego a arabela ka gona? Seo bana ba se nyakago ka mo go kgethegilego go batswadi ba bona, ke seo Jesu a bego a ikemišeditše go ba nea sona—nako ya gagwe le tlhokomelo. Ke therešo gore mantšu a bjalo ka a rego, “ke a go rata” ke a bohlokwa. Lega go le bjalo, ditiro di bolela mo gontši go feta mantšu. Lerato la gago ga le bonagatšwe feela ke seo o se bolelago eupša le bonagatšwa kudu ke seo o se dirago. Le bonagatšwa ke nako gotee le tlhokomelo yeo o e neago bana ba gago. Lega go le bjalo, go dira tšeo ka moka go ka no se tšweletše mafelelo a mabotse, bonyenyane e sego ka pela kamoo o ka bago o lebeletše ka gona. Go nyakega gore o se fele pelo. Re ka ithuta go se fele pelo ge e ba re ekiša tsela yeo Jesu a ilego a dirišana le barutiwa ba gagwe ka yona.

Go se Fele Pelo ga Jesu le Lerato la Gagwe

10. Ke ka tsela efe Jesu a ilego a ruta barutiwa ba gagwe thuto mabapi le boikokobetšo, gomme mathomong e ile ya ba le mafelelo afe?

¹⁰ Jesu o be a tseba ka phadišano e tšwelago pele gare ga barutiwa ba gagwe ya go rata bogolo. Ka letšatši le lengwe ka morago ga ge a fihlile Kaperenaume le barutiwa ba gagwe, o ile a ba botšiša gore: “Le be Le fetolana eng tseleng? Bôná ba homola, ka xobane bà le tseleng ba be ba tšere kxang ya xo re e moxolo ké mang.”  Go e na le go ba sola ka thata, Jesu ka go se fele pelo o ile a ba nea thuto e šomago e le ge a leka go ba ruta mabapi le boikokobetšo. (Mareka 9:33-37) Na e ile ya tšweletša mafelelo ao a bego a a letetše? E sego ka yona nako yeo. Dikgweding tše ka bago tše tshela ka morago, Jakobo le Johane ba ile ba kgothaletša mmago bona go kgopela Jesu gore a ba nee maemo a phagamego Mmušong. Mo le gona, Jesu ka go se fele pelo o ile a phošolla tsela ya bona ya go nagana.—Mateo 20:20-28.

11. (a) Ke tiro efe e tlwaelegilego yeo baapostola ba Jesu ba ilego ba palelwa ke go e dira ka morago ga ge bona gotee le Jesu ba fihlile ka phapošing ya ka godimo? (b) Jesu o ile a dira’ng, gomme na maiteko a gagwe a ile a atlega ka yona nako yeo?

¹¹ Go se go ye kae, Paseka ya 33 C.E. e ile ya fihla gomme Jesu a gahlana le baapostola ba gagwe ka sephiring gore ba e bine. Ge ba fihla ka phapošing ya ka godimo, ga go le o tee wa baapostola ba 12 yo a ilego a leka go dira tiro e tlwaelegilego ya go hlapiša maoto ao a tletšego lerole a ba bangwe—tiro ya maemo a tlasana ya mohlanka goba ya mosadi ka lapeng. (1 Samuele 25:41; 1 Timotheo 5:10) Jesu o swanetše go ba a ile a kwa bohloko gakaakang ge a bona gore barutiwa ba gagwe ba sa tšwela pele ba ipontšha ba rata maemo a phagamego! Ka gona, Jesu o ile a hlapiša maoto a yo mongwe le yo mongwe wa bona gomme a ba kgopela go tšwa pelong gore ba latele mohlala wa gagwe wa go hlankela ba bangwe. (Johane 13:4-17) Na ba ile ba o latela? Beibele e bolela gore ka morago mantšiboeng ona ao “xwa tsoxa kxang mo xare xa bôná, ya xo re e a swanetšwexo ke xo ba yo moxolo xo bôná ké mang.”—Luka 22:24.

