“Bohlatse go Ditšhaba Tšohle”
“Bohlatse go Ditšhaba Tšohle”
“La tlo ba dihlatse tša-ka . . . xo fihla maxomong a lefase.”—DITIRO 1:8.
1. Ke neng le gona kae moo barutiwa ba kwelego ka lekga la pele boporofeta bjo bo begilwego go Mateo 24:14?
MANTŠU a Jesu ao a begilwego go Mateo 24:14 a tlwaelegile kudu moo ba bantši ba rena re a tsebago ka hlogo. Le gona ke boporofeta bjo bo kgahlišago e le ruri! Nagana ka seo barutiwa ba ka bago ba ile ba se nagana ge ba be ba bo kwa ka lekga la pele! E be e le ka ngwaga wa 33 C.E. Barutiwa ba be ba bile le Jesu ka nywaga e ka bago e meraro, gomme ga bjale ba be ba tlile le yena Jerusalema. Ba be ba bone mehlolo ya gagwe e bile ba theeditše dithuto tša gagwe. Gaešita le ge ba ile ba thabela therešo ya bohlokwa yeo Jesu a ilego a ba ruta yona, ba be ba tseba gabotse gore ga se batho ka moka bao ba bego ba thaba le bona. Jesu o be a e-na le manaba a matla le ao a nago le tutuetšo.
2. Barutiwa ba be ba tla lebeletšana le dikotsi gotee le ditlhohlo dife?
2 Thabeng ya Mehlware, barutiwa ba bane ba be ba dutše le Jesu, ba theeditše ka kelohloko ge a be a dutše a bolela ka dikotsi le ditlhohlo tše di tlago tšeo ba bego ba tla lebeletšana le tšona. Pejana, Jesu o be a ba boditše gore ba tla bolawa. (Mateo 16:21) Ga bjale o ile a bolela ka mo go kwagalago gore le bona ba be ba tla lebeletšana le kganetšo e šoro. O itše: “Ba tlo Le xafêla tlaišong; ba tlo Le bolaya; Le tlo ba ba xo hloiwa ke dithšaba tšohle ka ’baka la Leina la-ka.” Go be go ka se felele fao. Baporofeta ba maaka ba be ba tla aroša batho ba bantši. Ba bangwe ba be ba tla kgopša gomme ba be ba tla ekana le go hloyana. Le gona ba bangwe, ge e le gabotse “ba bantši,” ba be ba tla dumelela lerato la bona la go rata Modimo le Lentšu la gagwe gore le fole.—Mateo 24:9-12.
3. Ke ka baka la’ng mantšu a Jesu ao a hwetšwago go Mateo 24:14 e le a kgahlišago e le ruri?
3 Ka morago ga go bolela ka maemo ao a nyamišago, Jesu o ile a bolela taba e swanetšego go ba e ile ya makatša barutiwa ba gagwe. O itše: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.” (Mateo 24:14, NW) Ee, modiro wo Jesu a o thomilego kua Isiraele—go ‘hlatsela therešo’—o be o tla tšwela pele o gola lefaseng ka moka. (Johane 18:37) Ruri bjo ke boporofeta bjo bo kgahlišago! Go fihliša modiro wo ‘ditšhabeng tšohle’ e be e tla ba tlhohlo; go dira bjalo ba lebeletšane le “xo hloiwa ke dithšaba tšohle” e be e tla ba mohlolo. Go phethagatšwa ga modiro wo o mogolo go be go ka se bonagatše bogolo le matla a Jehofa feela eupša gape go be go tla bonagatša le lerato la gagwe, kgaugelo le go se fele pelo. Go oketša moo, go be go tla nea bahlanka ba gagwe sebaka sa go bontšha tumelo le boineelo bja bona.
4. Ke bomang bao ba ilego ba botšwa gore ba phethagatše modiro wa go nea bohlatse, gomme ke khomotšo efe yeo Jesu a ilego a e nea?
