Meneelo Yeo e Thabišago Pelo ya Modimo

RURI ye ga se kanegelo e thabišago. Kgošigadi Athalia o be a tšere setulo sa bogoši sa Juda a diriša maano-mabe le polao. Ka ge a ile a nagana ka phošo gore bajabohwa ka moka ba madi a ka bogošing ba bolailwe, o ile a ipea gore e be kgošigadi. Mosadi yo mongwe, e lego Joseba morwedi wa kgoši, yo a bego a tloga a rata Jehofa le Molao wa gagwe, ka sebete o ile a uta ngwana wa ka bogošing, e lego Joase. Joseba le monna wa gagwe, e lego Moperisita yo Mogolo Joyada, ba ile ba uta mojabohwa ka nywaga e tshelelago lefelong la bodulo leo le lego tempeleng ya gabo bona.—2 Dikxoši 11:1-3.

Ge Joase a e-na le nywaga e šupago, Moperisita yo Mogolo Joyada o be a šetše a itokišeleditše go thoma leano la gagwe la go thenkgolla kgošigadi ye setulong sa yona sa bogoši seo e se thopilego ka tsela ya boradia. O ile a ntšha mošemanyana moo a bego a mo utile gona gomme a mmea gore e be mojabohwa yo a swanetšego wa mmušo. Ke moka Kgošigadi e mpe e lego Athalia e ile ya gogelwa ka ntle ga tempele ke bahlapetši ba ka mošate gomme ya bolawa, e lego seo se ilego sa tlišetša batho kimollo le lethabo. Ka ditiro tša bona, Joyada le Joseba ba ile ba kgatha tema e kgolo go tsošološweng ga borapedi bja therešo nageng ya Juda. Eupša sa bohlokwa kudu ke gore ba ile ba kgatha tema go tšwetšeng pele lešika la ka bogošing la Dafida, leo le bego le tla lebiša go Mesia.—2 Dikxoši 11:4-21.

Kgoši yeo e sa tšwago go bewa setulong sa bogoši le yona e be e swanetše go kgatha tema yeo e bego e tla thabiša pelo ya Modimo. Ngwako wa Jehofa o be o tloga o nyaka go lokišwa. Kganyogo e sa laolegego ya Athalia ya gore e be yena mmuši a nnoši wa Juda e ile ya feleletša ka go hlokomologwa ga tempele le go hulwa ga yona. Ka gona, Joase o ile a ikemišetša go aga tempele lefsa le go e tsošološa. Ka ntle le go dika-dika, o ile a ntšha taelo ya gore go kgoboketšwe tšhelete yeo e nyakegago bakeng sa go tsošološwa ga ngwako wa Jehofa. O itše: “Dithšêlêtê ka moka tše kxêthwa tše di tlišwaxo Ngwakong wa Morêna, e lexo dithšêlêtê tša ba ba balwaxo, le tše motho a lefišwaxo ka tšôna, le tše motho a kaxo ithapa a di tliša Ngwakong wa Morêna, dithšêlêtê tšeo baperisita ba di tšeê xo batho ba sethšaba sa xabô, xomme ka tšôna ba lokišê Ngwakô mo ba hwetšaxo ò phušoxile.”—2 Dikxoši 12:5, 6.

