“Thušo Ya-ka E Tšwa go Jehofa”

Go se be Lenyalong le go Kgotsofala Tirelong ya Jehofa

MOSADI wa Mokriste kua Sepania o boletše gore: “Bontši bja rena re thabile e le ruri gaešita le ge re se lenyalong.” Ke ka baka la’ng a kgotsofetše? “Re rata go lokologa dipelaelong tše dintši e le gore re kgone go hlankela Modimo wa rena e lego Jehofa ka mo go oketšegilego kudu.”

Maikwelo a bjalo a dumelelana le seo Lentšu la Modimo le se bolelago mabapi le go se be lenyalong. Ge moapostola Paulo a be a hlalosa ditaba tše di akaretšago lenyalo, o ile a nea kwešišo ye e buduletšwego: “Ba ba sa kaxo ba tšea, le basadi ba bahloloxadi, ke ba botša ke re: E ka ba mo xo botse xe ba ka dula byalo ka nna.” Paulo ka boyena o be a sa nyala. Eupša ke ka baka la’ng a ile a kgothaletša go se be lenyalong? O boletše gore motho yo a lego lenyalong o pelo-pedi, mola monna goba mosadi yo a sego lenyalong a “belaêla tša Morêna.” (1 Ba-Korinthe 7:8, 32-34) Go hlankela Jehofa ke lebaka la motheo leo le dirago gore motho yo a sego lenyalong a thabe le go kgotsofala.

Go se be Lenyalong ka Morero o Mobotse

Ditlhaloso tša Paulo e ka ba tše di gakantšhago ditšong tšeo go kgothaletšwago kudu taba ya go tsenela lenyalo le go ba le bana. Lega go le bjalo, Jesu Kriste—yo ka boyena a bego a sa nyala eupša a thabile e bile a kgotsofetše—o ile a bolela ka morero o mobotse wa Bakriste bao ba sa nyalago. O itše: “Xo na le dikxôpê tše di . . . itirilexo dikxôpê ka ’baka la mmušô wa maxodimo.—E a kxônaxo xo [“dira bjalo, a a dire bjalo,” NW].”—Mateo 19:12.

Ka go dumelelana le mantšu ao, ba bantši ba hweditše go se be lenyalong go ba dumelela go hlankela Modimo ka ntle le ditšhitišo tše di tlwaelegilego bophelong bja lenyalo. (1 Ba-Korinthe 7:35) Bakriste ba dikete ba rapela Jehofa ka lethabo ba se na molekane wa lenyalo, le gona ba hwetša lethabo ka go thuša ba bangwe ka mafolofolo. *

Bakriste ba bantši bao ba sego lenyalong ba lemoga gore ga se feela batho ba lego lenyalong bao ba thabilego le gore ga se batho ka moka ba sego lenyalong bao ba sa thabago. Dihlopheng ka bobedi, ba bangwe ka dinako tše dingwe ba a thaba e bile ba a nyama. Ge e le gabotse, Beibele e bolela ka mo go kwagalago gore lenyalo ka bolona le tliša “bothata nameng.”—1 Ba-Korinthe 7:28.

Go se be Lenyalong ka Baka la Maemo

Ba bantši ga se ba tsenela lenyalo e sego ka go rata eupša ka baka la maemo. Ba ka ba ba duma borutho, bogwera le lerato tšeo di ka hwetšwago tokišetšong ya lenyalo. Lega go le bjalo, go ba bangwe ditšhelete le ditaba tše dingwe di ka ba di ba šitiša go tsenela lenyalo mo nakong ye. Bakriste ba bangwe—bao bontši bja bona e lego dikgaetšedi tša moya tše di rategago—ba dutše ba se lenyalong ka gobane ba ikemišeditše go kwa keletšo ya Beibele ya go nyala goba go nyalwa ‘feela Moreneng.’ (1 Ba-Korinthe 7:39) Ka potego e sa kwanantšhego ba tsoma molekane wa lenyalo feela gare ga barapedi ba Jehofa bao ba ineetšego le bao ba kolobeditšwego.

