Ditaba tše Dibotse Bakeng sa Batho ba Ditšhaba ka Moka
Ditaba tše Dibotse Bakeng sa Batho ba Ditšhaba ka Moka
“La tlo ba dihlatse tša-ka . . . xo fihla maxomong a lefase.”—DITIRO 1:8.
1. Ka ge re le barutiši ba Beibele, ke’ng seo re se elago hloko, gomme ka baka la’ng?
BARUTIŠI bao ba nago le bokgoni ga ba ele hloko feela seo ba se botšago barutwana ba bona eupša gape ba ela hloko kamoo ba se bolelago ka gona. Ka ge re le barutiši ba therešo ya Beibele, re dira se se swanago. Re ela hloko bobedi molaetša wo re o bolelago le mekgwa yeo re e dirišago. Molaetša wa rena e lego ditaba tše dibotse tša Mmušo wa Modimo, ga o fetoge eupša ka dinako tše dingwe re fetola mekgwa yeo re e dirišago e le gore e dumelelane le maemo. Ka baka la’ng? E le gore re kgone go fihlelela batho ba bantši ka mo go kgonegago.
2. Ge re dumelelanya mekgwa ya rena ya go dira boboledi le maemo, re ekiša mang?
2 Ka go dumelelanya mekgwa ya rena ya go dira boboledi le maemo, re ekiša bahlanka ba Modimo ba bogologolo. Ka mohlala, nagana ka moapostola Paulo. O itše: “Ba-Juda ba nkhweditše kè le wa xabô, . . . ba e sexo ba Molaô ba nkhwetša kè le wa xabô, . . . bafokodi ba nkhweditše kè le wa xabô, è le xore ke ruê bafokodi. Bohle ba nkhweditše kè le wa bôná, è le xore mo xo fêla ke bê le ba ke ba ruaxo.” (1 Ba-Korinthe 9:19-23) Mokgwa wa Paulo wa go itumelelanya le maemo e be e le o atlegago. Le rena re tla atlega ge e ba ka botho re dira gore dithero tša rena di swanele batho bao re bolelago le bona.
Go Fihla ‘Magomong a Lefase’
3. (a) Ke tlhohlo efe yeo re lebeletšanego le yona modirong wa rena wa boboledi? (b) Mantšu a Jesaya 45:22 a phethagatšwa bjang lehono?
3 Tlhohlo e kgolo yeo bao ba bolelago ditaba tše dibotse ba lebeletšanego le yona ke bogolo bja tšhemo—‘lefase ka moka leo go agilwego go lona.’ (Mateo 24:14, bapiša le NW.) Ngwaga-kgolong o fetilego, bahlanka ba bantši ba Jehofa ba ile ba šoma ka thata gore ba fihlelele dinaga tše difsa bakeng sa go phatlalatša ditaba tše dibotse. Mafelelo e bile afe? Go bile le koketšego e makatšago lefaseng ka bophara. Mathomong a ngwaga-kgolo wa bo-20, modiro wa boboledi o be o dirwa feela dinageng tše sego kae, eupša mo nakong ye Dihlatse tša Jehofa di šoma ka mafolofolo dinageng tše 235! Ke therešo gore ditaba tše dibotse tša Mmušo di tsebatšwa gaešita le ‘magomong a lefase.’—Jesaya 45:22.
4, 5. (a) Ke bomang bao ba kgathilego tema ya bohlokwa tabeng ya go phatlalatša ditaba tše dibotse? (b) Diofisi tše dingwe tša makala di ile tša re’ng mabapi le batho ba ba tšwago dinageng tše dingwe bao ba hlankelago tikologong ya lekala?