Batho ba ile ba neela ka go rata. Lega go le bjalo, baperisita ba be ba sa phethe modiro wa bona wa go tsošološa tempele ka pelo ka moka. Ka gona, kgoši e ile ya rarolla bothata ka go laela gore meneelo ka moka e tsenywe ka go lebanya ka lepokising le le kgethegilego. E ile ya bea Joyada gore e be mohlokomedi, gomme pego e re: “Joyada moperisita a tšea polokêlô, a thula lešoba sekhurumelong sa yôna, a e bea ka lehlakoreng le letona la aletare, mo xo tsênwaxo Ngwakong wa Morêna ka xôna. Xomme baperisita ba ba letaxo mojakô ba tšea thšêlêtê ka moka e nthšetšwaxo Ngwakô wa Morêna, ba e thšêla mo xo yôna. Ya re mohla ba hwetšaxo thšêlêtê polokelong è le e ntši, xwa tla mongwadi wa kxoši le moperisita e moxolo, ba  phutha dithšêlêtê tšeo di hweditšwexo Ngwakong wa Morêna, ba di bale, ba di xafêlê diatleng tša balaki ba modirô le bahlapetši ba Ngwakô wa Morêna. Bôná-bao ba di nthšetša babetli ba dikwata le baaxi ba ba bexo ba dira mo Ngwakong wa Morêna, le baaxi ba merakô, le babetli ba mafsika, xore ba rêkê dikwata le mafsika a xo betlwa, xore xo lokišwê Ngwakô wa Morêna, xo rêkwê dikaxô tšohle tša xo lokiša Ngwakô.”—2 Dikxoši 12:10-13.

Batho ba ile ba arabela ka pelo ka moka. Ngwako wa Jehofa wa borapedi o ile wa tsošološwa e le gore borapedi bja gagwe bo kgone go tšwela pele ka tsela e hlomphegago. Ka gona, ditšhelete ka moka tše di neetšwego di ile tša dirišwa gabotse. Kgoši Joase o ile a kgonthišetša seo!

Lehono, mokgatlo wa Jehofa o bonagalago o kgonthišetša gore ditšhelete ka moka tšeo di neetšwego di dirišwa gabotse bakeng sa go tšwetša pele borapedi bja Jehofa, gomme Bakriste ba therešo ba arabetše go etša kamoo ba-Isiraele ba bogologolo ba ilego ba arabela ka gona—ka pelo ka moka. Mohlomongwe o gare ga bao ba neetšego bakeng sa go tšwetša pele mediro ya Mmušo ngwageng o fetilego wa tirelo. Anke re ele hloko tše dingwe tša ditsela tšeo meneelo ya gago e dirišitšwego ka tšona.

MODIRO WA GO GATIŠA

Lefaseng ka bophara, dikgatišo tše di latelago di gatišeditšwe go ithuta le go di aba:

• Dipuku: 47 490 247

• Dipukwana: 6 834 740

• Diporoutšha: 167 854 462

• Dialmanaka: 5 405 955

• Dimakasine: 1 179 266 348

• Dipampišana: 440 995 740

• Dibidio: 3 168 611

Modiro wa go gatiša o dirwa Afrika, Amerika Leboa, Amerika Bogare le Amerika Borwa, Asia, Yuropa le dihlakahlakeng tša Pacific, e lego palo-moka ya dinaga tše 19.

“Ke nna Katelyn May. Ke na le nywaga e seswai. Ke na le diranta tše 192, gomme ke be ke tla rata go le nea tšona bakeng sa go thuša go lefelela metšhene ya go gatiša. Kgaetšedi ya lena yo monyenyane, Katelyn.”

“Re ile ra kopana re le lapa gomme ra boledišana ka metšhene e mefsa ya go gatiša. Bana ba rena, ba nywaga e 11 le 9, ba phethile ka go ntšha tšhelete go tšwa go yeo ba e bolokilego e le gore ba neele ka yona. Re thabela go romela moneelo wa bona gotee le wa rena.”

 MODIRO WA GO AGA

Ye e latelago ke mediro e mengwe ya go aga yeo e dirwago bakeng sa go thekga mediro ya Dihlatse tša Jehofa:

• Diholo tša Mmušo dinageng tšeo ditlabakelo di sego nene: 2 180

• Diholo tša Kopano: 15

• Makala: 10

• Baithapi ba tšwago dinageng tše dingwe ba lego tirelong ya nako e tletšego: 2 342

“Mafelo-bekeng a re swaretše seboka sa pele Holong ya rena e mpsha ya Mmušo. Re thabile kudu gore re na le lefelo le le swanetšego la go tumiša Tatago rena, Jehofa Modimo. Re leboga Jehofa le lena ge le hlokomela dinyakwa tša rena ka go aga Diholo tša Mmušo tše di oketšegilego. Ka kgonthe, Holo ya rena ya Mmušo e tloga e tšeelwa godimo mo tikologong.”—Chile.

