Dipotšišo tše Tšwago go Babadi

Psalme 102:26 e bolela gore lefase le magodimo “di tlo bá tša lôba.” Na mantšu ao a bolela gore Lefase le tla fedišwa?

Ge mopsalme a be a rapela Jehofa o itše: “Ké ’neng’ ya mola Ò thêa lefase, ya mola diatla tša xaxo di dira maxodimo. ’Me tšôna di tlo bá tša lôba, Wêna wa šala Ò le xôna. Di tlo bá tša ônala bo-ka kobô, wa di šatola bo-ka seaparô ka moka xa tšôna, tša fetoxa.” (Psalme 102:25, 26) Moko wa taba o bontšha gore ditemana tše ga di bolele ka go fedišwa ga lefase, eupša di bolela ka go ba gona ga Modimo ka mo go sa felego. Moko wa taba ye o bontšha gape lebaka leo ka lona therešo yeo ya bohlokwa e lego e homotšago go bahlanka ba Modimo.

Mohlomongwe mopsalme, o thoma ka go hlalosa mahloko a gagwe a ge a be a le bothopša Babele. O lla ka gore bophelo bja gagwe bo feta “bo-ka muši.” Pelaelo e tseneletšego e a mo tlaiša, gomme e dira gore mašapo a gagwe a ‘fiše bjalo ka leretha.’ O lapile, “[o] omeletše byalo ka mabyang,” gomme o lewa ke bodutu go “etša nonyana thlakeng ya ntlo.” Diteko tšeo a lebeletšanego le tšona di dira gore a se kganyoge dijo, gomme matšatši a gagwe a tletše ka manyami. (Psalme 102:3-11) Lega go le bjalo, mopsalme ga se a lahlegelwa ke kholofelo. Ka baka la’ng? Ka baka la seo Jehofa a holofeditšego go se direla Tsione, goba Jerusalema.

Le ge Tsione e fedišitšwe, Jehofa o be a holofeditše gore o tla e tsošološa. (Jesaya 66:8) Ka gona, mopsalme o bolela le Jehofa ka kholofelo gore: “Tsoxa O xauxêlê motse wa Tsione, xobane lebaka la xo o šôkêlwa ké lôna lé, le tlile. Mohla Morêna à axa motse wa Tsione.” (Psalme 102:13, 16) Ke moka mopsalme o boela tabeng yela ya mahloko a gagwe. Ge e le gabotse, o hlalosa gore ge e ba Jerusalema yeo e lego mašope e ka tsošološwa ka matla a Modimo, Jehofa a ka kgona go mo hlakodiša boemong bja gagwe bjo bo nyamišago. (Psalme 102:17, 20, 23) Le gona, go na le selo se sengwe seo se ilego sa tutueletša mopsalme gore a bote Jehofa ka mo go feletšego. Ke sefe? Ke therešo ya gore Modimo ke wa ka mo go sa felego.

Go ba gona ga Jehofa ka mo go sa felego go tloga go fapana le bophelo bjo bokopana bja mopsalme. O re go Jehofa: “Ya xaxo nywaxa e dula è le xôna neng le neng.” (Psalme 102:24) Se se latelago mopsalme o re: “Ké ’neng’ ya mola Ò thêa lefase, ya mola diatla tša xaxo di dira maxodimo.”—Psalme 102:25.

Lega go le bjalo, gaešita le nywaga e mentši ya lefase le ya magodimo e ka se bapetšwe le go ba gona ga Jehofa ka mo go sa felego. Mopsalme o oketša ka gore: “’Me tšôna [lefase le magodimo] di tlo bá tša lôba, Wêna wa šala Ò le xôna.” (Psalme 102:26) Lefase le magodimo di ka fedišwa. Ke therešo gore go na le moo Jehofa a boletšego gore di tla ba gona ka mo go sa felego. (Psalme 119:90; Mmoledi 1:4) Eupša di be di ka fedišwa ge e ba wo e be e le morero wa Modimo. Ka mo go fapanego, Modimo ga a hwe. Dilo tšeo di hlodilwego ke “tša neng le neng” feela ka gobane Modimo a di hlokomela. (Psalme 148:6) Ge e ba Jehofa a ka kgaotša go tsošološa dilo tšeo di hlodilwego, gona “di tlo bá tša ônala bo-ka kobô.” (Psalme 102:26) Go etša ge motho a phela nako e telele go feta diaparo tša gagwe, le Jehofa o be a ka phela nako e telele go feta tlholo ya gagwe—ge e ba a be a ka kgetha go dira bjalo. Lega go le bjalo, re tseba go tšwa mangwalong a mangwe gore yeo ga se thato ya gagwe. Lentšu la Modimo le re kgonthišetša gore Jehofa o rerile gore lefase le magodimo di be gona ka mo go sa felego.—Psalme 104:5.

E tloga e le mo go homotšago go tseba gore Jehofa ka mehla o tla phethagatša dikholofetšo tša gagwe ka moka. Go sa šetšwe gore re welwa ke diteko tša mohuta mang, ge re llela go yena, re ka kgodišega gore “ó tlo phafoxêla dithapêlô tša dišuana; ’thapêlô tša bôná a ka se di nyatše.” (Psalme 102:17) Ee, kholofetšo ya Jehofa ya gore o tla re thekga yeo e hwetšwago go Psalme 102 e tiile kudu go feta lefase leo re emego go lona.