12. Batswadi ba ka ekiša Jesu bjang ge ba dira maiteko tabeng ya go tlwaetša bana ba bona?

¹² Ge bana ba lena ba sa arabele keletšong ya lena, na lena batswadi le lemoga kamoo Jesu a swanetšego go ba a ile a ikwa ka gona? Gopola gore Jesu ga se a ka a lesa go thuša baapostola ba gagwe, gaešita le ge ba be ba tšea nako go phošolla diphošo tša bona. Go se fele pelo ga gagwe mafelelong go ile gwa enywa dienywa. (1 Johane 3:14, 18) Batswadi, le swanetše go ekiša lerato la Jesu le go se fele pelo ga gagwe gomme le ka mohla ga se la swanela go lesa go dira maiteko tabeng ya go tlwaetša bana ba lena.

13. Ke ka baka la’ng motswadi a sa swanela go raka ngwana yo a botšišago ka go mo kgadimola?

¹³ Bana ba swanetše go lemoga gore batswadi ba bona ba a ba rata le gore ba a ba kgahlegela. Jesu o be a nyaka go tseba seo barutiwa ba gagwe ba bego ba se nagana, ka gona o ile a theetša ge ba be ba e-na le dipotšišo. O ile a ba botšiša mabapi le seo ba bego ba se nagana ka ditaba tše itšego. (Mateo 17:25-27) Ke therešo gore thuto e botse e akaretša go theetša ka kelohloko le go ba le kgahlego e tšwago pelong. Motswadi o swanetše go lwantšha tshekamelo le ge e le efe ya go raka ngwana yo a botšišago ka go mo kgadimola ka gore: “Tloga mo! Na ga o bone gore ke swaregile?” Ge e ba motswadi a swaregile e le ka kgonthe, o swanetše go botša ngwana gore ba tla boledišana ka taba ye ka morago. Ke moka batswadi ba swanetše go kgonthišetša gore go boledišanwa ka yona. Ka tsela ye ngwana o tla bona gore motswadi o mo kgahlegela e le ka kgonthe, gomme o tla dula a itokišeleditše go ntšhetša motswadi sa mafahleng.

14. Batswadi ba ka ithuta’ng go Jesu mabapi le go bontšha lerato baneng ba bona?

¹⁴ Na ke mo go swanetšego gore batswadi ba bontšhe lerato la bona ka go bea matsogo magetleng a bana ba bona le ka go ba gokarela? Le gona mo, batswadi ba ka ithuta go Jesu. Beibele e bolela gore  o ile a “ba xokara, a ba bea diatla a ba šexofatša.” (Mareka 10:16) O nagana gore bana ba ile ba ikwa bjang? Ke therešo gore dipelo tša bona di ile tša thaba, gomme ba ikwa ba le kgaufsi le Jesu! Ge e ba go e-na le maikwelo a borutho le lerato magareng ga lena batswadi le bana ba lena, gona ba tla arabela ka lethabo kudu maitekong ao le a dirago a go ba laya le go ba ruta.

Taba ya Gore Nako e Swanetše go ba e Kaakang

15, 16. Kgopolo e tlwaelegilego ya go godiša bana e be e dutše e le efe, gomme go bonagala e tutueleditšwe ke’ng?

¹⁵ Ba bangwe ba ile ba belaela ge e ba bana ruri ba nyaka gore batswadi ba bona ba ba nee nako le tlhokomelo e lerato. Kgopolo ya go godiša bana yeo e ilego ya kgothaletšwa ka bokgoni e bitšwa nako ya bohlokwa. Baboleledi ba kgopolo ye ba bolela gore bana ga ba nyake nako e ntši go batswadi ba bona, seo ba se nyakago ke gore nako e nyenyane yeo ba e fetšago le bona e be ya bohlokwa, e beakantšwego gabotse le e rulagantšwego e sa le pele. Na kgopolo ya go diriša nako ya bohlokwa ke e šomago, yeo e kgothaletšwago e le ge go nagannwe ka boiketlo bja bana?