4 Ke’ng seo se dirago gore go be le tšwelopele e bjalo? Ke dilo tše dintši. Baromiwa bao ba tlwaeditšwego Sekolong sa Beibele sa Watchtower sa Gilead, gomme morago bjale le dialoga tša ka godimo ga 20 000 tša Sekolong sa Tlwaetšo ya Bodiredi, ba bapetše karolo e kgolo. Go bile bjalo le ka Dihlatse tše dintši tšeo di dirišitšego ditšhelete tša tšona go hudugela dinageng tšeo go nyakegago bagoeledi ba Mmušo ba oketšegilego. Bakriste ba bjalo bao ba bontšhago boikgafo—banna le basadi, ba bafsa le ba ba tšofetšego, ba ba sego lenyalong le ba ba lego lenyalong—ba kgatha tema ya bohlokwa tabeng ya go bolela molaetša wa Mmušo lefaseng ka moka. (Psalme 110:3; Ba-Roma 10:18) Ba ratwa kudu. Ela hloko seo diofisi tše dingwe tša makala di se ngwadilego mabapi le bao ba tšwago dinageng tše dingwe go tla go hlankela moo go nyakegago thušo e kgolo tikologong ya lekala.
5 “Dihlatse tše tšeo di rategago di etelela pele modirong wa go bolela ditikologong tšeo di lego lekatana, di thuša go hloma diphuthego tše difsa e bile di tlaleletša kgolong ya moya ya bana babo rena le dikgaetšedi ba ditikologong tšeo.” (Ecuador) “Ge e ba batho ba makgolo ba tšwago dinageng dišele bao ba hlankelago mo ba be ba ka tloga, go tsepama ga diphuthego go be go tla fokola. Ke tšhegofatšo go ba le bona.” (Dominican Republic) “Diphuthegong tša rena tše dintši, go na le palo e kgolo ya dikgaetšedi, gomme ka dinako tše dingwe e fihla go 70 lekgolong. (Psalme 68:11) Ba bantši ba bona e sa le ba bafsa therešong, eupša dikgaetšedi tše di sego lenyalong tše e lego babulamadibogo tšeo di tlilego mo go tšwa dinageng tše dingwe di nea thušo e bohlokwa ka go tlwaetša batho ba bjalo ba sa tšwago go kopanela. Dikgaetšedi tše di tšwago dinageng tše dingwe ke dimpho tša kgonthe go rena!” (Naga ya ka Bohlabela bja Yuropa) Na o kile wa naganišiša ka taba ya go hlankela nageng e nngwe? *—Ditiro 16:9, 10.
“Banna ba Lesome ba Mebolêlô ya Mehuta-huta”
6. Sakaria 8:23 e šupa bjang tlhohlong ya maleme yeo re lebeletšanago le yona modirong wa rena wa boboledi?
6 Tlhohlo e nngwe e kgolo ke go fapa-fapana mo gogolo ga dipolelo tšeo di bolelwago mo lefaseng. Lentšu la Modimo le boletše e sa le pele gore: “Mehleng yeo banna ba lesome ba mebolêlô ya mehuta-huta ba tlo swara monna wa Mo-Juda ka kobô, ba re: A nkê re yê le lena, ka xobane re kwile xore Modimo ó na le lena.” (Sakaria 8:23) Phethagatšong ya mehleng yeno ya boporofeta bjo, banna ba lesome ba emela lešaba le legolo leo go porofetilwego ka lona go Kutollo 7:9. Lega go le bjalo, ela hloko gore go ya ka boporofeta bja Sakaria, “banna ba lesome” ba be ba ka se tšwe feela ditšhabeng ka moka eupša gape le go batho “ba mebolêlô ya mehuta-huta.” (Mongwalo o sekamego ke wa rena.) Na re bone go phethagatšwa ga ntlha ye ya bohlokwa ya boporofeta? Ee, go tloga go le bjalo.
7. Ke dipalo-palo dife tšeo di bontšhago gore batho “ba mebolêlô ya mehuta-huta” ba fihlelelwa ka ditaba tše dibotse?
7 Ela hloko dipalo-palo tše dingwe. Nywageng e 50 e fetilego, dipuku tša rena di be di gatišwa ka maleme a 90. Lehono, palo yeo e goletše go maleme a ka godimo ga a 400. “Molaki e a bôtêxaxo yo bohlale” o dirile sohle seo a ka se kgonago go nea dipuku gaešita le go ba bangwe bao leleme la bona le bolelwago ke batho ba sego kae feela. (Mateo 24:45) Ka mohlala, dipuku tše di theilwego Beibeleng mo nakong ye di hwetšagala ka se-Greenland (seo se bolelwago ke batho ba 47 000), se-Palau (seo se bolelwago ke batho ba 15 000) le se-Yap (seo se bolelwago ke batho ba ka tlase ga 7 000).