4 Jesu o šiile barutiwa ba gagwe ba tseba gabotse gore ba na le modiro o bohlokwa kudu wo ba swanetšego go o dira. Pele ga ge a ka rotogela legodimong, Jesu o ile a tšwelela go bona gomme a re: “Le tlo fiwa matla xe Môya-mokxêthwa ò theoxêla xo lena, la tlo ba dihlatse tša-ka motseng wa Jerusalêma le naxeng ka moka ya Juda le ya Samaria, xo fihla maxomong a lefase.” (Ditiro 1:8) Ke therešo gore kgaufsinyane ba bangwe ba be ba tla ba tlatša. Lega go le bjalo, barutiwa ba be ba se kae ka palo. Ruri e swanetše go ba e be e le mo go homotšago go tseba gore moya o mokgethwa o matla wa Modimo o be o tla ba matlafatša gore ba phethagatše kabelo ye e tšwago go Modimo!
5. Ke’ng seo barutiwa ba sa kago ba se tseba mabapi le modiro wa go nea bohlatse?
5 Barutiwa ba be ba tseba gore ba swanetše go bolela ditaba tše dibotse le go ‘dira ditšhaba ka moka barutiwa.’ (Mateo 28:19, 20) Eupša ba be ba sa tsebe kamoo bohlatse bo bego bo tla newa ka gona ka mo go feletšego, le gona ba be ba sa tsebe nako yeo bofelo bo bego bo tla tla ka yona. Le rena ga re e tsebe. Tše ke ditaba tšeo di tsebjago ke Jehofa feela. (Mateo 24:36) Ge bohlatse bo tla be bo neilwe ka tsela e kgotsofatšago Jehofa, o tla fediša tshepedišo ye e kgopo ya dilo. Ke ka nako yeo feela mo Bakriste ba tlago go lemoga gore modiro wa boboledi o phethagaditšwe ka tekanyo yeo Jehofa a bego a e rerile. Barutiwa bao ba pele ba be ba ka se tsebe tekanyo yeo bohlatse bo bego bo tla newa ka yona mehleng ye ya bofelo.
Bohlatse Lekgolong la Pele la Nywaga
6. Go diregile’ng ka Pentekoste ya 33 C.E. le nakwana ka morago ga moo?
6 Lekgolong la pele la nywaga, modiro wa go bolela ka Mmušo le wa go dira barutiwa o tšweleditše mafelelo a makatšago. Ka letšatši la Pentekoste ya 33 C.E., mo e ka bago barutiwa ba 120 ba be ba le phapošing ya ka godimo kua Jerusalema. Moya o mokgethwa wa Modimo o ile wa tšhollelwa go bona, moapostola Petro a bea polelo e matla a hlalosa seo se bolelwago ke mohlolo wo, ke moka batho ba ka bago 3 000 ya ba badumedi gomme ba kolobetšwa. Tšeo e be e le dinyane. Go sa šetšwe maiteko a matla a baetapele ba bodumedi a go nyaka go fediša modiro wa go bolela ditaba tše dibotse, “Morêna ka mehla a eketša ba ba phološwaxo [go barutiwa].” Go se go ye kae, “palô ya banna ya ba dikete tše thlano.” Ka morago ga moo, “ba ba dumêlaxo ba fêla ba ata, . . . ya ba lešaba le lentši la banna le basadi.”—Ditiro 2:1-4, 8, 14, 41, 47; 4:4; 5:14.
7. Ke ka baka la’ng go sokologa ga Koronelio e be e le tšwelopele e lemogegago?
7 Go bile le tiragalo e nngwe gape e lemogegago ka ngwaga wa 36 C.E.—go sokologa le go kolobetšwa ga Koronelio, e lego yo mongwe wa ba-Ntle. Ge a hlahla moapostola Petro go ya go monna yo yo a boifago Modimo, Jehofa o bontšhitše gore taelo ya Jesu ya go ‘dira ditšhaba ka moka barutiwa’ e be e sa felele feela go ba-Juda bao ba lego dinageng tše di fapa-fapanego. (Ditiro 10:44, 45) Bao ba etelelago pele ba ile ba arabela bjang? Ge baapostola le banna ba bagolo kua Judea ba be ba lemoga gore ditaba tše dibotse di be di swanetše go išwa gape le go baditšhaba—bao e sego ba-Juda—ba ile ba tumiša Modimo. (Ditiro 11:1, 18) Ka nako yeo, modiro wa boboledi o ile wa tšwela pele o enywa dienywa magareng ga ba-Juda. Nywageng e mmalwa ka morago, mohlomongwe ka 58 C.E., go oketša go badumedi ba ba-Ntle gwa ba le “Ba-Juda ba ba kxodilwexo . . . ba dikete tše ntši.”—Ditiro 21:20.
