Phihlelo

Go Tseba se se Lokilego le go se Dira

KA GE GO ANEGA HADYN SANDERSON

Jesu o kile a botša baapostola ba gagwe gore: “Ge e ba le tseba dilo tše, le a thaba ge e ba le di dira.” (Johane 13:17) Ee, re ka ba re tseba se se lokilego, eupša ka dinako tše dingwe go thata go se dira! Lega go le bjalo, ka morago ga go phela nywaga ya ka godimo ga e 80, gomme e 40 ya yona ke e feditše ke le tirelong ya boromiwa, ke kgodišegile gore mantšu a Jesu ke a therešo. Go dira seo Modimo a se bolelago, ka kgonthe go a thabiša. E re ke hlalose.

KA 1925, ge ke be ke e-na le nywaga e meraro, batswadi ba-ka ba be ba le gona polelong ya Beibele yeo e bego e swaretšwe toropong ya gabo rena ya Newcastle, kua Australia. Polelo e rego, “Ba Dimilione Bao ba Phelago mo Nakong ye ba ka se ke ba hwa le ka Mohla,” e ile ya kgodiša mma gore o hweditše therešo, gomme o ile a thoma go ba gona ka mehla dibokeng tša Bokriste. Lega go le bjalo, kgahlego ya tate e ile ya fokotšega kapejana. O ile a ganetša tumelo yeo mma a sa tšwago go e hwetša e bile a tšhošetša ka gore o tla sepela ge e ba a sa e tlogele. Mma o be a rata tate gomme a nyaka go boloka lapa le le gotee. Go sa šetšwe seo, o be a tseba gore go kwa Modimo go be go le bohlokwa kudu, ka gona o be a ikemišeditše go dira se se lokilego mahlong a gagwe. (Mateo 10:34-39) Tate o ile a sepela, gomme ka morago ke be ke mmona feela ka sewelo.

Ge ke lebelela morago, ke kgahlwa ke go botegela ga mma Modimo ka go se kwanantšhe. Phetho ya gagwe e ile ya dira gore nna le kgaetšedi’a-ka yo mogolo Beulah re phele bophelo bja go sekamela dilong tša moya bjo bo tletšego ka ditšhegofatšo. Le gona e ile ya re ruta thuto ya bohlokwa—ge re tseba se se lokilego, re swanetše go katanela go se dira.

Go Lekwa Tumelo

Barutwana ba Beibele, go etša ge Dihlatse tša Jehofa di be di bitšwa bjalo ka nako yeo, ba ile ba dira maiteko a magolo a go thuša lapa lešo. Koko o ile a  tla go dula le rena gomme le yena o ile a amogela therešo ya Beibele. Yena le mma e be e le monwana le lenala modirong wa boboledi, moo seriti sa bona le botho bja bona di ilego tša dira gore batho ba ba hlomphe.

Go sa le bjalo, bana babo rena ba godilego ba Bakriste ba ile ba ntlhokomela gomme ba ntlwaetša ka tsela e bohlokwa. Go se go ye kae ke ile ka ithuta go diriša karata ya bohlatse yeo e dirišetšwago go nea batho thero e bonolo ka magaeng a bona. Le gona ke be ke bapala dipolelo tše di gatišitšwego tša Beibele keremafomong e nyenyane e bile ke e-ya go gwanta le bona re apere dipampiri tša go athwa tše di tsebatšago dipolelo tša phatlalatša go phatša setarata se segolo sa toropong. Go be go le thata, ka ge ke be ke tšhaba batho. Lega go le bjalo, ke be ke tseba se se lokilego gomme ke be ke ikemišeditše go se dira.

Ka morago ga go fetša sekolo, ke ile ka thoma go šoma pankeng, e lego mošomo wo o bego o akaretša go ya dipankeng tše dingwe tšeo di lego ka tlase ga ye ke bego ke le go yona go dikologa naga ya New South Wales. Le ge Dihlatse di be di se nene karolong yeo ya naga, tlwaetšo ye ke e hweditšego e ile ya nthuša go boloka tumelo ya-ka e phela. Mma o ile a nngwalela mangwalo a kgothatšago ao a ilego a mmatlafatša moyeng.