“Mojakô . . . o Moxolo” wo o Lebišago Dibakeng tše Difsa
8, 9. Ke tšwelopele efe yeo e re buletšego “mojakô . . . o moxolo,” gomme Dihlatse tše dikete di arabetše bjang?
8 Lega go le bjalo, mehleng yeno go ka no se nyakege gore re ye dinageng tše dingwe go yo bolela ditaba tše dibotse go batho ba maleme ka moka. Nywageng e sa tšwago go feta, go fihla ga bafaladi le batšwa-ntle ba dimilione dinageng tše di tšwetšego pele ka tša boiphedišo go ile gwa dira gore go be le ditšhaba tše dintši tša bafaladi tšeo di bolelago maleme a fapa-fapanego. Ka mohlala kua Paris, Fora, go bolelwa maleme a ka bago 100. Kua Toronto, Canada, palo yeo ke 125; gomme kua London, Engelane, go bolelwa maleme a šele a fetago 300! Go ba gona ga batho ba bao ba tšwago dinageng tše dingwe ditikologong tša diphuthego tše dintši go bula “mojakô . . . o moxolo” wo o lebišago dibakeng tše difsa tša go boledišana le batho ba ditšhaba ka moka ka ditaba tše dibotse.—1 Ba-Korinthe 16:9.
9 Dihlatse tše dikete di arabela tlhohlong ye ka go ithuta maleme a mangwe. Go ba bantši ba bona go thata; eupša maiteko a bona a magolo a putswa ka lethabo la go thuša bafaladi le batšwa-ntle go ithuta therešo yeo e hwetšwago ka Lentšung la Modimo. Ngwageng wa morago bjale, mo e ka bago 40 lekgolong ya batho ka moka bao ba kolobeditšwego dikopanong tša selete tšeo di bego di swaretšwe go e nngwe ya dinaga tša ka Bodikela bja Yuropa e be e le ba tšwago dinageng tše dingwe.
10. O dirišitše bjang pukwana ya Good News for People of All Nations? (Bona lepokisi le le rego, “Dibopego tša Pukwana ya Good News for People of All Nations,” go letlakala 26.)
10 Ke therešo gore ba bantši ba rena ga ba boemong bja go ithuta leleme le šele. Lega go le bjalo, re ka tšea karolo tabeng ya go thuša bafaladi gore ba diriše gabotse pukwana yeo e sa tšwago go lokollwa ya Good News for People of All Nations, * yeo e nago le molaetša o kgahlišago wa Beibele ka maleme a mantši. (Johane 4:37) Na o diriša pukwana ye bodireding?
Ge Batho ba sa Arabele
11. Ke tlhohlo efe e nngwe yeo go lebeletšanwago le yona ditikologong tše dingwe?
11 Ge tutuetšo ya Sathane e dutše e gola lefaseng, go ba le tlhohlo e nngwe yeo go lebeletšanwago le yona gantši kudu—go arabela batho ba sego kae ditikologong tše dingwe. Ge e le gabotse, boemo bjo ga bo re makatše ka ge Jesu a boletše e sa le pele gore boemo bjo bo bjalo bo be bo tla ba gona. Ge a bolela mabapi le mehla ya rena o itše: “Xo tlo nôtlêxa leratô la ba bantši.” (Mateo 24:12) Ee, go dumela go Modimo le go hlompha Beibele ga go sa le gona bathong ba bantši. (2 Petro 3:3, 4) Ka baka leo, dikarolong tše dingwe tša lefase, ke batho ba sego kae feela bao e bago barutiwa ba bafsa ba Kriste. Lega go le bjalo, seo ga se bolele gore maiteko a bana babo rena le dikgaetšedi ba rategago ba Bakriste bao ba dirago boboledi ka potego ditikologong tše bjalo tšeo go tšona batho ba sa arabelego ke a lefeela. (Ba-Hebere 6:10) Ke ka baka la’ng go se bjalo? Nagana ka se se latelago.