8. Ditaba tše dibotse di kgoma batho bjang?
8 Gaešita le ge koketšego e lemogegago gare ga Bakriste ba lekgolong la pele la nywaga e kgahliša, ga se ra swanela go lebala gore dipalo-palo tše di emela batho ba kgonthe. Molaetša wa Beibele wo ba o kwelego o be o le matla kudu. (Ba-Hebere 4:12) O fetošitše maphelo a batho bao ba ilego ba o amogela. Batho ba ile ba hlwekiša maphelo a bona, ba apara motho e mofsa, gomme ba boelana le Modimo. (Ba-Efeso 4:22, 23) Go bjalo le lehono. Le gona bao ba amogelago ditaba tše dibotse ka moka ga bona ba na le tebelelo e kgahlišago kudu ya go phela ka mo go sa felego.—Johane 3:16.
Badirišani ba Modimo
9. Ke tokelo le boikarabelo bofe bjo Bakriste ba pele ba ilego ba lemoga gore ba na le bjona?
9 Bakriste ba pele ga se ba ka ba nagana gore e be e le bona bao ba kgonnego go dira seo se fihleletšwego. Ba be ba lemoga gore modiro wa bona e le badiredi o be o thekgwa ke “matla a Môya-mokxêthwa.” (Ba-Roma 15:13, 19) Jehofa e be e le yena a bego a dira gore go be le kgolo ya moya. Ka nako e swanago, Bakriste ba be ba tseba gore ba na le tokelo le boikarabelo bja go ba “badirišani ba Modimo.” (1 Ba-Korinthe 3:6-9) Ka baka leo, ka go dumelelana le keletšo ya Jesu, ba ile ba ikgafa ka mafolofolo modirong wo ba bego ba o abetšwe.—Luka 13:24.
10. Ke boiteko bofe bjo Bakriste ba bangwe ba pele ba ilego ba bo dira bakeng sa go nea bohlatse ditšhabeng ka moka?
10 E le “moapostola wa ba-ntlê,” Paulo o ile a sepela dikhilomithara tše dikete nageng le lewatleng, a hloma diphuthego tše dintši profenseng ya Roma ya kua Asia le Gerika. (Ba-Roma 11:13) O ile a ya Roma mohlomongwe a fihla le Sepania. Ka nako yeo, moapostola Petro, yo a abetšwego “xo iša Ebangedi . . . xo ba lebollô,” o ile a leba thoko e nngwe gore a yo hlankela kua Babele, e lego lefelo leo go bego go e-na le ba-Juda ba bantši ka nako yeo. (Ba-Galatia 2:7-9; 1 Petro 5:13) Gare ga ba bangwe ba bantši bao ba ilego ba tšea karolo modirong wo wa Morena go be go e-na le basadi ba bjalo ka Terefina le Terifosa. Go bolelwa ka mosadi yo mongwe yo a bitšwago Peresi e le yo a “itapišeditšexo Morêna xa-xolo.”—Ba-Roma 16:12.
11. Jehofa o ile a šegofatša bjang maiteko a barutiwa?
11 Jehofa o ile a šegofatša ka mo go humilego maiteko a bašomi bao le bašomi ba bangwe ba mafolofolo. Nywageng ya ka tlase ga e 30 ka morago ga gore Jesu a bolele e sa le pele gore go tla ba le bohlatse bjo bo newago ditšhabeng tšohle, Paulo o ngwadile gore “Ebangedi” e ile ya “anêxêlwa babopya bohle ba tlase xa lexodimo.” (Ba-Kolose 1:23) Eupša na bofelo bo ile bja tla? Ee, ka kgopolo e itšego. Bo tletše tshepedišo ya dilo ya se-Juda ka ngwaga wa 70 C.E. ge madira a Roma a be a senya Jerusalema gotee le tempele ya yona. Lega go le bjalo, Jehofa o ikemišeditše gore go newe bohlatse bjo bontši kudu pele ga ge a ka fediša tshepedišo ya dilo ya lefase ka moka la Sathane.