Mangwalo ao a ile a nthuša ka nako e swanetšego. Ntwa ya II ya Lefase e be e šetše e thomile, gomme ke ile ka laelwa gore ke yo ingwadiša go tša bohlabani. Molaodi wa panka e be e le motho yo a tsenago kereke yo a fišegago e bile e le molaodi wa tša bohlabani wa tikologong yeo. Ge ke be ke mo hlalosetša ka boema-gare bja-ka bjalo ka Mokriste, o ile a dira gore ke kgethe—go tlogela bodumedi bja-ka goba go tlogela go šoma pankeng! Dilo di ile tša mpefala ge ke be ke itšweletša lefelong la tša bohlabani la go ngwadiša batho la tikologong yeo. Molaodi o be a le gona gomme o ile a ntebelela ka šedi ge ke be ke batamela tafoleng ya go ngwadiša. Ge ke be ke gana go saena dipampiri tša go ingwadiša, bahlankedi ba ile ba galefa. Boemo bo be bo sa kgahliše, eupša ke be ke ikemišeditše go dira se se lokilego. Ka thušo ya Jehofa, ke ile ka tšwela pele ke ikhomoletše gomme ke ikemišeditše go dira se se lokilego. Ka morago, ge ke be ke e-kwa gore bo-mphenyašilo ba bangwe ba be ba nnyaka, ke ile ka paka dilo tša-ka ka go akgofa gomme ka ngwega ka setimela!

Ka morago ga go boela Newcastle, ke ile ka ya tshekong ya molato ke e-na le bana bešo ba bangwe ba šupago bao ba bego ba ganne go tsenela tirelo ya bohlabani. Moahlodi o ile a re ahlolela dikgwedi tše tharo kgolegong moo re bego re šoma mošomo wa kgapeletšo. Le ge go ba kgolegong go be go sa thabiše, go dira se se lokilego go ile gwa tliša ditšhegofatšo. Ka morago ga ge re lokolotšwe, yo mongwe wa bao ke bego ke dula le bona ka seleng, e lego Hlatse-gotee le nna yeo e bitšwago Hilton Wilkinson, o ile a ntaletša gore ke yo šoma le yena lefelong la gagwe la go tšeela dinepe. Ge ke le moo ke ile ka gahlana le motho yo e bego e tla ba mosadi wa-ka, e lego Melody, yo a bego a šoma lefelong leo la go tšeela dinepe e le moamogela-baeng. Kapejana ka morago ga ge ke lokolotšwe, ke ile ka kolobetšwa e le go bontšha boineelo bja-ka go Jehofa.

Pakane ya go Tsenela Tirelo ya Nako e Tletšego

Ka morago ga ge re nyalane, nna le Melody re ile ra bula lefelo la rena la go tšeela dinepe kua Newcastle. Ka moragonyana ga moo re be re e-na le mošomo o montši moo re ilego ra thoma go fokola nameng le moyeng. Mo e nyakilego go ba ka yona nako yeo, Ted Jaracz, yoo ka nako yeo a bego a hlankela ofising ya lekala ya Dihlatse tša Jehofa ya kua Australia gomme ga bjale e lego setho sa Sehlopha se Bušago, o ile a boledišana le rena ka dipakane tša rena tša moya. Ka morago ga poledišano yeo, re ile ra phetha ka go rekiša kgwebo ya rena le go nolofatša bophelo bja rena. Ka 1954 re ile ra reka kharabane e nyenyane, ra hudugela toropong ya Ballarat nageng ya Victoria, gomme ra thoma go hlankela re le babulamadibogo, goba baebangedi ba nako e tletšego.

 Ge re dutše re šoma le phuthego e nyenyane ya Ballarat, Jehofa o ile a šegofatša maiteko a rena. Ka dikgwedi tše 18, palo ya batho bao ba bego ba e-ba gona dibokeng e ile ya oketšega go tloga go 17 go ya go 70. Ke moka re ile ra amogela taletšo ya gore re tsenele bodiredi bja bosepedi, goba modiro wa tikologo, nageng ya Australia Borwa. Nywageng e meraro e latetšego, re ile ra thabela go etela diphuthego motseng wa Adelaide le ditikologong tše di tšweletšago beine le dinamune tšeo di bapilego le Noka ya Murray. Maphelo a rena a be a fetogile e le ruri! Re be re thabetše go hlankela le bana babo rena le dikgaetšedi ba lerato. Ruri e be e le mo go putsago go dira se re bego re tseba gore se lokile!

Kabelo ya Boromiwa

Ka 1958 re ile ra tsebiša ofisi ya lekala ya Australia gore re ikemišeditše go ya Kopanong ya Ditšhaba-tšhaba ya “Thato ya Modimo” kua New York City bofelong bja wona ngwaga woo. E ile ya araba ka go re romela difomo tša kgopelo ya go yo tsena sekolo sa boromiwa sa Gilead kua United States. Ka ge re be re le bogareng bja nywaga ya rena ya bo-30, re be re nagana gore re šetše re fetile nywaga ya go ya Gilead. Lega go le bjalo, re ile ra romela difomo tša rena tša kgopelo gomme ra laletšwa gore re be gona sehlopheng sa bo-32. Bogareng bja dithuto, re ile ra amogela kabelo ya rena ya boromiwa—go ya India! Le ge mathomong re be re tšhogile, re be re nyaka go dira se se lokilego gomme re ile ra amogela kabelo ya rena ka lethabo.

