Go Monya Tsebo—Gona Bjale le ka mo go sa Felego

NGAKA ya kua Jeremane e lego Ulrich Strunz o ngwadile lelokelelo la dipuku tše di nago le sehlogo se se rego Forever Young. Go tšona, o ngwadile gore go ithobolla, go iphepa le go phela bophelo bjo bo agago go ka kaonefatša boemo bja tša maphelo le gona mohlomongwe gwa lebiša bophelong bjo botelele. Lega go le bjalo, ga a holofetše babadi ba dipuku tša gagwe gore ba tla phela ka mo go sa felego e le ka kgonthe ka go latela keletšo ya gagwe.

Lega go le bjalo, go na le mohuta o tee feela wa tsebo yeo e holofetšago bophelo bjo bo sa felego. Go bolela therešo, ge nkabe o be o phela ka mo go sa felego, o be o tla monya tsebo e holago ka mo go sa felego. Ge Jesu a be a rapela Modimo o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Anke sa pele re hlaloseng polelwana e rego “bophelô byo bo sa felexo” gomme re hlalose seo tsebo e se akaretšago le kamoo o ka e fihlelelago ka gona.

Go ya ka Beibele, kgaufsinyane Mmopi o tla fetoša lefase gore e be paradeise ya kgonthe, yeo e tlago go ba le maemo a mabotse ao go ona go ka phelwago nako e telele. Go tliša Paradeise yeo go tla akaretša gore a gate mogato o tiilego, go swana le mehleng ya Meetse-fula a Noage. Mateo kgaolo 24, ditemana 37 go ya go 39, e bontšha gore Jesu o ile a bapetša mehla ya rena le ‘mehla ya Noage,’ yeo go yona batho ba bego “ba sa šetše  selô” mabapi le boemo bja bona bjo bo hlobaetšago. Ba ile ba ba ba hlokomologa molaetša wo Noage a bego a o tsebatša. Ke moka go ile gwa tla “’tšatši le Noaxe a tsenexo polokelong ka lôna” gomme Meetse-fula a ile a fediša bohle bao ba ilego ba hlokomologa tsebo ye. (Mongwalo o sekamego ke wa rena.) Noage le bao ba bego ba e-na le yena ka arekeng ba ile ba tšwela pele ba phela.

Jesu o bontšhitše gore “’tšatši” le le swanago le le le a tla mehleng ya rena. Bao ba elago hloko tsebo e tswalanago le tiragalo ye ba ka se phologe feela eupša gape ba tla ba le tebelelo ya go phela ka mo go sa felego. Go oketša moo, bahu bao ba gopolwago ke Modimo ba tla tsošetšwa bophelong ka tebelelo ya gore le ka mohla ba se hwe gape. (Johane 5:28, 29) Ela hloko kamoo Jesu a hlalositšego dikgopolo tše tše pedi. Ge a bolela le Mareta mabapi le tsogo ya bahu, o itše: “E a ntumetšexo ó tlo phela le xe a ka hwa. Xomme e a phelaxo à ntumêla, a ka se kê a bá a hwa xo iša xo sa felexo.” Bohlatse ka moka bo bontšha gore “’tšatši” le le kgaufsi kudu, e lego se se bolelago gore o ka no ‘se hwe go iša ka mo go sa felego.’—Johane 11:25-27.

Ke moka Jesu o ile a botšiša Mareta gore: “A Lentšu lé O a le dumêla?” Mareta o arabile ka gore: “E, Morena!” Ge nkabe Jesu a be a ile a go botšiša potšišo e swanago lehono, na o be o tla araba ka go re’ng? Mohlomongwe o be o tla hwetša go le thata go dumela gore go na le kgonagalo ya gore o se ke wa hwa le ka mohla. Eupša le ge nkabe o ile wa arabela ka tsela yeo, ka ntle le pelaelo o be o ka rata gore o kgone go e dumela. Nagana ka bontši bja dilo tše o bego o tla ithuta tšona ge nkabe o ka ‘se hwe go iša ka mo go sa felego’! Inagane o thabela dilo ka moka tšeo mo nakong ye o dumago eka nkabe o ithuta tšona le go di dira eupša o se na nako ya go di dira. Le gona nagana feela o kopanywa gape le baratiwa ba gago bao ba hwilego! Ke tsebo efe e ka dirago gore dilo tše bjalo di kgonege, le gona o ka e fihlelela bjang?

Go Fihlelela Tsebo e Neago Bophelo—Go a Kgonega

Na re ka se kgone go monya tsebo ka Modimo le Kriste? Re ka kgona. Ke therešo gore tsebo ya mabapi le mediro ya Mmopi ga e fele. Lega go le bjalo, Jesu o be a sa bolele ka thuto ya bolepi bja dinaledi goba mohuta o mongwe wa tša thutamahlale ge a be a tswalanya ‘tsebo’ le “bophelô byo bo sa felexo.” Diema kgaolo 2, ditemana 1 le 5, e bontšha gore “dikeletšô” le “ditaelô” tše di hwetšwago ka Beibeleng di bohlokwa bakeng sa go “fihlêla xo tseba Modimo.” Le gona mabapi le Jesu, Johane 20:30, 31 e bontšha gore dilo tše di ngwadilwego ka Beibeleng di bohlokwa e le gore re tle re “bè le bophelô.”

