“Bao ba Theogelago Lewatleng ka Dikepe”

GO LEBANA le boema-kepe bja Gloucester, Massachusetts, U.S.A., go eme sehlwa-seeme sa bronze seo se swantšhetšago mootledi wa sekepe, a ikemišeditše go laola sekepe sa gagwe go phatša ledimo. Sehlwa-seeme se ke segopotšo sa barei ba dihlapi ba dikete ba Gloucester bao go tsebjago gore ba hwetše lewatleng. Botlaseng bja sehlwa-seeme le lefsikeng leo le lego kgaufsi go na le mantšu a Psalme 107:23, 24 a rego: “Bao ba theogelago lewatleng ka dikepe, ba bapatša meetseng a magolo; Bona ba ba bona mediro ya Morena le mehlolo ya gagwe madibeng.”—King James Version.

Go šoma mafelong a humilego ao go reelwago dihlapi a lewatle la Atlantic go kotsi kudu. Go theoša le nywaga, banna bao e ka bago ba 5 368 ba Gloucester, yeo ga bjale e nago le badudi ba ka bago 30 000, go tsebja gore ba lahlegetšwe ke maphelo a bona ge ba be ba rea dihlapi lewatleng. Lefsika la segopotšo le re: “Ba bangwe ba tšerwe ke diphefo tše matla gotee le maphoto a magolo bo-ka dithaba a ledimo le lešoro leo le tšwago leboa-bohlabela. Ba bangwe ba ile ba hwela seketswaneng seo se bego se le kgole le sekepe seo se ba išitšego gona moo go reelwago dihlapi. Dikepe tše dingwe di ile tša thulana ka gare ga madimo gomme ka manyami tša nwelela. Tše dingwe di ile tša nweletšwa ke go thulwa ke dikepe tše dikgolo tšeo di sepetšwago ke muši-meetse ditseleng tše dikgolo tša dikepe.”

Lefsika leo la segopotšo le nea bohlatse bjo bo nyamišago ka modiro o thata wo barei ba dihlapi ba ilego ba o dira gotee le dikotsi tšeo ba ilego ba lebeletšana le tšona go theoša le nywaga-kgolo. Akanya ka megokgo yeo e ilego ya tšhollwa ke ba lapa ka baka la go hloka kholofelo ge ba lahlegetšwe ke banna, bo-tate, barwarre gotee le barwa. Lega go le bjalo, Jehofa Modimo ga a lebale bahlologadi, ditšhiwana goba bao ba lahlegetšwego ke maphelo lewatleng. Moapostola Johane o ile a šupa tiragalong ye ya nakong e tlago ge a re: “Lewatlê la nthša bahu ba lôna; le lehu, le bo-dula-bahu tša nthša bahu ba xo tšôna.” (Kutollo 20:13) Nakong ya go tsošwa ga bona, bao ba ‘theogetšego lewatleng ka dikepe’ ba tla bona ‘mediro yeo e makatšago ya Morena’ e le ka kgonthe.