Dipotšišo tše Tšwago go Babadi

Ke ka baka la’ng Paulo a ile a ngwala mabapi le mosadi wa Mokriste gore: “O tlo bolokega ka go belega bana”?—1 Timotheo 2:15, PK.

Taba yeo e dikologilego temana ye e utolla’ng mabapi le seo Paulo a bego a se bolela? A le ka tlase ga pudulelo, o be a nea keletšo mabapi le karolo ya mosadi wa Mokriste ka phuthegong. O ngwadile gore: “Basadi ke rata xore ba aparê [“ikgabiše,” NW] xabotse, ba ithlôphê la xo šia thsôlô le boikxanthšô, bà se na mafôrô le dipheta le mašela a thêkô e thata. A ba aparê ka mo xo loketšexo basadi ba ba rexo re ba borapedi, ba bônalê ka medirô e mebotse.” (1 Timotheo 2:9, 10) Paulo o be a kgothaletša dikgaetšedi tša gagwe tša Bakriste gore di be le boipoetšo, di be le teka-tekano ge di kgetha boikgabišo le gore di ‘ikgabiše’ ka mediro e mebotse.

Se se latelago, Paulo o ile a hlalosa tokišetšo ya bohlogo ka phuthegong, a re: “Mosadi xa ke mo dumelele xo ruta le xo laola monna; a a dulê à ikhomoletše.” (1 Timotheo 2:12; 1 Ba-Korinthe 11:3) O hlalosa motheo wa tokišetšo ye ka go bontšha gore le ge Adama a sa ka a forwa ke Sathane, “ke mosadi [Efa] e a arošitšwego, gomme ya ba motshedi wa molao.” Mosadi wa Mokriste o be a ka šireletšwa bjang malebana le sebe sa Efa? Paulo o a araba: “Gomme o tlo bolokega ka go belega bana, ge a fela a dula tumelong le leratong le kgethegong ka tlhaologanyo.” (1 Timotheo 2:14, 15, PK) Paulo o be a bolela’ng ka mantšu a?

Go bonagala bafetoledi ba bangwe ba šišinya gore phologo ya mosadi e ithekgile ka go ba ga gagwe le bana. Ka mohlala, Beibele ya Sepedi e re: “O tlo phološwa è le wa xo bêlêxa bana.” Lega go le bjalo, go hlalosa mantšu a Paulo ka tsela ye e tla ba mo go fošagetšego. Mangwalo a mantši a bontšha gore e le gore motho a phološwe, o swanetše go tseba Jehofa, a dumele go Jesu gomme a be le tumelo le go bontšha tumelo yeo ka mediro. (Johane 17:3; Ditiro 16:30, 31; Ba-Roma 10:10; Jakobo 2:26) Go oketša moo, Paulo o be a sa bolele gore basadi bao ba dumelago ba na le kgonthišetšo ya gore ba tla belega bana ka tsela e šireletšegilego. Basadi ba ile ba belega ka mo go atlegilego go sa šetšwe gore e be e le badumedi goba e se bona. Ka manyami, ba bangwe ba ile ba hwa nakong ya ge ba belega, go sa šetšwe gore e be e le badumedi goba e se bona.—Genesi 35:16-18.

Keletšo e nngwe gape ya Paulo yeo e lego mabapi le basadi e hwetšwago ge o tšwela pele lengwalong lona le, e re thuša go kwešiša seo a bego a se bolela. O lemoša ka bahlologadi ba bangwe ba e sa lego bafsa bao ba bego “ba tlwaêla xo thêta le malapa bà se na modirô; [ya se be] xo tšwafa fêla, ya ba dithsêlê le xo bolêla tše di sa lokaxo.” Keletšo ya Paulo e bile efe? O tšwela pele ka gore: “Ké xôna ke rataxo xore ba bafsa ba tšewê, ba bêlêxê bana, ba dišê malapa a bôná, xore lenaba ba se le neê sebaka sa xo roxa.”—1 Timotheo 5:13, 14.

Paulo o gatelela karolo e holago ya mosadi tokišetšong ya lapa. A swaregile ka mediro e bjalo ka go ‘belega bana le go diša lapa,’ mosadi yo a bego a tšwela pele “tumelong le leratong le kgethegong ka tlhaologanyo,” o be a ka se ke a gokeletšwa boitshwarong bjo bo sa agego. Boemo bja gagwe bja moya bo be bo tla šireletšwa goba ‘bja bolokega.’ (1 Timotheo 2:15, PK) Go latela tsela e bjalo go be go tla thuša basadi ba bantši ba bafsa go phema mereo ya Sathane.

Mantšu a Paulo go Timotheo a re gopotša ka moka ga rena, banna le basadi, gore re swarege ka mediro e holago. Lentšu la Modimo le eletša Bakriste ka moka gore: “Ké xôna phakxamêlang xo swara tsela ka xo itôta; Le se etšê mašilo, Le etšê bahlale.”—Ba-Efeso 5:15.