Re ile ra sepela ka sekepe gomme ra fihla Bombay (yeo ga bjale e lego Mumbai) mesong e mengwe ka 1959. Bašomi ba makgolo ba be ba robetše gohle kua boema-kepeng. Go be go na le monkgo wa go ferelela. Ge letšatši le hlaba, le ile la dira gore re tsebe seo re tlago go lebeletšana le sona. Ga se ra ka ra kwa phišo e bjalo! Banyalani ba baromiwa e lego Lynton le Jenny Dower, bao ba kilego ba bula madibogo le rena kua Ballarat, ba ile ba re amogela. Ba ile ba re iša Legaeng la Bethele la India, leo le bego le le phapošing ya godimo e pitlaganego yeo e lego kgaufsi le bogare bja toropo. Legaeng le go be go dula bašomi ba Bethele ba baithapi ba tshelelago. Ngwanabo Rena Edwin Skinner yo a hlanketšego India e le moromiwa ga e sa le go tloga ka 1926, o ile a re eletša gore re reke mekotla e megolo ya go rwala merwalo, pele re e-ya kabelong ya rena. Mekotla ye e be e bonwa kudu ditimeleng tša India gomme e ile ya re thuša kudu maetong a rena ao re ilego ra a sepela ka morago.

Ka morago ga go sepela matšatši a mabedi ka setimela, re ile ra fihla kabelong ya rena kua Tiruchchirappalli, e lego toropo e lego nageng ya ka borwa ya Madras (yeo ga bjale e bitšwago Tamil Nadu). Moo, re ile ra tlatša babulamadibogo ba bararo ba kgethegilego ba ma-India bao ba bego ba nea bohlatse go badudi ba 250 000. Maemo a bophelo a be a le bonolo. Ka nako e nngwe, re be re šaletšwe ke diranta tše 26 ka dipotleng tša rena. Eupša ge tšhelete yeo e be e fela, Jehofa ga se a ka a re lahla. Motho yo mongwe yo a bego a ithuta Beibele o ile a re adima tšhelete ya go hira legae le le swanetšego bakeng sa go swarela diboka go lona. Ka nako e nngwe ge re be re feletšwe ke dijo, moagišani ka botho o ile a re tlišetša nama yeo a e apeilego ka kheri. E be e le bose, eupša e be e baba kudu moo e ilego ya ntshwariša sethekhu!

Tšhemong

Gaešita le ge batho ba bangwe kua Tiruchchirappalli ba be ba bolela Seisemane, bontši bja bona ba be ba bolela se-Tamil. Ka gona, re ile ra leka ka thata go ithuta thero e bonolo ka leleme leo bakeng sa go e diriša tirelong ya tšhemo. Re ile ra hlompšha ke batho ba bantši ba lefelong leo.

Re be re tloga re thabela go dira bodiredi bja ntlo le ntlo. Ma-India ka tlhago ke batho ba go amogela baeng, gomme ba bantši ba bona ba be ba re laletša gore re tlo nwa dilapološi. Ka ge thempheretšha gantši e be e e-ba 40°C, re be re tloga re thabela mokgwa wa bona wa go amogela baeng. E be e le botho go boledišana le batho ka ditaba tša bona pele ga ge re ka rola molaetša wa rena. Beng ba dintlo gantši ba be ba botšiša nna le mosadi wa-ka gore: “Le tšwa kae? Na le na le bana? Ke ka baka la’ng le se nabo?” Ge ba e-kwa se, gantši ba be ba ithapela go re iša go matwetwe! Lega go le bjalo, dipoledišano tšeo di ile tša re thuša go itsebiša le go hlalosa bohlokwa bja modiro wa rena wo o theilwego Beibeleng.

Batho ba bantši bao re bego re dira boboledi go bona ba be ba le bodumeding bja Bohindu—e lego ditumelo tšeo di fapanago kudu le tša Bokriste. Go e na le go ngangišana ka go se kwešišege ga difilosofi tša Bohindu, re be re fo bolela ditaba tše dibotse tša Mmušo wa Modimo—ka mafelelo a mabotse. Ka dikgwedi tše tshela, batho ba ka bago 20 ba  ile ba thoma go ba gona dibokeng legaeng la rena la boromiwa. Yo mongwe wa batho ba e be e le moentšineare wa tša meago yo a bitšwago Nallathambi. Yena le morwa wa gagwe Vijayalayan, ka morago ba ile ba thuša batho ba ka bago 50 gore e be bahlanka ba Jehofa. Vijayalayan le yena o ile a hlankela ka nakwana lekaleng la India.

