“Tšwela Pele o re Anegela!”

KUA Nezlobnaya, Russia, sehlopha sa barutwana sa go ithuta dipuku sekolong se se phagamego se be se ithuta dipuku tša mongwadi wa mo-Russia e lego Mikhail Bulgakov. Gare ga dipuku tšeo go be go e-na le padi yeo e bego e bolela ka Jesu Kriste ka lenyatšo, mola e hlalosa Sathane e le mogale. Ka morago ga go ahla-ahla puku yeo le klase, morutišigadi o ile a nea barutwana molekwana o tšwago ka pading ye. Lega go le bjalo, yo mongwe wa barutwana yo a bitšwago Andrey, wa nywaga e 16, yo e lego Hlatse ya Jehofa, ka botho o ile a kgopela gore a se ngwale molekwana ka lebaka la gore letswalo la gagwe le be le sa mo dumelele go ithuta dipuku tše swanago le tšeo. Go e na le moo o ile a kgopela go ngwala taodišo yeo a bego a tla hlalosa kwešišo ya gagwe ka Jesu Kriste. Morutišigadi o ile a dumela.

Ka taodišong ya gagwe, Andrey o hlalositše gore le ge a hlompha dikgopolo tša ba bangwe, o lemogile gore tsela e kaone-kaone ya go ithuta ka Jesu ke go bala e nngwe ya dipego tše nne tša Ebangedi. Ka go dira bjalo, “le tla ithuta ka Jesu, bophelo le dithuto tša gagwe ka ge di hlaloswa ke dihlatse tše bonego ka mahlo.” Andrey o okeditše ka gore: “Selo se sengwe sa go tshwenya ke tsela yeo Sathane a hlaloswago ka yona. Ba bangwe ba ka kgahlwa ke go bala puku yeo go yona Sathane e lego mogale, eupša nna ga e nkgahle.” O ile a hlalosa gore Sathane ge e le gabotse ke sebopiwa sa moya se kgopo le se matla seo se hlanogetšego Modimo, sa bakela batho bobe, bošula le matshwenyego. Andrey o phethile taodišo ya gagwe ka gore: “Ga ke nagane gore ke tla holwa ke go bala padi ye. Ge e le gabotse, ga ke nyatše Bulgakov. Eupša go ya ka nna, go ka ba kaone go bala Beibele gore ke tsebe therešo ka bophelo bja Jesu Kriste.”

Morutišigadi o be a kgahlilwe ke taodišo ye mo a ilego a mo kgopela gore a ba hlalosetše ka Jesu Kriste. Andrey o ile a dumela ntle le go dika-dika. Nakong e latetšego ge klase e ithuta puku, Andrey o ile a bala pego ya gagwe ka pele ga klase ka moka. O ile a hlalosa gore ke ka baka la eng a dumela gore Jesu ke motho yo a phagamego yo a kilego a phela. Le gona o ile a bala Beibele kgaolong ya Mateo yeo e bolelago ka lehu la Jesu. Ka ge nako yeo a bego a e abetšwe e be e fela, Andrey o ile a rata go phetha, eupša barutwana-gotee le yena ba ile ba mo kgopela, ba re: “Tšwela pele o re anegela! Go ile gwa direga’ng?” Ka gona, o ile a tšwela pele a ba balela ka go tsošwa ga Jesu ka pegong ya Mateo.

Ge Andrey a feditše, barutwana-gotee le yena ba ile ba mmotšiša dipotšišo tše dintši ka Jesu le Jehofa. Andrey o re: “Ke be ke rapetše gore Jehofa a mphe bohlale, gomme o ile a araba thapelo ya-ka. Ke ile ka kgona go araba dipotšišo tša bona ka moka!” Ka morago ga klase, Andrey o ile a nea morutišigadi wa gagwe puku ya Motho yo a Phagamego Kudu yo a Kilego a Phela, * yeo a e amogetšego ka lethabo. Andrey o boletše gore: “O ile a nnea dintlha tša godimo bakeng sa taodišo ya-ka, a ba a ntheta ge ke se na dihlong ka tumelo ya-ka. O ile a ba a bolela gore go na le moo tumelo ya gagwe e swanago le ya-ka.”

Andrey o thabišwa ke gore o ile a latela letswalo la gagwe leo le hlahlilwego ka Beibele, a se dumele go bala dipuku tšeo di hlomphollago Jehofa le Morwa wa gagwe, Jesu Kriste. Go ema a tiile bjalo ga se gwa mo šireletša feela dithutong tšeo e sego tša Mangwalo eupša gape go butše tsela e kgahlišago ya go boledišana le ba bangwe ka ditherešo tša bohlokwa tša Beibele.

[Mongwalo wa ka tlase]