¹⁶ Mongwadi yo mongwe yo a boledišanego le bana ba bantši o boletše gore seo ba “bego ba tloga ba se nyaka go batswadi ba bona e be e le nako e oketšegilego” gotee le “go elwa hloko ka mo go feletšego.” Se se lemogegago ke gore moprofesara yo mongwe wa kholetšheng o itše: “Polelwana ye [nako ya bohlokwa] e bile gona ka baka la go ipona molato ga batswadi. Batho ba be ba nyaka tsela ya go itokafatša mabapi le go fetša nako e nyenyane le bana ba bona.” Batswadi ba swanetše go fetša nako e kaaka’ng le bana ba bona?

17. Bana ba nyaka’ng go batswadi ba bona?

¹⁷ Beibele ga e bolele selo ka taba ye. Lega go le bjalo, batswadi ba ba-Isiraele ba ile ba kgothaletšwa go bolela le bana ba bona ge ba le ka ngwakong, ge ba le tseleng, ge ba yo robala le ge ba tsoga. (Doiteronomio 6:7) Go molaleng gore se se bolela gore batswadi ba swanetše go boledišana le bana ba bona le go ba ruta ka dinako tšohle letšatši le letšatši.

18. Jesu o ile a diriša bjang dibaka tše di tšwelelago bakeng sa go tlwaetša barutiwa ba gagwe, gomme batswadi ba ka ithuta’ng go se?

¹⁸ Jesu o ile a ruta barutiwa ba gagwe ka katlego ge a be a e-ja le bona, a sepela le bona, gaešita le go iketla le bona. Ka gona, o ile a diriša sebaka se sengwe le se sengwe bakeng sa go ba ruta. (Mareka 6:31, 32; Luka 8:1; 22:14) Ka mo go swanago, batswadi ba Bakriste ba swanetše go ba šedi e le gore ba diriše sebaka se sengwe le se sengwe bakeng sa gore ba thome poledišano e botse le bana ba bona gomme ba e tšwetše pele le gore ba ba tlwaetše ditsela tša Jehofa.

Seo o ka se Rutago le Kamoo o ka se Rutago ka Gona

19. (a) Ke’ng se se nyakegago ka ntle le go fetša nako le bana? (b) Ke’ng seo batswadi ba tlogago ba swanetše go se ruta bana ba bona?

¹⁹ Go fo fetša nako o e-na le bana gaešita le go  ba ruta ga se gwa lekana bakeng sa go ba godiša ka katlego. Selo se sengwe sa bohlokwa ke seo se rutwago. Ela hloko kamoo Beibele e gatelelago ka gona seo se swanetšwego go rutwa. E re: “Mantšu a ke Xo laetšaxo lehono . . . O a tiišetšê bana ba xaxo.” “Mantšu a” ao bana ba swanetšego go a rutwa ke afe? Go molaleng gore ke mantšu ao go sa tšwago go bolelwa ka ona, a rego: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka matla a xaxo ka moka.” (Doiteronomio 6:5-7) Jesu o boletše gore molao wo ke wa bohlokwa kudu melaong ka moka ya Modimo. (Mareka 12:28-30) Batswadi ba tloga ba swanetše go ruta bana ka Jehofa, ba ba hlalosetše lebaka leo ka lona e lego yena a nnoši yo a swanelwago ke lerato la rena gotee le boineelo bja rena bja pelo ka moka.

20. Batswadi ba mehleng ya bogologolo ba be ba laetšwe ke Modimo gore ba rute bana ba bona eng?

²⁰ Lega go le bjalo, “mantšu a” ao batswadi ba kgothaletšwago gore ba a rute bana ba bona ga a akaretše feela taba ya go rata Modimo ka pelo ka moka. O tla lemoga gore kgaolong e tlago pele ga ye ya Doiteronomio, Moše o boeletša melao yeo Modimo a ilego a e ngwala diphaphathing tša mafsika—Melao e Lesome. Melao ye e akaretša taelo ya gore o se ke wa bolela maaka, o se ke wa utswa, o se ke wa bolaya le gore o se ke wa dira bootswa. (Doiteronomio 5:11-22) Ka gona, batswadi ba mehleng ya bogologolo ba ile ba kwešiša gabotse go nyakega ga go nweletša ditekanyetšo tša boitshwaro ka baneng ba bona. Batswadi ba Bakriste lehono ba swanetše go nea bana ba bona tlhahlo e swanago ge e ba ba nyaka go ba thuša gore ba be le bokamoso bjo bo bolokegilego le bjo bo thabišago.

