Dipotšišo tše Tšwago go Babadi

Ke ka baka la’ng ge barutiwa ba be ba e-kwa gore Petro yo a golegilwego o eme mojako ba ile ba re: “Ké morongwa wa xaxwe”?—Ditiro 12:15.

Barutiwa ba ka be ba ile ba nagana ka phošo gore motseta yo e lego morongwa yo a emelago Petro o be a eme kgorong. Ela hloko taba yeo e dikologilego temana ye.

Petro o be a golegilwe ke Heroda, yoo a bego a bolaile Jakobo. Ka gona, barutiwa ba be ba e-na le lebaka le le kwagalago la go dumela gore Petro le yena o be a tla bolawa. A tlemilwe ka diketwane, Petro yo a golegilwego o be a hlapeditšwe ke dihlopha tše di šiedišanago tše nne tša bahlabani ba bane. Ke moka, bošegong bjo bongwe morongwa o ile a mo lokolla ka mohlolo gomme a mo ntšhetša ka ntle ga kgolego. Ge mafelelong Petro a lemoga seo se bego se direga, o ile a re: “Byalo ké xôna ke tsebaxo xore Morêna ó romile Morongwa wa xaxwe, a nthlakodiša matsoxong a Herode.”—Ditiro 12:1-11.

Gatee-tee Petro o ile a ya legaeng la mmago Johane Mareka, moo barutiwa ba mmalwa ba bego ba bokane gona. Ge a kokota mojakong wa kgoro, ngwanenyana yo e lego mohlanka yo a bitšwago Rode o ile a ya mojako go yo kwa gore ke mang. Ge a lemoga lentšu la Petro, o ile a kitima a yo botša ba bangwe ntle le go mmulela! Mathomong, barutiwa ba be ba sa dumele gore ke Petro yo a emego kgorong. Go e-na le moo, ka phošo ba ile ba nagana gore: “Ké morongwa wa xaxwe.”—Ditiro 12:12-15.

Na barutiwa ba be ba dumela gore Petro o be a šetše a bolailwe le gore moya wa gagwe o aroganego le mmele o be o eme kgorong? Go be go ka se be bjalo le gatee, ka gobane balatedi ba Jesu ba be ba tseba therešo ya Mangwalo mabapi le boemo bja bahu—gore “ga ba tsebe selo.” (Mmoledi 9:5, 10, PK) Ka gona, ke’ng seo barutiwa ba ka bago ba be ba se bolela ge ba be ba re: “Ké morongwa wa xaxwe”?

Barutiwa ba Jesu ba be ba tseba gore go theoša le histori ka moka, barongwa ba ile ba nea batho ba Modimo thušo ya motho ka noši. Ka mohlala, Jakobo o ile a bolela ka “Morongwa-Monamoledi wa-ka mabothateng ka moka.” (Genesi 48:16) Le gona, mabapi le ngwana yo monyenyane yo a bego a le magareng ga bona, Jesu o ile a botša balatedi ba gagwe gore: “Le bônê xore Le se nyatšê e mongwê wa ba banyenyane bá; ka xobane Nna ke a Le botša, Barongwa ba bôná kwa lexodimong ba hlwa ba bôna sefahloxô sa Tate wa maxodimong.”—Mateo 18:10.

Ka mo go kgahlišago, Young’s Literal Translation of the Holy Bible e fetolela lentšu agʹgelos (“morongwa”) e le “motseta.” Go bonagala eka ba-Juda ba bangwe ba be ba e-na le tumelo ya gore mohlanka yo mongwe le yo mongwe wa Modimo o na le morongwa wa gagwe ka noši—ge e le gabotse, “morongwa wa mohlokomedi.” Go ba gona, pono ye ga e rutwe ka go lebanya ka Lentšung la Modimo. Lega go le bjalo, go na le kgonagalo ya gore ge barutiwa ba be ba re, “Ké morongwa wa xaxwe,” ba be ba nagana gore motseta yo e lego morongwa yo a emelago Petro o be a eme kgorong.