Na ke Tsebo e Ntši Kudu go Rena?

Banyalani bao e lego baromiwa ba be ba dutše lebopong la Afrika Bodikela ba lebeletše ngwedi kua godimo. Monna o ile a re: “Batho ba tseba mo gontši gakaaka’ng ka ngwedi, le gona go na le mo gontši gakaaka’ng moo ba ka go tsebago ka wona?”

Mosadi wa gagwe o ile a araba ka gore: “Nagana ge nkabe re be re kgona go bona lefase ka tsela ye re lebeletšego ngwedi wo ka yona—batho lefaseng ba na le tsebo e kaaka’ng, le gona ke e kaaka’ng yeo ba swanetšego go ithuta yona? Le gona nagana feela! Ga se feela gore lefase le dikologa letšatši eupša tshepedišo ya rena ka moka ya dipolanete go dikologa letšatši e a sepela. Se se bolela gore mo gongwe re ka se hlwe re e-ba gona mo re lego gona gape legohleng. Ge e le gabotse, re tseba lefelo le re lego go lona gona bjale, feela ka baka la gore re tlwaelane le makoko a legodimo. Re na le tsebo e ntši kudu ka dilo tše dingwe, eupša ga re tsebe le mo re lego gona ka kgopolo e itšego!”

DIKGOPOLO tšeo di mabapi le ditherešo tše dingwe tša motheo. Go bonagala go e-na le mo gontši mo re ka ithutago gona. Ke therešo gore yo mongwe le yo mongwe wa rena o ithuta dilo tše difsa letšatši le lengwe le le lengwe. Lega go le bjalo, go sa šetšwe gore re ithuta mo gontši gakaakang, ga go bonagale re kgona go tseba mo gontši ka tsela ye re nyakago ka yona.

Ke therešo gore go tlaleletša bokgoning bja rena bja go amogela tsebišo e mpsha, bokgoni bja go boloka tsebo bo oketšegile kudu. Tsebo e bolokilwego ya batho ke e ntši ka baka la thekinolotši. Moo tsebišo e bolokwago gona (hard disk) ka gare ga computer ga bjale go na le sekgoba se segolo moo mantšu a mafsa a dipalo a ilego a swanelwa ke go hlangwa bakeng sa go bontšha bogolo bja sona. CD-ROM e nyenyane e ka kgona go boloka tsebišo e ntši kudu; bogolo bja yona bo hlaloswa e le di-megabyte tše 680 goba go feta. DVD e tlwaelegilego e ka swara tsebišo e nyakilego e feta ya CD-ROM ga šupa, le gona tše dingwe tše dikgolo ka mo go oketšegilego di thoma go hwetšagala.

Mekgwa ya batho ya go boledišana ya mehleng yeno e nyakile e sa kwešišege. Metšhene ya go gatiša ya rotary e kitima ka lebelo le le makatšago ge e gatiša dikuranta, dimakasine le dipuku. Motho yo a dirišago Internet a ka hwetša tsebišo e ntši kudu ka go fo kgotla konotswana ya computer. Ditseleng tše le go tše dingwe tše dintši, go phatlalatšwa ga tsebišo go oketšega ka lebelo kudu go feta kamoo motho a ka lemogago ka gona. Tekanyo ya tsebišo ka dinako tše dingwe e ile ya swantšhwa le lewatle, gomme ke e ntši kudu mo e lego gore ka tsela ya seswantšhetšo re swanetše go rutha go yona eupša re leke gore re se ke ra e-nwa ka moka. Bogolo bjo bo makatšago bja yona bo re gapeletša gore re be ba kgethago.

Lebaka le lengwe la go ba bao ba kgethago ke gore bontši bja  tsebišo ye e lego gona ga se ka mehla e holago. Ka kgonthe, e nngwe ya yona e bile ga e amogelege, ga go nyakege gore e tsebje. Gopola gore ge go bolelwa ka tsebo go šupša go tsebišo—go sa šetšwe gore ke e botse goba ke e mpe, e a hola goba ga e hole. Se sebe le go feta, dilo tše dingwe tše di lebelelwago ke ba bantši e le tša therešo di fo ba di sa nepagala. Ke ka makga a mantši gakaakang gaešita le dipolelo tša batho ba ba hlompšhago bao ba lego matleng a taolo ka morago di ilego tša ipontšha e le tše di fošagetšego, goba tša maaka! Ka mohlala, nagana ka mokgomana wa motseng wa Efeso ya bogologolo, yoo a bego a tloga a lebelelwa ke batho ba moo e le mohlankedi yo a nago le tsebo. O ile a bolela gore: “Ké mang motho e a sa tsebexo xe motse wa Efeso è le Mo-lôta-ngwakô-wa-Diana wôna modimo-xadi o moxolo, le wa seswanthšô sa wôna sa xo tšwa lexodimong xo Jupitere?” (Ditiro 19:35, 36) Gaešita le ge se se be se bonagala e le tsebo e tlwaelegilego—e bile e le e sa ganetšegego, go ya kamoo ba bantši ba bego ba tla bolela ka gona—e be e se therešo gore seswantšho se wele go tšwa legodimong. Ka lebaka le le kwagalago, Beibele e Kgethwa e lemoša Bakriste go itiša malebana le dilo tšeo e lego “diphetolanô tša ba aketšaxo ba re ké yôna tsebô.”—1 Timotheo 6:20.

Lebaka le legolo la go ba bao ba kgethago mabapi le tsebo ke gore bophelo bja rena bja gona bjale ke bjo bokopana kudu. Go sa šetšwe gore o yo mogolo gakaakang, ka ntle le pelaelo go na le mehuta e mentši ya tsebo yeo o ka nyakago go e nyakišiša, eupša o lemoga gore o fo ba o ka se phele nako e telele ka mo go lekanego gore o dire bjalo.

Na bothata bjo bja motheo bo tla ka bja fetoga? Na go ka ba le mohuta wa tsebo o hwetšagalago wo o ka telefatšago bophelo kudu goba gaešita le ka mo go sa felego? Na tsebo e bjalo e ka ba e šetše e le gona? Ge e ba go le bjalo, na e ka dirwa gore e hwetšwe ke batho bohle? Na go tla ka gwa tla letšatši leo tsebo ka moka e tlago go akaretša seo re se letetšego—therešo? Banyalani bao e lego baromiwa bao go boletšwego ka bona ka mo godimo ba hweditše dikarabo tše di kgotsofatšago dipotšišong tšeo, gomme le wena o ka di hwetša. Hle bala sehlogo se se latelago, seo se tlago go go nea tebelelo ya go monya tsebo ka mo go sa felego.