 Ka dinako tše dingwe, ba bangwe ba batho ba ba lewa ke bodutu. Ka morago ga go dumela gore o ikwa ka tsela ye, Mokriste yo mongwe yo a sego lenyalong o re: “Re tseba molao wa Jehofa gomme ga re nyake go Mo nyamiša ka tsela le ge e le efe. Re ka ba re nyaka bogwera bja molekane, eupša go sa šetšwe gore batho lefaseng ba ka ba ba dira seo go thwego ke go re nyakela, re ema re tiile. E bile ga re nyake go ba gare ga banna goba basadi bao e sego badumedi.” Bakriste ba bjalo ba swanelwa ke go retwa ka baka la go diriša keletšo ya Beibele le go kgomarela ditekanyetšo tše di phagamego tša boitshwaro e le gore ba kgahliše Jehofa go sa šetšwe dikgateletšego tša maikwelo tšeo ba ka bago ba lebeletšana le tšona.

Modimo o Nea Thušo e Kgolo

Jehofa o botegela bao ba mmotegelago ditabeng tše bjalo ka go gana go nyalana le batho bao ba sa mo hlankelego. Kgoši Dafida o be a ka bolela go tšwa phihlelong ya motho ka noši gore: “Yo botho ó Xo hwetša [Jehofa] Ò le Yo botho.” (Psalme 18:25) Le go bao ba mo kwago ka potego, Modimo o holofetša gore: “Nka se kê ka Xo lahla; nka se kê ka Xo tloxêla.” (Ba-Hebere 13:5) Ka go ekiša Jehofa, re ka reta ka go tšwa pelong Bakriste ba nywaga ka moka bao ba sego lenyalong bao ka potego ba kgomarelago Lentšu la Modimo. Le gona re ka rapelela gore Jehofa a ba matlafatše gore ba lebeletšane le ditlhohlo tša bona ka katlego.—Baahlodi 11:30-40.

Bakriste ba bantši bao ba sego lenyalong ba hwetša go tšea karolo ka botlalo modirong wa go ruta Beibele go ba nea morero bophelong. Ka mohlala, ela hloko Patricia e lego mosadi yo a sego lenyalong yo a lego bogareng bja nywaga ya gagwe ya bo-30 yo e lego mmulamadibogo, goba moebangedi wa nako e tletšego. O re: “Gaešita le ge go se be lenyalong go tliša diteko, go nneile sebaka sa go ba mmulamadibogo wa ka mehla. Ka ge ke le motho yo a sego lenyalong, lenaneo la-ka le feto-fetoga le maemo kudu, e lego seo se dirago gore ke be le nako e oketšegilego ya go ithuta. Le gona ke ithutile go ithekga kutšwanyana ka Jehofa, kudu-kudu dinakong tša diteko.”

Maikwelo a bjalo a theilwe kholofetšong ya Beibele e homotšago ya gore: “Xafêla Morêna ditsela tša xaxo, O mmôtê; Yêna ó tlo dira.” (Psalme 37:5) Ka kgonthe, barapedi ka moka ba Jehofa bao ba botegago, bao ba lego lenyalong goba bao ba sego lenyalong, ba ka homotšwa le go matlafatšwa ke mantšu a buduletšwego a rego: “Thušo ya-ka e tšwa go Jehofa.”—Psalme 121:2, NW.

[Mongwalo wa ka tlase]

[Ntlhakgolo go letlakala 9]

“E a sa tšeexo ó belaêla tša Morêna, xore a kxahlê Morêna.”—1 BA-KORINTHE 7:32

[Lepokisi go letlakala 8]

GO DIRA GORE GO SE BE LENYALONG E BE MO GO PUTSAGO

Jesu, yo a sa kago a nyala, o boletše gore: “Sejô sa-ka ké xe ke dira thatô ya E a nthomilexo, xe ke phêtha medirô ya xaxwe.”—Johane 4:34.

Barwedi ba bane ba Filipi bao ba bego ba se lenyalong ba be ba swaregile ka go “porofeta.”—Ditiro 21:8, 9.

Dikgaetšedi tša Bakriste tše di sego lenyalong tšeo di tsebatšago molaetša wa Mmušo ke karolo ya ‘lešaba le legolo la basadi bao ba bolelago ditaba tše dibotse.’—Psalme 68:11.