Bohlatse bjo bo Newago Lehono
12. Barutwana ba pele ba Beibele ba ile ba kwešiša bjang taelo ya go dira boboledi?
12 Karolong ya mafelelo ya lekgolo la bo-19 la nywaga, ka morago ga go ata ga bohlanogi bja bodumedi ka nako e telele, borapedi bjo bo sekilego bo ile bja hlongwa lefsa. Barutwana ba Beibele, go etša ge Dihlatse tša Jehofa di be di tsebja bjalo ka nako yeo, ba be ba kwešiša gabotse taelo ya gore ba dire barutiwa lefaseng ka moka. (Mateo 28:19, 20) Ka ngwaga wa 1914, go be go e-na le batho ba 5 100 bao ba bego ba tšea karolo ka mafolofolo modirong wa boboledi, gomme ditaba tše dibotse di be di fihlile dinageng tše 68. Lega go le bjalo, Barutwana bao ba pele ba Beibele ba be ba sa kwešiše ka botlalo seo se bolelwago ke Mateo 24:14. Bofelong bja lekgolo la bo-19 la nywaga, Beibele yeo e nago le ditaba tše dibotse, goba ebangedi, e be e fetoletšwe le go gatišwa ke mekgatlo ya Beibele ka maleme a mantši gomme e abilwe lefaseng ka bophara. Ka gona, ka nywaga-some e sego kae, Barutwana ba Beibele ba ile ba nea mabaka ka gore bohlatse bjo bo yago ditšhabeng bo be bo šetše bo neilwe.
13, 14. Ke kwešišo efe e nepagetšego mabapi le thato le morero wa Modimo yeo e ilego ya tšweletšwa ka tokollong ya Morokami wa 1928?
13 Ganyenyane-ganyenyane, Jehofa o ile a nea batho ba gagwe kwešišo e nepagetšego mabapi le thato ya gagwe le morero wa gagwe. (Diema 4:18) Morokami (wa Seisemane) wa December 1, 1928, o itše: “Na re ka bolela gore go abja ga Beibele go ile gwa phethagatša boporofeta bja mabapi le go bolelwa ga ebangedi ya mmušo? Ga go bonagale go le bjalo! Go sa šetšwe go abja mo ga Beibele, go sa dutše go nyakega gore sehlotswana sa Modimo sa dihlatse mo lefaseng se gatiše dipuku tša go hlalosa [morero] wa Modimo le go etela magae ao go ona go sepedišitšwego Dibeibele tše. Go sego bjalo, batho ba tla tlogelwa ba sa tsebe ka go hlongwa ga mmušo wa Mesia mehleng ya rena.”
14 Tokollo yeo ya Morokami e tšwetše pele ka gore: “Ka 1920, . . . Barutwana ba Beibele ba ile ba kwešiša gabotse boporofeta bja Morena wa rena bjo bo lego go Mateo 24:14. Ke moka ba ile ba lemoga gore ‘ebangedi ye’ yeo e bego e swanetše go bolelwa lefaseng ka moka gore e be bohlatse go ba-Ntle goba go ditšhaba ka moka, e be e se ebangedi ya mmušo wo o sa tlogo tla eupša e be e le ebangedi yeo e bontšhago gore Kgoši Mesia o thomile go buša lefase.”
