Na go na le Taba Gore ba Bangwe ba Nagana’ng ka Rena?

MO E ka bago mang le mang o thabela go retwa. Theto e ka dira gore re ikwe gabotse, gomme ya re nea moya wa kgotsofalo. Go amogelwa go ka ba gwa dira gore re nyake go kaonefatša mediro ya rena. Se se fapanego e ka ba therešo ge re lemoga gore batho ba bangwe ga ba re amogele. Re ka nyamišwa moyeng ke karabo ya go se naganele goba polelo ya go hlaba. Seo ba bangwe ba se naganago ka rena se ka ba le tutuetšo ya kgonthe ka seo re se naganago ka rena ka noši.

E tla ba phošo go hlokomologa kamoo ba bangwe ba re lebelelago ka gona. Ge e le gabotse re ka holwa ke go dumelela ba bangwe ba hlahloba boitshwaro bja rena. Ge e ba di theilwe melaong ya motheo yeo e phagamego ya boitshwaro, dikgopolo tša ba bangwe di ka re hola le go re tutuetša gore re dule re tsepame. (1 Ba-Korinthe 10:31-33) Lega go le bjalo, dikgopolo tša batho ba bantši gantši ke tšeo di sa lokago. Nagana ka pono e kgopamego yeo baruti ba bagolo le ba bangwe ba bego ba e-na le yona ka Jesu Kriste ge ba be ba “goeletša, ba re: “Mo kokotele koteng! Mo kokotele koteng!” (Luka 23:13, 21-25, NW) Re swanetše go furalela dikgopolo tšeo di theilwego tsebišong ya maaka goba tšeo di tutuetšwago ke lehloyo goba kgethollo. Ka gona, re swanetše go itlwaetša go ba le kahlolo e botse le go diriša ka bohlale dikgopolo tša ba bangwe.

Ke Kgopolo ya Mang Yeo e Lego Bohlokwa?

Re nyaka go amogelwa ke bao ba lego kgaufsi le rena borapeding bja therešo. Ba ba akaretša ditho tša lapa tšeo e lego badumedi gotee le dikgaetšedi le bana babo rena ba Bakriste. (Ba-Roma 15:2; Ba-Kolose 3:18-21) Lerato le tlhompho tša badumedi-gotee le rena le “go kgothatšana” gare ga bona go bohlokwa kudu go rena. (Ba-Roma 1:11, 12, NW) Ka ‘go ipoetša re phalana go godišaneng.’ (Ba-Filipi 2:2-4) Go feta fao, re tsoma gotee le go tšeela godimo thušo ya “bao ba etelelago pele” gare ga rena—bagolo ka phuthegong.—Ba-Hebere 13:17, NW.

Le gona, “tumô e botse xo ba-ntlê” le yona e a ratega. (1 Timotheo 3:7) Go thabiša gakaakang ge ba leloko bao e sego badumedi, bašomi-gotee le rena le baagišani ba re hlompha! Le gona, na ga re leke go nea kgopolo e botse go batho bao re dirago boboledi go bona e le gore ba tle ba sekamele molaetšeng wa Mmušo? Botumo bja rena setšhabeng bja go ba bao ba hlwekilego boitshwarong, ba tsepamego le ba botegago bo tlišetša Modimo letago. (1 Petro 2:12) Lega go le bjalo, le ka mohla re ka se ke ra kwanantšha melao ya motheo ya Beibele e le gore re amogelwe ke ba bangwe; e bile re ka se ikgakanye bakeng sa go ba kgahliša. Re swanetše go lemoga gore go kgahliša batho ka moka ga go kgonagale. Jesu o boletše gore: “Xe le ka be Le le ba lefase, lefase le ka ba le rata ba e lexo ba xalô; xomme le Le hloile ka xe Le se ba xalô, ka xe ke Le hlaotše lefaseng.” (Johane 15:19) Na go na le se re ka se dirago go hwetša tlhompho ya bao ba re ganetšago?