12. Re dira modiro wa rena wa boboledi ka merero efe e mebedi?
12 Ebangedi ya Mateo e gatelela merero e mebedi ya bohlokwa ya go dira mediro ya rena ya boboledi. O mongwe ke gore re “dirê dithšaba ka moka barutiwa.” (Mateo 28:19) O mongwe ke gore molaetša wa Mmušo o šoma e le “bohlatse.” (Mateo 24:14) Merero ye ka bobedi ke ya bohlokwa, eupša wa bobedi ke wa bohlokwa ka mo go kgethegilego. Ka baka la’ng?
13, 14. (a) Ke sebopego sefe sa bohlokwa sa pontšho ya go ba gona ga Kriste? (b) Re swanetše go gopola’ng, kudu-kudu ge re dira boboledi ditikologong tšeo go tšona go arabelago batho ba sego kae?
13 Mongwadi wa Beibele e lego Mateo o begile gore baapostola ba ile ba botšiša Jesu gore: “Pontšho ya go ba gona ga gago le ya bofelo bja tshepedišo ya dilo e tla ba eng?” (Mateo 24:3, NW) Ge Jesu a araba o ile a bolela gore sebopego se sengwe se segolo sa pontšho yeo e be e tla ba go dirwa ga modiro wa boboledi lefaseng ka bophara. Na o be a bolela ka modiro wa go dira barutiwa? Aowa. O itše: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka.” (Mateo 24:14, NW) Ka gona, Jesu o bontšhitše gore modiro wa go bolela ka Mmušo ka bowona e be e tla ba sebopego sa bohlokwa sa pontšho ye.
14 Ka gona, ge re dutše re bolela ditaba tše dibotse tša Mmušo, re gopola gore gaešita le ge re sa atlege ka mehla tabeng ya go dira barutiwa, re atlega tabeng ya go nea “bohlatse.” Go sa šetšwe gore batho ba arabela bjang, ba tseba seo re se dirago, gomme ka go rialo re tšea karolo go phethagatšeng boporofeta bja Jesu. (Jesaya 52:7; Kutollo 14:6, 7) Jordy, e lego Hlatse ya mofsa ya kua Bodikela bja Yuropa, o ngwadile gore: “Go tseba gore ke dirišwa ke Jehofa bakeng sa go kgatha tema e kgolo go phethagatšeng Mateo 24:14 go tloga go ntira gore ke thabe e le ruri.” (Mateo 24:14; 2 Ba-Korinthe 2:15-17) Ga go pelaelo gore le wena o ikwa ka tsela e swanago.
Ge Molaetša wa Rena o Ganetšwa
15. (a) Jesu o lemošitše balatedi ba gagwe e sa le pele mabapi le’ng? (b) Ke’ng se se re thušago go dira boboledi go sa šetšwe kganetšo?
15 Maemo a thata a dira gore go be le tlhohlo e nngwe modirong wa go bolela ditaba tše dibotse tša Mmušo. Jesu o lemošitše balatedi ba gagwe e sa le pele gore: “Le tlo ba ba xo hloiwa ke dithšaba tšohle ka ’baka la Leina la-ka.” (Mateo 24:9) Go etša Bakriste ba pele, balatedi ba Jesu lehono ba hloilwe, ba a ganetšwa e bile ba a tlaišwa. (Ditiro 5:17, 18, 40; 2 Timotheo 3:12; Kutollo 12:12, 17) Dinageng tše dingwe, mo nakong ye ba thibelwa ke mmušo. Lega go le bjalo, ka go kwa Modimo, Bakriste ba therešo bao ba lego dinageng tše di bjalo ba tšwela pele ka modiro wa go bolela ditaba tše dibotse tša Mmušo. (Amosi 3:8; Ditiro 5:29; 1 Petro 2:21) Ke’ng seo se dirago gore bona gotee le Dihlatse tše dingwe lefaseng ka bophara, ba kgone go dira bjalo? Jehofa o ba matlafatša ka moya wa gagwe o mokgethwa.—Sakaria 4:6; Ba-Efeso 3:16; 2 Timotheo 4:17.
