Bagoeledi ba Mmušo ba a Bega

Go Tsoma Batho ba Swanelegago Dinaga-magaeng tša Australia

KAROLO e kgolo-kgolo ya bogareng bja naga bja Australia e tsebja ka gore ke dinaga-magaeng. Dikarolo tše dingwe tša dinaga-magaeng di be di sa ka tša etelwa ke Dihlatse tša Jehofa ka nywaga e 12. Ka gona, Dihlatse tša Jehofa kua Darwin, e lego motse-mošate wa Northern Territory, di ile tša rulaganyetša lesolo le legolo la go bolela ditaba tše dibotse la matšatši a senyane bakeng sa go tsoma batho ba swanelegago.—Mateo 10:11.

Thulaganyo e dirilwego ka šedi e kgolo e thomile dikgwedi tše 12 pele ga lesolo leo, go akaretša le go dirwa ga mebapa ya tikologo ya disekwere-khilomithara tše 800 000—e lego lefelo le le fetago New Zealand gararo ka bogolo. Bakeng sa go kwešiša kamoo lefelo le le pharaletšego ka gona, tšea gore tsejana ya go tloga tseleng e kgolo go fihla kgorong ya ntlo polaseng, ke ya monabo wa botelele bja go feta dikhilomithara tše 30! Ka godimo ga moo, dipolasa tše dingwe di arogane ka bokgole bja dikhilomithara tše 300 goba go feta moo.

Baithapi ba Dihlatse ba 145 ba ile ba tšea karolo lesolong leo. Ba bangwe ba be ba e-tšwa mafelong a kgole kudu a bjalo ka Tasmania. Ba bangwe ba ile ba goroga ka dikoloi tšeo di gogago ka maotwana a mane di tletše ka ditlabakelo tša go kampa, di-spare parts le peterolo. Ba bangwe ba be ba gogile dithoto tša bona ka dikharabane. Ka godimo ga moo, go be go hirilwe dipese tše pedi tšeo di nametšago batho ba 22 bakeng sa go rwala bao ba se nago dikoloi tše di swanetšego tše di gogago ka maotwana a mane. Bao ba bego ba sepela ka dipese ba ile ba nea bohlatse ka mo go kgethegilego go badudi ba ditorotswana tša ditikologong tše itšego.

Pele bana babo rena ba ka thoma ka leeto, ba ile ba rulaganyetša dipolelo le dipontšho bakeng sa go nea tlhahlo ya kamoo go ka dirwago thero ya ditaba tše dibotse tšhemong ye e sa tlwaelegago. Ka mohlala, go dira boboledi ka tsela e atlegago setšhabeng sa ma-Aborigine (badudi ba setlogo ba Australia), gantši go nyaka gore motho a latele tsela e itšego ya boitshwaro le gore a tsebe meetlo ya ma-Aborigine. Le gona go ile gwa boledišanwa ka ditaba tša mabapi le tikologo bakeng sa go thuša go šireletša diphoofolo le dimela tša lešokeng.

Ba ile ba thabela diphihlelo tše dintši tše di kgahlišago. Ka mohlala, lefelong le lengwe la ma-Aborigine,  bana babo rena ba ile ba rulaganyetša go nea polelo ya phatlalatša e theilwego Beibeleng. Mosadi yo e lego hlogo ya setšhaba o ile a ya ka boyena go batho go ba tsebiša ka polelo yeo. Ka morago ga moo, go ile gwa sepedišwa dipuku tše 5 le diporoutšha tše 41 go batho bao ba bego ba le gona. Lefelong le lengwe go ile gwa ikgokaganywa le mo-Aborigine yo mongwe. O be a bile a swere Beibele ya gagwe ya King James Version, eupša e be e tšofetše e bile e kgeigile. Ge a botšišwa gore afa o tseba leina la Modimo, o ile a araba ka gore ee ke moka a ntšha tokollo ya Morokami wa kgale ka baking ya gagwe. O ile a bala makasine woo, wo o bego o tsopola Mareka 12:30 (NW) e rego: “O swanetše go rata Jehofa Modimo wa gago ka pelo ya gago ka moka.” O ile a re: “Lengwalo leo ke le rata kudu.” Ka morago ga poledišano e tseneletšego ya Beibele, o ile a newa Beibele e mpsha le dikgatišo tše dingwe tšeo di theilwego Beibeleng.

Kgaufsi le Gulf of Carpentaria, molaodi wa polasa ya diheketara tše 400 000 o ile a kgahlegela molaetša wa Mmušo. Eitše ge a bontšhwa kgatišo ya Puku Ya-ka ya Ditaba tša Beibele le ya Tsebo E Išago Bophelong Bjo bo sa Felego, * a botšiša ge e ba go e-na le kgatišo le ge e le efe ka se-Kriol. Taba ye e be e sa tlwaelega ka gobane le ge ma-Aborigine a mantši a bolela se-Kriol, ke a sego kae feela ao a kgonago go se bala. Ka morago go ile gwa lemogwa gore bašomi ka moka ba 50 bao ba šomago polaseng yeo ba be ba kgona go bala se-Kriol. Molaodi wa polasa yo o ile a thabela go hwetša dikgatišo tša Beibele ka se-Kriol gomme ka bolokologi o ile a fana ka dinomoro tša gagwe tša mogala bakeng sa gore go ikgokaganywe le yena.

Nakong ya matšatši a senyane a go dira boboledi bjo bo tseneletšego, go ile gwa sepedišwa palo-moka ya Dibeibele tše 120, dipuku tše 770, dimakasine tše 705 le diporoutšha tše 1 965. Ka godimo ga moo, go ile gwa dirwa maeto a go boela a 720 gomme gwa thongwa le dithuto tša Beibele tše 215.

Ka kgonthe, batho ba bantši bao ba swanelegago ba phatlaletšego tikologong ye e kgolo-kgolo bao ba swerwego ke tlala ya moya, ba ile ba fepša.—Mateo 5:6.

[Mongwalo wa ka tlase]

[Mmapa go letlakala 30]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

AUSTRALIA

NORTHERN TERRITORY

Darwin

Gulf of Carpentaria

Sydney

TASMANIA