21. Taelo ya gore Lentšu la Modimo le ‘tiišetšwe’ ka baneng e be e bolela’ng?

²¹ Ela hloko gore batswadi ba botšwa mabapi le kamoo ba swanetšego go ruta bana ba bona “mantšu a,” goba melao ka gona, ge go thwe: “O a tiišetšê bana ba xaxo.” Lentšu ‘tiišetša’ le bolela “go ruta le go gatelela ka go boeletša ka mehla goba go eletša: go kgothaletša goba go nweletša ka monaganong.” Ka gona, ge e le gabotse Modimo o botša batswadi gore ba be le lenaneo leo le rulagantšwego la thuto ya Beibele leo le nago le morero o kgethegilego wa go gatelela dilo tša moya ka megopolong ya bana ba bona.

22. Batswadi ba ba-Isiraele ba be ba boditšwe gore ba dire’ng bakeng sa go ruta bana ba bona, gomme seo se be se bolela’ng?

 ²² Lenaneo le bjalo leo le rulagantšwego le nyaka gore batswadi e be bona ba gatago mogato wa pele. Beibele e re: “O a tlêmêlêlê [“mantšu a,” goba melao ya Modimo] seatleng sa xaxo e bê seká, e bê mofapahlôxô mo phatleng ya xaxo. O a ngwalê dijakwaneng tša ngwako wa xaxo, le mo maxorong a xaxo.” (Doiteronomio 6:8, 9) Se ga se bolele gore batswadi ba swanetše go ngwala e le ka kgonthe melao ya Modimo dijakwaneng le dikgorong, gomme ba e tlemelele diatleng le diphatleng tša bana ba bona. Go e na le moo, ntlha ke gore batswadi ka mehla ba swanetše go gopotša bana ba bona ka dithuto tša Modimo. Ba swanetše go ruta bana ba bona ka mehla, bjalo ka ge eka dithuto tša Modimo di dula di le diphatleng tša bana ka dinako tšohle.

23. Ke’ng se se tlago ahla-ahlwa thutong ya bekeng e tlago?

²³ Ke dilo dife tše dingwe tša bohlokwa kudu tšeo batswadi ba swanetšego go di ruta bana ba bona? Ke ka baka la’ng e le gabohlokwa lehono gore bana ba rutwe ba be ba tlwaetšwe go itšhireletša? Ke thušo efe yeo e lego gona lehono bakeng sa batswadi yeo e tla ba thušago go ruta bana ba bona ka katlego? Dipotšišo tše le tše dingwe tšeo di tshwenyago batswadi ba bantši di tla ahla-ahlwa sehlogong se se latelago.

O tla Araba Bjang?

• Ke ka baka la’ng batswadi ba swanetše go lebelela bana ba bona e le ba bohlokwa?

• Batswadi le batho ba bangwe ba ka ithuta’ng go Jesu?

• Batswadi ba swanetše go nea bana ba bona nako e kaaka’ng?

• Bana ba swanetše go rutwa’ng, gomme ba swanetše go rutwa bjang?

[Dipotšišo tša Thuto]

[Seswantšho go letlakala 10]

Batswadi ba ka ithuta’ng tseleng ya Jesu ya go ruta?

[Diswantšho go letlakala 11]

Ke neng le gona ke bjang batswadi ba ba-Isiraele ba bego ba swanetše go ruta bana ba bona?

[Diswantšho go letlakala 12]

Batswadi ba swanetše go tlemelela dithuto tša Modimo diphatleng tša bana ba bona