Go Dula re le Leetong

Re be re e-na le dikgwedi tša ka tlase ga tše tshelelago re le India ge ke be ke kgopelwa gore ke hlankele ke le molebeledi wa selete wa mathomo wa sa ruri nageng ye. Se se be se akaretša go sepela India ka moka, go rulaganya dikopano le go šoma gotee le dihlopha tše senyane tše di bolelago maleme a sa swanego. E be e le modiro o thata kudu. Re ile ra paka diaparo tša rena le ditlabakelo ka dikgwedi tše tshelelago ka gare ga ditheranka tše tharo le ka gare ga mekotla ya go rwala merwalo yeo re bego re dula re e diriša gomme ra tloga motseng wa Madras (yeo ga bjale e lego Chennai) ka setimela. Ka ge tšhemo yeo e bego e šongwa ke selete se e be e le ya bogolo bja dikhilomithara tše 6 500, re be re dula re le leetong. Ka nako e nngwe, re ile ra fetša kopano toropong ya ka borwa ya Bangalore ka Sontaga. Ke moka ra ya Darjeeling yeo e lego ka leboa thitong ya dithaba tša Himalaya bakeng sa go hlankela kopanong e nngwe gape bekeng e latelago. Leeto la go ya Darjeeling le be le akaretša go sepela dikhilomithara tše 2 700 le go fetoša ditimela ka makga a mahlano mo tseleng.

Maetong a rena a mathomo, re ile ra thabela go bontšha batho filimi e rego The New World Society in Action. Filimi ye e be e tlwaelanya batho le bogolo bja mokgatlo wa Jehofa wa lefaseng gotee le modiro wa wona. Gantši, batho ba makgolo ba be ba e-ba gona go tlo bogela. Ka nako e nngwe, re ile ra bontšha batho bao ba bego ba kgobokane ka thoko ga tsela filimi ye. Ge filimi e dutše e tšwela pele, maru a pula a ile a thiba gomme kapejana a tla thokong tša rena. Ka ge lešaba le lengwe le kile la tsoša mpherefere ge filimi e be e kgaosetšwa, ke ile ka phetha ka go tšwela pele ke ba bontšha yona eupša ka dira gore e bontšhe ka lebelo. Ka mahlatse, filimi e ile ya fela pele e ka kgaosetšwa ge marothi a mathomo a pula a thoma go rotha.

Nywageng e latetšego, nna le Melody re ile ra ya dikarolong tše dintši tša India. Ka ge tikologo e nngwe le e nngwe e be e e-na le dijo tša yona tša moswana-noši, diaparo, polelo le ponagalo ya naga, go be go le bjalo ka ge eka re tloga nageng e nngwe go ya go e nngwe. Ruri go na le go se swane mo go kgahlišago tlholong ya Jehofa! Go bjalo le ka diphoofolo tša naga tša India. Ka nako e nngwe, ge re be re hlomile ditente lešokeng la Nepal, re ile ra bona nkwe e kgolo kudu. E be e le phoofolo e kgahlišago. Go e bona go ile gwa matlafatša kganyogo ya rena ya go nyaka go ba Paradeiseng, moo mafelelong go tla bago le khutšo magareng ga batho le diphoofolo.

Diphetogo Mokgatlong

Mehleng yeo ya pejana, bana babo rena ba kua India ba be ba swanetše go latela kgaufsi dithulaganyo tša mokgatlo wa Jehofa. Diphuthegong tše dingwe, banna ba be ba dula ka lehlakoreng le tee ka phapošing yeo go swarelwago seboka go yona mola basadi ba be ba dula ka lehlakoreng le lengwe. Gantši diboka di be di sa thome ka nako. Tikologong e nngwe, go be go letšwa tšhipi e nago le  modumo o mogolo e le gore bagoeledi ba Mmušo ba tle dibokeng. Ditikologong tše dingwe, bagoeledi ba be ba e-tla ka o tee ka o tee ka go lebelela nako ka letšatši. Dikopano le maeto a balebeledi ba basepedi di be di sa be gona ka mehla. Bana babo rena ba be ba ikemišeditše go dira se se lokilego, eupša ba be ba nyaka tlwaetšo.