“Bana babo rena le dikgaetšedi ba tšeela godimo kudu thušo yeo e newago ke mokgatlo wa Jehofa. Le lehono, re tšwela pele re bolela ka nako e kgahlišago yeo re bilego le yona le sehlopha sa go aga.”—Moldova.

“Nna le mosadi wa-ka re sa tšwa go keteka ngwaga wa bo-35 re nyalane. Re be re leka go dira phetho ya seo re nyakago go rekelana sona ka nako yeo, gomme re ile ra phetha ka go neela tšhelete e itšego go Jehofa le go mokgatlo wa gagwe, ka gobane ka ntle le thušo ya bona, mohlomongwe nkabe re sa ka ra atlega lenyalong la rena. Re tla rata gore tšhelete yeo e tsentšwego ka mo e dirišetšwe go thuša go aga Holo ya Mmušo go e nngwe ya dinaga tše di diilago.”

“Ke sa tšwa go amogela bohwa, gomme ka ge ‘dilo tšeo ke di ratago’ di se nene gomme ‘dilo tšeo ke di nyakago’ di se nene le go feta, ke tla rata go le nea tšhelete yeo e tsentšwego ka mo go thuša go aga Diholo tša Mmušo, tšeo di nyakegago kudu dinageng tše dintši.”

 MODIRO WA TLHAKODIŠO

Mehleng ye ya bofelo, dikotsi gantši di hlaga ka ntle le temošo. Dihlatse tša Jehofa tše dintši di ntšha meneelo e oketšegilego e le gore bana babo tšona ba lego ditikologong tšeo di hlagetšwego ke kotsi ba kgone go thušwa. E le kgopotšo, meneelo e ntšhwago bakeng sa modiro wa tlhakodišo e tšewa e le karolo ya meneelo e ntšhwago bakeng sa modiro wa lefase ka bophara. Mafelo a latelago ke a mangwe ao go ona Dihlatse tša Jehofa di thušitšego bao ba hlagetšwego ke kotsi:

• Afrika

• Asia

• Tikologo ya Caribbean

• Dihlakahlaka tša Pacific

“Nna le monna wa-ka re rata go le leboga kudu ka ge le rometše ditlabakelo tša go thuša modirong wa tlhakodišo ge go be go lokišwa tshenyo yeo e diregilego nakong ya madimo a magolo. Re ile ra kgona go rulela ntlo ya rena lefsa. Re tloga re leboga gore le ile la arabela ka go akgofa kudu.”

“Ke nna Connor, gomme ke na le nywaga e 11. Ge ke be ke bona seo se diregilego ge tsunami e be e hlasela, ke be ke nyaka go thuša. Ke holofela gore se ke se romelago se tla thuša bana babo rena le dikgaetšedi.”

 BAHLANKA BA LEGO TIRELONG E KGETHEGILEGO YA NAKO E TLETŠEGO

Bakriste ba bantši ba hlankela modirong wa boebangedi goba magaeng a Bethele ka nako e tletšego. Baithapi ba bangwe ba nako e tletšego ba hlokomelwa ka meneelo ya boithatelo. Gare ga bona go na le ba latelago:

• Baromiwa: 2 635

• Balebeledi ba basepedi: 5 325

• Ditho tša Bethele: 20 092

“Ka ge nka se kgone go yo hlankela Bethele ga bjale [mošemane wa nywaga e mehlano], ke nyaka go romela moneelo wo ka lerato le legolo. Ge ke gola, ke tla ya Bethele gore ke yo šoma ka thata.”

Go Tšwetša Pele Thuto ya Beibele

Jesu Kriste o laetše balatedi ba gagwe gore ba “dirê dithšaba ka moka barutiwa.” (Mateo 28:19) E le go kwa mantšu a gagwe, Dihlatse tša Jehofa di swaregile ka go dira boboledi le go ruta molaetša wa Beibele dinageng tše 235. Di gatiša dipuku tša Beibele le go di aba ka maleme a 413.

