Na o lwa le Maikwelo?

BOPHELONG bja gagwe, Lena o feditše nako e ntši a e-lwa le maikwelo a fošagetšego mabapi le yena ka noši. O itše: “Nywaga ya go gobošwa ka tša botona le botshadi ge ke sa le ngwana e dirile gore ke se sa hlwa ke itlhompha. Ke ile ka ikwa ke se na mohola ka mo go feletšego.” Simone le yena o gopola bofseng bja gagwe gomme o re, “Ka gare-gare ga-ka go be go e-na le selo seo se hlaelago e bile ke be ke dumela gore ga ke na mohola gakaalo.” Go se thabe ka mo go tseneletšego mo go bakwago ke maikwelo a bjalo go bonagala go apareditše lehono. Tirelo e nngwe ya go nea bafsa keletšo mogaleng e bolela gore mo e nyakilego go ba seripa-gare sa batho bao ba leletšago moo ba bontšha “maikwelo a sa kgaotšego a go inyatša.”

Go ya ka ditsebi tše dingwe, batho ba ba le maikwelo a go ikwa ba sa swanelege ge ba bangwe ba ba dira gore ba ikwe ba se na mohola. Boemo bjo bjalo bja kgopolo bo ka gola ge motho a dulela go kgalemelwa ke ba bangwe, go swaiwa diphošo ka tsela e feteletšego le e bogale goba go swarwa gampe. Go sa šetšwe gore lebaka ke lefe, mafelelo e ka ba a fetšago matla gaešita le go ba  ao a senyago. Nyakišišo ya morago bjale ya tša kalafo e hweditše gore batho bao ba nago le maikwelo a fošagetšego mabapi le bona ka noši ba sekametše tabeng ya go se ipote le go se bote ba bangwe, gomme ka go se tsebe ba senya ditswalano tša kgaufsi le segwera. Pego mabapi le nyakišišo ye e re: “Ka tsela e itšego, ba ‘baka’ ona maemo ao ba a boifago kudu.”

Batho bao ba ikwago ka tsela yeo gantši ke bona bao Beibele e ba bitšago ba go ‘golelwa ke dipelaelo.’ (Psalme 94:19) Ba nagana gore ba ka se tsoge ba bile le bokgoni ka mo go lekanego. Ge selo se itšego se sa sepele gabotse, ka tlhago ba ipona molato. Gaešita le ge ba bangwe ba ka ba reta mabapi le seo ba se fihleletšego, ba ikwa ka gare-gare e le baradia bao ba tlago go feleletša ba lemogilwe. Ka baka la ge ba dumela gore ga se ba swanela go thaba, ba bantši ba itahlela boitshwarong bjo bo bolayago bjo ba se nago matla a go tšwa go bjona. Lena, yo go boletšwego ka yena pejana o ile a ba le mathata a magolo a go ja ka baka la go se itlhomphe, gomme o dumela ka gore, “ke ile ka ikwa ke sa kgone go fetoša selo.”

Na batho bao ba lwago le go ‘gola ga dipelaelo’ mo go bjalo ba swanetše go ikwa ka tsela ye bophelo bja bona ka moka? Na go na le selo seo se ka dirwago bakeng sa go lwantšhana le maikwelo a bjalo? Beibele e hlalosa melao ya motheo le keletšo e šomago yeo e thušitšego batho ba bantši gore ba atlege ntweng ye. E mengwe ya melao yeo ya motheo ke efe, le gona e thušitše bjang bao ba tlaišegago gore ba hwetše lethabo bophelong? Sehlogo se se latelago se tla hlalosa.