Dipotšišo tše Tšwago go Babadi

Na Mokriste a ka boloka letswalo le lebotse ge e ba a amogela mošomo wo o akaretšago go itlhama?

Dihlatse tša Jehofa lefaseng ka bophara di tšeela godimo boikarabelo bja tšona bjo di bo filwego ke Modimo bja go hlokomela malapa a tšona ka dilo tše di bonagalago. (1 Timotheo 5:8) Lega go le bjalo, mešomo e mengwe e thulana le melao ya motheo ya Beibele ka go lebanya gomme e swanetše go phengwa. Yona e akaretša mešomo e tswalanago le go petšha, go dirišwa gampe ga madi gotee le go kgothaletša go dirišwa ga ditšweletšwa tša motšoko. (Jesaya 65:11; Ditiro 15:29; 2 Ba-Korinthe 7:1; Ba-Kolose 3:5) Gaešita le ge mešomo e mengwe e sa ganetšwe ka go lebanya ka Beibeleng, e ka senya letswalo la motho goba letswalo la ba bangwe.

Go šoma mošomo wa boiphedišo wo o nyakago gore motho a sware sethunya goba sebetša se itšego ke phetho ya motho ka noši. Lega go le bjalo, mošomo wa go itlhama o bea motho kotsing ya kgonagalo ya gore a be le molato wa madi ge a ka gapeletšega go šomiša sebetša seo a se swerego. Ka gona, Mokriste o swanetše go naganišiša ka thapelo ge e ba a nyaka go amogela boikarabelo bja go dira phetho ya kapejana moo go akaretšwago bophelo bja motho. Go swara sebetša gape go bea motho kotsing ya go gobala goba ya lehu ka baka la tlhaselo goba la go itefeletša.

Ba bangwe le bona ba ka kgongwa ke phetho yeo motho a e dirago. Ka mohlala, boikarabelo bjo bogolo bja Mokriste ke go bolela ditaba tše dibotse tša Mmušo wa Modimo. (Mateo 24:14) Na o be o ka kgona go ruta batho gore ba “phedišanê xa-botse le batho ka moka” mola wena o iphediša ka go swara sebetša? (Ba-Roma 12:18) Go thwe’ng ka bana ba gago le ba bangwe ba leloko? Na go ba le sethunya ka gae go ka se bee maphelo a bona kotsing? Go oketša moo, na ba bangwe ba be ba ka kgopišwa ke boemo bja gago tabeng yeo?—Ba-Filipi 1:10.

‘Mehleng ye ya bofelo,’ batho ba bantši ke ba ‘sehlogo e bile ba hloile tše botse.’ (2 Timotheo 3:1, 3, bapiša le PK.) Ge e ba motho a tseba se, na a ka hloka seo a ‘begwago ka sona’ ge e ba a ka kgetha mošomo wo o tlago go mo lweša le batho ba mohuta woo? (1 Timotheo 3:10) Le ganyenyane. Ka baka le, phuthego e be e ka se lebelele motho yo bjalo e le yo a “se naxo bosodi” ge a be a fo tšwela pele a swara dibetša ka morago ga ge a filwe keletšo ya Beibele ka botho. (1 Timotheo 3:2; Tito 1:5, 6) Ka gona, monna goba mosadi yo bjalo o be a ka se swanelegele tirelo le ge e le efe e kgethwa ka phuthegong.

Jesu o ile a kgonthišetša barutiwa ba gagwe gore ge e ba ba bea dikgahlego tša Mmušo pele maphelong a bona, ga go nyakege gore ba tshwenyege kudu ka go ba le dinyakwa tša bophelo. (Mateo 6:25, 33) Ka kgonthe, ge e ba re bota Jehofa ka mo go feletšego, “Yêna ó tlo [re] babalêla; a ka se kê a bá a lesa moloki xe a ka šuthišwa.”—Psalme 55:22.