15. Modiro wa go nea bohlatse o ile wa gola bjang ga e sa le go tloga ka bo-1920?
15 ‘Sehlotswana seo sa dihlatse’ sa bo-1920 ga se sa ka sa dula e le se senyenyane. Nywaga-someng e latetšego, “lešaba le lexolo” la “dinku tše dingwê” le ile la lemogwa gomme la thoma go kgoboketšwa. (Kutollo 7:9; Johane 10:16) Lehono go na le bagoeledi ba ditaba tše dibotse ba 6 613 829 dinageng tše 235 lefaseng. A phethagatšo e makatšago gakaakang ya boporofeta! “Ditaba tše tše dibotse tša mmušo” ga se tša ka tša bolelwa ka tekanyo e kgolo gakaalo. Ga se gwa ka gwa ba le nako le ge e le efe pele mo go bilego le bahlanka ba Jehofa ba bantši gakaakaa bao ba botegago lefaseng.
16. Ke’ng seo se fihleletšwego ngwageng wa go feta wa tirelo? (Bona tšhate e lego go matlakala 27-30.)
16 Lešaba le legolo la Dihlatse le be le swaregile le le gotee ngwageng wa tirelo wa 2005. Go feditšwe diiri tše fetago dimilione tše dikete go tsebatšwa ditaba tše dibotse dinageng tše 235. Go dirilwe maeto a go boela a dimilione, gwa ba gwa swarwa dithuto tša Beibele tše dimilione. Modiro wo o dirilwe ke Dihlatse tša Jehofa, tšeo di gafilego nako le dilo tša tšona ka go rata bakeng sa go boledišana le ba bangwe ka Lentšu la Modimo. (Mateo 10:8) Ka moya wa gagwe o mokgethwa o matla, Jehofa o tšwela pele a matlafatša bahlanka ba gagwe gore ba phethagatše thato ya gagwe.—Sakaria 4:6.
Go Šoma ka Thata Bakeng sa go Nea Bohlatse
17. Batho ba Jehofa ba arabela bjang mantšung a Jesu mabapi le go bolela ditaba tše dibotse?
17 Gaešita le ge go fetile nywaga e ka bago e 2 000 ga e sa le go tloga mola Jesu a boletšego gore ditaba tše dibotse di be di tla bolelwa, phišego yeo batho ba Modimo ba fišegelago modiro ka yona ga se ya ka ya fokotšega. Re a tseba gore ka go kgotlelela ga rena go direng tše dibotse, re bonagatša dika tša Jehofa e lego lerato, kgaugelo le go se fele pelo. Ka go swana le yena, ga re kganyoge gore go be le yo a fedišwago eupša re kganyoga gore batho ba sokologe gomme ba boelane le Jehofa. (2 Ba-Korinthe 5:18-20; 2 Petro 3:9) Di tutuetšwa ke moya wa Modimo, Dihlatse tša Jehofa di tšwela pele ka mafolofolo di tsebatša ditaba tše dibotse go fihla magomong a lefase. (Ba-Roma 12:11) Ka baka leo, batho kae le kae ba amogela therešo gomme ba dira dilo ka go dumelelana le tlhahlo ya Jehofa e lerato. Ela hloko mehlala e sego kae.
18, 19. O ka laodiša diphihlelo dife tša ba bangwe bao ba ilego ba amogela ditaba tše dibotse?
18 Charles e be e le molemi ka bodikela bja Kenya. Ka 1998, o rekišitše dikhilograma tše fetago 8 000 tša motšoko gomme o ile a newa lengwalo la bokgoni leo le bego le mo hlalosa e le Molemi yo a ba Phalago Bohle wa Motšoko. Ka nako yeo, o ile a thoma go ithuta Beibele. Go se go ye kae, o ile a thoma go lemoga gore motho yo a akaretšwago tabeng ya go tšweletša motšoko o ganetšana le taelo ya Jesu ya gore motho a rate moagišani. (Mateo 22:39) Ge a be a phetha ka gore ‘molemi yo a ba phalago bohle wa motšoko’ ge e le gabotse ke ‘mmolai yo a ba phalago bohle,’ Charles o ile a tšhela dibjalo tša gagwe tša motšoko ka mpholo. O ile a tšwela pele go fihlela a ineela le go kolobetšwa gomme ga bjale ke mmulamadibogo wa ka mehla e bile ke mohlanka wa bodiredi.