16. Jesu o ile a bontšha bjang tswalano magareng ga modiro wa boboledi le moya wa Modimo?
16 Jesu o gateletše tswalano ya kgaufsi magareng ga moya wa Modimo le modiro wa boboledi ge a be a botša balatedi ba gagwe gore: “Lena Le tlo fiwa matla xe Môya-mokxêthwa ò theoxêla xo lena, la tlo ba dihlatse tša-ka . . . xo fihla maxomong a lefase.” (Ditiro 1:8, mongwalo o sekamego ke wa rena; Kutollo 22:17) Thulaganyo yeo ditiragalo di diregago ka yona lengwalong le ke ya bohlokwa. Sa pele, barutiwa ba ile ba amogela moya o mokgethwa, gomme ka morago ba thoma go dira modiro wa go nea bohlatse lefaseng ka moka. Ke feela ka thekgo ya moya wa Modimo moo ba bego ba tla ba le matla a go kgotlelela go nea “bohlatse mo xo dithšaba tšohle.” (Mateo 24:13, 14; Jesaya 61:1, 2) Ka gona, ka mo go swanetšego Jesu o ile a bolela ka moya o mokgethwa e le “mothuši.” (Johane 15:26, NW) O boletše gore moya wa Modimo o be o tla ruta le go hlahla barutiwa ba gagwe.—Johane 14:16, 26; 16:13.
17. Ge re lebeletšane le kganetšo e šoro, moya o mokgethwa o re thuša bjang?
17 Ke ka ditsela dife moya wa Modimo o re thušago lehono ge re lebeletšane le kganetšo e šoro modirong wa go bolela ditaba tše dibotse? Moya wa Modimo o a re matlafatša, gomme o ganetša bao ba re tlaišago. Ka mohlala, nagana ka tiragalo yeo e diregilego bophelong bja Kgoši Saulo.
O Ganetšwa ke Moya wa Modimo
18. (a) Ke ka tsela efe Saulo a ilego a fetoga motho yo mobe ka go fetišiša? (b) Ke mekgwa efe yeo Saulo a ilego a e diriša go tlaiša Dafida?
18 Saulo o thomile gabotse bjalo ka kgoši ya pele ya Isiraele, eupša ka morago o ile a se sa kwa Jehofa. (1 Samuele 10:1, 24; 11:14, 15; 15:17-23) Ka baka leo, moya wa Modimo o ile wa se sa thekga kgoši ye. Saulo o ile a galefela Dafida o šoro, yoo a bego a tloditšwe gore e be kgoši e latelago yeo ga bjale e bego e thekgwa ke moya wa Modimo. (1 Samuele 16:1, 13, 14) Dafida o be a bonagala a ka hlaselega gabonolo. Godimo ga moo, o be a swere harepa feela mola Saulo a be a kgatikanya lerumo. Ka gona ka letšatši le lengwe ge Dafida a be a letša harepa, ‘Saulo o ile a betša lerumo a re ke pataganya Dafida le leboto; Dafida a efoga gabedi.’ (1 Samuele 18:10, 11) Ka morago, Saulo o ile a theetša morwa wa gagwe Jonathane, e lego mogwera wa Dafida, gomme a ena ka gore: “Ka bophelô bya Morêna, Dafida a ka se kê a bolawa.” Eupša Saulo gape “a re ke mo pataxanya le lebôtô ka lerumô.” Lega go le bjalo, Dafida “a šašarapana pele xa Saulo, lerumô la hlaba lebôtô.” Dafida o ile a tšhaba, eupša Saulo a mo hlomara. Ka nako yeo e kotsi, moya wa Modimo o ile wa thoma go ganetša Saulo. Ka tsela efe?—1 Samuele 19:6, 10.