Ka 1959, mokgatlo wa Jehofa o ile wa hloma Sekolo sa Bodiredi sa Mmušo. Lenaneo le la tlwaetšo lefaseng ka bophara le ile la thuša balebeledi ba tikologo, babulamadibogo ba kgethegilego, baromiwa le bagolo ba phuthego gore ba phethe boikarabelo bja bona bja Mangwalo ka katlego. Ge sekolo se be se thoma kua India ka December 1961, ke ile ka ba mohlahli wa klase. Ganyenyane-ganyenyane, mafelelo a tlwaetšo yeo a ile a hola diphuthego nageng ka moka, gomme di ile tša tšwela pele ka go akgofa. Ge bana babo rena ba šetše ba tseba se se lokilego, moya wa Modimo o ile wa ba tutueletša go se dira.

Le gona, dikopano tše dikgolo di ile tša kgothatša bana babo rena le go ba dira gore ba be boteeng. E kgahlišago kudu go dikopano tše e be e le Kopano ya Ditšhaba-tšhaba ya “Ditaba tše Dibotse tša Neng le Neng” yeo e bego e swaretšwe kua New Delhi ka 1963. Dihlatse tša India ka moka di ile tša sepela dikhilomithara tše dintši gore di be gona kopanong yeo, gomme tše dintši di ile tša dira bjalo ka go diriša tšhelete ya tšona ka moka yeo di bego di e bolokile. Ka ge baemedi ba 583 ba tšwago dinageng tše dingwe tše 27 le bona ba be ba le gona, e be e le ka lekga la pele Dihlatse tša tikologong di gahlana le bana babo rena ba bantši ba etilego gaešita le go gwerana le bona.

Ka 1961, nna le Melody re ile ra laletšwa gore re be karolo ya lapa la Bethele kua Bombay, moo ka morago ke ilego ka hlankela ke le setho sa Komiti ya Lekala. Ditokelo tše dingwe di ile tša latela. Ka nywaga e mentši, ke ile ka hlankela ke le molebeledi wa diofisi tša makala dikarolong ka moka tša Asia le Bohlabela bja Magareng. Ka ge modiro wa boboledi o be o thibetšwe go tše dintši tša dinaga tše, bagoeledi ba tikologong ba be ba swanetše go ba “šedi bjalo ka dinoga, fela [e be] ba se nago molato bjalo ka maeba.”—Mateo 10:16.

Katološo le Diphetogo

Ka 1959 ge re be re sa tšo fihla India la mathomo, go be go e-na le bagoeledi ba 1 514 ba mafolofolo nageng. Lehono, palo yeo e oketšegile go fihla ka godimo ga 24 000. E le gore re kgone go lebeletšana ka katlego le kgolo ye, re ile ra hudugela meagong e mefsa ya Bethele ka makga a mabedi ka gare ga toropo ya Bombay goba kgaufsi le yona. Ke moka ka March 2002, lapa la Bethele le ile la huduga gape—ga bjale le ile la hudugela meagong e mefsa yeo e agilwego kgaufsi le Bangalore, ka borwa bja India. Ga bjale, ditho tša Bethele tše 240 di dula meagong ye ya sebjale-bjale gomme tše dingwe tša ditho tšeo di fetolela dipuku tše di theilwego Beibeleng ka maleme a 20.

Gaešita le ge nna le Melody re be re fagahletše go hudugela Bangalore, go fokola mmeleng go ile gwa re gapeletša gore re boele Australia ka 1999. Ga bjale re hlankela re le ditho tša lapa la Bethele kua Sydney. Gaešita le ge re tlogile India, lerato leo ka lona re ratago bagwera ba rena ba rategago le bana ba rena ba moya nageng yeo le sa dutše le matlafala. Ruri re thabela go amogela mangwalo a tšwago go bona!

Ge re lebelela morago nywageng ya ka godimo ga e 50 re le tirelong ya nako e tletšego, nna le Melody re ikwa re šegofaditšwe kudu. Pele re be re šoma go boloka diswantšho tša batho dinepeng, eupša go šoma go boloka batho ba phela kgopolong ya Modimo e be e le kgetho e kaone-kaone. A diphihlelo tše dibotse gakaakang tšeo re bilego le tšona ka go dira phetho ya go etiša thato ya Modimo pele bophelong! Ee, go dira seo Modimo a rego se lokile ka kgonthe go a thabiša!

[Mebapa/Seswantšho go letlakala 15]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

INDIA

New Delhi

Darjeeling

Bombay (Mumbai)

Bangalore

Madras (Chennai)

Tiruchchirappalli

[Diswantšho go letlakala 13]

Hadyn le Melody ka 1942

[Seswantšho go letlakala 16]

Lapa la Bethele kua India, ka 1975