Ke therešo gore moneelo wa bohlokwa kudu woo Mokriste a ka o neago bakeng sa go thuša batho ba oketšegilego go ithuta ka Modimo le ka merero ya Gagwe ke nako ya gagwe. Dihlatse tša Jehofa di dirišitše nako ya tšona e ntši le matla bakeng sa go thuša baagišani ba tšona. Le gona, di neetše ka ditšhelete, gomme meneelo ya tšona ka moka yeo di e neetšego ka ditsela tše di fapa-fapanego, e thušitše go dira gore leina la Jehofa le merero ya gagwe e tsebje lefaseng ka moka. Eka Jehofa a ka tšwela pele a šegofatša maiteko a bakeng sa go thuša ba bangwe go ithuta mo go oketšegilego ka yena. (Diema 19:17) Boikemišetšo bjo bo bjalo bja go nyaka go thuša bo thabiša pelo ya Jehofa!—Ba-Hebere 13:15, 16.

[Lepokisi go letlakala 28-30]

Ditsela Tšeo ka Tšona ba Bangwe ba Kgethago go Nea

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo e itšego ya tšhelete yeo ba e tsenyago ka mapokising a ngwadilwego “Meneelo Bakeng sa Modiro wa Lefase ka Bophara—Mateo 24:14.”

Kgweding e nngwe le e nngwe, diphuthego di romela ditšhelete tše ofising ya Dihlatse tša Jehofa yeo e hlankelago naga ya gabo tšona. Meneelo ya boithatelo ya ditšhelete e ka romelwa ka go lebanya go Watch Tower Bible and Tract Society of Pennsylvania, Attention: Accounting Office, Private Bag X2067, Krugersdorp, 1740, South Africa, goba ofising ya lekala ya Dihlatse tša Jehofa yeo e hlankelago naga ya geno. Ditšheke tšeo di romelwago atereseng yeo e lego ka mo godimo di swanetše go lefelelwa go “Watch Tower.” Mabenyabje goba dilo tše dingwe tše bohlokwa le tšona di ka neelwa. Lengwalo le lekopana leo le bolelago gore selo se se bjalo ke mpho e neelwago ka go lebanya le swanetše go sepela le meneelo ye.

GO NEA MO GO RULAGANYEDITŠWEGO

Go tlaleletša dimphong tša ditšhelete tše di newago ka go lebanya, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Inšuranse: Mokgatlo wa Watch Tower o ka ngwadišwa e le moja-bohwa wa thulaganyo ya tša inšuranse ya bophelo goba thulaganyo ya go rola modiro/ya phenšene.

 

Di-Stock le di-Bond: Di-Stock le di-bond di ka neelwa go Mokgatlo wa Watch Tower e le mpho e neelwago ka go lebanya.

Dintlo le Mafelo ao e Lego Dithoto: Dintlo le mafelo ao e lego dithoto ao a ka rekišwago a ka neelwa e le mpho e neelwago ka go lebanya goba ge e ba e le lefelo la bodulo, monei a ka tšwela pele a dula go lona ge a sa dutše a phela. Ikgokaganye le ofisi ya lekala ya nageng ya geno pele o e fetišetša ntlo le ge e le efe goba lefelo leo e lego thoto ka molao.

 

Dikeno: Dithoto goba tšhelete di ka tlogelelwa Mokgatlo wa Watch Tower e le bohwa ka go dirišwa ga keno e dirilwego ka molao.

Bakeng sa tsebišo e oketšegilego, o ka ikgokaganya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba wa ikgokaganya le ofisi ya lekala ya Dihlatse tša Jehofa yeo e hlankelago naga ya geno.

 

Accounting Office:

Private Bag X2067

Krugersdorp, 1740

South Africa

Mogala: (011) 761 1000

[Mothopo wa Seswantšho go letlakala 27]

Faithful video: Stalin: U.S. Army photo