19. Moya wa Modimo o ile wa šireletša Dafida bjang?
19 Dafida o ile a tšhabela go moporofeta Samuele, eupša Saulo o ile a roma banna ba gagwe gore ba yo swara Dafida. Lega go le bjalo, ge ba be ba fihla lefelong leo Dafida a bego a iphihlile go lona “môya wa Morêna wa tlêla bahlanka ba Saulo, ’me le bôná ba porofeta.” Ba be ba tletše moya wa Modimo moo ba ilego ba lebala morero wa thomo ya bona ka mo go feletšego. Saulo o ile a roma banna ka makga a mangwe a mabedi gore ba boe le Dafida, gomme selo se se swanago se ile sa direga gape. Mafelelong, Kgoši Saulo ka boyena o ile a ya go Dafida, eupša Saulo le yena o ile a palelwa ke go emeletšana le moya wa Modimo. Ge e le gabotse, moya o mokgethwa o ile wa mo thibela go dira seo a bego a se tletše, “a hlwa ’tšatši leo a bá a lala a phafoxile bošexo byoo ka moka”—e lego seo se ilego sa nea Dafida nako e lekanego ya gore a tšhabe.—1 Samuele 19:20-24.
20. Ke thuto efe yeo re ka ithutago yona pegong ya go tlaišwa ga Dafida ke Saulo?
20 Pego ye ya Saulo le Dafida e swere thuto e matlafatšago: Batlaiši ba bahlanka ba Modimo ba ka se atlege ge ba ganetšwa ke moya wa Modimo. (Psalme 46:11; 125:2) Jehofa o be a rerile gore Dafida e be kgoši ya Isiraele. Ga go motho yo a bego a ka fetola seo. Mehleng ya rena, Jehofa o rerile gore “ditaba tše tše dibotse tša mmušo di tla bolelwa.” (NW) Ga go motho yo a ka thibelago seo gore se se ke sa direga.—Ditiro 5:40, 42.
21. (a) Baganetši ba bangwe lehono ba dira dilo bjang? (b) Re ka kgodišega ka’ng?
21 Baetapele ba bangwe ba bodumedi le ba dipolitiki ba diriša maaka gaešita le bošoro go leka go re šitiša. Lega go le bjalo, go etša ge Jehofa a ile a šireletša Dafida moyeng, O tla šireletša batho ba Gagwe lehono. (Maleaki 3:6) Ka gona, go etša Dafida, re bolela ka kgodišego gore: “Ke bôta Modimo, xa ke boife; motho ó ntira’ng?” (Psalme 56:11; 121:1-8; Ba-Roma 8:31) Ka thušo ya Jehofa, eka re ka tšwela pele re lebeletšana le ditlhohlo ka moka ka katlego ge re dutše re phetha thomo yeo re e neilwego ke Modimo ya go bolela ditaba tše dibotse tša Mmušo go batho ba ditšhaba ka moka.
[Mengwalo ya ka tlase]
^ ser. 5 Bona lepokisi le le rego “Maikwelo a Tseneletšego a Kgotsofalo,” go letlakala 22.
^ ser. 10 E gatišitšwe ke Dihlatse tša Jehofa.
Na o a Gopola?
• Ke ka baka la’ng re fetola mekgwa yeo re e dirišago boboleding e le gore e dumelelane le maemo?
• “Mojakô . . . o moxolo” wo o bulegilego o lebiša dibakeng dife tše difsa?
• Ke’ng seo se fihlelelwago ka modiro wa rena wa boboledi, gaešita le ditikologong tšeo go arabelago batho ba sego kae?
• Ke ka baka la’ng go se na moganetši yo a ka thibelago go bolelwa ga ditaba tše dibotse tša Mmušo?
[Dipotšišo tša Thuto]
[Lepokisi go letlakala 22]
Maikwelo a Tseneletšego a Kgotsofalo
“Ba thabile e bile ba thabela go hlankela Jehofa ba le gotee.” Seo se hlalosa lapa leo le ilego la huduga Sepania la ya Bolivia. Morwa wa ka lapeng leo o be a ile moo go yo thuša sehlopha seo se lego lekatana. Batswadi ba gagwe ba ile ba thabišwa kudu ke go mmona a thabile moo go se go ye kae lapa ka moka—go akaretša le bašemane ba bane ba nywaga e 14 go ya go e 25—le ilego la yo hlankela moo. Bašemane ba bararo mo nakong ye ba bula madibogo, gomme yo a ba buletšego tsela o sa tšwa go ya Sekolong sa Tlwaetšo ya Bodiredi.