Go Hwetša Tlhompho ya Baganetši

Jesu o lemošitše gore: “Le tlo ba ba ba hloilwexo ke bohle ka ’baka la leina laka. Xomme e a tl’o xo kxôtlêlêla xo iša bofelong, ké yêna a tl’o xo phološwa.” (Mateo 10:22) Lehloyo le ka dinako tše dingwe le tšweletša ditatofatšo tše mpe. Bahlankedi ba mmušo bao ba nago le kgethollo ba ka re phara ka molato wa gore re bao go thwego  ba lwantšha mmušo goba gore re bafetogedi. Baganetši bao ba bolelago ka bolokologi ba ka bolela gore re sehlotswana sa bodumedi seo se tshwenyago se se swanetšwego ke go fedišwa. (Ditiro 28:22) Ka dinako tše dingwe, ditatofatšo tše tša maaka di ka lwantšhwa. Bjang? Ka go latela keletšo ya moapostola Petro e rego: “Ka mehla le [dule le] itokišeditše go iphemela pele ga mang le mang yo a le botšišago lebaka la kholofelo ya lena, eupša le dira bjalo ka boleta le ka tlhompho e tseneletšego.” (1 Petro 3:15, 16, NW) Go oketša moo, re swanetše go diriša “taba tše di phedilego, tše di se nago go kgalwa; gore yo a re ngangišago a hlabišwe dihlong, a hloke sebe se a ka re bolelago ka sona.”—Tito 2:8, PK.

Ge re dutše re leka go hlwekiša kgobošo leineng la rena, ga se ra swanela go nyamišwa goba go nolwa moko ke go bolelwa gampe ka tsela e sa lokago. Morwa wa Modimo yo a phethagetšego Jesu, o ile a latofatšwa ka molato wa thogako, wa go lwantšha mmušo gotee le wa go dirišana le meoya. (Mateo 9:3; Mareka 3:22; Johane 19:12) Moapostola Paulo o ile a gobošwa. (1 Ba-Korinthe 4:13) Bobedi Jesu le Paulo ba ile ba tshediša go swaiwa diphošo mo go bjalo mahlo gomme ba tšwela pele ba swaregile modirong wa bona. (Mateo 15:14) Ba be ba tseba gore le ka mohla ba be ba ka se ke ba amogelwa ke manaba a bona, ka ge “lefase ka moka le rapaletše matleng a yo mobe.” (1 Johane 5:19, NW) Lehono re lebeletšana le tlhohlo e swanago. Ga se ra swanela go boifa ge baganetši ba babe ba phatlalatša maaka ka rena.—Mateo 5:11.

Dikgopolo Tšeo di Tlogago di le Bohlokwa

Dilo tšeo batho ba di naganago ka rena di tloga di sa swane, go ithekgile ka maikemišetšo a bona le seo ba se kwelego ka rena. Ba bangwe ba a re reta le go re hlompha mola ba bangwe ba re hloya le go re roga. Lega go le bjalo, ge feela re sa dutše re hlahlwa ke melao ya motheo ya Beibele, re na le mabaka ka moka a go thaba le go ba le khutšo.

Moapostola Paulo o ngwadile gore: “Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong, xore motho wa Modimo e bê yo boló-ka-tlalô, a kxonišwê xo dira medirô e botse ka moka.” (2 Timotheo 3:16, 17) Ge re dumelela Lentšu la Modimo ka tebogo le re hlahla dilong tšohle, gona re amogelwa ke Jehofa Modimo le Morwa wa gagwe, Jesu Kriste. Mafelelong, dikgopolo tšeo di tlogago di le bohlokwa ke tša Jehofa le Morwa wa gagwe. Bohlokwa bja rena bja kgonthe bo bonagatšwa ke seo ba se naganago ka rena. Mafelelong, bophelo bja rena bo ithekgile ka go amogelwa ke bona.—Johane 5:27; Jakobo 1:12.

[Ntlhakgolo go letlakala 30]

“Ke nyamišwa ke theto ka gobane ke e kgopela ka sephiring.”—SERETI SA MO-INDIA, RABINDRANATH TAGORE

[Diswantšho go letlakala 31]

Dikgopolo tša badumedi-gotee le rena di bohlokwa

[Mothopo wa Seswantšho go letlakala 30]

Culver Pictures