Ka go rialo, tsebo ya go tseba Jehofa le Jesu Kriste go etša ge e hwetšwa ka Beibeleng e bohlokwa bakeng sa go bontšha kamoo go ka hwetšwago bophelo bjo bo sa felego. Beibele ke puku ya moswana-noši. Ka botho, Mmopi o ile a e budulela ka tsela yeo e lego gore le batho ba sa rutegago bao ba sa kago ba hwetša dibaka tša go ithuta ba ka monya tsebo e lekanego bakeng sa go hwetša bophelo bjo bo sa felego. Ka mo go swanago, motho yo a ithutago dilo ka pela le yo a nago le nako e ntši gotee le dilo tše a ka di dirišago ka mehla o tla dula a kgona go ithuta selo se itšego se sefsa go tšwa Mangwalong a buduletšwego. Taba ya gore o kgona go bala sehlogo se ke bohlatse bja gore o na le bokgoni bja go ithuta, eupša o swanetše go diriša bokgoni bjoo bjang?

Lefaseng ka bophara, diphihlelo di bontšhitše gore tsela e atlegago kudu ya go hwetša tsebo ye ke ka go ba le thuto ya Beibele yeo e swarwago ke motho yo a šetšego a kwešiša taba. Go fo etša ge Noage a ile a leka go fetišetša tsebo ya gagwe go batho bao ba bego ba phela mehleng ya  gagwe, Dihlatse tša Jehofa di ikemišeditše go tla lapeng la gago bakeng sa go ithuta Beibele le wena. Di ka diriša poroutšha ya Ke Eng Seo Modimo a se Nyakago go Rena? goba puku e nago le sehlogo se se swanetšego se se rego Tsebo e Išago Bophelong bjo bo sa Felego. * Gaešita le ge o ka hwetša go le thata go dumela taba ya gore Paradeiseng ya lefaseng, batho bao ba botegago ba ka “se kê [ba] hwa xo iša xo sa felexo,” o ka ithuta go holofela kholofetšo ye o diriša dipoledišano tše tša Beibele. Ka gona ge e ba o ka rata go phela ka mo go sa felego goba o fo nyaka go bona ge e ba go kwagala go dumela gore o ka phela ka mo go sa felego, o swanetše go dira’ng? Amogela sebaka se sa go ithuta Beibele.

Go ithuta mo go bjalo go tla tšea nako e kaaka’ng? Poroutšha ya matlakala a 32 yeo go sa tšwago go bolelwa ka yona, ye e hwetšagalago ka maleme a makgolo, e na le dithuto tše 16 feela tše kopana. Goba ge e ba o beela nako e ka bago iri ka thoko mo bekeng, o tla nyaka feela dikgwedi tše sego kae gore o ithute ditaba tše bohlokwa tša Beibele, o diriša puku ya Tsebo e Išago Bophelong bjo bo sa Felego. Dikgatišo tše di thušitše batho ba bantši go hwetša tsebo e ntši le go hlagolela lerato le le tseneletšego la go rata Modimo. Mmopi o tla putsa bao ba mo ratago e le ka kgonthe, ka go dira gore ba phele ka mo go sa felego.

Tsebo e neago bophelo ruri e a hwetšagala, e bile e hwetšagala gabonolo. Beibele e fetoletšwe, bonyenyane karolo ya yona, ka maleme a fetago 2 000. Dihlatse tša Jehofa dinageng tše 235 di thabela go nea thušo ya motho ka noši le go nea dikgatišo tše di theilwego Beibeleng e le gore o ka oketša tsebo ya gago.

Thuto ya Motho ka Noši

Tswalano ya gago le Modimo ke taba ya motho ka noši magareng ga gago le Mmopi. Ke wena feela o ka e bolokago e phela le go e matlafatša, le gona ke yena feela a ka go neago bophelo bjo bo sa felego. Ka gona, o swanetše go tšwela pele o ithuta Lentšu la gagwe le le ngwadilwego. Ka go ba le motho yo a tlago legaeng la gago ka mehla, o ka hwetša go le bonolo go beela nako ka thoko bakeng sa go ithuta.