19 Ga go pelaelo gore Jehofa o šišinya ditšhaba ka bohlatse bjo bo newago lefaseng ka moka, gomme matsaka—batho—a a bo amogela. (Hagai 2:7) Pedro, yo a dulago kua Portugal, o ile a tsenela sekolo sa boruti ge a be a e-na le nywaga e 13. Morero wa gagwe e be e le go ba moromiwa le go ruta ka Beibele. Lega go le bjalo, ka morago ga nakwana, o ile a tlogela sekolo sa boruti ka gobane Beibele e be e rutwa ka sewelo diklaseng tša gagwe. Ka morago ga nywaga e tshelelago, o be a ithutela tša monagano yunibesithing ya kua Lisbon. O be a dula le mmane’agwe, yo e lego yo mongwe wa Dihlatse tša Jehofa, yo a ilego a mo kgothaletša go bala Beibele. Ka nako yeo, Pedro o be a sa kgonthišege gore Modimo o gona, goba go phetha ka gore a swarelwe thuto ya Beibele goba aowa. O ile a bolela le moprofesara wa gagwe wa thuto ya monagano mabapi le go se kgone go dira phetho. Moprofesara yo o ile a bolela gore selo se sengwe seo thuto ya monagano e se rutago ke gore gantši batho bao ba sa kgonego go dira diphetho ba feleletša ka go ikgobatša. Ka nako yeo, Pedro o ile a phetha ka gore a swarelwe thuto ya Beibele. O sa tšwa go kolobetšwa gomme ga bjale le yena o swara dithuto tša Beibele.
20. Ke ka baka la’ng re ka thabišwa ke gore bohlatse bo newa ditšhabeng tšohle ka tekanyo e kgolo gakaakaa?
20 Re sa dutše re sa tsebe tekanyo yeo bohlatse bo tla newago ka yona ditšhabeng, e bile ga re tsebe letšatši le nako yeo bofelo bo tlago go tla ka yona. Seo re se tsebago ke gore e tla ba kgaufsinyane. Re thabela gore go bolelwa ga ditaba tše dibotse ka tekanyo e kgolo gakaalo e fo ba e nngwe ya ditsela tše dintši tšeo di bontšhago gore nako e kgaufsi ya gore Mmušo wa Modimo o tšeele mebušo ya batho legato. (Daniele 2:44) Ge ngwaga o mongwe le o mongwe o dutše o feta, batho ba dimilione ba newa sebaka sa gore ba amogele ditaba tše dibotse, gomme se se tumiša Modimo wa rena, e lego Jehofa. Eka re ka ikemišetša go dula re botega gomme re be gotee le bana babo rena lefaseng ka bophara bao ba swaregilego modirong wa go nea bohlatse ditšhabeng ka moka. Ka go dira bjalo, re tla iphološa gomme ra phološa le bao ba re theetšago.—1 Timotheo 4:16.
Na o a Gopola?
• Ke ka baka la’ng boporofeta bjo bo lego go Mateo 24:14 e le bjo bo lemogegago gakaakaa?
• Ke boiteko bofe bjo Bakriste ba pele ba bo dirilego boboleding, gona ka mafelelo afe?
• Barutwana ba Beibele ba ile ba thoma go kwešiša bjang senyakwa sa gore ba nee bohlatse ditšhabeng ka moka?
• Ke’ng seo se go kgahlago ge o ela hloko modiro wa batho ba Jehofa wa ngwageng o fetilego wa tirelo?
[Dipotšišo tša Thuto]
[Tšhate go letlakala 27-30]
PEGO YA NGWAGA WA TIRELO WA 2005 YA DIHLATSE TŠA JEHOFA LEFASENG KA BOPHARA
(See bound volume)
[Mmapa/Diswantšho go letlakala 25]
Paulo o sepetše dikhilomithara tše dikete nageng le lewatleng a bolela ditaba tše dibotse
[Seswantšho go letlakala 24]
Jehofa o ile a hlahla Petro gore a nee bohlatse go Koronelio le go ba lapa la gagwe