Angelica, yo a nago le nywaga e 30, yo a tšwago Canada o re: “Ditlhohlo ke tše dintši, eupša ke kgotsofatšwa ke go thuša batho bodireding. Le gona ke kgongwa ke ditebogo tše dintši tše di tšwago go Dihlatse tša tikologong ye tšeo gantši di ntebogago ka baka la go tla ga-ka ke tlile go di thuša.
Bana ba motho ba babedi bao ba lego nywageng ya bona ya mafelelo ya bo-20 ba tšwago United States, bao ba hlankelago kua Dominican Republic ba re: “Go be go e-na le ditšo tše dintši tšeo re bego re swanetše go tlwaelana le tšona. Lega go le bjalo, re ile ra kgotlelela kabelong ya rena, gomme barutwana ba rena ba šupago ba Beibele mo nakong ye ba ba gona dibokeng.” Bana ba ba motho ba ile ba thuša kudu tabeng ya go rulaganya sehlopha sa bagoeledi ba Mmušo toropong yeo go yona go se nago phuthego.
Laura, e lego kgaetšedi yo a lego nywageng ya gagwe ya mafelelo ya bo-20, o be a dutše a hlankela dinageng tše dingwe ka nywaga ya ka godimo ga e mene. O re: “Ge e le gabotse, ke boloka bophelo bja-ka bo le bonolo. Se se thuša bagoeledi gore ba bone gore o ka phela bophelo bja maemo a tlasana ka baka la boikgethelo le go ba yo a hlaphogetšwego monaganong, e sego ka baka la bodiidi. Go kgona go thuša ba bangwe, kudu-kudu bafsa, go nna e ile ya ba mothopo wa lethabo leo le bipago mathata a kgonthe a go hlankela tšhemong e šele. Nka se ke ka ananya tirelo ya-ka mo ka bophelo le ge e le bofe bjo bongwe, gomme ke tla dula mo ge Jehofa a sa dutše a ntumelela.”
[Lepokisi/Seswantšho go letlakala 26]
Dibopego tša Pukwana ya Good News for People of All Nations
Pukwana ya Good News for People of All Nations e na le molaetša wo o lekanago letlakala le tee wo o tšweleditšwego ka maleme a 92. Molaetša o ngwadilwe ka tsela yeo o ka rego ke wena o bolelago. Ka baka leo ge mong wa ntlo a bala molaetša, go kwagala eka ke wena o bolelago le yena.
Bokagare bja letlakala la ka ntle bo na le mmapa wa lefase. Diriša mmapa wo e le tsela ya go thoma segwera le mong wa ntlo. Mohlomongwe o ka šupa naga yeo o dulago go yona gomme wa bontšha gore o ka rata go tseba mo yena a tšwago gona. Ka tsela yeo, o ka dira gore a itlhalose le go dira gore go be le moya wa bogwera le wa go iketla.
Ketapele ya pukwana ye e lokeletša megato e mmalwa yeo re swanetšego go e gata e le gore re thuše ka katlego bao ba bolelago leleme leo re sa le kwešišego. Hle bala megato ye ka kelohloko gomme o e diriše ka bohlale.
Lenaneo la dikagare ga le lokeletše feela maleme eupša gape le lokeletša le maswao a maleme ao go bapa le ona. Sebopego se se go thuša go tseba leswao la leleme leo le gatišitšwego dipampišaneng tša rena le dikgatišong tše dingwe tšeo di ngwadilwego ka maleme a fapa-fapanego.
[Seswantšho]
Na o diriša pukwana ye bodireding?
[Diswantšho go letlakala 23]
Dikgatišo tša rena tše di theilwego Beibeleng mo nakong ye di hwetšagala ka maleme a ka godimo ga a 400
GHANA
PHILIPPINES
LAPLAND (SWEDEN)
[Diswantšho go letlakala 24, 25]
Na o ka hlankela moo go nyakegago bagoeledi ba bantši ba Mmušo?
ECUADOR
DOMINICAN REPUBLIC