Ka ge Beibele le dithušo tša go ithuta Beibele di e-na le ‘tsebo ya go tseba Modimo,’ o tloga o swanetše go di hlokomela gabotse. (Diema 2:5) Ke moka ka go dira bjalo o tla ba le tšona ka nywaga-nywaga. Ge e ba o dula nageng e hlabologago, o ka no ba o sa ka wa diriša dipuku tše dintši tša go ithuta ge o be o sa le sekolong, eupša o ithuta kudu ka go theetša le ka go ba šedi. Ka mohlala, kua Benin go bolelwa maleme a fetago 50. Go tlwaelegile gore batho ba bolele maleme a mane goba a mahlano ka go thelela, gaešita le ge ba se ba ka ba ba le puku ya go ithuta maleme a. Bokgoni bja gago bja go ithuta ka go theetša, go ba šedi le go tsepamiša kgopolo ke tšhegofatšo. Go sa dutše go le bjalo, o tla hwetša gore dipuku di ka go thuša kudu ge o dutše o ithuta.

Gaešita le ge legae la gago le tletše ka dilo, leka go hwetša lefelo le le go swanetšego bakeng sa go ithuta Beibele le dikgatišo tše di theilwego Beibeleng. Di bee moo di hwetšagalago gabonolo le moo di ka se senyegego.

Thuto ya Lapa

Ge e ba o le motswadi, o swanetše go kgahlegela go thuša bana ba gago go hwetša tsebo e swanago le yeo o nago le yona. Dinageng tše di hlabologago, gantši batswadi ba tlwaetše go ruta bana ba bona mediro e lego bohlokwa bophelong. E ka akaretša go apea, go rwalela dikgong, go ga meetse, go lema, go thea dihlapi le go bapatša mmarakeng. Ye e tloga e le thuto e holago bophelong. Lega go le bjalo, batswadi ba bantši mo thutong ye ga ba akaretše tsebo yeo e ka lebišago bophelong bjo bo sa felego.

Go sa šetšwe gore o boemong bofe, mohlomongwe o ikwa o se na nako e lekanego yeo o ka e beelago ka thoko. Mmopi le yena o lemoga se. Mabapi le tsela yeo ka yona re rutago bana ditsela tša gagwe, ela hloko se a se boletšego kgale-kgale ge a re: “O a tiišetšê bana ba xaxo; O bolêle ôna O dutše ngwakong wa xaxo, le xe O le tseleng xe O y’o rôbala le xe O tsoxa.” (Doiteronomio 6:7) Motheong wa dikgopolo tše, ke ka baka la’ng o sa leke go ba le lenaneo la gago la go ithuta, go swana le le le latelago:

1. “O dutše ngwakong wa xaxo”: Katanela go ba le dipoledišano tša ka mehla, mohlomongwe  beke le beke, le bana ba gago ka gae, go fo swana le ge motho yo mongwe a ka ba a ile a dira bjalo le wena. Dihlatse tša Jehofa di nea dikgatišo tše di theilwego Beibeleng tše di swanetšego bakeng sa go ruta bana ba nywaga ka moka.

2. “Xe O le tseleng”: Bolela le bana ba gago ka bolokologi mabapi le Jehofa, go fo swana le ge o ba ruta ka dilo tše di nyakegago bophelong goba o ba nea tlhahlo ka bolokologi.

3. “Xe O y’o rôbala”: Rapela le bana ba gago bošego bjo bongwe le bjo bongwe.

4. “Xe O tsoxa”: Malapa a mantši a bile le mafelelo a putsago ka go ahla-ahla temana e tee ya Beibele mesong e mengwe le e mengwe. Dihlatse tša Jehofa di diriša pukwana ya Go Hlahloba Mangwalo ka Mehla * bakeng sa go dira se.

Dinageng tše di hlabologago, batswadi ba bantši ba katana kudu e le go kgonthišetša gore yo mongwe wa bana ba bona o hwetša thuto e botse ya lefase. Ka tsela yeo, ngwana o tla kgona go hlokomela batswadi ge ba tšofala. Lega go le bjalo, ge e ba o ithuta Beibele gomme o thuša bana ba gago ka moka go dira se se swanago, o tla hwetša tsebo ye e tla thušago wena le lapa la gago ka moka gore le phele ka mo go sa felego.

Na go tla ka gwa tla letšatši le re tlago go ba re tseba dilo ka moka? Aowa. Ge lefase la rena le tšwela pele le dikologa legohleng, re tla tšwela pele re monya tsebo. Ka kgonthe, Mmoledi 3:11 e re: “Tšohle [Modimo] ó di dirile xore di kxahlê ka mohla wa tšôna; le tša neng le neng o di beile dipelong tša bôná. Fêla, tirô ye Yêna Modimo a e diraxo, mathômô le mafêlô a yôna, motho xa a e lemoxe.” Go monya tsebo go nea lethabo le le ka se tsogego le fedile.

[Mengwalo ya ka tlase]

[Ntlhakgolo go letlakala 5]

“Bophelô byo bo sa felexo ké xe ba Xo tseba . . . ”

[Diswantšho go letlakala 7]

Thuša lapa la gago go monya tsebo gona bjale le ka mo go sa felego